Skip to main content

தமிழ்நாட்டுல இருந்து பதவி கேட்டு வராதீங்க... உளவுத்துறை கொடுத்த ரிப்போர்ட... எச்சரித்து அனுப்பிய அமித்ஷா! 

Published on 16/03/2020 | Edited on 16/03/2020

தலைவர் இல்லாமல் தவித்துக் கொண்டிருந்த தமிழக பா.ஜ.க.வின் புதிய தலைவராக தேசிய தாழ்த்தப்பட்ட மற்றும் பழங்குடியினர் ஆணையத்தின் துணைத் தலைவராக இருக்கும் எல்.முருகனை நியமித்திருக்கிறார் தேசிய தலைவர் ஜே.பி.நட்டா!

தலைவர் நியமிக்கப்பட்டதில் நிம்மதிப் பெருமூச்சு கமலாலயத்தில் எழுந்தாலும் அப்பதவியை எதிர்பார்த்திருந்த சீனியர் தலைவர்களுக்கு ஏக வருத்தம். தங்களது ஆதரவாளர்களிடம் கோபத்தைக் கொட்டித் தீர்த்துள்ளனர்.

 

bjp



தமிழக தலைவராக இருந்த தமிழிசை சௌந்தரராஜன் தெலுங்கானாவின் கவர்னராக நியமிக்கப்பட்டதைத் தொடர்ந்து கடந்த 6 மாதங்களுக்கும் மேலாக தமிழக பா.ஜ.க. தலைவர் பதவி காலியாகவே இருந்தது. இந்த பதவியைக் கைப்பற்ற முன்னாள் தலைவர் பொன். ராதாகிருஷ்ணன், ஹெச்.ராஜா, கேசவ விநாயகம், சி.பி.ராதாகிருஷ்ணன், வானதி சீனிவாசன், நயினார் நாகேந்திரன், முருகானந்தம், கருப்பு முருகானந்தம், கே.டி.ராகவன் உள்ளிட்ட 12-க்கும் மேற்பட்ட பெருந்தலைகள் முட்டி மோதின.

புதிய தலைவரை நியமிப்பது குறித்து முன்னாள் தேசிய தலைவர் அமித்ஷாவும் இன்னாள் தேசிய தலைவர் ஜே.பி.நட்டாவும் பல்வேறு ஆலோசனைகளை நடத்தினர். தமிழக பா.ஜ.க. தலைவர்கள் குறித்த ஒரு பட்டியலை தயாரித்து அவர்களைப் பற்றிய முழு ரிப்போர்ட் வேண்டும் என மத்திய உளவுத்துறைக்கு உத்தரவிட்டிருந்தார் மத்திய உள்துறை அமைச்சரான அமித்ஷா. பட்டியலில் இருந்தவர்களைப் பற்றி விசாரித்த உளவுத்துறை, ஒருவரை பற்றிக்கூட நல்ல ஒப்பீனியனை தரவில்லை. ஒவ்வொருவர் மீதும் பல புகார்களை தெரிவித்திருந்தது. இதனால் தமிழக தலைவர்கள் மீது அமித்ஷாவுக்கு நம்பிக்கை இல்லை.

 

