'டாஸ்மாக் முறைகேடு வழக்கு'-வேறு அமர்வுக்கு மாற்ற முறையீடு

சென்னை மற்றும் கரூர் உள்ளிட்ட பல்வேறு இடங்களில் கடந்த மாதம் 6ஆம் தேதி முதல் 8 ஆம் தேதி அமலாக்கத்துறை அதிகாரிகள் அதிரடி சோதனையில் ஈடுபட்டனர். குறிப்பாகச் சென்னை எழும்பூரில் உள்ள டாஸ்மாக் தலைமை அலுவலகத்திலும், அதேபோல் அரக்கோணம் திமுக எம்.பி. ஜெகத்ரட்சகனுக்கு சொந்தமான நிறுவனத்திலும் அமலாக்கத்துறை சார்பில் சோதனை நடைபெற்றது. இதையடுத்து இந்த சோதனையின் மூலம் ரூ.1000 கோடி அளவுக்கு முறைகேடு நடைபெற்றிருப்பதாக அமலாக்கத்துறை தெரிவித்திருக்கிறது.

இது தமிழக அரசியலில் புயலை கிளப்பிய நிலையில் எதிர்க்கட்சியினர் அரசுக்கு எதிராக கடும் கண்டனங்களை தெரிவித்தனர். அமலாக்கத்துறை விசாரணையை எதிர்த்து டாஸ்மாக் நிறுவனம் சார்பில் சென்னை உயர்நீதிமன்றத்தில் முறையீடு செய்யப்பட்டது. இந்த வழக்கு  நீதிபதிகள் எம்.எஸ்.ரமேஷ், செந்தில்குமார் அடங்கிய அமர்வதற்கு முன்பு விசாரணையில் இருந்த நிலையில் நீதிபதிகள் இருவரும் வழக்கில் இருந்து  திடீரென விலகினர். அதனைத் தொடர்ந்து இந்த வழக்கு எஸ்.எம்.சுப்பிரமணியன் மற்றும் ராஜசேகர் அடங்கிய புதிய நீதிபதிகள் தலைமையில் தற்போது விசாரணையில் இருக்கிறது.

கடந்த விசாரணையில், 'டாஸ்மாக் முறைகேடு வழக்கில் சட்டப்பூர்வ  விசாரணையை சீர்குலைக்கும் வகையில் தமிழக அரசு மனு தாக்கல் செய்துள்ளது. தமிழக அரசின் மனு விசாரணைக்கு உகந்ததல்ல. எனவே இந்த வழக்கை அபராதத்துடன் தள்ளுபடி செய்ய வேண்டும். சோதனைக்காக வாரண்டை சமர்ப்பிக்க வேண்டிய அவசியம் இல்லை. அமலாக்கத்துறையிடம் முறையிட வாய்ப்பு இருந்தும் நேரடியாக ஐகோர்ட்டை நாடியது தவறு. சோதனையின் போது அதிகாரிகள் உணவு அருந்த, ஓய்வெடுக்க அனுமதி வழங்கிய பிறகே வாக்குமூலங்கள் பதிவு செய்யப்பட்டது. பெண் அதிகாரிகள் பாதுகாப்பான முறையில் வீட்டுக்கு அனுப்பி வைக்கப்பட்டனர்' என அமலாக்கத்துறை தெரிவித்திருந்தது.

அமலாக்கத்துறை தாக்கல் செய்த பதில் மனுவுக்கு பதிலளிக்க தமிழக அரசு அவகாசம் கேட்ட நிலையில்  வரும் ஏப்ரல் 8 ஆம் தேதிக்கு வழக்கு ஒத்திவைக்கப்பட்டுள்ளது. இந்நிலையில் அமலாக்கதுறைக்கு எதிரான டாஸ்மாக் நிர்வாகம் மற்றும் தமிழக அரசு தாக்கல் செய்த மனுக்களை வேறு அமர்வுக்கு மாற்ற வேண்டுமென மேல்முறையீடு செய்யப்பட்டுள்ளது. இந்த வழக்கை விசாரித்து வரும் நீதிபதிகளில் இரண்டாவது நீதிபதியான ராஜசேகரின் சகோதரர் அமைச்சர் செந்தில் பாலாஜியின் வழக்கறிஞராக இருக்கிறார். எனவே இந்த வழக்கை இந்த அமர்வு விசாரிக்கக் கூடாது என்று இன்று தலைமை நீதிபதி அமர்வில் மூத்த வழக்கறிஞர் விஜயன் முறையிட்டுள்ளார். இதனைக் கேட்ட தலைமை நீதிபதி, நீதிபதிகள் எஸ்.எம்.சுப்பிரமணியன் மற்றும் கே.ராஜசேகர் அமர்வில் மீண்டும் முறையீடு செய்யுங்கள். அந்த அமர்வு ஒரு முடிவு செய்து தெரிவிக்கும் பட்சத்தில் நிர்வாக உத்தரவு பிறப்பிக்கப்படும் என தெரிவித்திருக்கிறார்.