கடல்வாழ் உயிரினங்களின் உயிர்க்கோள காப்பக மன்னார்வளைகுடாப் பகுதியான ராமேசுவரத்தில் பாம்பன் கடல் பகுதியில் கடல் நீரின் நிறம் பச்சையாக மாறியது மட்டுமில்லாமல், அப்பகுதியில் மீன்களும் இறந்து குவிவதால் மீனவர்கள் மத்தியில் மட்டுமல்லாது பொதுமக்கள் மத்தியிலும் அதிர்ச்சி ஏற்பட்டுள்ளது.
 

எண்ணற்ற உயிரிகளையும், ஏராளமான கடல்வளத்தையும் உள்ளடக்கியது மன்னார்வளைகுடாப் பகுதி. ராமநாதபுரம் மாவட்டம் ராமேசுவரத்தில் உள்ள இப்பகுதியிலுள்ள பாம்பன் குந்துகால் சின்னபாலம் கடல் பரப்பு, சிங்கிலி தீவு மற்றும் குருசடை தீவு உள்ளிட்ட பல தீவுகளை உள்ளடக்கிய இக்கடல் பகுதி மிகவும் முக்கியமானது. இங்குள்ள பாம்பன் குந்துகால் பகுதியில் நேற்று மாலை வேளையில், நீல நிறத்திலுள்ள கடல் திடுமென பச்சை வண்ணத்திற்கு மாறி காட்சியளித்தது. அத்துடன் மாசுகள் குவிந்து நுரை மிதந்ததால் சுவாசிக்க வழியின்றி, இப்பகுதியிலுள்ள கிளி, ஓரா மீன்கள் செத்து குவிந்தது. இதனால் பதட்டமடைந்த மீனவர்களும், பொதுமக்களும் அருகிலுள்ள மண்டபம் மத்திய கடல் மீன் ஆராய்ச்சி நிலையத்திற்கு தகவல் கொடுத்தனர். 

சம்பவ இடத்திற்கு வந்த ஆராய்ச்சி நிலையத்தார் பெரிய பெரிய டப்பாக்களில் நீரை சேமித்தவர்கள், இறந்து கிடந்த மீன்களையும் ஆய்வுக்காக எடுத்து சென்றனர். ''இது ஜூலை முதல் செப்டம்பர் வரை கடலில் இயற்கையாக நடக்கக்கூடிய மாற்றமே" என்றனர். எனினும், நேற்று மீன்கள் இறந்த நிலையில் இன்று நண்டுகளும் இறந்து கிடக்க, இதற்காகவே காத்திருக்கும் பறவைகளும் மயங்கி, இறந்து கிடக்கும் மீன்களை உணவிற்கு எடுத்துச் சென்று அக்கம் பக்கத்திலுள்ள குடியிருப்புப் பகுதியில் போடுவதால் நோய் தொற்று அபாயமும் ஏற்பட்டுள்ளது.

"கடலில் காணப்படும் ஒரு வகை பாசியான டைடோபிளாங்டன் - ஆல்கே என்ற தாவர நுண்ணுயிர்கள் கடலின் நீல நிறத்தை கிரகித்து பச்சை வண்ணமாக மாற்றுகிறது. கடலில் இந்த பச்சை நிறங்கள் எங்கெங்கு காணப்படுகின்றதோ அதில் அதிகப்படியான வெப்பமும், கார்பன் டை ஆக்சைடும் கண்டிப்பாக இருக்கும். அது ஆபத்தானதும் கூட. இனிவரும் காலங்களில் அனைத்துக்கடல்கள் நீல நிறத்திலிருந்து பச்சை வண்ணமாக மாற சாத்தியம் அதிகம்" என தனது ஆய்வில் எச்சரித்துள்ளது அமெரிக்காவிலுள்ள மசாசூசெட்ஸ் தொழில்நுட்ப பல்கலைக்கழகம் என்பதும் நினைவிலிருக்க வேண்டிய ஒன்று.

