Skip to main content

லக்கிம்பூர் வன்முறை; வெளியான தடய அறிவியல் அறிக்கை- இணையமைச்சர் மகனுக்கு அதிகரிக்கும் சிக்கல்!

Published on 09/11/2021 | Edited on 09/11/2021

 

ASHISH MISRA

 

உத்தரப்பிரதேச மாநிலம் லக்கிம்பூரில் போராட்டத்தில் ஈடுபட்டிருந்த விவசாயிகள், மத்திய உள்துறை இணை அமைச்சர் அஜய் மிஸ்ராவின் மகன் ஆஷிஸ் மிஸ்ராவுக்கு கறுப்புக்கொடி காட்ட முயன்றனர். அப்போது ஆஷிஸ் மிஸ்ராவின் கார் மோதியதில் 4 விவசாயிகள் இறந்ததாகக் கூறப்படுகிறது. மேலும் ஆஷிஸ் மிஸ்ரா அந்த சமயத்தில் துப்பாக்கியால் சுட்டதாகவும் கூறப்படுகிறது. இதனையடுத்து, விவசாயிகள் போராட்டத்தில் வன்முறை வெடித்தது. இந்த வன்முறையில் பத்திரிகையாளர் ஒருவரும் பாஜகவை சேர்ந்த மூவரும் உயிரிழந்தனர்.

 

இந்த வன்முறை சம்பவம் தொடர்பாக ஆஷிஸ் மிஸ்ராவும், அவரது அவருடைய ஆதரவாளர்கள் சிலரும் கைது செய்யப்பட்டுள்ளனர். மேலும் இந்த வன்முறை தொடர்பாக விசாரணை நடத்தி வரும் உச்சநீதிமன்றம், இந்த வழக்கு விசாரணை குறித்து உத்தரப்பிரதேச அரசு மீதும், காவல்துறை மீதும் கடும் அதிருப்தி தெரிவித்துள்ளதோடு, வழக்கின் விசாரணையை கண்காணிக்க உயர்நீதிமன்ற நீதிபதியை நியமிப்பது குறித்து ஆலோசித்து வருகிறது.

 

இதற்கிடையே ஆஷிஸ் மிஸ்ரா மற்றும் அவரது நண்பர் அங்கித் மிஸ்ரா ஆகியோரின் உரிமம் பெற்ற துப்பாக்கியைக் கைப்பற்றப்பட்டு தடயவியல் பரிசோதனைக்காக அனுப்பப்பட்டிருந்தது. இந்தநிலையில் தடய அறிவியல் ஆய்வகம் தனது ஆய்வு அறிக்கையில், ஆஷிஸ் மிஸ்ரா மற்றும் அங்கித் மிஸ்ரா ஆகிய இருவரின் துப்பாக்கிகளிலிருந்து தோட்டாக்கள் சுடப்பட்டதை உறுதி செய்துள்ளது. இந்த அறிக்கை உச்சநீதிமன்றத்தில் சமர்ப்பிக்கப்படவுள்ளது.

 

தனது மகன் வன்முறை நிகழ்ந்த இடத்தில் இல்லை எனக் கூறி வந்த நிலையில், தடய அறிவியல் ஆய்வகத்தின் அறிக்கை அவருக்கும் அவரது மகனுக்கும் சிக்கலை ஏற்படுத்தியுள்ளது. மேலும் இந்த அறிக்கையால் ஆஷிஸ் மிஸ்ரா மீதான பிடி இறுகும் எனக் கருதப்படுகிறது.

 

 

 

சார்ந்த செய்திகள்

Next Story

பாலியல் வன்கொடுமை செய்து தூக்கிலிடப்பட்ட சிறுமிகள்

Published on 15/09/2022 | Edited on 15/09/2022

 

lakhimpur kheri case; 2 girls passed away

 

உத்திர பிரதேசம் மாநிலத்தில் பட்டியலின சமூகத்தை சேர்ந்த 2 சிறுமிகள் பாலியல் வன்கொடுமை செய்யப்பட்டு தூக்கிலிடப்பட்ட சம்பவம் பெரும் கொந்தளிப்பை ஏற்படுத்தியுள்ளது.

