Skip to main content

“ராமதாஸ் உத்தரவாதத்தால் போராட்டத்தை கைவிட்டேன்..” - திருமாவளவன்

Published on 18/05/2023 | Edited on 18/05/2023

 

“I gave up the struggle because of Ramdas' guarantee..” - Thirumavalavan

 

சிதம்பரத்தில் விடுதலைச் சிறுத்தைகள் கட்சி சார்பில் முள்ளிவாய்க்கால் இனப்படுகொலை வீரவணக்க நாள் பொதுக்கூட்டம் நடைபெற்றது. இதில் விடுதலைச் சிறுத்தைகள் கட்சியின் தலைவரும் சிதம்பரம் நாடாளுமன்றத் தொகுதி உறுப்பினருமான தொல். திருமாவளவன் கலந்துகொண்டார்.  இதில், ஈழப் போரில் உயிர் மாண்ட பொதுமக்கள், குழந்தைகள், பெண்கள், போராளிகள் உள்ளிட்ட அனைவருக்கும் வீரவணக்கம் செலுத்தும் வகையில் அவர்களின் படங்களுக்கு நினைவு தீபம் ஏற்றி மலர் தூவி அஞ்சலி செலுத்தினார்.

 

பின்னர், அவர் உரையாற்றுகையில், “தமிழீழ விடுதலை களம் தமிழ்நாட்டுக்கு அந்நியமான களம் அல்ல; விடுதலைச் சிறுத்தைகளுக்கும் அந்நியமான களம் அல்ல. தொடக்கக் காலத்தில் இருந்து தமிழீழ விடுதலைக்கு அறப்போராட்டம் நடத்தி வருகிற கட்சி விடுதலைச் சிறுத்தைகள் எனப் பெருமையாகக் கூறிக் கொள்கிறோம். திமுக அரசு இருக்கும்போது ஈழப்போரை நிறுத்து என இந்திய அரசுக்கு முதல் குரல் கொடுத்து போராட்டத்தில் ஈடுபட்டது விடுதலைச் சிறுத்தைகள் கட்சி.

 

அப்போது நான்கு நாள் உண்ணாவிரதப் போராட்டத்தில் இருந்த போது எந்த தமிழ்த்தேசியவாதிகளும், ‘இந்த போராட்டத்தை விடாதே. தொடர்ந்து நடத்து’ எனக் கூறவில்லை. எல்லாரும் பொங்கல் கொண்டாடிய போது போரை நிறுத்த சாகும் வரை உண்ணாவிரதப் போராட்டத்தை நடத்திய இயக்கம் விடுதலைச் சிறுத்தைகள் கட்சி. அப்போது எனக்கு சரியான வழிகாட்டுதல் இல்லை. நான்கு நாட்களுக்கு பிறகு அதனை முடித்து வைக்க பாமக தலைவர் ராமதாஸ் வந்தார். அவரை குற்றம் சொல்லவில்லை. அவர், ‘நீங்கள் இருக்க வேண்டிய தேவை உள்ளது. உடம்பை கெடுத்துக்க வேண்டாம்’ என கூறி, ‘நாம் இரண்டு பேரும் சேர்ந்து போராடுவோம்’ என உத்தரவாதம் அளித்தார்.

 

அப்போது உளவுத்துறை திருமாவளவன், நடராஜன், நெடுமாறன், ராமதாஸுடன் கூட்டு சேர்ந்து ஆட்சியை கவிழ்க்க சதி வேலை செய்கிறார்கள் என கலைஞரிடம் கூறினார்கள். போராட்டத்திற்கு எது முக்கியமோ அதன் அடிப்படையில் தான் முடிவு எடுக்கப்பட்டது. தேர்தல் கணக்கு போட்டு போராட்டத்தை முன்னெடுக்கும் இயக்கமல்ல விடுதலைச் சிறுத்தைகள் கட்சி. அதனால்தான் போகிறப்போக்கில் எடப்பாடி பழனிசாமி மதுவிலக்கை எதிர்த்துப் போராடத் தயாரானால் நாங்களும் போராடுவோம் எனக் கூறினேன். தேர்தல் கணக்கு பார்த்து, கூட்டணி கணக்கு பார்த்து அரசியல் செய்கிற இயக்கமல்ல விடுதலைச் சிறுத்தைகள் கட்சி.

