Skip to main content

பிரதமர் மோடி ஆட்சியில் உயர்ந்தது விவசாயிகளின் வருமானம் அல்ல...!

Published on 28/11/2020 | Edited on 28/11/2020

 

farmer delhi chalo

 

 

மத்திய அரசு கொண்டுவந்த புதிய வேளாண் சட்டங்களை எதிர்த்து பஞ்சாப், ஹரியானாவை சேர்ந்த விவசாயிகள் ‘டெல்லி சலோ’ என்கிற பேரணியை நேற்று முன் தினம் தொடங்கினர். இதில் பஞ்சாபை சேர்ந்த விவசாயிகள் ஹரியானா வழியாக டெல்லியை நோக்கி பேரணி நடத்த திட்டமிட்டு, ஹரியானாவில் நுழையும்போது பல்லாயிரக் கணக்கான விவசாயிகளுக்கும் ஹரியானா போலீஸாருக்கும் இடையே மோதல் வெடித்தது. அவர்களை ஹரியானாவுக்கு நுழையவிடாமல் தடுக்க அந்த மாநில அரசு முயன்றது. விவசாயிகள் மீது தடியடி நடத்தினர். தண்ணீரை பீய்ச்சி அடித்து விரட்டினர். கண்ணீர் புகைகுண்டுகளை வீசி கூட்டத்தை கலைக்க முயன்றனர். இது தொடர்பாக 50க்கும் மேற்பட்ட விவசாயிகள் கைது செய்யப்பட்டனர். ஆனால், தடைகளை உடைத்து ஹரியானா விவசாயிகளுடன் பஞ்சாப் விவசாயிகள் கைகோர்த்து பேரணியை தொடங்கினர். இரண்டாம் நாளான நேற்று டெல்லியை நெருங்கும் சமயத்தில், அவர்களை டெல்லிக்குள் அனுமதிக்கவிடாமல் ஹரியானா எல்லைப்பகுதியிலேயே தடுத்து நிறுத்தி வைத்தனர். மீண்டும் போலீஸாருக்கும், விவசாயிகளுக்கும் இடையே நேற்று காலை மோதல் வெடித்தது. டெல்லி எல்லைப்பகுதியில் பதற்றம் நிலவியது. திடீரென, விவசாயிகளுக்கு உள்ளே நுழைய அனுமதி வழங்கியது டெல்லி போலீஸ். டெல்லி திக்ரி எல்லைப் பகுதியில் விவசாயிகள் சாலையில் அமர்ந்து போராட்டத்தில் ஈடுபட, போலீஸார் மீண்டும் தடியடி நடத்தியும், தண்னீர் பீய்ச்சியும் விவசாயிகளை அடித்து விரட்டினர்.

 

அதன்பின் டெல்லி புராரி பகுதியிலுள்ள மைதானத்தில் அமைதியான வழியில் போராட்டங்களை நடத்திக்கொள்ள விவசாயிகளுக்கு அனுமதி வழங்கப்பட்டது. ஆனால், விவசாயிகள் ஆங்காங்கே வாகனங்களுடன் விவசாயிகள் கூடியிருந்ததால் டெல்லியில் தொடர்ந்து பதற்றம் நீடிக்கிறது. விவசாயிகளின் போராட்டத்தால் நெற்று டெல்லி போக்குவரத்து நிலைகுழைந்துவிட்டது. இதனிடையே, மத்திய வேளாண் துறை அமைச்சர் நரேந்திர சிங் தோமர் நேற்று கூறும்போது, “விவசாயிகளுடன் பேச்சுவார்த்தை நடத்த மத்திய அரசு தயாராக உள்ளது. டிசம்பர் 3ஆம் தேதி அடுத்தக்கட்ட பேச்சுவார்த்தைக்கு வருமாறு விவசாய சங்கங்களுக்கு அழைப்பு விடுக்கிறேன்” என்றார். ஏற்கனவே கடந்த 13ஆம் தேதி விவசாய சங்க பிரதிநிதிகளுடன் மத்திய அரசு தரப்பில் பேச்சுவார்த்தை நடைபெற்றது. இதில் விவசாயிகள் சார்பாக ஐந்து கோரிக்கைகள் முன்வைக்கப்பட்டன. இந்த கோரிக்கைகள் நிறைவேற்றப் படாததால்தான் அவர்கள் ஏற்கனவே திட்டமிட்டப்படி இந்த பஞ்சாப், ஹரியானா, உ.பி, உத்தரகாண்ட், ராஜஸ்தான் உள்ளிட்ட மாநிலங்களை சேர்ந்த விவசாயிகள் ஏராளமான டிராக்டர், லாரிகளில் நேற்று முன் தினம் இந்த டெல்லி சலோ என்கிற முழக்கத்துடன் பேரணியை தொடங்கியுள்ளனர். தற்போது வரையில் இந்த விவசாயிகளின் போராட்டம், போலீஸாரின் தடியடியால் டெல்லியே பதற்றத்தில் இருக்கிறது. இன்று டெல்லியில் மட்டும் 3 லட்சம் விவசாயிகள் கூடுவார்கள் என்று சொல்லப்படுகிறது. இதனை தடுப்பதற்காக அந்தந்த மாநிலங்களில் இருந்து டெல்லிக்கு வரும் ரயில்கள் ரத்து செய்யப்பட்டுள்ளன, சில ரயில்கள் வேறு பாதையில் அனுப்பப்பட்டுள்ளன, சில ரயில்கள் பாதி வழியில் திருப்பி அனுப்பப்பட்டுள்ளது.