bjp



இருப்பினும் தமிழக தலைவர்கள் ஒவ்வொருவரும் அவரவரின் டெல்லி லாபியைக் கொண்டு முயற்சித்தனர். இதனையறிந்த அமித்ஷா, தமிழகத்திலிருந்து பதவி கேட்டு யாரும் டெல்லிக்கு வரக் கூடாது என எச்சரித்திருந்தார். யார் மீதும் நம்பிக்கை இல்லை; ஒருவர் கூட மக்களுக்கு நெருக்கமானவராக இல்லை என்கிற வருத்தத்தில் தேசிய தலைவர்கள் இருந்ததால் புதிய தலைவரை தேர்வு செய்வதில் இழுபறி நீடித்தது. அதேசமயம், பல மாதங்களாக தலைவர் இல்லாததால் கட்சிப் பணிகள் முடங்கி கிடக்கிறது என்கிற புகார்கள் பா.ஜ.க. தலைமையகத்தை முற்றுகையிட்டதை உணர்ந்து, டெல்லி தேர்தல் முடிந்ததும் தலைவர் நியமிக்கப்படுவார் என்கிற உறுதியை தமிழக பா.ஜ.க.வினருக்கு கொடுத்திருந்தார் ஜே.பி.நட்டா! ஆனால், டெல்லி தேர்தல் முடிந்ததும் வெடித்த கலவரத்தால் தமிழக பா.ஜ.க. தலைவர் விவகாரம் கிடப்பில் விழுந்தது. இந்த நிலையில், கடந்த திங்கள் கிழமை நடந்த ஆலோசனையில்தான் எல்.முருகனை தேர்வு செய்திருக்கிறார்கள். ஜே.பி.நட்டாவுக்கு மிக நெருக்கமானவர் முருகன்.


"ராஜ்யசபா எம்.பி.க்களாக கடந்த முறை அ.தி.மு.க.வும், தற்போது தி.மு.க.வும் அருந்ததியர் சமூகத்திற்கு முக்கியத்துவம் தந்து கொங்கு மண்டலத்தை மையப் படுத்தி அரசியல் செய்வதால் பா.ஜ.க.வும் அருந்ததியருக்கு வாய்ப்பளிக்கும் முகமாக முருகனை தேர்வு செய்திருக்கிறது. தலித் சமூகத்திற்கு பா.ஜ.க. எதிரி என்பது போல தமிழகத்தில் சித்தரிக்கப்பட்டு வருவதை உடைப்பதற்காகவும், தலைவர் பதவியையே ஒரு தலித்திற்கு கொடுத்துள்ளோம் என்பதை உணர்த்தவும்தான் இந்தத் தேர்வு'' என்கின்றனர் பா.ஜ.க. தலைமைக்கழக நிர்வாகிகள்.


நாமக்கல் மாவட்டம், ராசிபுரத்தை சேர்ந்த எல்.முருகன் சட்டப்படிப்பில் முதுகலை படித்திருக்கிறார். மனித உரிமைகள் சட்டத்தில் டாக்டர் பட்டம் பெற்றிருக்கும் முருகன், சென்னை உயர்நீதிமன்றத்தில் 15 ஆண்டுகளாக வழக்கறிஞராகவும் இருந்துள்ளார். தமிழிசையின் சிபாரிசில்தான் தேசிய தாழ்த்தப் பட்டோர் ஆணையத்தின் துணைத் தலைவர் பதவியும் முருகனுக்கு கிடைத்திருக்கிறது. முரசொலி நிலம் விவகாரம் தொடர்பாக ஆணையத்திலிருந்து தி.மு.க.வுக்கு நோட்டீஸ் அனுப்பியது இந்த முருகன்தான்.

 

 

bjp



அவரிடம் நாம் பேசியபோது, "தொண்டர்களில் ஒருவனாக இருந்து தமிழகத்தில் பா.ஜ.க.வை வளர்ப்பதே என்னுடைய தலையாய பணி. தலைவர் பதவியை அதிகாரமாக நினைக்காமல் சேவைக்கான வாய்ப்பாகவே கருதுகிறேன்'' என்கிறார்.

முருகன் நியமனம் குறித்து சீனியர் தலைவர்கள் சிலரிடம் பேசிய போது, "அ.தி.மு.க.வில் ராஜ்யசபா சீட் ஜி.கே. வாசனுக்கு தரப்படுகிறது. இதற்கு முழு காரணம் எங்களின் தேசிய தலைமை தான். அமித்ஷாவின் சிபாரிசு இல்லாமல் வாசனுக்கு சீட் கிடைத்திருக்கவே கிடைத்திருக்காது. இந்த வாய்ப்பை தமிழக பா.ஜ.க.வினருக்கு தந்திருக்க லாமே! கட்சி பணிகளை செய்வ தில்லை, கட்சியை வளர்க்கவில்லை என எங்களை குறை சொல்லிக்கொண்டே இருக்கும் தேசிய தலைமை, கிடைக்கிற வாய்ப்புகளையும் யாருக்காகவோ எதற்காகவோ ஒதுக்கினால் எங்களுக்கு எப்படி நம்பிக்கை வரும்?

