விஜய் தற்போது பிரபல தெலுங்கு இயக்குநர் வம்சி பைடிப்பள்ளி இயக்கும் 'வாரிசு' படமும் வினோத் இயக்கத்தில் அஜித்தின் நடிப்பில் துணிவு படமும் பொங்கல் ரிலீசுக்கு காத்திருக்கிறது. தமிழில் உச்ச நட்சத்திரமாக இருக்கும் இரண்டு பெரிய ஹீரோக்களின் படங்கள் ஒரே சமயத்தில் 8 ஆண்டுகள் கழித்து வெளியாகவுள்ளதால் ரசிகர்கள் மத்தியில் பெரும் எதிர்பார்ப்பு நிலவி வருகிறது.

'வாரிசு' மற்றும் 'துணிவு' ஆகிய இரண்டு படங்களுக்கும் சமமான அளவில் திரையரங்குகள் ஒதுக்கப்படுவதாக உதயநிதி ஸ்டாலின் முன்னதாக தெரிவித்திருந்த நிலையில், வாரிசு பட தயாரிப்பாளர் தில்ராஜு, "தமிழ்நாட்டில் விஜய்தான் முன்னணி ஹீரோ. அதனால் வாரிசு படத்திற்கு அதிக திரையரங்குகள் ஒதுக்க வேண்டும். இது தொடர்பாக உதயநிதியை சந்தித்துப் பேசப் போகிறேன்" என ஒரு பேட்டியில் பேசியிருந்தார்.  இது சர்ச்சையை ஏற்படுத்திய நிலையில் பல பிரபலங்களும் இது தொடர்பாக கருத்து தெரிவித்து வருகின்றனர்.

நடிகர் விஜய், அஜித் ஆகியோரை வைத்து படம் இயக்கிய பேரரசுவிடம் செய்தியாளர்கள் இது குறித்து கேள்வி எழுப்பினர். அதற்கு பதிலளித்த பேரரசு, ''எப்பொழுதுமே எம்ஜிஆர் சிவாஜி, ரஜினி கமல், விஜய் அஜித் அவர்களை ஈக்குவலாகத்தான் பார்க்கிறோம். ஒருவருக்கொருவர் ஈக்குவலாக இருந்தால்தான் அந்த தரத்தில் வைப்பார்கள். விஜய்க்கு வேறு ஒரு ஹீரோவை வைக்கமாட்டேன் என்கிறார்கள். தமிழ் மக்கள் எம்ஜிஆர்க்கு இணையாக சிவாஜியை வைத்தார்கள். ரஜினிக்கு இணையாக கமலை வைத்தார்கள். இப்பொழுது விஜய் அஜித்தை நாம் ஈக்குவலாக வைத்துவிட்டோம்.

இப்படி சொல்வது ஒரு போரை உருவாக்கும். இரண்டு படங்களும் ஒரே நேரத்தில் ரிலீஸ் ஆவதே மோதலாக இருக்கிறது. இதில் இவர் பற்ற வைக்கிறார். என்னைப் பொறுத்தவரை இரண்டு பேரும் ஈக்குவல்தான். இரண்டு படமும் சமமாக பெரிய வெற்றி அடைய வேண்டும். எந்தப் படம் வெற்றி அடையுதோ அந்தப் படம்தான் நம்பர் ஒன். ஹீரோவை பார்க்கக்கூடாது. வாரிசு துணிவை விட பெரிய வெற்றி அடைந்தால் வாரிசு நம்பர் ஒன். வாரிசை விட துணிவு வெற்றியடைந்தால் துணிவு நம்பர் ஒன். படம்தான் நம்பர் ஒன். ஹீரோக்கள் சமம்தான்'' என்றார்.

புதுச்சேரி மாநிலம், துத்திபட்டில் கிரிக்கெட் சங்கத்துக்குச் சொந்தமான மைதானங்கள் உள்ளது. இங்கு நீர்நிலைகளை ஆக்கிரமிப்பு செய்ததாக எழுந்த குற்றச்சாட்டைத் தொடர்ந்து முன்னாள் ஆளுநர் கிரண்பேடி, மைதானத்துக்கு சீல் வைக்க உத்தரவிட்டார். இந்த தடைகள் நீக்கப்பட்டு இப்போது விளையாட்டு போட்டிகள் நடத்தப்பட்டு வருகிறது. 

மைதானம் மூடப்பட்டபோது முத்தரையர்பாளையத்தில் உள்ள இளங்கோவடிகள் அரசு பள்ளி மைதானத்தில் கிரிக்கெட் பயிற்சி அளிக்கப்பட்டது. அப்போது பயிற்சியாளர் தாமரைக்கண்ணன் தனியார் பள்ளியில் 12- ஆம் வகுப்பு படித்து வரும் 16 வயது சிறுமியிடம் பாலியல் சீண்டலில் ஈடுபட்டு வந்ததாகக் கூறப்படுகிறது. 

உடனே பாதிக்கப்பட்ட சிறுமி கிரிக்கெட் சங்க நிர்வாகிகளிடம் புகார் செய்துள்ளார். ஆனால் அவர்கள் பயிற்சியாளரிடம் மோதல் வேண்டாம் என கூறியுள்ளனர். மேலும் இவ்விவகாரத்தில் உரிய நடவடிக்கை எடுக்கவில்லை எனவும் தெரிகிறது. 

இதையடுத்து சிறுமி புதுச்சேரி குழந்தைகள் நலக்குழுவிடம் புகார் செய்தார். அதன்பேரில் குழந்தைகள் நலக்குழுவினர் விசாரணை நடத்தினர். அதில் பள்ளி சிறுமியிடம் பயிற்சியாளர் பாலியல் சீண்டலில் ஈடுபட்டதும், அதன் மீது கிரிக்கெட் சங்க நிர்வாகிகள் நடவடிக்கை எடுக்காததும் உறுதியானது. 

இதையடுத்து, அவர்கள் மீது நடவடிக்கை எடுக்கக்கோரி குழந்தைகள் நலக்குழுவின் தலைவர் சிவசாமி  மேட்டுப்பாளையம் காவல் நிலையத்தில் புகார் அளித்தார். புகாரின் அடிப்படையில் பயிற்சியாளர் தாமரைக்கண்ணன் மீது பாலியல் சீண்டல், மற்றொரு பயிற்சியாளர் ஜெயக்குமார், கிரிக்கெட் சங்கத் தலைவர் தாமோதரன், செயலாளர் வெங்கட், கிரிக்கெட் அணி கேப்டன் ரோஹித் உட்பட 5 பேர் மீது போக்சோ பிரிவின் கீழ் வழக்குப்பதிவு செய்த காவல்துறையினர், தலைமறைவானவர்களை வலை வீசி தேடி வருகின்றனர். 

இதில் கிரிக்கெட் கிளப் தலைவர் தாமோதரன் மகன் ரோஹித் பிரபல திரைப்பட இயக்குநர் ஷங்கரின் மருமகன் ஆவார். இவருக்கு சமீபத்தில்தான் திருமணம் நடந்தது  குறிப்பிடத்தக்கது.