 

கலைஞர் ஆட்சியில் இருந்தபோதே அதிமுக கூட்டணியில் இருந்த ராமதாஸ், நெடுமாறன், வைகோ உள்ளிட்டவர்களுடன் இணைந்து பயணப்பட்டவன் நான். இதனை யாரும் பாராட்டமாட்டார்கள். இது ஒரு மாறுபட்ட அணுகுமுறை. இந்த துணிச்சலை யாரும் அங்கீகரிக்கமாட்டார்கள். இது சாதாரணமாக எடுக்கப்பட்ட முடிவு இல்லை. தீர்க்கமாக, உணர்வுப்பூர்வமாக எடுக்கப்பட்ட முடிவு. தமிழீழ விடுதலையை ஆதரிப்பது இனவாதத்தை ஆதரிப்பது அல்ல. ஒரு சிறுபான்மையை பெரும்பான்மை ஒடுக்கும்போது அதனை எதிர்ப்பது ஒரு ஜனநாயக சக்தியின் கடமை. அது விடுதலைச் சிறுத்தைகள் கட்சிக்கு இருக்கிறது.

 

இங்கு சங்பரிவார் கும்பல் ஒரு மொழி, ஒரு கலாச்சாரத்தை தூக்கிப் பிடிக்கப் பார்க்கிறது. இலங்கையிலும் இதேதான் நடைபெற்றது. அங்கு சிங்களம், பௌத்த பேரினவாதம்; இங்கு இந்து, இந்தி பேரினவாதம். இதை இப்படியே விட்டால் இன்னும் 10 ஆண்டுகளில் இந்தியாவில் கிறிஸ்தவர்கள், இஸ்லாமியர்களை தமிழ் ஈழத்தில் செய்தது போல் படுகொலை செய்வார்கள். ஆர்.எஸ்.எஸ், சங்பரிவாரத்தை வீழ்த்தாவிடில்; பாஜகவை ஆட்சிக்கட்டிலில் இருந்து அப்புறப்படுத்தாவிடில் இலங்கையில் நடைபெற்ற இனப்படுகொலை போல் இந்தியாவிலும் நடைபெறும்.

 

அங்கேயும் வெறுப்பு அரசியல், இங்கேயும் வெறுப்பு அரசியல். எனவேதான் ஆளுநர் சனாதனத்தை பாதுகாக்கும் விதமாக சிதம்பரம் நடராஜர் கோவில் பிரச்சனையை பற்றி பேசி வருகிறார். கன்னித்தன்மை பரிசோதனையை பாவச்செயல் என்கிறார். ஆனால், 6 வயது, 10 வயது, 12 வயது சிறுமிகளை பலவந்தப்படுத்தியது பாவமல்ல என்கிறார். ஏனென்றால் மனுஸ்மிருதியில் அப்படித்தான் உள்ளது. சாமியார்கள் எல்லாம் சின்ன சின்ன சிறுமிகளை கல்யாணம் செய்துகொண்டதால் கைது செய்யப்படுகிறார்கள் என்றால் அந்த மதம் பாலியல் திருமணங்களை நியாயப்படுத்துகிறது. மனுஸ்மிருதி இதை சட்டப்பூர்வமாக அனுமதிக்கிறது.

 

புரட்சியாளர்கள் நடமாடிய மண்ணில் சனாதன சங்கிகள் நடமாடுகிறார்கள். தமிழீழ விடுதலையை விடுதலைச் சிறுத்தைகள் தொடர்ந்து பேசுவோம். அதன் அரசியலை அடைகாப்போம், போராட்டத்தை முன்னெடுப்போம், தமிழ் ஈழம் வெல்லும், அதனை காலம் சொல்லும்” எனப் பேசினார்.

 

இந்த கூட்டத்தில் விடுதலைச் சிறுத்தைகள் கட்சியின் மாநில பொதுச் செயலாளர் சிந்தனைச்செல்வன் எம்.எல்.ஏ., கவிஞர் யுகபாரதி, மாநில துணை பொதுச் செயலாளர் வன்னியரசு, மாவட்டச் செயலாளர் பாலா. அறவாழி, கடலூர் மாநகராட்சி துணைத் தலைவர் சிந்தனைச்செல்வன் உள்ளிட்ட தமிழகத்தின் பல்வேறு பகுதிகளில் இருந்து 1000-திற்கும் மேற்பட்டவர்கள் கலந்து கொண்டனர்.

