Skip to main content

ஆசியாவில் உயரமான அய்யனார் கோயில்; மாலையால் சாதனை படைத்த கதை!

Published on 07/03/2023 | Edited on 07/03/2023

 

Ayyanar Temple, tallest in Asia; Malai's record-breaking story!

 

புதுக்கோட்டை மாவட்டம், கீரமங்கலம் அருகில் உள்ள குளமங்கலம் வில்லுனி ஆற்றங்கரையில் உள்ள பெருங்காரையடி மிண்ட அய்யனார் கோயில் அப்பகுதி மக்களால் பெரிய கோயில் என்று அழைக்கப்படுகிறது. கோயில் முன்பு அமைக்கப்பட்டுள்ள 35 அடி உயரமுள்ள பிரமாண்டமான குதிரை சிலை அய்யனாரின் வாகனமாக இன்றளவும் பக்தர்களால் பார்க்கப்படுகிறது. இந்த குதிரை சிலை ஆசியாவிலே உயரமான குதிரை சிலை என்றும் கூறப்படுகிறது.

 

ஒவ்வொரு ஆண்டும் மாசிமகத் திருவிழா மகாமகத்திற்கு இணையாக பக்தர்கள் கூடும் திருவிழாவாக நடத்தப்படுகிறது. மாசி பௌர்ணமி நாளில் நடத்தப்படும் மாசிமகத் திருவிழாவின் முக்கிய நிகழ்வாக பிரமாண்ட குதிரை சிலைக்கு நேர்த்திக்கடன் உள்ள பக்தர்கள் காகிதப் பூ மாலைகள் அணிவிப்பதே சிறப்பு. 

 

Ayyanar Temple, tallest in Asia; Malai's record-breaking story!

 

35 அடி உயரம் கொண்ட மாலைகளை கார், வேன், லாரி போன்ற வாகனங்களில் ஏற்றி வந்து குதிரை சிலைக்கு அணிவித்து அய்யனாரை தரிசனம் செய்வதால் மன அமைதி கிடைப்பதாக கூறுகின்றனர் பக்தர்கள். தமிழகத்தின் பல மாவட்டங்களில் இருந்தும் பக்தர்கள் இந்தக் கோயிலுக்கு மாலைகளுடன் வருவர். கொரோனா முழு ஊரடங்கு காலத்தில் கூட தடையின்றி திருவிழா நடத்தப்பட்ட ஒரே கோயில் பெருங்காரையடி மிண்ட அய்யனார் கோயில் தான் என்ற பெருமையும் உண்டு.

 

ஒவ்வொரு ஆண்டும் சுமார் 2 ஆயிரம் மாலைகள் வரை குதிரை சிலைக்கு அணிவிக்கப்படும் கடந்த ஆண்டு 2200 மாலைகள் வரை அணிவிக்கப்பட்டது. கடந்த சில வருடங்களாக மாலைகள் அதிகம் வரும் என்பதால் முதல் நாளே கிராமத்தின் முதல் மாலை அணிவிக்கப்படுவது போல இந்த ஆண்டும் தொடங்கியது. அமைச்சர் மெய்யநாதனும் குடும்பத்துடன் வந்து தரிசனம் செய்து மாலை அணிவித்தார். ஆனால் இந்த ஆண்டு வரலாறு காணாத வகையில் திங்கள் கிழமை இரவு 10 மணி வரை 2750 மாலைகள் அணிவிக்கப்பட்ட நிலையில் சுமார் 200 மாலைகள் ஏற்றப்பட்ட வாகனங்கள் நீண்ட வரிசையில் காத்திருந்தது. "பெரிய கோயில் வரலாற்றிலேயே முதன் முறையாக 2700 மாலைகளை கடந்துள்ளது" என்று பெருமையாக கூறுகின்றனர். 

 

Ayyanar Temple, tallest in Asia; Malai's record-breaking story!

 

மாசிமகத் திருவிழாவிற்கு வந்த பக்தர்களுக்கு கீரமங்கலம், கொத்தமங்கலம், குளமங்கலம், பனங்குளம் உள்பட பல கிராமங்களிலும் 50க்கும் மேற்பட்ட இடங்களில் அன்னதானமும், 100க்கும் மேற்பட்ட இடங்களில் தண்ணீர் பந்தல்களும் அமைக்கப்பட்டிருந்தது. கீரமங்கலம் மேற்கு பேட்டை ஜமாத்தார்கள் பெருங்காரையடி மிண்ட அய்யனார் கோயில் பக்தர்களுக்காக தண்ணீர் பந்தல் அமைத்து குடிநீர் பாட்டில்கள் வழங்கி சிறப்பித்திருந்தனர். இன்று செவ்வாய்க்கிழமை இரவு தெப்பத்திருவிழாவும் நடக்கிறது.

 

 

Next Story

மதுரை வைகை ஆற்றில் எழுந்தருளினார் கள்ளழகர்! 

Published on 23/04/2024 | Edited on 23/04/2024
Madurai Vaigai River woke up Kallazhakar

உலகப்புகழ் பெற்ற மதுரை சித்திரை விழாவின் முக்கிய நிகழ்வான கள்ளழகர் வைகை ஆற்றில் இறங்கும் நிகழ்வு பெரும் விமரிசையாக ஆண்டு தோறும் நடைபெற்று வருகிறது. இதனை லட்சக்கணக்கான மக்கள், பக்தர்கள் நேரில் கண்டு களிப்பர். தகதகக்கும் தங்கக் குதிரையில் கம்பீரமாக வலம்வரும் கள்ளழகர் வைகை ஆற்றில் இறங்கும் வைபவம் மிகவும் பிரசித்தி பெற்றது.

