Skip to main content

இடைக்கால பொதுச்செயலாளர் ஆகிறார் இ.பி.எஸ்.! ஜூலை 11- ல் அதிர்ச்சி வைத்தியம் யாருக்கு?

Published on 05/07/2022 | Edited on 05/07/2022


 

EPS becomes interim general secretary! July 11 - Who is traumatized?

 

அ.தி.மு.க.வில் ஒற்றைத் தலைமைக்கான குடுமிப்பிடி சண்டை உச்சமடைந்துள்ள நிலையில், எடப்பாடி பழனிசாமியை இடைக்கால பொதுச்செயலாளராக அறிவிக்க அவருடைய ஆதரவாளர்கள் தீர்மானித்துள்ளனர். வரும் ஜூலை 11- ஆம் தேதி நடக்கும் பொதுக்குழுவில் இதற்கான தீர்மானம் நிறைவேற்றப்பட உள்ளதாக ர.ர.க்கள் கூறுகின்றனர். 

 

ஜெ.,மறைவுக்குப் பிறகு, கடந்த ஐந்து ஆண்டுகளாக ஓ.பன்னீர்செல்வம் ஒருங்கிணைப்பாளராகவும், எடப்பாடி பழனிசாமி இணை ஒருங்கிணைப்பாளராகவும் பொறுப்பேற்று கட்சியை வழி நடத்தி வருகின்றனர். இனியும் இரட்டைத் தலைமை எனும் இரட்டைக் குழல் துப்பாக்கியாக இருந்தால், கட்சியை முன் நகர்த்திச் செல்வதில் தொய்வு ஏற்படும் என்பதை உணர்ந்த முக்கிய நிர்வாகிகள், ஒற்றைத் தலைமைக்கான முழக்கத்தை திடீரென்று எழுப்பினர். எடப்பாடி பழனிசாமியின் கூடாரத்தில் இருந்து தான் இந்த முழக்கம் திட்டமிட்டு கிளப்பி விடப்பட்டது. 

 

ஒற்றைத் தலைமைக்கான முழக்கம், கட்சிக்குள் பெரும் அதிர்வலைகளை ஏற்படுத்தியது. குறிப்பாக, பெரியகுளத்தாரை ரொம்பவே ஆட்டம் காணச் செய்தது. பொதுக்குழு உறுப்பினர்கள் மட்டுமின்றி மாவட்டச் செயலாளர்களிலும் பெரும்பான்மை ஆதரவு எடப்பாடி பழனிசாமிக்கு இருப்பதால், அவர்தான் ஒற்றைத் தலைமைக்கான ஒரே சாய்ஸ் என்கிறார்கள் அவருடைய ஆதரவாளர்கள். குறிப்பாக முன்னாள் அமைச்சர்கள் சி.வி.சண்முகம், கே.பி.முனுசாமி, ஜெயக்குமார் உள்பட பலரும் இபிஎஸ்ஸை ஆதரிப்பதோடு, ஓபிஎஸ்ஸை வெளிப்படையாகவே தாறுமாறாக விமர்சித்து வருகின்றனர். 

 

இந்த பரபரப்புக்கு இடையே, கடந்த ஜூன் 23- ஆம் தேதி, சென்னையில் பொதுக்குழு கூட்டம் நடந்தது. அக்கூட்டத்தில், ஏற்கனவே நிறைவேற்றுவதற்காக முடிவு செய்து வைக்கப்பட்டிருந்த 23 தீர்மானங்களையும் ஒரே வரியில் நிராகரித்த எடப்பாடி தரப்பினர், புதிய மற்றும் நிரந்தர அவைத்தலைவராக தமிழ்மகன் உசேனை நியமித்தும், அடுத்த பொதுக்குழுவை ஜூலை 11- ஆம் தேதி கூட்டப்படும் என்றும் தீர்மானம் நிறைவேற்றினர். 