 

கூட்டம் முடிந்த பிறகு திருமாவளவன் அறிவிப்பு ஒன்றை வெளியிட்டார். அதில் ஜூன் 26 ஆம் தேதி காங்கிரஸ் கட்சியின் முன்னாள் தலைவர் இளையபெருமாளின் நூற்றாண்டு விழா பொதுக்கூட்டம் காட்டுமன்னார்கோவிலில் நடைபெறுகிறது என்றும், அதேபோல் விடுதலைச் சிறுத்தைகள் கட்சியில் 20 இடங்களில் இளைஞர்கள் மாவட்டச் செயலாளராக மே 18-ஆம் தேதி அறிவிக்கப்படுவார்கள் என்றும் அறிவித்தார்.

 

 

சார்ந்த செய்திகள்

Next Story

பட்டியலின மக்கள் பயன்படுத்தும் குடிநீர்த்தொட்டியில் மாட்டுச்சாணம் கலப்பு; ராமதாஸ் கண்டனம்!

Published on 26/04/2024 | Edited on 26/04/2024
Ramdas said mixing of cow dung in the drinking water tank of Sangamviduthi panchayat is reprehensible

சங்கம்விடுதி ஊராட்சி குடிநீர்த் தொட்டியில் மாட்டுச் சாணம் கலப்பு கண்டிக்கத்தக்கது என பாமக நிறுவனர் ராமதாஸ் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், “புதுக்கோட்டை மாவட்டம் கந்தர்வகோட்டை ஒன்றியம் சங்கம்விடுதி ஊராட்சிக்குட்பட்ட குருவண்டான் தெருவில் பட்டியலின மக்களுக்கு குடிநீர் வழங்குவதற்காக அமைக்கப்பட்டுள்ள மேல்நிலை நீர்த்தேக்கத் தொட்டியில் மாட்டுச்சாணம் கலக்கப்பட்டிருப்பதாக வெளியாகியுள்ள செய்திகள்  அதிர்ச்சியளிக்கின்றன. பொதுமக்கள் குடிப்பதற்கான குடிநீர்த் தொட்டியில்  மாட்டுச்சாணம் கலக்கப்பட்டது மனிதநேயமற்றது மட்டுமின்றி, மனிதத் தன்மையற்ற செயலாகும்.  இது கடுமையாகக் கண்டிக்கத்தக்கது.

குருவண்டான் தெரு குடிநீர்த் தொட்டியில் சில நாட்களுக்கு முன்பாகவே மாட்டுச்சாணம் கலக்கப்பட்டிருக்கக் கூடும் என்று தெரியவந்துள்ளது. அத்தொட்டியிலிருந்து விநியோகிக்கப்பட்ட குடிநீரை குடித்த குழந்தைகள் உள்ளிட்ட பலருக்கு உடல்நலம் பாதிக்கப்பட்டதைத் தொடர்ந்து மேல்நிலை நீர்த்தேக்கத் தொட்டியை ஆய்வு செய்த போது தான் இந்த உண்மை வெளிவந்திருக்கிறது. மக்களுக்கு குடிநீர் வழங்குவதற்கான குடிநீர்த் தொட்டியில் இது போன்ற மிருகத்தனமான செயல்கள் நடப்பதைக் கண்காணிக்க வேண்டியதும், ஒவ்வொரு நாளும் குடிநீர் மக்கள் பயன்படுத்தத் தக்க வகையில் பாதுகாப்பாக இருக்கிறதா?  என்பதை ஆய்வு செய்ய வேண்டியதும் அரசின் பணி. ஆனால், இந்த இரு கடமைகளிலும் திராவிட மாடல் அரசு தோல்வியடைந்து விட்டது.