 

விவசாயிகளின் இந்த போராட்டத்தை கட்டுக்குள் கொண்டுவர டெல்லி போலீஸாருடன் சிஐஎஸ்எஃப் உட்பட பல்வேறு படைகளைச் சேர்ந்த வீரர்களும் பாதுகாப்பு பணியில் ஈடுபடுத்தப்பட உள்ளனர். இந்த போராட்டத்திற்கு இந்தியா முழுவதிலும் விவசாயிகளிடமிருந்து ஆதரவு பெருகி வருகிறது. ஒருசில முக்கிய விவசாய சங்க தலைவர்கள் இந்த போராட்டத்தில் கலந்துகொள்ள இருப்பதாக அறிவித்தவர்களை வீட்டு காவலில் போலீஸ் வைத்துள்ளது. என்சிஆர்பியின் கணக்குப்படி மோடி இந்தியாவின் பிரதமரானபின் விவசாயிகளின் போராட்டம் மலமலவென உயர்ந்திருப்பது தெரிய வருகிறது. 2014 முதல் 2016 என்கிற இடைப்பட்ட காலத்தில் மட்டும் சட்டத்தை மீறிய விவசாயிகள் நடத்தும் போராட்டம் 628லிருந்து 4837ஆக அதிகரித்துள்ளது. சுமார் 700 சதவீதம் இரண்டு வருடங்களில் உயர்ந்திருப்பதாக தெரிகிறது. தன்னுடைய ஆட்சியில் விவசாயிகளின் வருமானம் இரட்டிப்பாகும் என்று பிரச்சாரங்களில் பேசி விவசாயிகளின் நம்பிக்கைக்கு பயிரிட்ட நரேந்திர மோடி. வெற்றிபெற்ற பின்னர் விவசாயிகளுக்கு தான் கொடுத்த வாக்குறுதியை நிறைவேற்ற பெரிதும் உழைத்ததாக தெரியவில்லை. 2018ஆம் ஆண்டு நடைபெற்ற விவசாய மாநாட்டில், காணொளி காட்சி மூலம் பங்கேற்ற பிரதமர் மோடி, “2022ஆம் ஆண்டுக்குள் விவசாயிகளின் வருமானம் இரட்டிப்பாக்க அரசு உறுதி எடுத்துள்ளது” என்று பேசினார். அதன்மீது நம்பிக்கை வைத்த விவசாயிகளுக்கு, பேரதிர்ச்சியாக அமைந்தது புதிய வேளாண் திருத்த சட்டம், போராட்டம் பல மடங்காக இரட்டிப்பாகியுள்ளது என்பது வருத்தமான விஷயமே. தொடக்கத்தில் சிறு சிறு ஆர்ப்பாட்டங்களாக இருந்துவந்த விவசாயிகளின் போராட்டங்கள் தற்போது மத்திய அரசுடனான நேரடி போராட்டமாக மாறி இருப்பதனால்தான் தெருக்களிலிருந்து டெல்லியை நோக்கிய பயணமாக கடந்த இரண்டாண்டில் மாறியிருக்கிறது.

 

(மேற்குறிப்பிட்ட 700 சதவீத விவசாய போராட்டம் அதிகரிப்பு என்பது 2014 முதல் 2016 வரை மட்டுமே. இன்னும் 2017 முதல் தற்போது வரையிலான போராட்டங்களின் எண்ணிக்கை அதிகமானதாக இருக்கும் என்று சொல்லப்படுகிறது.)