 

இதனால் உச்சக்கட்ட அதிருப்தி அடைந்த ஓ.பன்னீர்செல்வம், வைத்தியலிங்கம், மனோஜ்பாண்டியன் ஆகியோர் பொதுக்குழு கூட்டத்தில் இருந்து பாதியிலேயே வெளியேறினர். 

 

இந்நிலையில், பொதுக்குழு உறுப்பினர் சண்முகம் என்பவர், ஜூலை 11- ஆம் தேதி நடக்க உள்ள பொதுக்குழு கூட்டத்திற்கு தடை விதிக்கக் கோரியும், இபிஎஸ், சி.வி.சண்முகம், ஜெயக்குமார், திண்டுக்கல் சீனிவாசன், கே.பி.முனுசாமி, தமிழ்மகன் உசேன் ஆகியோர் மீது சென்னை உயர்நீதிமன்றத்தில் நீதிமன்ற அவமதிப்பு வழக்கு தொடர்ந்தார். 

 

இந்த வழக்கு, திங்கள்கிழமை (ஜூலை 4), நீதிபதிகள் துரைசாமி, சுந்தர்மோகன் ஆகியோர் அமர்வு முன்பு விசாரணைக்கு வந்தது. வழக்கை விசாரித்த நீதிபதிகள், ''வரும் ஜூலை 11- ஆம் தேதி நடைபெற உள்ள பொதுக்குழுவுக்கு தடை கோரி, தனி நீதிபதியிடம்தான் செல்ல வேண்டும். உச்சநீதிமன்றத்தில் முறையிடப்பட்டு உள்ளதால், நாங்கள் எந்த உத்தரவையும் இப்போது பிறப்பிக்க முடியாது. 

 

நீதிமன்ற அவமதிப்பு வழக்கில் எடப்பாடி பழனிசாமி உள்ளிட்டோர் வரும் ஜூலை 7- ஆம் தேதிக்குள் பதில் மனுத் தாக்கல் செய்ய வேண்டும்,'' என்று உத்தரவிட்டு, விசாரணையை தள்ளி வைத்தனர். ஒருபுறம் வழக்கு, மேல்முறையீடு என ஓ.பி.எஸ். தரப்பு முட்டுக்கடைகளை போட முயற்சித்தாலும், இதைப் பற்றியெல்லாம் கிஞ்சித்தும் கவலைப்படாமல் பொதுக்குழுவை நடத்துவதற்கான ஏற்பாடுகளில் இ.பி.எஸ். தரப்பு மும்முரமாக ஈடுபட்டுள்ளனர். 

 

திருவள்ளூர் மாவட்டம், வானகரத்தில் உள்ள ஸ்ரீவாரு வெங்கடாசலபதி மண்டபத்தில், ஜூலை 11- ல் பொதுக்குழுவை நடத்த விரிவான ஏற்பாடுகள் நடந்து வருகின்றன.பொதுக்குழுவில் விவாதிக்கப்பட வேண்டிய பொருண்மை விவரங்களை 2432 உறுப்பினர்கள் கையெழுத்திட்டு கடிதமாக கொடுத்துள்ளனர். இதன் விவரங்கள் தற்போது வெளியாகி உள்ளன. 

 

இது தொடர்பாக இலைக்கட்சியின் பொதுக்குழு உறுப்பினர்கள் சிலரிடம் பேசினோம். ''பொதுக்குழுவில் பங்கேற்க உள்ள உறுப்பினர்கள், தங்களுக்கு உரிய அழைப்பிதழ், அடையாள அட்டை ஆகியவற்றை கண்டிப்பாக எடுத்துச் செல்ல வேண்டும். இவற்றில் எதுவொன்று இல்லாவிட்டாலும் கூட்டத்தில் கலந்து கொள்ள முடியாது. 

