Skip to main content

போட்டோகிராபர் கொலை - பெண்ணால் பிடிபட்ட குற்றவாளி!

Published on 04/03/2024 | Edited on 04/03/2024
Andhra photographer passes away

ஆந்திர மாநிலம் விசாகப்பட்டினம், மதுரவாடா பக்கண்ணா பாளையத்தைச் சேர்ந்தவர் பொதினா சாய்குமார் (23). இவர் திருமணம் உள்ளிட்ட சுப நிகழ்ச்சிகளுக்காக ஆன்லைன் மூலம் ஆர்டர் பெறுவதையும், புகைப்படங்கள் மற்றும் வீடியோக்களை படம்பிடிப்பதையும் வழக்கமாக வைத்திருந்தார். ஆன்லைன் மூலம் முன்பதிவு செய்து, உள்ளூரிலும் தொலைதூர இடங்களிலும் நடக்கும் நிகழ்வுகளுக்குச் செல்வார்.  

இந்நிலையில், அம்பேத்கர் கோனசீமா மாவட்டத்திலுள்ள ரவுலபாலம் பகுதியைச் சேர்ந்த ஷண்முக் தேஜா, பிப்ரவரி 26 ஆம் தேதி திருமணத்திற்காக பத்து நாள் போட்டோ ஷூட் நடத்த வேண்டுமென, ஆன்லைனில் சாய்குமாரிடம் ஆர்டர் செய்து போனில் பேசினார். இதனைத் தொடர்ந்து, ரூ.10 லட்சம் மதிப்புள்ள கேமரா மற்றும் ஷூட்டிங்கிற்கு தேவையான உபகரணங்களுடன் சாய்குமார் ரயிலில் விசாகப்பட்டினத்திலிருந்து ராஜமுந்திரி சென்றார்.

புறப்படுவதற்கு முன் தனது பெற்றோருக்கு போன் செய்து, ரவுலபாலத்தில் திருமண நிகழ்ச்சியில் புகைப்படம் எடுக்கப் போவதாகக் கூறினார். ராஜமகேந்திரவரத்தில் ரயிலில் இறங்கிய சாய்குமாரை இரண்டு இளைஞர்கள் காரில் வந்து அழைத்துச் சென்றனர். ரவுலபாலம் அருகே இருவரும் சேர்ந்து சாய்குமாரைக் கொலை செய்து உடலைப்  புதைத்துவிட்டு, கேமரா மற்றும் உபகரணங்களை எடுத்துச் சென்றனர்.

தான் கொலையாவதற்கு முன் சாய்குமார் ராஜமுந்திரியில் இறங்கியவுடன், ‘எனக்குச் சந்தேகமாக இருக்கிறது. தெரியாதவர்கள் அழைத்தவுடன் வந்துவிட்டேன். எனது போன் பயன்பாட்டில் இல்லாவிட்டால் ஆர்டர் கொடுத்து அழைத்துச் சென்ற ஷண்முக் தேஜா செல்போன் எண் மற்றும் தன்னை அழைத்துச் சென்ற காரைப் பின்னால் இருந்து எடுத்த போட்டோ விபரங்களை அனுப்பியிருக்கிறேன்’ என்ற தகவலைப் பெற்றோருக்கு அனுப்பினார்.

சாய்குமார் திருமண நிகழ்ச்சி என்று கூறிச் சென்றதால் பெற்றோர் பெரிதாக எடுத்துக் கொள்ளவில்லை. ஆனால், மூன்று நாட்களாகியும் சாய்குமாரிடம் இருந்து போன் வரவில்லை. போன் வேறு ஸ்விட்ச்-ஆப் செய்யப்பட்டு இருந்ததால், மகன் எங்கு இருக்கிறார் என்ற விவரம் தெரியாததால், விசாகப்பட்டினம் பி.எம்.பாலம் காவல்நிலையத்தில் பெற்றோர் தரப்பில் புகார் அளித்தனர். சாய்குமார் காணாமல் போனதாக வழக்குப் பதிவு செய்து விசாரணை நடத்திய காவல்துறையினர், சாய்குமாரின் தொலைபேசி அழைப்பு தரவுகளின் அடிப்படையில், ஷண்முக் தேஜாவை அடையாளம் கண்டனர். அவருடைய செல்போன் எண்ணைக் கொண்டு கண்டுபிடிக்க முயன்றனர். ஆனால், அவருடைய செல்போன் ஸ்விட்ச்-ஆப் செய்யப்பட்டிருந்தது.