 

 

Next Story

டெல்லி மேயர் தேர்தல் ரத்து; பா.ஜ.க.வுக்கு எதிராக ஆம் ஆத்மி ஆர்ப்பாட்டம்

Published on 26/04/2024 | Edited on 26/04/2024
 Aam Aadmi struggle for Canceled Delhi Mayoral Election

18ஆவது நாடாளுமன்றத் தேர்தல் நாடு முழுவதும் களைகட்டி வருகிறது. அதன்படி முதற்கட்டமாக கடந்த 19ஆம் தேதி தொடங்கி வரும் ஜூன் 1 ஆம் தேதி வரை 7 கட்டமாக வாக்குப்பதிவு நடைபெறவுள்ளது. முதற்கட்டமாக 21 மாநிலங்கள் மற்றும் யூனியன் பிரதேசங்களில் உள்ள 102 இடங்களுக்கு வாக்குப்பதிவு நடைபெற்றது. இதன் ஒரு பகுதியாக நாடு முழுவதும் 13 மாநிலங்களில் உள்ள 87 மக்களவைத் தொகுதிகளில் இன்று (26.04.2024) 2ஆம் கட்ட வாக்குப்பதிவு நடைபெற்று வருகிறது.

இதற்கிடையில், டெல்லி மேயர் மற்றும் துணை மேயரைத் தேர்வு செய்வதற்கான தேர்தல் இன்று (26-04-24) நடைபெற இருந்த நிலையில், திடீரென ரத்து செய்யப்பட்டுள்ளது. இதற்கு ஆம் ஆத்மி கட்சியினர் கடும் கண்டனம் தெரிவித்து வருகின்றனர்.

டெல்லி மாநிலத்தில் மொத்தம் 250 கவுன்சிலர்கள் உள்ளனர். டெல்லியில் உள்ள மேயரைத் தேர்ந்தெடுக்க 10 எம்.பி.க்கள், 14 எம்.எல்.ஏ.க்கள் மற்றும் 250 கவுன்சிலர்கள் 274 வாக்காளர்கள் வாக்களிப்பார்கள். இதில் மேயர் தேர்தலில் போட்டியிடும் வேட்பாளருக்கு அதிகபட்சமாக 138 வாக்குகள் தேவை. அந்த வகையில், ஆம் ஆத்மி கட்சிக்கு, காங்கிரஸ் கவுன்சிலர்கள் மற்றும் சுயேட்சை கவுன்சிலர்கள் உட்பட 151க்கும் மேற்பட்ட வாக்குகள் கிடைக்கப்பெற இருந்தது. இதனால், டெல்லி மேயர் தேர்தலில் ஆம் ஆத்மி கட்சி வெற்றி வாய்ப்பு அதிகமாக இருந்தது.

இந்த நிலையில், டெல்லி மேயர் தேர்தலை ஆளுநர் அலுவலகம் ரத்து செய்யப்படவுள்ளதாக டெல்லி மாநகராட்சி அறிவித்துள்ளது. இது குறித்து தெரிவிக்கையில், ‘தலைமை அதிகாரி நியமிக்கப்படாததால் டெல்லி மேயர் தேர்தல் தள்ளி வைக்கப்படுகிறது; எனத் தெரிவிக்கப்பட்டுள்ளது. இதற்கு ஆம் ஆத்மி கடும் கண்டனம் தெரிவித்து மேயர் சபையில் போராட்டம் நடத்தி வருகின்றது.

இது குறித்து ஆம் ஆத்மி எம்.பி சஞ்சய் சிங் கூறுகையில், “ பட்டியலின சமூகத்தைத் தடுக்க இவர்கள் சதி செய்கிறார்கள். இந்த முறை, பட்டியலின சமூகத்தைச் சேர்ந்தவர்தான் டெல்லி எம்சிடியின் மேயராக வர இருந்தது. ஆனால் தேர்தலை ரத்து செய்ததன் மூலம், அவர் தனது பட்டியலின விரோத மனநிலை மற்றும் அரசியலமைப்புச் சட்டத்தை சிதைத்ததற்கு மற்றொரு சான்றைக் கொடுத்துள்ளனர்” எனப் பேசினார். தற்போது மேயர் ஷெல்லி ஓபராயின் பதவிக்காலம் மார்ச் 31-ஆம் தேதியுடன் முடிவடைந்த நிலையில் புதிய மேயர் தேர்ந்தெடுக்கப்படும் வரை அவர் பதவியில் நீடிப்பார் என்று கூறப்பட்டுள்ளது. 

Next Story

“இதை செய்ய சொன்னால் இந்தியாவை விட்டு வெளியேறுவோம்” - வாட்ஸ் அப் எச்சரிக்கை!