எங்களைப் பற்றி சிந்திக்காத போது கட்சியைப் பற்றி நாங்கள் எப்படி சிந்திக்க முடியும்? நாடு முழுக்க ஊழல் எதிர்ப்பு முழக்கத்தை முன்னிறுத்தி விட்டு, தமிழகத்தில் ஒரு ஊழல் ஆட்சிக்கு உறுதுணையாக இருந்து வருவதை மக்கள் ரசிக்கவில்லை. பா.ஜ.க.வை பற்றி மக்கள் கோபம் காட்டுகிறார்கள். அப்படியிருக்க, கட்சியை எப்படி வளர்க்க முடியும்?

ராஜ்யசபா சீட்டில் என்ன தவறுகளை செய்திருக்கிறதோ அதேதான் தலைவர் நியமனத்திலும் செய்திருக்கிறது எங்கள் தலைமை. ஒரு பொறுப்பான பதவியிலிருப்பவரை தலைவராக நியமிக்க வேண்டிய அவசியம் என்ன? மக்களுக்கு அறிமுகமில்லாத நபரை நியமித்து கட்சியை எப்படி வளர்க்கப் போகிறார்கள்? தெரியவில்லை. ஆக, முருகனின் நியமனம் பல விதங்களிலும் சீனியர்களி டம் அதிருப்தியை உருவாக்கியிருக்கிறது'' என்கின்றனர் மிக அழுத்தமாக. புதிய தலைவரின் செயல்பாடுகளில் இருக்கிறது பா.ஜ.க.வின் இமேஜ்.


 

Next Story

4 கோடி ரூபாய் சிக்கிய விவகாரம்; ஹோட்டல் ஊழியர்கள் காவல் நிலையத்தில் ஆஜர்

Published on 23/04/2024 | Edited on 23/04/2024
 4 crore rupees issue; Hotel staff present at police station

உலகின் மிகப்பெரிய ஜனநாயக திருவிழாவான இந்திய நாட்டின் 18ஆவது நாடாளுமன்றத் தேர்தல் நாடு முழுவதும் களைகட்டி வருகிறது. அதன்படி முதற்கட்டமாக கடந்த 19.04.2024 அன்று தமிழகம் மற்றும் புதுச்சேரியில் வாக்குப்பதிவு முடிந்தது. வரும் ஜூன் 1 ஆம் தேதி வரை 7 கட்டமாக வாக்குப்பதிவு நடைபெற உள்ளது.

முன்னதாக தமிழகத்தில் தேர்தல் பரப்புரைகள் தீவிரமாக சென்று கொண்டிருந்த நேரத்தில் சென்னை எழும்பூர் ரயில் நிலையத்தில் இருந்து திருநெல்வேலிக்கு செல்லும் ரயிலில் தாம்பரம் ரயில் நிலையத்தில் கடந்த 06.04.2024 அன்று இரவு உரிய ஆவணங்களின்றி கொண்டு செல்ல முயன்ற ரூ.4 கோடி மதிப்பிலான ரொக்கம் பறக்கும் படையினரால் பறிமுதல் செய்யப்பட்டது. 6 பைகளில் கட்டுக்கட்டாக இருந்த 500 ரூபாய் நோட்டுகளைப் பறக்கும் படையினர் அதிரடியாகப் பறிமுதல் செய்தனர்.