ஷண்முக் தேஜாவின் முகநூல் பக்கத்தில் விசாகப்பட்டினத்தைச் சேர்ந்த பெண்ணுடன் பழக்கம் இருப்பதைத் தெரிந்து கொண்ட காவல்துறையினர், அந்தப் பெண்ணின் முகநூல் ஐ.டி.யிலிருந்து சாட் செய்தனர். அதற்கு ஷண்முக் தேஜாவும் ரிப்ளை செய்ய, அவர் இருக்கும் இடத்தை ஐ.பி. எண் ஆதாரம் மூலம் கண்டறிந்து சென்ற காவல்துறையினர் கைது செய்தனர்.

இந்தக் கொலை வழக்கு குறித்து விசாகப்பட்டினம் காவல் ஆணையர் ரவிசங்கர் பேசியபோது, “சாய்குமார் காணாமல் போனதாக கடந்த மாதம் 29 ஆம் தேதி புகார் வந்தது. அவரிடம் இருந்த ரூ.15 லட்சம் மதிப்புள்ள கேமராவுக்காக அவர் கொல்லப்பட்டுள்ளார். ஆலமூரில் சாய்குமார் உடல் புதைக்கப்பட்டிருப்பதை அறிந்து, அதனைக் கைப்பற்றி உடற்கூறு ஆய்வுக்கு அனுப்பியிருக்கிறோம். இந்த வழக்கில் ஷண்முக் தேஜாவுக்கு அவருடைய நண்பரும் துணையாக இருந்துள்ளார். தலைமறைவாக உள்ள மற்றொரு இளைஞரைத் தேடி வருகிறோம்” எனத் தெரிவித்துள்ளார். 

சார்ந்த செய்திகள்

 

Next Story

புல்டோசர் மூலம் இடித்து தரைமட்டமாக்கப்பட்ட ஒய்.எஸ்.ஆர் காங்கிரஸ் அலுவலகம்; ஆந்திராவில் பரபரப்பு

Published on 22/06/2024 | Edited on 22/06/2024
bulldozed YSR Congress office in Andhra Pradesh

ஆந்திரப் பிரதேசத்தில் நடைபெற்ற தேர்தலில் ஆட்சியில் இருந்த ஒய்.எஸ்.ஆர் காங்கிரஸ் ஆட்சியைக் கவிழ்த்து தெலுங்கு தேசம் கூட்டணி அபார வெற்றி பெற்றிருந்தது. 175 தொகுதிகள் கொண்ட ஆந்திராவில், தெலுங்கு தேசம் கட்சி 135 இடங்களிலும், அதன் கூட்டணி கட்சிகளான ஜன சேனா கட்சி 21 இடங்களிலும், பா.ஜ.க 8 இடங்களிலும் வெற்றி பெற்றது. சட்டமன்றத் தேர்தலில் வெற்றி பெற்ற சந்திரபாபு நாயுடு ஆந்திர முதல்வராக கடந்த 12ஆம் தேதி பதவியேற்றுக் கொண்டார். இதன் மூலம், ஆந்திரப் பிரதேசத்தில் 4வது முறையாக சந்திரபாபு நாயுடு முதல்வராக பதவியேற்றுள்ளார்.

இதற்கிடையில், குண்டூர் மாவட்டம் தடேபள்ளியில் ஒய்.எஸ்.ஆர் காங்கிரஸ் கட்சியின் அலுவலகம் கட்டப்பட்டு வந்தது. இந்த அலுவலகம் சட்டவிரோதமாக கட்டப்பட்டுள்ளதாக குடிநீர் வடிகால் வாரிய அதிகாரிகள் எதிர்ப்பு தெரிவித்து நோட்டீஸ் அனுப்பியதாகக் கூறப்படுகிறது. இந்த நடவடிக்கைக்கு எதிராக ஒய்.எஸ்.ஆர் காங்கிரஸ் கட்சியினர் நீதிமன்றத்தில் வழக்கு தொடர்ந்தனர்.

