ஆர்த்தி ஸ்கேன் மையங்களில் அதிரடி வருமான வரி சோதனை!

ஆர்த்தி ஸ்கேன் நிறுவனம் தொடர்புடைய, 25 இடங்களில் வருமான வரித்துறையினர் அதிரடியாக சோதனை நடத்தி வருகின்றனர். 

சென்னையைத் தலைமையிடமாகக் கொண்டு செயல்படும் பிரபல ஆர்த்தி ஸ்கேன் மையம் நாடு முழுவதும் 86 கிளைகளைக் கொண்டு செயல்பட்டு வருகிறது. தமிழகத்தில் மட்டும் 65 கிளைகள் உள்ளன. இந்த நிலையில், இன்று (07/06/2022) காலை முதல் தமிழகத்தில் மட்டும் 25 இடங்களில் ஆர்த்தி ஸ்கேன் தொடர்பான இடங்களில் வருமான வரித்துறை அதிகாரிகள் சோதனை நடத்தி வருகின்றனர். 

குறிப்பாக, ஆர்த்தி ஸ்கேன் செயல்படும் இடங்களிலும் மற்றும் அதில் பணிபுரியும் மருத்துவர்களின் வீடுகளிலும் அதன் உரிமையாளர் கோவிந்தராஜன் மற்றும் வடபழனி, கீழ்ப்பாக்கம், அண்ணா நகரில் வசிக்கும் அதன் நிர்வாகிகளின் வீடுகளிலும் வருமான வரித்துறை சோதனை நடைபெற்று வருகிறது. 

வரி ஏய்ப்பு செய்ததாகவும், குறுகிய காலத்தில் அதிக அளவு கிளைகளைத் திறந்தது சந்தேகத்தை எழுப்பியுள்ளதாகவும், வருமான வரித்துறை அதிகாரி தரப்பில் தெரிவிக்கப்பட்டுள்ளது.