“திமுக அரசின் நிதி நிலை அறிக்கை வெற்று அறிவிப்புகளை மட்டுமே கொண்ட ஒரு விளம்பர அறிக்கை” – சீமான் 

தமிழ்நாடு 2022-23ஆம் நிதி ஆண்டுக்கான நிதி நிலை அறிக்கையை நேற்று தமிழ்நாடு சட்டமன்றத்தில், நிதி அமைச்சர் பழனிவேல் தியாகராஜன் தாக்கல் செய்தார். இந்த நிதிநிலை அறிக்கையைப் பாராட்டியும், விமர்சனங்களை முன்வைத்தும் அரசியல் கட்சி தலைவர்கள் கருத்து தெரிவித்துவருகின்றனர். இந்நிலையில், நாம் தமிழர் கட்சியின் ஒருங்கிணைப்பாளர் சீமான் நிதிநிலை அறிக்கை குறித்து கருத்து தெரிவித்து அறிக்கை ஒன்றை வெளியிடுள்ளார். 

அதில் அவர், “தமிழ்நாடு சட்டப்பேரவையில் தாக்கல் செய்யப்பட்ட 2022-23ஆம் ஆண்டுக்கான திமுக அரசின் நிதிநிலை அறிக்கையானது ஒரு தொலைநோக்குத் திட்டமுமின்றி வெற்று விளம்பர அறிக்கையாக மட்டுமே இருப்பது பெரும் ஏமாற்றமளிக்கிறது. தொடர்ந்து இரண்டாவது முறையாகத் தனது தேர்தல் வாக்குறுதிகளை நிறைவேற்றுவதற்குரிய அறிவிப்புகளை நிதிநிலை அறிக்கையில் வெளியிடாமல் ஆளும் திமுக அரசு நழுவி வருவது தற்போது வெட்ட வெளிச்சமாகியுள்ளது.

மாநிலப் பள்ளிக்கல்வித் துறைக்கான ஒதுக்கீடு ஏறத்தாழ 4,298 கோடி ரூபாய் அளவு குறைக்கப்பட்டு அது நேரடி கல்வித் திட்டங்களுக்கு இல்லாமல் மாற்றுத் திட்டங்களுக்கு பயன்படுத்தப்பட்டிருப்பது கண்டனத்திற்குரியது. கல்வித்துறையில் நீட் தேர்வு, புதிய கல்விக் கொள்கை எனப் பல சவால்களை எதிர்கொள்ளும் தற்போதைய காலகட்டத்தில், கல்விக் கட்டமைப்பை மேம்படுத்துவதற்கான தொகையை அதிகப்படுத்தாமல், குறைத்திருப்பது மிகத்தவறானத் திட்டமிடலாகும். மேலும், மகளிருக்கான 1000 ரூபாய் மாத உரிமைத்தொகை, கல்விக்கடன் தள்ளுபடி, நகைக்கடன் தள்ளுபடி, எரிபொருள் விலை குறைப்பு, சமையல் எரிகாற்று உருளைக்கு 100 ரூபாய் மானியம் போன்ற வாக்குறுதிகளை தனது தேர்தல் அறிக்கையில் அள்ளி வீசி, மாநில அதிகாரத்தைக் கைப்பற்றிய திமுக, ஆட்சிக்கு வந்து ஓராண்டாகியும் அவற்றை நிறைவேற்ற எந்தவொரு முன்னெடுப்பையும் செய்யாமல் நிதிநிலை அறிக்கையைத் தயாரித்திருப்பது நம்பி வாக்களித்த மக்களை ஏமாற்றும் துரோகச் செயலாகும். அதுமட்டுமின்றி, மறுவாழ்வு முகாம்களில் வாழும் ஈழத்தமிழ் சொந்தங்களுக்கு உதவித் தொகையாக மாதம் 1,500 ரூபாய் வழங்கும் அறிவிப்பு, மீனவக் குடும்பங்களுக்கு 2 இலட்சம் வீடுகள் கட்டித்தரும் அறிவிப்பு போன்ற வாக்குறுதிகளைப் பற்றி இந்நிதிநிலை அறிக்கையில் எதுவும் குறிப்பிடாதது அடித்தட்டு உழைக்கும் மக்களை வஞ்சித்து, அவர்களின் வயிற்றில் அடிக்கும் வஞ்சகச்செயலாகும்.

