மின்னல் வேக ஸ்டம்பிங்! - தன் சாதனையை முறியடித்த தோனி! (வீடியோ)

மேற்கிந்தியத் தீவுகள் அணிக்கு எதிரான நான்காவது ஒருநாள் கிரிக்கெட் போட்டியில் ஸ்டம்பிங் மூலம் விக்கெட்டை வீழ்த்திய தோனி, தனது முந்தைய சாதனையை முறியடித்துள்ளார். 
 

இந்தியா - மேற்கிந்தியத் தீவுகள் அணிகள் மோதிய நான்காவது ஒருநாள் கிரிக்கெட் போட்டி மும்பையில் உள்ள ப்ராபோர்ன் மைதானத்தில் நடைபெற்றது. இந்தப் போட்டியில் முதலில் பேட்டிங் செய்த இந்திய அணி ஐந்து விக்கெட் இழப்புக்கு 377 ரன்கள் எடுத்தது. பின்னர் களமிறங்கிய மேற்கிந்தியத் தீவுகள் அணி 153 ரன்களுக்கு அனைத்து விக்கெட்டுகளையும் இழந்து தோல்வியைத் தழுவியது. 
 

மேற்கிந்தியத் தீவுகள் அணி விளையாடிக் கொண்டிருந்தபோது 28வது ஓவரில் கீமா பவுல் எதிர்கொள்ள ரவீந்திர ஜடேஜா பந்துவீசினார். அப்போது பந்தைக் கணிக்காமல் பவுல் விட ஸ்டம்புக்குப் பின்னால் இருந்த தோனி, கண்ணிமைக்கும் நேரத்தில் ஸ்டம்பிங் செய்தார். பவுல் சில நொடிகள் திரும்பிப் பார்த்துவிட்டு அங்கிருந்து நடையைக் கட்டினார். இருப்பினும், லெக்-அம்பயர் மூன்றாவது அம்பயரிடம் கேட்க, நம்பாத ஜடேஜா தோனியை நோக்கி இது விக்கெட்தானா? என சந்தேகத்துடன் கேட்டார். 
 

Quickest stumping & That precious smile?...

If there is anything faster than the speed of light in this world, it should be DHONI's stumping?#Dhoni #INDvWI pic.twitter.com/D87rTTjcWu

— Prakash MSD'ian (@shadowOfMahi) October 29, 2018

மூன்றாவது அம்பயர் ரீப்ளே செய்து பார்த்ததில் பவுல் ஸ்டம்பிங் மூலம் அவுட் ஆனது உறுதி செய்யப்பட்டது. இந்த விக்கெட்டின்போது தோனி வெறும் 0.08 விநாடிகளில் ஸ்டம்பிங் செய்திருந்தார். முன்னதாக, 2016ஆம் ஆண்டில் ஆஸ்திரேலியாவுக்கு எதிரான போட்டியில் அப்போதைய கேப்டன் ஜியார்க் பெய்லியை தோனி ஸ்டம்பிங் செய்ததுதான் அதிவேக ஸ்டம்பிங்காக இருந்தது. இப்போது தனது சாதனையையே தோனி முறியடித்திருக்கிறார். இந்த வீடியோவை தோனி ரசிகர்கள் சமூக வலைதளங்களில் பகிர்ந்து வருகின்றனர்.