Skip to main content

தொடங்கியது மொய் விருந்து.. மொய் எழுத கணினி பதிவுகள்

Published on 01/08/2018 | Edited on 27/08/2018
computer moy

  
முதல் முறையாக மொய் பதிவுகள் கணினி மூலம் பதிவு செய்வது தொடங்கியுள்ளது. எழுதுவதை எளிமையாக்க ஆன்லைன் மூலம் மொய் பதிவு செய்யப்படுவதாக கூறப்படுகிறது.
 

புதுக்கோட்டை மாவட்டம் ஆலங்குடி, அறந்தாங்கி தொகுதியிலும் தஞ்சாவூர் மாவட்டத்தில் பேராவூரணி, பட்டுக்கோட்டை தொகுதியிலும் ஆனி மாதம் தொடங்கி ஆவணி மாதம் முடியும் வரை ஒவ்வொரு நாளும் மொய் விருந்துகளால் கலைகட்டி இருக்கும் கிராமங்கள். தினசரி மனமனக்கும் கறி விருந்து ஒவ்வொரு நாளும் கோடிகளில் புரளும் பணம். இது தான் மொய் விருந்து. 1980 காலக்கட்டத்தில் ரூ. 50, 100 என்று தொடங்கிய மொய் விருந்தில் இன்று லட்ச ரூபாய்கள் வரை மொய் வைக்கப்பட்டு வருகிறது. 20 ஆண்டுகளுக்கு முன்பு அதிகபட்சமாக ஒருவர் ரூ. 2 லட்சம் வாங்குவது பெரிய அளவில் பேசப்படும். ஆனால் தற்போது ஒருவர் மட்டுமே ரூ. 5 கோடிகள் வரை மொய் வாங்கிக் கொண்டு செல்கிறார். அவ்வளவு வேகமாக மொய் விருந்து வளர்ந்து கொண்டிருக்கிறது.
 

 

 

    மொய் வாங்குதற்காக ஆட்டுக்கறி உணவு கொடுக்க வேண்டும். அதற்காக டன் கணக்கில் கறி சமைக்க வேண்டும். ஊரெங்கும் பதாகை விளம்பரங்கள், வண்ணமயமான பத்திக்கைகள் அச்சடித்து கொடுத்து மொய் வாங்க வேண்டும் 15 ஆண்டுகளுக்கு முன்பு வரை தனி நபராக மொய் விருந்து வைத்தனர். ஆனால் கடந்த 10 ஆண்டுகளாக 10, முதல் 20 நபர்கள் வரை ஒரே விருந்து வைத்து மொய் வாங்கிச் செல்கின்றனர். அதே போல பேராவூரணி பகுதியில் 30 பேர்கள் வரை ஒரே விருந்து வைத்து மொய் வாங்கிச் செல்கின்றனர். கடந்த 5 ஆண்டுகளுக்கு முன்பு ஆலங்குடி தொகுதியில் வடகாடு, கீழாத்தூர் வரை மட்டுமே மொய் விருந்து நடத்தினார்கள். ஆனால் கடந்த சில ஆண்டுகளாக ஆலங்குடி வரை மொய்விருந்து பரவியுள்ளது. 

 

computer moy


 

    மொய் வசூல் நாளில் உறவினர்களும், நண்பர்களும் செய்யும் மொய் பணத்தை நோட்டுகளில் எழுதிக் கொள்ள அதற்காக உள்ள எழுத்தர்கள் மூலம் மொய் நோட்டுகளில் எழுதிக் கொண்டு பணத்தை வசூல் செய்வது வழக்கம். இப்போதும் அப்படித் தான் நடந்து வருகிறது. மொய் எழுத்தருக்கு ஒரு நாள் சம்பளமாக ரூ. 900 வரை கொடுக்க வேண்டும்.
 