இதையடுத்து இந்தப் பணத்தை எடுத்து வந்த புரசைவாக்கம் தனியார் விடுதி மேலாளரும் பாஜக உறுப்பினருமான சதீஷ், அவரின் சகோதரர் நவீன் மற்றும் லாரி ஓட்டுநர் பெருமாள் ஆகிய 3 பேரும் கைது செய்யப்பட்டனர். திருநெல்வேலி மக்களவைத் தொகுதி பாஜக வேட்பாளர் நயினார் நாகேந்திரனுக்கு, இந்தப் பணத்தைக் கொண்டு செல்ல முயன்றதாக மூவரும் பகீர் வாக்குமூலம் கொடுத்ததாகத் தகவல் வெளியாகி இருந்தது. இச்சம்பவம் தமிழகம் முழுவதும் பெரும் பரபரப்பை ஏற்படுத்தியது.

சம்பவத்தில் ரொக்கமாக நான்கு கோடி ரூபாய் பறிமுதல் செய்யப்பட்டது தொடர்பாக நயினார் நாகேந்திரன் ஆஜராகி பதிலளிக்கும்படி காவல்துறை தரப்பில் சம்மன் அனுப்பப்பட்டிருந்தது. ஆனால் நயினார் நாகேந்திரன் விசாரணைக்கு ஆஜராகாத நிலையில் விசாரணைக்கு ஆஜராக பத்து நாட்கள் அவகாசம் வேண்டும் என நயினார் நாகேந்திரன் தரப்பில் காவல்துறைக்கு பதில் கடிதம் கொடுக்கப்பட்டுள்ளது.

நெல்லையில் நான்கு கோடி ரூபாய் பணம் கைப்பற்றப்பட்டது தொடர்பாக நயினார் நாகேந்திரனின் ஹோட்டலில் பணியாற்றிய  ஊழியர்கள் மற்றும் உறவினர்களுக்கு காவல்துறை சார்பில் நேரில் ஆஜராக சம்மன் அனுப்பட்டிருந்தது. தாம்பரம் காவல் நிலையத்தில் ஆஜராகி இது தொடர்பாக விளக்கம் அளிக்க உத்தரவிடப்பட்டிருந்தது. இந்நிலையில் நயினார் நாகேந்திரனின் ஹோட்டலில் பணியாற்றிய இரண்டு ஊழியர்கள் தற்போது தாம்பரம் காவல் நிலையத்தில் விசாரணைக்கு ஆஜராகி உள்ளனர். ராஜேந்திரனின் உறவினர் ஆஜராகவில்லை என்று கூறப்படுகிறது. இதனால் நயினார் நாகேந்திரனின் உறவினர் முருகன் என்பவரிடம் இன்று மாலை விசாரணை நடத்த தாம்பரம் போலீசார் முடிவு செய்திருப்பதாகவும்  தகவல்கள் வெளியாகி உள்ளது.

Next Story

பா.ஜ.க வேட்பாளரின் நாடகம் அம்பலம்!

Published on 23/04/2024 | Edited on 23/04/2024
BJP candidate's play exposed in kerala

நாட்டின் 18ஆவது நாடாளுமன்றத் தேர்தல் நாடு முழுவதும் களைகட்டி வருகிறது. அதன்படி வாக்குப்பதிவானது முதற்கட்டமாக கடந்த ஏப்.19 ஆம் தேதி தொடங்கி, வரும் ஜூன் 1 ஆம் தேதி வரை 7 கட்டமாக நடைபெறவுள்ளது. அதில் பதிவாகும் வாக்கு எண்ணிக்கையானது ஜூன் 4ஆம் தேதி நடைபெற்று அன்றே முடிவுகள் அறிவிக்கப்பட இருக்கின்றன. இதனிடையே, முதற்கட்டமாக தமிழ்நாடு உள்ளிட்ட 21 மாநிலங்கள் மற்றும் யூனியன் பிரதேசங்களில் உள்ள 102 இடங்களுக்கு கடந்த ஏப்.19 ஆம் தேதி வாக்குப்பதிவு நடைபெற்றது.

