நெல்சன் திலீப்குமார் இயக்கத்தில், நடிகர் சிவகார்த்திகேயன் நடிப்பில் உருவாகியுள்ள படம் 'டாக்டர்'. இதில், சிவகார்த்திகேயனுக்கு ஜோடியாக பிரியங்கா மோகன் நடித்துள்ளார். அனிருத் இசையமைத்துள்ள இப்படத்தை கே.ஜே.ஆர். ஸ்டூடியோஸ் ராஜேஷ் மற்றும் நடிகர் சிவகார்த்திகேயன் இணைந்து தயாரித்துள்ளனர்.
இப்படம் மார்ச் 26-ஆம் தேதி வெளியாகவிருந்த நிலையில், எதிர்வரவிற்கும் சட்டமன்றத் தேர்தலை முன்னிட்டு ரிலீஸ் ஒத்திவைக்கப்பட்டுள்ளது. இதனையடுத்து, டாக்டர் திரைப்படம் ரம்ஜான் தினத்தையொட்டி வெளியாகவுள்ளதாக படக்குழு அறிவித்துள்ளது.
சுந்தர் சி இயக்கத்தில் வெளியான 'அரண்மனை' மற்றும் 'அரண்மனை -2' படங்களுக்கு கிடைத்த வரவேற்பைத் தொடர்ந்து 'அரண்மனை -3' உருவாகி வருகிறது. ஆர்யா நாயகனாக நடித்துள்ள இப்படத்தின் படப்பிடிப்பை நிறைவு செய்துள்ள சுந்தர் சி, இறுதிக்கட்டப்பணிகளில் கவனம் செலுத்தி வருகிறார். இந்த நிலையில், அரண்மனை 3 படத்தை ரம்ஜான் தினத்தையொட்டி திரைக்குக் கொண்டுவர சுந்தர் சி திட்டமிட்டுள்ளதாகத் தகவல் வெளியாகியுள்ளது.
இந்த இரு படங்களுக்கும் மிகப்பெரிய எதிர்பார்ப்பு உள்ள நிலையில், ஒரே தினத்தில் வெளியாகும் பட்சத்தில் தியேட்டர்கள் கிடைப்பதில் தொடங்கி பல நெருக்கடிகள் ஏற்படும் என எதிர்பார்க்கப்படுகிறது.