Published on 26/04/2024 | Edited on 26/04/2024
 WhatsApp warning May have to leave India

உலகம் முழுவதும் உள்ள கோடிக்கணக்கான மக்கள் உபயோகிக்கும் செயலி தான் வாட்ஸ் அப். இந்த செயலி மூலம், தகவல்களை பரிமாறவும், இணைய சேவை மூலம் எந்தவித கட்டணமுமின்றி வீடியோ கால், ஆடியோ கால் போன்றவற்றை பயன்படுத்தவும் முடியும். மேலும், புகைப்படங்கள், வீடியோக்கள், ஸ்டிக்கர்கள் என அனைத்து விதமான பரிமாற்றங்களையும் இந்த செயலி மூலம் அனுப்பக்கூடிய வசதிகள் உண்டு. இந்த செயலியை உபயோகிக்காத மக்கள் மிகவும் சொற்பமாக தான் இருக்க முடியும் என்றுதான் கூற வேண்டும். 

இதற்கிடையில் வாட்ஸ் அப் பயனர்களின் வசதிகளுக்கு ஏற்றவாறு வாட்ஸ் அப் நிறுவனம் அவ்வப்போது புதிய அப்டேட்களை அறிமுகப்படுத்தி வருகிறது. அந்த வகையில், இந்த செயலி மூலம் பயனர் ஒருவருக்கு அனுப்பும் செய்திகளை மூன்றாம் நபர்கள் பார்க்க முடியாதவாறு எண்டு டு எண்டு என்கிரிப்ஷன் ( End to End Encryption) முறையை கொண்டு வந்தது. இதனைப் பயன்படுத்தி பயனர்கள், தாங்கள் அனுப்பும் செய்திகளை பாதுகாத்து கொள்ளலாம். இதனால், தனிப்பட்ட ஒருவரின் செய்திகள் பாதுகாக்கப்படும் என்று கூறப்படுகிறது. 

இந்த நிலையில், கடந்த 2021ஆம் ஆண்டு இந்தியாவில் தகவல் தொழில்நுட்ப சட்டங்களில் மத்திய அரசு புதிய மாற்றத்தை கொண்டு வந்தது. மத்திய அரசு கொண்டு வந்த அந்த சட்டத்தில் கூறியதாவது, போலி செய்திகளையும், நாட்டின் பாதுகாப்பு காரணங்களுக்காகவும் தவறான செய்தி பகிர்வுகளை கண்டறிய வேண்டும். இதனால், வாட்ஸ் அப், பேஸ்புக் போன்ற செய்தி பகிர்வு செயலி வாயிலாக பகிரப்படும் அனைத்து செய்திகளும் சேமிக்கப்பட வேண்டும் என்று கூறப்பட்டது.

இதனை எதிர்த்து வாட்ஸ் அப், பேஸ் புக் ஆகிய நிறுவனங்கள் டெல்லி உயர்நீதிமன்றத்தில் வழக்கு தொடர்ந்தது. இது தொடர்பான வழக்கு நேற்று (25-04-24) டெல்லி உயர்நீதிமன்றத்தில் விசாரணைக்கு வந்தது. அப்போது, மத்திய அரசு சார்பில் ஆஜரான வழக்கறிஞர் கூறுகையில், ‘வாட்ஸ் அப் எண்டு டு எண்ட் என்கிரிப்ஷன் காரணமாக போலி செய்திகளை கண்டறிவதில் சிக்கல் ஏற்படுகிறது. மேலும், இது போலி செய்திகளால் நாட்டில் நிலவும் அமைதி மற்றும் ஒற்றுமையை சீர்குலைத்துவிடும்’ என வாதிட்டார். 

இதனையடுத்து, வாட்ஸ் அப் தரப்பில் ஆஜரான வழக்கறிஞர் தேஜஸ் காரியா, “இந்த சட்டத்தை அமல்படுத்துவதால் நாங்கள் ஒரு முழுமையான சங்கிலியை வைத்திருக்க வேண்டும். மேலும், மில்லியன் கணக்கான செய்திகளை பல ஆண்டுகளாக சேமிக்க வேண்டும் நிலை உருவாகும். உலகில் எந்த நாட்டிலும் இது போன்ற சட்டங்கள் இல்லை.  இது போன்ற சட்டங்களை கொண்டு வந்து  என்கிரிப்ஷனை எடுக்க சொன்னால் வாட்ஸ்அப் இந்தியாவை விட்டு செல்ல வேண்டி இருக்கும்” எனத் தெரிவித்தார். இருதரப்பு வாதங்களை கேட்ட நீதிபதிகள், இது தொடர்பான வழக்கை ஒத்திவைத்தனர்.