    ஆனால் இந்த ஆண்டு கீரமங்கலம் பகுதியில் முதல் முறையாக கணினியில் மொய் பதிவு செய்யும் தொழில்நுட்பம் நுழைந்துள்ளது. கீரமங்கலம் அருகில் உள்ள பெரியா@ர் இணைப்புச் சாலையில் உள்ள ஒரு தனியார் திருமண மண்டபத்தில் நடந்த மொய் விருந்தில் 3 மடிகணினினளுடன் பெண்களும், இளைஞர்களும் காத்திருந்தனர். ஒரு குறிப்பிட்ட நபருக்கு மொய் செய்ய வந்தவர்கள் மடிகணினியும் காத்திருந்தவர்களிடம் தங்கள் ஊர், பெயர், மொய் தொகை, புதிய மொய் அனைத்தையும் சொல்ல விரைவாக கணினியில் பதிவு செய்து பணத்தை பெற்றுக் கொண்டு யாருக்கு எவ்வளவு மொய் செய்யப்பட்டுள்ளது என்பதற்கான ரசீது உடனடியாக வழங்கப்பட்டது. அதே மண்டபத்தில் வழக்கமான முறையில் மொய் நோட்டுகுளில் எழுதிக் கொண்டிருந்தனர் பலர். இந்த புதிய முறையை மொய் செய்ய வந்த உறவினர்கள் ஆச்சர்யமாக பார்த்தனர். இந்த மாதத்தில் இன்னும் பல மொய் விருந்துகளில் கணினியில் மொய் பதிவு செய்ய முன்பதிவு செய்யப்பட்டுள்ளதாகவும் கூறப்படுகிறது.
 

computer moy


    கணினியில் மொய் பதிவு செய்வது குறித்து அந்த நிறுவனத்தின் பிரபு கூறும் போது.. மதுரை மாவட்டத்தில் கடந்த 2 ஆண்டுகளாக கணினி மூலம் மொய் பதிவு செய்வதை அறிமுகப்படுத்தினோம் முதலில் தயக்கம் காட்டிய விழா குடும்பத்தினர் பிறகு அதன் சிறப்புகளை அறிந்து மொய் பதிவு செய்ய வாய்ப்புகள் கொடுத்தனர். அதன் பிறகு தான் கீரமங்கலம், பேராவூரணி பகுதிகளில் மொய் விருந்துகள் நடப்பதை அறிந்து புளிச்சங்காடு கைகாட்டியில் அலுவலகம் திறந்து முதல் முறையாக பெரியா@ர் இணைப்புச் சாலை மண்டபத்தில் மொய் பதிவு செய்து கொடுத்திருக்கிறோம். இன்னும் பல பேர் கேட்டுள்ளனர்.
 

    நோட்டுகளில் மொய் எழுதுவது போல கணினியில் பதிவு செய்து உடனடியாக ரசீதும் கொடுப்பதுடன் விழா நடத்தும் நபருக்கு எஸ்.எம்.எஸ். செல்லும் வசதியும் செய்யப்பட்டுள்ளது. மொய் பதிவுகள் முடிந்த பிறகு உடனடியாக அனைத்து பக்கங்களையும் ஊர் வாரியாக, அகர வரிசைப்படி பிரிண்ட் எடுத்து புத்தகமாக கொடுப்பதுடன் விழா நடத்தும் நபரின் செல்போனில் அதற்கான ஆப் ஏற்றப்பட்டு அனைத்து விபரங்களையும் அதில் அறிந்து கொள்ள வசதிகளும் செய்து கொடுத்திருக்கிறோம். எங்கே இருந்தாலும் மொய் நோட்டை புரட்டிப் பார்க்காமல் செல்போனிலேயே மொய் விபரங்களை உடனடியாக தெரிந்து கொள்ளலாம். எந்த தவறும் நடக்காமல் இது உதவி செய்கிறது. இந்த ஆண்டு மொய் விருந்து நிகழ்ச்சிகளில் ஏராளமானவர்கள் முன் பதிவு செய்துள்ளனர் என்றார்.
 

 

 

    கீரமங்கலம், வடகாடு, மாங்காடு, கொத்தமங்கலம், சேந்தன்குடி, நகரம். செரியலூர், பனங்குளம், குளமங்கலம், பெரியா@ர், பாண்டிக்குடி, நெய்வத்தளி, மேற்பனைக்காடு, அணவயல், புள்ளாண்விடுதி, நெடுவாசல் மற்றும் சுற்றியுள்ள சுமார் 30 கிராமங்களில் மட்டும் ஒரு ஆண்டுக்கு 1500 பேர் மொய் விருந்து நடத்துகின்றனர். அதில் சுமார் ரூ. 600 கோடிகள் வரை வசூலாகிறது. பேரிய அளவு மொய் வாங்கும் நபர்கள் உடனடியாக பணத்தை எண்ணுவதற்கு சிரமப்படுவதை அறிந்த பல வங்கி அதிகாரிகளே கடந்த ஆண்டுகள் வரை சென்று வசூல் செய்து எண்ணி கொடுத்தனர். ஆனால் வடகாடு பகுதியில் இந்த ஆண்டு பணம் எண்ணும் இயந்திரம் வாடகைக்கு விடப்படுவதாக கூறப்படுகிறது. இன்னும் 2 மாதங்கள் கீரமங்கலம் பகுதியில் தினசரி கறிவிருந்துக்கு பஞ்சமில்லை..
            