 

கரோனா பரவல் அச்சம் உள்ளதால், அதற்குரிய வழிகாட்டு நெறிமுறைகளும் பின்பற்றப்படும். முகக்கவசம் அணிவதும், சமூக இடைவெளியும் கட்டாயமாக்கப்பட்டு உள்ளது. இந்தக் கூட்டத்தில் 16 பொருண்மைகள் குறித்து விவாதத்திற்கு எடுத்துக் கொள்ளப்பட உள்ளது. கழக ஒருங்கிணைப்பாளர், இணை ஒருங்கிணைப்பாளர் என்ற இரட்டைத் தலைமையை ரத்து செய்து, கழகத்தின் அடிப்படை உறுப்பினர்களால் தேர்வு செய்யப்படும் பொதுச்செயலாளர் பொறுப்பு குறித்து விவாதிக்கப்படும். 

 

முக்கியமாக, அ.தி.மு.க.வை முன்னெடுத்துச் செல்ல, இடைக்கால பொதுச்செயலாளர் பொறுப்பை உருவாக்குவது குறித்தும் பேசப்பட உள்ளது. இதே கூட்டத்தில், இடைக்கால பொதுச்செயலாளரை நியமித்து விடுவோம். இபிஎஸ்தான் அந்தப் பொறுப்புக்குத் தகுதியானவர். பொதுச்செயலாளர் தேர்தல் குறித்தும் முடிவெடுக்கப்படும். பெரியார், அண்ணா, ஜெயலலிதா ஆகியோருக்கு பாரத ரத்னா விருது வழங்க மத்திய அரசை வலியுறுத்தி தீர்மானம் போட இருக்கிறோம். 

 

இவையெல்லாம் கட்சி சார்ந்த சங்கதிகள். எனினும், திமுக அரசை கண்டித்தும் சில தீர்மானங்களை வைத்திருக்கிறோம். குறிப்பாக, அதிமுக அரசின் மக்கள் நலத்திட்டங்களை ரத்து செய்தது, விலைவாசி உயர்வு மற்றும் சட்டம் ஒழுங்கை கட்டுப்பாட்டுக்குள் வைக்கத் தவறிய திமுக அரசைக் கண்டித்தும் தீர்மானம் நிறைவேற்றப்படும்,'' என்கிறார்கள் ர.ர.க்கள். 

 

இது ஒருபுறம் இருக்க, கரோனா பரவலைக் காரணம் காட்டி, பொதுக்குழுவுக்கு ஆளுந்தரப்பில் இருந்து முட்டுக்கட்டைகள் வந்தால் என்ன செய்வது என்பதால், அதற்கும் மாற்றுத் திட்டத்தை வைத்திருக்கிறார்கள் இபிஎஸ் தரப்பினர். 

 

ஒரே இடத்தில் 3 ஆயிரம் பேர் கூடுவதற்கு அரசு தடை விதிக்கும்பட்சத்தில், அந்தந்த மாவட்டத்திலேயே பொதுக்குழு கூட்டத்தை நடத்திக்கொள்ளவும் முடிவு செய்துள்ளனர். அதற்கும் முட்டுக்கட்டை வந்தால், வீடியோ கான்பரன்ஸ் மூலமும் பொதுக்குழுவை நடத்திக்கொள்ளவும் தீர்மானித்து இருக்கிறார்கள். 

 

அவைத்தலைவராக தமிழ்மகன் உசேனை நியமித்தது செல்லாது என ஓ.பி.எஸ். தரப்பு புது குண்டை போட்டதால், எதற்கு தேவையில்லாத சர்ச்சை என்று இ.பி.எஸ். தரப்பு கருதியதோ என்னவோ, பொதுக்குழுவிற்கான அழைப்புக் கடிதத்தை அவைத்தலைவர் பெயரில் அனுப்பாமல், 'அதிமுக தலைமைக் கழகம்' என்ற பெயரில் மட்டும் அனுப்பி வைத்துள்ளனர். 

 

ஆகமொத்தத்தில், ஜூலை 11- ல், எடப்பாடி பழனிசாமி இடைக்கால பொதுச்செயலாளர் ஆவதும், அன்று ஓ.பி.எஸ்.ஸூக்கு அதிர்ச்சி வைத்தியம் அளிக்கவும் தயாராகி வருகிறது எடப்பாடி அன்டு கோ. 

