உலகக்கோப்பை கிரிக்கெட் போட்டிகள்; இன்று முதல் டிக்கெட் விற்பனை தொடக்கம்

ஐசிசி உலகக் கோப்பைக் கிரிக்கெட் போட்டிக்கான டிக்கெட் விற்பனை இன்று முதல் தொடங்க உள்ளது.

4 ஆண்டுகளுக்கு ஒருமுறை நடைபெறும் ஐசிசி ஒருநாள் உலகக் கோப்பைக் கிரிக்கெட் போட்டி கடந்த 2019 ஆம் ஆண்டு இங்கிலாந்தில் நடைபெற்றது. அதில் இங்கிலாந்து முதன்முறையாக சாம்பியன் பட்டத்தை கைப்பற்றியது. இதையடுத்து இந்த ஆண்டு நடைபெறும் உலகக் கோப்பை போட்டியை நடத்தும் வாய்ப்பு இந்தியாவுக்கு கிடைத்துள்ளது.

உலகக் கோப்பைக்கான போட்டிகள் வரும் அக்டோபர் 5 ஆம் தேதி தொடங்கி நவம்பர் 19 ஆம் தேதி வரை நடைபெறுகிறது. இதில் இந்தியா, பாகிஸ்தான், இலங்கை உள்ளிட்ட 10 நாடுகளைச் சேர்ந்த கிரிக்கெட் அணிகள் பங்கேற்கின்றன. இந்நிலையில் போட்டிகளுக்கான டிக்கெட் விற்பனை இன்று இரவு 8 மணிக்கு தொடங்குகிறது. இதற்காக சுமார் 4 லட்சம் டிக்கெட்டுகள் விற்பனைக்குத் தயாராக உள்ளன. கிரிக்கெட் ரசிகர்கள் அதிகாரப்பூர்வ இணையதளத்தில் டிக்கெட்டுகளை ஆன்லைன் மூலமாக முன்பதிவு செய்துகொள்ளலாம் என பிசிசிஐ அறிவித்துள்ளது. இன்று முதல் டிக்கெட் விற்பனை தொடங்குவதால் கிரிக்கெட் ரசிகர்கள் உற்சாகத்தில் உள்ளனர்.