'ஒருபோதும் சமரசம் இல்லை; நம்பிக்கை வலிமையானது' - மோடி பேச்சு

ஏழு கட்டங்களாக நடைபெற்ற மக்களவைத் தேர்தல் முடிவுகள் கடந்த 4ஆம் தேதி வெளியானது. அதில் 543 மக்களவைத் தொகுதிகளில் தேசிய ஜனநாயகக் கூட்டணி 292 இடங்களிலும், இந்தியா கூட்டணி 234 இடங்களிலும் வென்றுள்ளது. இதில் தேசிய ஜனநாயகக் கூட்டணியில் உள்ள பா.ஜ.க தனித்து 240 தொகுதிகளை மட்டுமே கைப்பற்றியிருந்தது.

ஆட்சி அமைக்க தனிப்பெம்ருபான்மை இல்லாத பா.ஜ.கவுக்கு, தேசிய ஜனநாயகக் கூட்டணியில் உள்ள தெலுங்கு தேசம் கட்சியைச் சேர்ந்த சந்திரபாபு நாயுடுவும், ஐக்கிய ஜனதா தளம் கட்சியைச் சேர்ந்த நிதிஷ்குமாரும் ஆதரவு தருவதாக உறுதி அளித்தனர். இதையடுத்து தேசிய ஜனநாயகக் கூட்டணி தலைமையில் பிரதமர் மோடி மூன்றாவது முறையாக ஆட்சி அமைக்கவுள்ளார்.

இந்நிலையில் பாஜக கூட்டணி எம்.பிக்கள் கூட்டம் பழைய நாடாளுமன்றத்தின் வளாகத்தில் நடைபெற்றது. கூட்டத்திற்கு மோடி வந்திருந்த பொழுது எம்பிக்கள் அனைவரும் 'மோடி... மோடி...' என முழுக்கமிட்டு அவரை வரவேற்றனர். தொடர்ந்து பேசிய பாஜகவின் தேசிய தலைவர் ஜே.பி.நட்டா, 'தனது வாழ்க்கையை நாட்டுக்காகவே அர்ப்பணித்துள்ளார் மோடி. அனைவருக்கும் அனைத்தும் என்ற நோக்கத்துடன் பாஜக கூட்டணி அரசு செயல்படும். கடந்த 10 ஆண்டுகளில் யாரும் நினைத்துப் பார்க்காத வளர்ச்சியை மோடி வழங்கி உள்ளார்' என்றார்.

அதனைத் தொடர்ந்து பேசிய ராஜ்நாத் சிங், ''இந்தக் கூட்டணி நிபந்தனையில் உருவான கூட்டணி இல்லை அர்ப்பணிப்பில் உருவான கூட்டணி. என்.டி.ஏ கூட்டணி அரசுக்கு எந்தவித அழுத்தமும் கிடையாது. அறுபது ஆண்டுகள் கழித்து தொடர்ந்து மூன்றாவது முறையாக பிரதமராகப் பதவியேற்று புதிய சாதனைப் படைத்துள்ளோம். மோடியை மீண்டும் பிரதமர் ஆக்குவதற்கு நான் முன்மொழிகிறேன்'' என்றார்.

மோடியின் பெயரை உச்சரித்ததும் தேசிய ஜனநாயகக்  கூட்டணியின் எம்பிக்கள் 'மோடி... மோடி..' என முழக்கமிட்டனர். பின்னர் பேசிய அமித்ஷா மோடியை மீண்டும் பிரதமர் ஆக்குவதற்கு வழிமொழிந்ததோடு நாடாளுமன்றக் குழு தலைவராக நரேந்திர மோடி தேர்வு செய்யப்பட்டார். அதனைத் தொடர்ந்து பேசிய சந்திரபாபு நாயுடு, 'பிரதமர் மோடியின் பத்தாண்டுகள் ஆட்சியில் மகத்தான வளர்ச்சியை நாடு அடைந்துள்ளது. உலக அளவில் சிறந்த தலைவர் பிரதமர் மோடி' எனப் புகழாரம் சூட்டி பேசினார்.

தமிழகத்தில் இருந்து என்.டி.ஏ கூட்டணியில் உள்ள ஓ.பன்னீர்செல்வம், தமிழ் மாநில காங்கிரஸ் தலைவர் ஜி.கே.வாசனும் கலந்து கொண்டு எழுந்து நின்று கைதட்டி உற்சாகத்தை வெளிப்படுத்தினர்.

இறுதியாக தனது உரையை ஆரம்பித்த பிரதமர் மோடி, ''பழங்குடியின மக்கள் அதிகம் வசிக்கும் 10 மாநிலங்களில் 7-இல் அதிக ஆதரவு கிடைத்துள்ளது. என்.டி.ஏ  கூட்டணி கட்சிகளுக்கு இடையே உள்ள நம்பிக்கை வலிமையானது. தேர்தலுக்கு முன்பே உருவான கூட்டணி வெற்றிகரமாக ஆட்சி அமைப்பது இதுவே முதல் முறை. 30 ஆண்டுகளில் தற்போது அமைந்துள்ள என்டிஏ கூட்டணிதான் வலிமையானது. தேசத்தின் வளர்ச்சியில் ஒருபோதும் சமரசம் இல்லை. தேசமே முதன்மையானது. அனைத்து முடிவுகளிலும் ஒருமித்த கருத்து எட்டுவதே எங்கள் கூட்டணி என் நோக்கம். என்.டி.ஏ என்றால் சிறப்பு நிர்வாகம் என்ற பொருள். அரசு எப்படி நடக்கிறது? எதனால் நடக்கிறது? என்பது இப்போதுதான் மக்களுக்கு தெரிந்துள்ளது. இந்தக் கூட்டணி, ஆட்சிக்காக அமைக்கப்பட்ட கூட்டணி அல்ல தேர்தலுக்கு முன்பே அமைந்த கூட்டணி. ஒரு அரசை நடத்துவதற்கு ஒருமித்த கருத்துதான் அவசியம்; பெரும்பான்மை முக்கியமல்ல. கூட்டணியில் உள்ள அனைத்து கட்சிகளும் சமமானவை தேசிய ஜனநாயக கூட்டணி வெற்றிக்காக உழைத்த அனைவருக்கும் நன்றி சொல்லிக் கொள்கிறேன்'' என்றார்.