 

 

சார்ந்த செய்திகள்

Next Story

“திருச்சி அதிமுக வேட்பாளர் வெற்றிக்கு ஒற்றுமையுடன் பாடுபட வேண்டும்” - தங்கமணி

Published on 29/03/2024 | Edited on 29/03/2024
 Trichy AIADMK candidate must work together for victory says Thangamani

திருச்சி மாவட்டம் முசிறி தா.பேட்டை ரோட்டில் அமைந்துள்ள தனியார் மண்டபத்தில் பெரம்பலூர் பாராளுமன்றத் தொகுதி அதிமுக வேட்பாளர் சந்திரமோகன் அறிமுகம் மற்றும் செயல் வீரர்கள் ஆலோசனைக் கூட்டம் நடைபெற்றது. கூட்டத்திற்கு திருச்சி புறநகர் மாவட்டச் செயலாளர் பரஞ்சோதி தலைமை வகித்தார். முன்னாள் எம்எல்ஏக்கள் செல்வராசு, மல்லிகா, இந்திரா காந்தி, பரமேஸ்வரி, முருகன் ஆகியோர் முன்னிலை வகித்தனர். முன்னாள் அமைச்சர்கள் மோகன், எம்.ஆர். விஜயபாஸ்கர், நாமக்கல் மாவட்டச் செயலாளரும் பெரம்பலூர் பாராளுமன்றத் தொகுதி பொறுப்பாளருமான தங்கமணி ஆகியோர் அதிமுக வேட்பாளரை ஆதரித்துப் பேசினார்.

அப்போது முன்னாள் அமைச்சர் தங்கமணி பேசியதாவது: பண பலமா? அதிகார பலமா? என்று நிரூபிக்கின்ற இந்த தேர்தலை பொறுத்தவரை நாம் வீடு வீடாகச் சென்று திண்ணைப் பிரச்சாரம் மேற்கொண்டு வாக்குகள் சேகரிக்க வேண்டும் எனவும்,  பூத்துக்கு 500 வாக்குகள் பெற்றால் கூட நாம் வெற்றி பெற முடியும். 15 நாள் உழைப்பு அடுத்த ஐந்து வருடத்திற்கான மக்கள் பலனை தரும். திருச்சி மாவட்டம் அதிமுகவின் கோட்டை என்பதை நாம் மீண்டும் நிரூபிக்க வேண்டும். ஒவ்வொரு வீட்டிற்கும் ஐந்து முறை சென்று கழக தொண்டர்கள் வாக்குகள் சேகரிக்க வேண்டும். இறந்து போனவர்கள், வெளிநாட்டில் இருப்பவர்கள் வாக்குகளை கண்டறிந்து கள்ள வாக்குகளை நாம் தடுக்க வேண்டும். அதிமுக ஆட்சியில் விலைவாசி கட்டுக்குள் இருந்தது. திமுக ஆட்சியில் விலைவாசி மற்றும் அனைத்து கட்டணங்களும் உயர்ந்துள்ளது.

நகை கடன் அனைவருக்கும் தள்ளுபடி என்று கூறிவிட்டு 45 லட்சம் பேரில் 12 லட்சம் பேருக்கு மட்டுமே தள்ளுபடி செய்துள்ளனர். 10 ஆண்டுகளில் தாலிக்கு தங்கம், லேப்டாப், இலவச சைக்கிள், மகளிர் திருமண உதவித் திட்டம் உள்ளிட்ட பல்வேறு மக்கள் திட்டங்களை நாம் நிறைவேற்றியுள்ளோம். 2026 ஆம் ஆண்டு எடப்பாடி பழனிசாமி தான் மீண்டும் முதலமைச்சர் என உறுதிமொழி ஏற்போம். உள்ளாட்சி தேர்தலுக்கும், வரும் 2026 ஆம் ஆண்டு நடைபெற உள்ள சட்டமன்றத் தேர்தலுக்கும் இந்த நாடாளுமன்றத் தேர்தல் அடித்தளமாக அமையும். பெரம்பலூர் நாடாளுமன்ற தொகுதி வேட்பாளர் சந்திரமோகனுக்கு இரட்டை இலை சின்னத்தில் பெருவாரியான வாக்குகள் பெற்று வெற்றி பெற செய்ய வேண்டுமாய் கழக தொண்டர்கள் அனைவரையும் கேட்டுக்கொள்கிறேன் என்று பேசினார்.