2022-23ஆம் ஆண்டில் மாநிலத்தின் மொத்தக்கடன் 6,53,000 கோடி ரூபாய் எனும் நிதியமைச்சரின் அறிவிப்பு பெரும் அதிர்ச்சியைத் தருகிறது. 2022-23ஆம் நிதியாண்டில் முதலீட்டுச்செலவுகள் 43,000 கோடி ரூபாய்தான் எனத் தெரிவித்த பிறகு, ஒரே ஆண்டில் மேலும் 90,000 கோடி ரூபாய் கடன்கள் அதிகமானது எப்படி என்பது புரியவில்லை. அப்படியென்றால், இந்த அரசு அன்றாடச் செலவுகளுக்கே கடன் வாங்கும் சூழ்நிலையில்தான் உள்ளதா எனும் அடிப்படை கேள்வி எழுகிறது. 2022-23ஆம் நிதி ஆண்டில் மாநிலத்தின் வருமானம் அனைத்து விதத்திலும் அதிகரிக்கும் எனும்போது 90,000 கோடி ரூபாய் கூடுதலாகக் கடன் வாங்க வேண்டிய தேவையென்ன?. இவ்வாறாக, மாநிலத்தின் செலவினங்களைக் கடந்த ஓராண்டில் திமுக அரசு கட்டுக்குள் வைக்கத் தவறியது கண்கூடாகத் தெரிகிறது. இதுவெல்லாம், திமுக அரசின் நிர்வாகத் திறமையின்மையையே படம்பிடித்துக் காட்டுகிறது.

2021-22ஆம் ஆண்டில் 1,21,857 கோடி ரூபாயாக இருந்த மாநில வரிவருமானம், 2022-23ஆம் ஆண்டில் 1,42,799 கோடி ரூபாயாக இருக்கும் எனக் கணக்கிடப்பட்டுள்ளது. கூடுதலாகக் கணக்கிடப்படும் 21,000 கோடி ரூபாயை எந்த முறையில் ஈட்டப்போகிறார்கள் எனும் கேள்விக்குப் பதிலில்லை. இதன்மூலம், மாநில வரிகள் நாளடைவில் கூட்டப்பட்டு, மக்களின் தலைமீது சுமை ஏறுமோ எனும் ஐயம் எழுவதைத் தவிர்க்க முடியவில்லை. மாநில மின் பகிர்மானக் கட்டுமானக் கழகத்தின் இழப்பான 13,000 கோடி ரூபாயை மாநில அரசு ஏற்கும் என்ற அறிவிப்பின் மூலம், இவ்வளவு ஆண்டுகளாகியும் இழப்பில் இயங்கி வரும் அந்நிறுவனத்தை பொருளாதாரச் சீரமைப்பு செய்யவோ அல்லது புதிய முதலீடுகள் மூலம் புத்துயிர்ப்பெறச் செய்யவோ திமுக அரசு முயற்சிக்கவில்லை என்பது புலனாகிறது. இதன் வாயிலாக, கடந்த அதிமுக அரசைப் போலவே, தற்போதைய திமுக அரசும் செயல்பாடற்றத் தன்மையோடு இருப்பதை உணர்ந்துகொள்ள முடிகிறது. இத்தோடு, மாநிலத்தின் நேரடி வருமானத்தை ஈட்டும் நிறுவனமாக தொடர்ந்து டாஸ்மாக் இருந்து வருவதும், அதன் வருவாயைப் பெரிதளவில் அரசு நம்பி நிற்பதும் பேரவலத்தின் உச்சமாகும். மாநிலத்தின் கனிமவளங்களை முறைப்படுத்தி வணிகம் செய்தாலே ஆண்டொன்றுக்கு 20,000 கோடி ரூபாய்வரை வருமானம் ஈட்ட முடியும் என்ற நிலையில், 3471 அனுமதிகளாக அதனைப் பிரித்து, தனியாருக்குக் குத்தகைக்கு விடுவதன் மூலம், வெறும் 983 கோடி ரூபாயையே வருமானமாகப் பெறுவதென்பது என்ன வகையான பொருளாதார நிர்வாகம்? வெட்கக்கேடு!

பன்னெடுங்காலமாக மாநில வருவாயின் பெரும் செலவுத்தொகையாக இருக்கிற அரசு ஊழியர்களின் ஊதியம், ஓய்வூதியம் ஆகியவற்றோடு, நடப்பாண்டில் இன்ன பிற சலுகைகளுக்காக, மேலும் 19,000 கோடி ரூபாய் அளவுக்கு செலவு அதிகமாகும் என்கிறார் நிதி அமைச்சர். இன்றுவரை முறைப்படுத்தப்படாத செலவு மையமாகவே இருந்து வரும் இச்செலவின வகையை இந்த ஆண்டும் சரி செய்ய முற்படாதது ஏனென்று புரியவில்லை. மாநிலத்திற்குள் உள்ளூர் முதலீடுகளை ஈர்க்க எந்த ஒரு திட்டத்தையும் அறிவிக்காத இந்த நிதிநிலை அறிக்கை எளிய மக்களின் வாழ்க்கைத்தரத்தையோ அல்லது வாழ்வாதாரத்தையோ மேம்படுத்த எந்த ஒரு திட்டத்தையும் அறிவிக்கவில்லை என்பதே உண்மை நிலையாகும். ஒட்டுமொத்தத்தில், திமுக அரசின் இந்நிதிநிலை அறிக்கையினை, மக்களுக்கு நலன் பயக்காத வகையில் வழமையாக வெறும் வெற்று அறிவிப்புகளை மட்டுமே கொண்ட விளம்பர அறிக்கையென மதிப்பிடுகிறேன்” என்று தெரிவித்துள்ளார்.