அந்த மனுவை விசாரித்த நீதிமன்றம், ஒய்.எஸ்.ஆர் காங்கிரஸ் அலுவலகத்தை இடிக்க தடை விதித்து உத்தரவிட்டதாகக் கூறப்படுகிறது. இந்த நிலையில், இன்று (22-06-24) காலை 5 மணி அளவில், குடிநீர் வடிகால் வாரிய அதிகாரிகள் ஒய்.எஸ்.ஆர் காங்கிரஸ் அலுவலகத்தை ராட்சத பொக்லைன் எந்திரங்களை கொண்டு இடித்தனர். இந்த நடவடிக்கைக்கு ஒய்.எஸ்.ஆர் காங்கிரஸ் கட்சியின் தலைவர் ஜெகன் மோகன் ரெட்டி கண்டனம் தெரிவித்துள்ளார்.

இது குறித்து ஜெகன் மோகன் ரெட்டி தனது எக்ஸ் பக்கத்தில் கூறியதாவது, “ஆந்திராவில் அரசியல் கட்சி நடவடிக்கைகளில் ஈடுபட்டதன் மூலம் சந்திரபாபு தனது பழிவாங்கும் நடவடிக்கையை மேற்கொண்டுள்ளார். கிட்டத்தட்ட ஒரு சர்வாதிகாரி புல்டோசர் மூலம் அழித்துள்ளார். இந்த ஐந்தாண்டு கால ஆட்சி எப்படி இருக்கப்போகிறது என்ற வன்முறை செய்தியை இந்தச் சம்பவத்தின் மூலம் கொடுத்துள்ளார். இந்த அச்சுறுத்தல்கள், இந்த வன்முறைச் செயல்கள் ஒய்.எஸ்.ஆர் காங்கிரஸில் இல்லை. மக்களுக்காகக் கடுமையாகப் போராடுவோம். சந்திரபாபுவின் இச்செயல்களைக் கண்டிக்குமாறு நாட்டின் அனைத்து ஜனநாயகவாதிகளையும் கேட்டுக்கொள்கிறேன்” என்று பதிவிட்டுள்ளார். 

Next Story

நிர்வாணமாக இளம்பெண்ணின் சடலம்; அதிர்ச்சி சம்பவத்தால் பரபரப்பு!

Published on 22/06/2024 | Edited on 22/06/2024
the shocking incident on corpse of a young woman in andhra pradesh

ஆந்திரப் பிரதேச மாநிலம், பாபட்லா மாவட்டத்தைச் சேர்ந்தவர் 21 வயது இளம்பெண். இவர் இன்று அதிகாலை வீட்டை விட்டு வெளியே சென்று வெகு நேரமாகியும் வீடு திரும்பவில்லை. இதனால், அவரது குடும்பத்தினர் அவரை பல்வேறு இடங்களில் தேடி வந்தனர். அப்போது, அப்பகுதியில் உள்ள பள்ளி அருகே முட்புதரில் நிர்வாண நிலையில் அப்பெண்ணின் உடல் இருப்பதைக் கண்டு அதிர்ச்சியடைந்தனர். 

இதனையடுத்து, இந்தச் சம்பவம் குறித்து போலீசாருக்கு தகவல் கொடுக்கப்பட்டது. தகவல் அறிந்து சம்பவ இடத்திற்கு விரைந்து வந்த போலீசார், உயிரிழந்த அப்பெண்ணின் சடலத்தை மீட்டு பிரேதப் பரிசோதனைக்காக மருத்துவமனைக்கு அனுப்பி வைத்தனர். மேலும், இந்தச் சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர். 

அந்தப் பெண் பாலியல் வன்கொடுமைக்கு ஆளாக்கப்பட்டு கொலை செய்யப்பட்டிருக்கலாம் என்று சந்தேகத்தின் பேரில் போலீசார் தொடர்ந்து விசாரணை மேற்கொண்டு வருகின்றனர். வீட்டை விட்டு வெளியே சென்ற இளம்பெண் உயிரிழந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.