வேட்பாளர் சந்திரமோகனை அறிமுகப்படுத்தி விஜயபாஸ்கர் பேசியதாவது: தேர்தல் வாக்குறுதிகளை நிறைவேற்றியவர் முன்னாள் முதலமைச்சர் ஜெயலலிதா. ஏழைகளுக்கு 20 கிலோ அரிசி, தாலிக்கு தங்கம், மாணவர்களுக்கு லேப்டாப் கொடுத்தார். ஆனால் இந்த திமுக ஆட்சியில் அந்த திட்டத்தை எல்லாம் நீக்கி விட்டனர். நீட் ஒழிக்கிறேன் என்று சொல்லி இப்போது மத்தியில் காங்கிரஸ் ஆட்சி வந்த உடன் நீக்குகிறோம் என்று சொல்லி பொய் பிரச்சாரம் செய்து வாக்கு கேட்டு செல்வார்கள். அந்த பொய் பிரச்சாரத்தை முறியடிக்கும் வகையில் நமது திண்ணை பிரச்சாரம் இருக்க வேண்டும் என செயல் வீரர்களுக்கு ஆலோசனைகள் வழங்கினார்.

இதனை அடுத்து வேட்பாளர் சந்திரமோகன் பேசியதாவது:  என்னை எந்த நேரத்திலும் பொதுமக்கள் தொடர்பு கொள்ளலாம். நான் வெற்றி பெற்றவுடன்  இப்பகுதிகளுக்குரிய தேவைகளை கவனத்தில் கொண்டு நிறைவேற்ற பாடுபடுவேன் எனப் பேசினார்.

முன்னதாக முன்னாள் எம்எல்ஏ செல்வராஜ் அனைவரையும் வரவேற்றுப் பேசினார். கூட்டத்தில் தேமுதிக மாவட்டச் செயலாளர் குமார், புதிய தமிழகம் கட்சி மாவட்டச் செயலாளர் சின்னையன் , வளரும் தமிழகம் கட்சி மாவட்ட செயலாளர் தமிழன் துரைராஜ், எஸ்டிபிஐ கட்சி மாவட்டச் செயலாளர் அசாருதீன் உட்பட கூட்டணிக் கட்சி நிர்வாகிகள் தொண்டர்கள் பலர் கலந்து கொண்டனர். நிறைவில் நகரச் செயலாளர் எம்.கே. சுப்ரமணியன் நன்றி கூறினார்.

Next Story

'குறைந்தது 15 ஆயிரம் பேருக்கு மேல் கூட்டம் இருக்கணும்' - கட்டளையிட்ட த.மோ. அன்பரசன்