 

 

 

 

 

Next Story

வேண்டுதலை நிறைவேற்றும் குழந்தை முனீஸ்வரர்; பூஜை சோறு போட்ட பக்தர்கள்!

Published on 13/07/2024 | Edited on 13/07/2024
Muneeswarar the wish-fulfilling child; Devotees who put rice in the puja

புதுக்கோட்டை மாவட்டம் அறந்தாங்கி வட்டம் நாகுடி அருகே உள்ள அரியமரக்காடு கிராமத்தில் பிரசித்தி பெற்ற ஸ்ரீ குழந்தை முனீஸ்வரர் திருக்கோயில் அமைந்துள்ளது. குழந்தை முனீஸ்வரர் மட்டும் வழக்கம் போலத் திண்டு அமைத்து வேல் மட்டும் நடப்பட்டிருக்கும் உருவம் இல்லை. ஆனால் பரிவார தெய்வங்களுக்குச் சின்ன சின்ன சிற்பங்கள் அமைக்கப்பட்டிருக்கும். இக்கோயிலில் சில ஆண்டுகளுக்கு ஒருமுறை பூஜை போடப்படுவது வழக்கம். அதே போல இந்த ஆண்டு பாரம்பரிய முறைப்படி கிடா வெட்டு பூஜை கோயில் நிர்வாகிகள் ஏற்பாட்டில் நேற்று நடைபெற்றது.

பூஜைக்கான ஏற்பாடுகள் நடந்து கொண்டிருக்கும் போது நேற்று காலை முதல் நேர்த்திக்கடன் வைத்திருந்த பல கிராமங்களையும் சேர்ந்த பக்தர்கள் செங்கிடாய்களை வாங்கி வந்து கோயிலில் கட்டினர். மாலை வரை நூற்றுக்கணக்கான கிடாய்கள் வந்த பிறகு கோயில் பூசாரிகள் குலவையிட்டு சாமியாட்டத்தைத் தொடங்க ஒவ்வொரு கிடாய்க்கும் மாலை போட்டு மஞ்சள் தண்ணீர் தெளிக்கக் கிடாய்கள் தலையசைக்க அடுத்த சில நிமிடங்களில் தலைகள் வெட்டப்பட்டது. 

Muneeswarar the wish-fulfilling child; Devotees who put rice in the puja

வெட்டப்பட்ட கிடாய்களை உரித்து சுத்தம் செய்ய ஒரு குழுவினர். எலும்புகள், கறிகளை தனித்தனியாகப் பிரித்து எடுக்க ஒரு குழுவினர். கால், தோல் என அத்தனையும் சுத்தம் செய்து முடிப்பதற்குள் மிளகாய், மல்லி சரக்குகளைப் பாரம்பரிய முறையிலேயே இடித்துக் கொடுக்க, தயாராக இருந்த சமையலர்கள் செங்கிடாய் கறிகளை வேகவைத்து ரசமாகக் கொதிக்க வைத்தனர். மற்றொரு பக்கம் மூட்டை மூட்டையாக அரிசிகள் வேகவைத்துக் குவியல் குவியலாகச் சோறு குவிக்கப்பட்டிருந்தது.

சமையல் முடிந்து மாலை நேரப் பூஜைகள் தொடங்கும் போது அரியமரக்காடு சுற்றியுள்ள பல கிராமங்களைச் சேர்ந்த பக்தர்களும் ஆயிரக்கணக்கில் வந்து குழந்தை முனியை வழிபட்டதோடு ஆளுக்கொரு பாக்குமட்டைகளை எடுத்துக் கொண்டு வயல்வெளியில் அமர சுடச்சுடச் சமைக்கப்பட்ட சோறுகளைத் தட்டுகளில் வைத்துக் கொதிக்க கொதிக்க வைக்கப்பட்ட கறியும் ரசமும் சேர்த்து ஊத்த பத்தாயிரம் பக்தர்களும் சுவைத்து ருசித்தனர். 