 

திருவாரூர் மாவட்டம் நீடாமங்கலத்தை மையமாக கொண்டு இழந்து வரும் பசுமையை காக்க புயலில் அழிந்த மரங்களை மீட்க உருவாக்கப்பட்டது கிரீன் நீடா என்ற அமைப்பு. தன்னார்வமுள்ள இயற்கை ஆர்வலர்கள் தங்களை உறுப்பினர்களாக இணைத்துக் கொண்டு நீடாமங்கலம் முதல் சுற்றுவட்டார கிராமங்களில் மரக்கன்றுகளை நட்டு வளர்த்து வருகிறார். நஞ்சில்லா உணவுக்காக நாட்டுக் காய்கறிகளின்  மாடித்தோட்டம் அமைப்பதை முன்னெடுத்து பயிற்சியும் கொடுத்து விதைகளையும் வழங்கினார்கள்.

இவர்களின் அடுத்த முயற்சியாக கிராமங்களில் கிடைக்கும் இடங்களில் எல்லாம் குருங்காடுகளை உருவாக்குவது. அதன் முதல்கட்டமாக நீடாமங்கலம் பேரூராட்சிக்கு சொந்தமான சுமார் 25 ஆயிரம் சதுரடி நிலத்தில் குருங்காடு அமைக்க கிரீன் நீடாவுடன் கைகோர்த்தது பேரூராட்சி நிர்வாகம். குருங்காடு அமைக்க வேண்டும் என்றது கிரீன் நீடாவுடன் 15 தன்னார்வ அமைப்புகளும் இணைந்தார்கள் ஆர்வமுள்ள தனிநபர்களும் குடும்பத்துடன் கலந்து கொண்டனர்.

இந்ததகவல் அறிந்த இளவரசியின் மகள் கிருஷ்ணபிரியா தனது அறக்கட்டளையில் இருந்து மரக்கன்றுகளை வழங்குவதாக சொன்னதுடன் பலன் தரும் பல வகையான  சுமார் 1000 பழ மரக்கன்றுகளை  வழங்கினார். 25 ஆயிரம் சதுரடியில்  நடைபயிற்சிக்காகவும் காட்டின் மையத்தில் நூலகம் படிப்பகம் அமைக்கவும் இடம் ஒதுக்கிவிட்டு 2 அடிக்கு ஒரு கன்று வீதம் நடவு செய்தனர். பேரூராட்சியில் சேகரிக்கப்பட்ட மட்கும் குப்பைகளை அடிய உரமாக போட்டு கன்றுகள் நடப்பட்டுள்ளது.
    

இது குறித்து கிரீன் நீடா ஒருங்கிணைப்பாளர் ராஜவேலு கூறும்போது.. 

புயல்களில் அழிந்த மரங்களை மீட்க உருவாக்கப்பட்ட அமைப்பு இன்று பள்ளிகளிலும் பரவியுள்ளது. கிராமங்களில் நாங்கள் நட்ட மரக்கன்றுகள் வளர்கிறது. அடுத்தகட்டமாக தான் குருங்காடு வளர்ப்பு திட்டம். முதலில் பேரூராட்சியுடன் இணைந்து முதல்காட்டை உருவாக்கியாச்சு அடுத்து இதுபோல இடங்களை காட்டினால் காடு வளர்க்க தயாராக உள்ளோம். காட்டுக்குள் தூய காற்றை சுவாசிக்க நடைபாதையும் இயற்கையோடு இருந்து படிக்க நூலகம், படிப்பகம் அமைக்கப்படுவதுடன் பறவைகளுக்காக ஆங்காங்கே தண்ணீர் தொட்டிகளும் அமைக்கப்படும். 10 ஆண்டுகளில் வளர்க்க வேண்டிய மரங்களை குருங்காடுகளில் 3 ஆண்டுகளில் வளர்த்துவிடுவோம். எங்கள் முயற்சிக்கு தன்னார்வலர்களின் ஒத்துழைப்பும் உதவியும் நிறைய கிடைக்கிறது. தற்போது கூட முதல் குருங்காட்டுக்கான மரக்கன்றுகளை சென்னை கிருஷ்ணபிரியா அறக்கட்டளையினர் வழங்கியுள்ளனர். அதேபோல பலரும் உதவியுள்ளனர் என்றார்.