Published on 29/03/2024 | Edited on 29/03/2024
nn

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

திமுக, அதிமுக, நாம் தமிழர், பாஜக உள்ளிட்ட கட்சிகள் தீவிரமாக வாக்கு சேகரிக்க களத்தில் இறங்கியுள்ளது. இந்த நிலையில், செங்கல்பட்டில் நடைபெற்ற தேர்தல் பரப்புரை கூட்டத்தில் கலந்துகொண்ட அமைச்சர் தா.மோ. அன்பரசன் பேசுகையில், “நம்ம வேட்பாளர் வாராரு, மாவட்டச் செயலாளர்  வாராரு, எம்.எல்.ஏ வாராருன்னு வீட்டுக்கு வீடு தேங்காய் வாங்கி கொடுத்து விடுவார்கள். வீட்டுக்கு வீடு ஒரு சால்வை வாங்கி கொடுத்து விடுவார்கள். நான் கூட்டிட்டு வருவேன் நீங்கள் சால்வை போடுங்கள் என்று சொல்வார்கள். அப்படியெல்லாம் செய்தீர்கள் என்றால் டைம் வேஸ்ட். மத்த ஊருக்கு போவதெல்லாம் கெட்டுப் போய்விடும். அதேபோல் ஜீப் வருகிறது என்றால் இப்பொழுது வைத்தார்களே பட்டாசு அது மாதிரி பட்டாசு வைப்பார்கள். அது ஒரு அரை மணி நேரத்திற்கு வெடிக்கும். அதனால் ஊரே காலி ஆகிவிடும். தயவு செய்து சொல்கிறேன், பட்டாசு யாராவது வைத்தார்கள் என்றால் நிச்சயமாக கட்சியில் இருந்து எடுத்து விடுவார்கள். ஜாக்கிரதை கண்டிப்பாக சொல்கிறேன். சிரிக்கிறதுக்கு சொல்லவில்லை உண்மையாகவே சொல்கிறேன்.

நான் பலமுறை சொல்லிவிட்டேன். இந்த மாதிரி பட்டாசு வெடிக்காதீங்க என்று. இரவு 10 மணியோடு பிரச்சாரத்தை முடிக்கணும். நாளை மாலை நம்முடைய இளைஞர் அணி செயலாளர், விளையாட்டுத் துறை அமைச்சர் ஆலந்தூர் தொகுதியில் பிரச்சாரத்தை முடித்துவிட்டு பல்லாவரம் தொகுதிக்கு வருகிறார். அதனால் மிகப்பெரிய அளவில் மிகப்பெரிய கூட்டத்தை நாம் காட்டியாக வேண்டும். கூட்டணி கட்சித் தோழர்களும் அதிக அளவில் வரவேண்டும். நம்ம தோழர்களும் அதிக அளவில் வரவேண்டும். குறைந்தது 15 ஆயிரம் பேருக்கு மேல் அங்கு கூட்டம் இருக்கணும். பக்கத்திலேயே நாளைக்கு எடப்பாடி பழனிசாமி கூட்டம் நடைபெறுகிறது. அந்தக் கூட்டம் பிசுபிசுத்து போய்விட வேண்டும். நம்ம கூட்டம் தான் மிகப்பெரிய கூட்டம் என்பதை அதிமுககாரங்க உணரணும். நம்ம கதை முடிஞ்சு போச்சு என நாளைக்கே அவங்க முடிவு பண்ணனும்.

இங்கு காங்கிரஸ் மாவட்ட தலைவர் பேசும்போது சொன்னார், எங்கு வீக்கா இருக்குதோ அங்குதான் கவனம் செலுத்த வேண்டும் என்று. அங்கெல்லாம் கவனம் செலுத்த வேண்டியது இல்லை. எங்கு நல்லா இருக்குதோ அங்கதான் கவனம் செலுத்தணும். நீ அங்கு போய் ஓட்டு போடாதவன் கிட்ட போயிட்டு எத்தனை வாட்டி போய் கேட்டாலும் ஓட்டு போட மாட்டான். நம்ம ஆளு எங்க நல்லா இருக்கானோ அவன் கால்ல போய் விழு. அவன் ஓட்டு போடுவான். இது நம்ம தந்திரம் கற்றுக்கொள். இது எங்க வேலை. ஓட்டு போடாதவங்க கிட்ட நீ போய் தொங்கிக்கிட்டு இருக்க வேண்டிய அவசியமில்லை. என்னதான் கால்ல விழுந்தாலும் ஓட்டு போட மாட்டான். நம்ம ஆளு ஓட்டு போடுறவன் இருக்கிறான். அவர்கள் கிட்ட போய் ஓட்டு கேளுங்க. டைம் வேஸ்ட் பண்ணாதீங்க'' என்றார்.