தமிழ்நாட்டில் கடந்த ஒன்றரை ஆண்டுகளாக குடிநீர் தொட்டிகளில் மலம், மாட்டுச்சாணம் போன்றவற்றை கலக்கும் நிகழ்வுகள் அதிகரித்து விட்டன. அதிலும் குறிப்பாக பள்ளிகளிலும், பட்டியலின மக்கள் வாழும் பகுதிகளிலும் இத்தகைய நிகழ்வுகள் தொடர்வது மிகுந்த கவலையும், வேதனையும் அளிக்கிறது. பட்டியலின மக்களுக்கு எதிராக இத்தகைய கொடுமைகள் தொடர்ந்து நடைபெற்று வரும் நிலையில் அவற்றைத் தடுக்க தமிழக அரசு தவறி விட்டது.

வேங்கைவயல் குடிநீர்த் தொட்டியில் மலம் கலக்கப்பட்ட கொடூரம் நிகழ்ந்து இன்றுடன் 17 மாதங்களாகி விட்டன. ஆனால்,  அதில் தொடர்புடைய குற்றவாளிகள் மீது இதுவரை எந்த நடவடிக்கையும் எடுக்கப்படாதது தான் இத்தகைய கொடுமைகள் மீண்டும், மீண்டும் நிகழ்வதற்கு காரணம் ஆகும். வேங்கைவயல் விவகாரத்தில் தமிழக அரசு இனியும் உறங்கிக் கொண்டிருக்காமல்  குற்றவாளிகளை அடையாளம் கண்டு, கடுமையான தண்டனை பெற்றுத்தர வேண்டும்.

குருவண்டான் தெரு குடிநீர்த் தொட்டியில் சாணம் கலக்கப்பட்ட நிகழ்வும் வேங்கைவயல் நிகழ்வு எந்த அளவுக்கு கொடூரமானதோ, அதே அளவுக்கு கொடூரமானது. அனைவரும் மனிதர்கள் தான். பிடிக்காதவர்களை பழிவாங்குவதற்காக இத்தகைய செயல்களில் ஈடுபட்டவர்கள் மன்னிக்கப்படுவதற்கு தகுதியற்றவர்கள். இந்த நிகழ்வின் பின்னணியில் இருப்பவர்கள் யாராக இருந்தாலும் அவர்களை கண்டுபிடித்து சட்டத்தின் முன் நிறுத்தி உரிய தண்டனை பெற்றுத்தர தமிழக அரசும், காவல்துறையும் நடவடிக்கை எடுக்க வேண்டும்” எனக் குறிப்பிட்டுள்ளார்.

Next Story

ஓடும் பேருந்தில் இருக்கையுடன் தூக்கி வீசப்பட்ட நடத்துநர்; அன்புமனி கண்டனம்!

Published on 25/04/2024 | Edited on 25/04/2024
Anbumani condemns conductor being thrown with his seat in   moving govt bus

ஓடும் பேருந்தில், நடத்துநர் இருக்கையுடன் தூக்கி வீசப்பட்டதற்கு பா.ம.க தலைவர் அன்புமணி ராமதாஸ் கண்டனம் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், “திருச்சி திருவரங்கத்தில் இருந்து கே.கே.நகருக்கு சென்று கொண்டிருந்த அரசு நகரப் பேருந்து, வளைவு ஒன்றில் திரும்பும் போது, நடத்துநர் அமர்ந்திருந்த இருக்கை கழன்று வெளியில் விழுந்துள்ளது. இருக்கையுடன் நடத்துநரும் வெளியில் தூக்கி வீசப் பட்டுள்ளார். நல்வாய்ப்பாக பேருந்துக்கு பின்னால் வேறு வாகனங்கள் வரவில்லை என்பதால், நடத்துனர்  லேசான காயங்களுடன் உயிர்த் தப்பியுள்ளார். காயமடைந்த ஓட்டுநர் விரைவில் நலம் பெற எனது விருப்பங்களைத் தெரிவித்துக் கொள்கிறேன்.