 

உத்திர பிரதேசம் மாநிலம் லக்கிம்பூர் கேரி மாவட்டத்தில் சிறுமிகள் இருவரின் உடல் கரும்புத் தோட்டத்தில் உள்ள மரத்தில் தூக்கில் தொங்கியது. அவர்களை அருகில் உள்ள கிராமத்தை சேர்ந்த இளைஞர்கள் பாலியல் வன்கொடுமை செய்து கொலை செய்துவிட்டதாக சிறுமிகளின் குடும்பத்தினர் குற்றம் சாட்டினர். இந்த கொலையை தற்கொலை போல சித்தரிக்க முயலுவதாக புகார் எழுப்பிய குடும்பத்தினர் கொலை செய்தவர்களை கண்டுபிடித்து கைது செய்ய வலியுறுத்தி போராட்டம் நடத்தினர். 

 

சிறுமிகளின் உடலை கைப்பற்றி பிரேத பரிசோதனைக்கு அனுப்பிய போலீசார் வழக்கு பதிவு செய்து தொடந்து விசாரணை செய்து வருகின்றனர். பாலியல் வன்கொடுமை மற்றும் கொலை என இரு பிரிவுகளின் கீழ் வழக்கு பதிவு செய்த போலீசார் இது தொடர்பாக 6 பேரை கைது செய்துள்ளனர். 

 


 

Next Story

லக்கிம்பூர் கலவரம்: மத்திய அமைச்சர் மகன் விவகாரத்தில் அதிரடி காட்டிய உச்சநீதிமன்றம் 

Published on 18/04/2022 | Edited on 18/04/2022

 

Supreme Court cancels bail of Ashish Mishra

 

கடந்த ஆண்டு உத்தரப்பிரதேச மாநிலம் லக்கிம்பூரில் போராட்டத்தில் ஈடுபட்டிருந்த விவசாயிகள், மத்திய உள்துறை இணை அமைச்சர் அஜய் மிஸ்ராவின் மகன் ஆஷிஸ் மிஸ்ராவுக்கு கறுப்புக்கொடி காட்ட முயன்றனர். அப்போது ஆஷிஸ் மிஸ்ராவின் கார் மோதியதில் 4 விவசாயிகள் பலியானர். மேலும், ஆஷிஸ் மிஸ்ரா அந்த சமயத்தில் துப்பாக்கியால் சுட்டதாகவும் கூறப்படுகிறது. இதனையடுத்து, விவசாயிகள் போராட்டத்தில் வன்முறை வெடித்தது. இந்த வன்முறையில் பத்திரிகையாளர் ஒருவரும் பாஜகவைச் சேர்ந்த மூவரும் உயிரிழந்தனர்.

 

இந்த வழக்கில் கைது செய்யப்பட்டிருந்த ஆஷிஸ் மிஸ்ராவுக்கு அலகாபாத் உயர்நீதிமன்றம், பிப்ரவரி 10ஆம் தேதி ஜாமீன் வழங்கியது. இதை எதிர்த்து பாதிக்கப்பட்டவர்கள் குடும்பத்தினர் தரப்பில் உச்சநீதிமன்றத்தில் மேல்முறையீடு செய்யப்பட்டது. இந்த வழக்குகளை உச்ச நீதிமன்றத்தின் தலைமை நீதிபதி என்.வி.ரமணா தலைமையிலான அமர்வு விசாரித்து வந்த நிலையில், ஆஷிஸ் மிஸ்ராவுக்கு வழங்கப்பட்ட ஜாமீனை ரத்து செய்து உச்ச நீதிமன்றம் இன்று உத்தரவு பிறப்பித்துள்ளது. மேலும், ஒரு வாரத்திற்குள் சரணடைய வேண்டும் என்ற கெடுவும் ஆஷிஸ் மிஸ்ராவுக்கு விதிக்கப்பட்டுள்ளது.