இந்த சித்திரை விழாவின் ஒரு பகுதியான மீனாட்சி - சுந்தரேசுவரர் திருக்கல்யாணம் நேற்று முன்தினம் (21.04.2024)  நடைபெற்றது. அதாவது சித்திரைத் திருவிழாவின் 10ஆம் நாளில் முக்கிய நிகழ்வான மீனாட்சி, சுந்தரேசுவரர் திருக்கல்யாணம் திரளான பக்தர்கள் முன்னிலையில் கோலாகலமாக நடைபெற்றது. அதனைத் தொடர்ந்து மீனாட்சி - சுந்தரேஸ்வரர் தேரோட்டம் நேற்று (22.04.224) கோலாகலமாகத் தொடங்கியது. இதனையொட்டி பல்லாயிரக்கணக்கான பக்தர்கள் தேரை  உற்சாகத்துடன் வடம் பிடித்து இழுத்து பரவசம் அடைந்தனர். இதற்காக அதிகாலை முதல் பல்லாயிரக்கணக்கான பக்தர்கள் குவிந்த வண்ணம் இருந்தனர். அதே சமயம் வைகை ஆற்றில் இறங்கும் நிகழ்வுக்காக கள்ளழகர் மதுரை வந்தடைந்தார். கள்ளழகர் உடன் பாரம்பரியமாகக் கொண்டு வரப்படுகின்ற அழகர் கோயிலின் உண்டியல்கள் 3 மாட்டு வண்டிகளில் எடுத்து வரப்பட்டது.

இந்நிலையில் மதுரை சித்திரை திருவிழாவின் முக்கிய நிகழ்வான கள்ளழகர் வைகையாற்றில் எழுந்தருளும் நிகழ்வு இன்று (23.04.2024) நடைபெற்றது. கள்ளழகரை தரிசிக்க ஆயிரக்கணக்கான மக்கள் வைகை ஆற்றில் குவிந்தனர். இதனையடுத்து பச்சைப் பட்டு உடுத்தி தங்கக் குதிரையில் கள்ளழகர் வைகை ஆற்றின் கரைக்கு வருகை புரிந்தார். கள்ளழகர் வைகையாற்றில் இறங்குவதற்கு முன்பு ஆற்றங்கரையில் மாலை அணிவித்து அகழருக்கு மரியாதை செலுத்தப்பட்டது. அதனைத் தொடர்ந்து பக்தர்களின் கோஷம் விண்ணை முட்ட, தங்கக்குதிரையில் பச்சைப்பட்டு உடுத்தி வைகையாற்றில் கள்ளழகர் இறங்கினார். கள்ளழகர் வைகையாற்றில் எழுந்தருளும் நிகழ்வைக் காண சென்னை உயர்நீதிமன்றத்தின் மதுரைக்கிளை நீதிபதிகள் ஆர். சுரேஷ்குமார், புகழேந்தி, ஆதி கேசவலு மற்றும் அருள் முருகன் உள்ளிட்டோர் வருகை புரிந்திருந்தது குறிப்பிடத்தக்கது. 

Next Story

மீனாட்சி - சுந்தரேஸ்வரர் தேரோட்டம்; பக்தர்கள் உற்சாகம்!

Published on 22/04/2024 | Edited on 22/04/2024
Meenakshi - Sundareswarar Chariot; Devotees excited

உலகப் பிரசித்தி பெற்ற மதுரை சித்திரை விழாவின் ஒரு பகுதியான மீனாட்சி - சுந்தரேசுவரர் திருக்கல்யாணம் நேற்று (21.04.2024)  நடைபெற்றது. அதாவது சித்திரை திருவிழாவின் 10ஆம் நாளில் முக்கிய நிகழ்வான மீனாட்சி, சுந்தரேசுவரர் திருக்கல்யாணம் திரளான பக்தர்கள் முன்னிலையில் கோலாகலமாக நடைபெற்றது.

இந்நிலையில் சித்திரை திருவிழாவின் முக்கிய நிகழ்வான மதுரை மீனாட்சியம்மன் கோயிலின் மீனாட்சி - சுந்தரேஸ்வரர் தேரோட்டம் கோலாகலமாகத் தொடங்கியது. இதனையொட்டி பல்லாயிரக்கணக்கான பக்தர்கள் தேரை  உற்சாகத்துடன் வடம் பிடித்து இழுத்து வருகின்றனர். இதற்காக அதிகாலை முதல் பல்லாயிரக்கணக்கான பக்தர்கள் குவிந்த வண்ணம் இருந்தனர்.

மேலும், மதுரை வைகை ஆற்றில் கள்ளழகர் இறங்கும் நிகழ்வுக்காக மதுரை வந்தடைந்தார். கள்ளழகர். உடன் பாரம்பரியமாக கொண்டு வரப்படுகின்ற அழகர் கோயிலின் உண்டியல்கள் 3 மாட்டு வண்டிகளில் எடுத்து வரப்பட்டுள்ளது குறிப்பிடத்தக்கது.