Muneeswarar the wish-fulfilling child; Devotees who put rice in the puja

இக்கோயிலில் இருந்த பக்தர்கள் கூறும் போது, “அரியமரக்காடு மட்டுமின்றி சுற்றியுள்ள கிராமங்களைச் சேர்ந்தவர்கள் புதிதாகத் திருமணம் ஆனவர்கள் மற்றும் திருமணமாகிப் பல வருடங்களாகக்  குழந்தை இல்லாதவர்கள் தங்களுக்கு ஆண் குழந்தை வேண்டும் என நேர்த்திக்கடன் வைத்து நேர்த்திக்கடன் நிறைவேறினால் செங்கிடாய் வாங்கி தருவதாக வேண்டிச் செல்வார்கள். இவ்வாறு நேர்த்திக்கடன் வைத்துச் செல்பவர்களுக்கு அடுத்த ஆண்டே ஆண் குழந்தை பாக்கியம் கிடைப்பதால் தங்கள் வேண்டுதல் நிறைவேறியவுடன் குழந்தை முனீஸ்வரருக்குப் பூஜை திருவிழாவின் போது ஆட்டுக்கிடாய் வழங்கி பிரார்த்தனையை நிறைவேற்றுவார்கள்.

அதன் அடிப்படையில் நேற்று நடைபெற்ற கிடா வெட்டு பூஜையில் தங்கள் வேண்டுதலின் படி செங்கிடா வாங்கி கோயிலில் நேர்த்திக்கடன் செலுத்தினர். கிடா வெட்டு பூஜைக்குப் பிறகு குழந்தை முனீஸ்வரர் கோயில் திடலில் 10,000 பேருக்குக் கறி விருந்து வழங்கப்பட்டது. அதே நேரம் இந்த பூஜை சோற்றைப் பெண்கள் சாப்பிடமாட்டார்கள் அதனால் அவர்களுக்காகக் கோழி கறி சமைத்து வழங்கப்படும்” என்றனர். 

Next Story

புதுக்கோட்டையில் ரவுடி சுட்டுக் கொலை!

Published on 11/07/2024 | Edited on 11/07/2024
Trichy MGR nagar Durai incident at Pudukottai

திருச்சி மாவட்டம் எம்ஜிஆர் நகரை சேர்ந்தவர் துரை. ரவுடியான இவர் மீது 70க்கும் மேற்பட்ட பல்வேறு குற்ற வழக்குகள் நிலுவையில் உள்ளன. இந்நிலையில் புதுக்கோட்டையில் இருந்து பட்டுக்கோட்டை செல்லக்கூடிய வம்பன் காட்டுப்பகுதியில் துரை பதுங்கி இருப்பதாக தகவல் கிடைத்துள்ளது. இதனையடுத்து போலீசார் அவரை கைது செய்ய சம்பவ இடத்திற்கு வந்துள்ளனர். அப்போது துரை தான் வைத்திருந்த ஆயுதங்களால் போலீசாரை தாக்கிவிட்டு கொலை மிரட்டல் விடுத்ததுடன் அங்கிருந்து தப்பிச் செல்ல முயற்சித்துள்ளார்.

இதனால் போலீசார் தற்காப்புக்காக இவர் மீது துப்பாக்கிச்சூடு நடத்தியுள்ளனர். இதனையடுத்து இவரை அரசு மருத்துவமனையில் சிகிச்சைக்காக அனுமதித்தனர். இருப்பினும் சிகிச்சை பலனின்றி உயிரிழந்ததாக தகவல் வெளியாகியுள்ளது. இச்சம்பவம் புதுக்கோட்டையில் பெரும் பரபரப்பை ஏற்படுத்தியுள்ளது. என் கவுண்டர் நடந்த இடத்தில் மாவட்ட காவல் கண்காணிப்பாளர் விசாரணை நடத்தி வருகிறார்.

கடந்த ஆண்டு திருச்சியில் ஏற்கனவே திருட்டு வழக்கிற்காக இவரை போலீசார் விசாரணைக்கு அழைத்துச் சென்றபோது தப்பிச் சென்றவர் ஆவார். மேலும் காவல் ஆய்வாளார் உள்ளிட்ட 5 காவலர்கள் துரை தாக்கியதில் காயமடைந்ததும் குறிப்பிடத்தக்கது.