அதே வேளையில், மொத்தம் 20 மக்களவைத் தொகுதிகள் கொண்ட கேரளா மாநிலத்தில், இரண்டாம் கட்டமாக வருகிற ஏப்ரல் 26ஆம் தேதி ஒரே கட்டமாக தேர்தல் நடைபெறவிருக்கிறது. இங்கு நடைபெறும் தேர்தலை எதிர்கொள்ள கம்யூனிஸ்ட் கட்சி, காங்கிரஸ், பா.ஜ.க ஆகிய கட்சிகள் தீவிர பிரச்சாரத்தில் ஈடுபட்டு வருகின்றன. இதற்கான தேர்தல் பிரச்சாரம் இன்று (23-04-24) மாலையுடன் நிறைவடையவுள்ளது.

அந்த வகையில், கேரளா மாநிலம், கொல்லம் மக்களவைத் தொகுதியில் பா.ஜ.க சார்பில் பிரபல மலையாள நடிகர் கிருஷ்ணகுமார் போட்டியிடுகிறார். இந்த தேர்தலில் வெற்றி பெற்றே ஆக வேண்டும் என்ற ஒரே நோக்கத்தில் அந்த தொகுதி முழுவதும் கிருஷ்ணகுமார் தேர்தல் பிரச்சாரம் மேற்கொண்டு வந்தார். அதன்படி, கொல்லம் மக்களவைத் தொகுதிக்குட்பட்ட குந்த்ரா பகுதியில் உள்ள சந்தையில் இரு தினங்களுக்கு முன்பு அங்குள்ள மக்களிடம் வாக்கு சேகரித்து கொண்டிருந்தார். அப்போது, அங்கு கிருஷ்ணகுமாரின் கண்ணில் கூர்மையான ஆயுதம் பட்டு பலத்த காயம் ஏற்பட்டது.

BJP candidate's play exposed in kerala

இதனையடுத்து, காயமடைந்த அவரை அருகில் உள்ள மருத்துவமனையில் சிகிச்சைக்காக அனுமதித்தனர். அங்கு கிருஷ்ணகுமாரின் கண்ணில் தையல் போட்டு சிகிச்சை மேற்கொள்ளப்பட்டது. இதற்கிடையே, எதிர்க்கட்சியினர் தாக்கியதில் கண்ணில் காயம் ஏற்பட்டதாக பா.ஜ.க வேட்பாளர் கிருஷ்ணகுமார் புகார் கூறினார். இது தொடர்பாக கிருஷ்ணகுமார் தனது எக்ஸ் (ட்விட்டர்) பக்கத்தில் கூறியதாவது, “கேரளாவின் கொல்லம் குந்த்ராவில் எனது மக்களவைத் தொகுதியில் பிரச்சாரத்தின் போது எனக்கு எதிர்க்கட்சிகளின் தாக்குதலால் கண்ணில் காயம் ஏற்பட்டது. இந்த நேரத்தில் உங்கள் பிரார்த்தனைகள் மற்றும் ஆதரவு எனக்கு எப்போதும் இருக்கிறது. நன்றி” எனத் குறிப்பிட்டு கண்ணில் பிளாஸ்திரியுடன் எடுக்கப்பட்ட புகைப்படத்தை பதிவிட்டார்.

இது தொடர்பாக, குந்திரா போலீசார் விசாரணை நடத்தி வந்தனர். அதில், கிருஷ்ணகுமார் கலந்துகொண்ட தேர்தல் பிரச்சார கூட்டத்தில் கலந்து கொண்ட பா.ஜ.க தொண்டர் சனல் என்பவரை போலீசார் விசாரணை மேற்கொண்டனர். அப்போது அவர், தவறுதலாக பா.ஜ.க வேட்பாளர் கிருஷ்ணகுமாரின் கண்களை சாவியால் குத்திவிட்டதாக வாக்குமூலம் அளித்தார்.