சென்னை அமைந்தகரை பகுதியில் கடந்த பிப்ரவரி  6-ஆம்  தேதி  மாநகரப் பேருந்தின் தளம் உடைந்து  ஏற்பட்ட ஓட்டை வழியாக பெண் பயணி ஒருவர் சாலையில் விழுந்து காயமடைந்தார்.  அதனால் ஏற்பட்ட அதிர்ச்சி விலகும் முன்பாகவே  திருச்சியில்  பேருந்தின் இருக்கை கழன்று  நடத்துநர்  தூக்கி வீசப்பட்டுள்ளார்.  பேருந்தின் டயர் தனியாக கழன்று ஓடுவது, பேருந்தின் மேற்கூறை  தனியாக கழன்று காற்றில் பறப்பது போன்ற நிகழ்வுகளும் நடந்து கொண்டுதான் இருக்கின்றன. தினமும் 2 கோடி மக்கள் பயணிக்கும் அரசுப் போக்குவரத்துக் கழக பேருந்துகளை  திமுக அரசு எவ்வளவு மோசமாக பராமரிக்கிறது என்பதற்கு இதை விட மோசமான எடுத்துக் காட்டு இருக்க முடியாது.

தமிழ்நாடு அரசு போக்குவரத்துக்கழகங்களில் உள்ள 20,926 பேருந்துகளில் 1500 பேருந்துகள் 15 ஆண்டுகளுக்கும் மேலாக இயக்கப்பட்டு வருகின்றன என்பதை  தமிழக போக்குவரத்துத்துறை அமைச்சர் சிவசங்கரே  ஒப்புக் கொண்டிருக்கிறார்.  15 ஆண்டுகளைக் கடந்த பேருந்துகளை இயக்குவதே சட்ட விரோதம் ஆகும். இதைத் தவிர 15 ஆயிரத்திற்கும் மேற்பட்ட  பேருந்துகள்  12 ஆண்டுகளுக்கும் மேலாக இயக்கப்பட்டு வருகின்றன.  திமுக  ஆட்சிக்கு வந்த பிறகு விரல் விட்டு எண்ணக் கூடிய அளவில் தான் புதிய பேருந்துகள் வாங்கப்பட்டுள்ளன.

புதிய பேருந்துகள் வாங்கப்படாததால், காலாவதியான பேருந்துகள் அதிக எண்ணிக்கையில் இயக்கப்படுவதும்,   அவற்றை பராமரிப்பதற்கும், உதிரி பாகங்கள் வாங்குவதற்கும் கூட போதிய நிதி ஒதுக்கப்படாததுதான்  இத்தகைய அவல நிலை  ஏற்படுவதற்கு காரணம் ஆகும்.  இத்தகைய அவல நிலைக்கு திமுக தலைமையிலான திராவிட மாடல் அரசுதான் பொறுப்பேற்க வேண்டும்.

அமைச்சர்கள் மற்றும் அதிகாரிகளுக்கான மகிழுந்துகள் அவர்கள் விரும்பும் நேரத்தில் மாற்றப்படுகிறது. முதலமைச்சரின் வாகன அணிவகுப்பில் வரும் மகிழுந்துகள்  கருப்பு வண்ணத்தில் இருக்க வேண்டும் என்பதற்காக, ஏற்கெனவே வாங்கப்பட்டு சில மாதங்கள் மட்டுமே ஆன மகிழுந்துகள்  ஓரங்கட்டப்பட்டு, கோடிக்கணக்கில் செலவு செய்து 6 புதிய மகிழுந்துகள்  வாங்கப்படுகின்றன. ஆனால், பொதுமக்கள் பணம் கொடுத்து பயணம் செய்யும்  பேருந்துகள் மட்டும்  15 ஆண்டுகளைக் கடந்து இயக்கப்படுகின்றன. இது என்ன கொடுமை?

தமிழ்நாடு அரசுப் போக்குவரத்துக் கழகங்களில் உள்ள 6 ஆண்டுகளைக் கடந்த பேருந்துகள் அனைத்தும் உடனடியாக மாற்றப்பட்டு அவற்றிற்கு மாற்றாக புதிய பேருந்துகள் வாங்கி இயக்கப்பட வேண்டும்.  பழைய பேருந்துகளைப் பராமரிக்கவும்,  உதிரி பாகங்கள் வாங்கவும் அரசு போக்குவரத்துக் கழகங்களுக்கு அரசு  போதிய நிதி ஒதுக்கீடு  செய்ய வேண்டும்” என வலியுறுத்தியுள்ளார்.