இந்தியாவில் கோவாக்சின் மற்றும் கோவிஷீல்ட் ஆகிய தடுப்பூசிகள் முழு அளவில் பயன்பாட்டில் உள்ளன. ரஷ்யத் தடுப்பூசியான ஸ்புட்னிக் v தடுப்பூசிக்கு இந்தியாவில் ஒப்புதல் அளிக்கப்பட்டுவிட்டாலும், அதன் வர்த்தக ரீதியிலான விநியோகம் இன்னும் தொடங்கப்படவில்லை. இதனால் பெரு நகரங்களில் உள்ள சில தனியார் மருத்துவமனைகளில் மட்டுமே ஸ்புட்னிக் v தடுப்பூசி தற்போது செலுத்தப்பட்டு வருகிறது.
இவ்வாறு செலுத்தப்படும் ஸ்புட்னிக் v தடுப்பூசிகள், ரஷ்யாவில் தயாரிக்கப்பட்டு இந்தியா கொண்டுவரப்படுகிறது. இந்நிலையில் இந்தியாவில் தயாரிக்கப்பட்டு வரும் ஸ்புட்னிக் v தடுப்பூசிகள் எப்போது பயன்பாட்டிற்கு வரும் என்பது குறித்த தகவலை, அத்தடுப்பூசியை இந்தியாவில் தயாரித்து வரும் டாக்டர் ரெட்டி'ஸ் நிறுவனம் வெளியிட்டுள்ளது.
இதுதொடர்பாக டாக்டர் ரெட்டி'ஸ் நிறுவனத்தின் செய்தி தொடர்பாளர், "31.5 லட்சம் காம்போனென்ட் - 1 ஸ்புட்னிக் v டோஸ்களையும், 4.5 லட்சம் காம்போனென்ட் - 2 ஸ்புட்னிக் v டோஸ்களையும் இதுவரை நாம் பெற்றுள்ளோம். விநியோகத்தை அதிகரிக்க ரஷ்ய நேரடி நிதியத்துடன் நாங்கள் நெருக்கமாக பணியாற்றி வருகிறோம். உள்நாட்டில் தயாரிக்கப்பட்ட ஸ்புட்னிக் v தடுப்பூசி டோஸ்கள் வரும் செப்டம்பர் - அக்டோபர் கால அளவில் பயன்பாட்டிற்கு வரலாம்" எனக் கூறியுள்ளார்.
ஸ்புட்னிக் v தடுப்பூசி விரைவில் அரசு தடுப்பூசி மையங்களிலும் செலுத்தப்படும் என மத்திய அரசின் கரோனா பணிக்குழு தலைவர் என்.கே.அரோரா கடந்த மாதம் தெரிவித்திருந்தது குறிப்பிடத்தக்கது.
- "எல்லாருமே பார்ப்பீங்க" - விவரிக்கும் 'கூச முனுசாமி வீரப்பன்'
- "அதான் அடிச்சு தூக்குனேன்" - கூலாக சொன்ன கூச முனுசாமி வீரப்பன்
