Skip to main content

3 ரூபாய்க்கு தோசை.. ஏழைகளின் சிரிப்பில் இறைவனைக் காணும் ஷீலா அக்கா!

Published on 22/10/2021 | Edited on 22/10/2021

 

Sheela akka hotel at viluppuram district


வெறும் 20 ரூபாய் இருந்தா வயிறு நெறைய சாப்பிட்டுவிட முடியும் என யாராவது சொன்னால், நமட்டுச்சிரிப்புடன் நகர்ந்து சென்றுவிடுவோம். ஆனால், ஷீலா அக்காவும் அவரது கணவரும் இது சாத்தியம் எனப் புன்னகையுடன் நமது கைப்பிடித்து அவர்களின் ஹோட்டலுக்கு அழைத்துச் சென்றனர்.


விழுப்புரம் மாவட்டம், செஞ்சி அருகிலுள்ளது திருவம்பட்டு கிராமம். இந்த கிராமத்தில்தான் ஷீலா அக்காவும் அவரது குடும்பத்தாரும் ஹோட்டல் நடத்திவருகின்றனர். இட்லி -3 ரூபாய், கல்தோசை -3 ரூபாய், ரோஸ்ட் -15 ரூபாய் இதுதான் ஷீலா அக்கா கடையின் மெனு. தட்டுத்தடுமாறி நடக்கும் முதியவர்கள் முதல் தத்தி தத்தி நடக்கும் குழந்தைகள் வரை அத்தனை வயதினரும் ஷீலா அக்கா கடையின் ரெகுலர் கஸ்டமர்கள். மலிவான விலை என்பது ஒரு காரணியாக இருந்தாலும் சாப்பாட்டில் உள்ள ருசிதான் இங்கு வருவதற்கு பிரதான காரணம் என அக்கா கடையைப் பாராட்டி மகிழ்கின்றனர் அதன் வாடிக்கையாளர்கள்.

 

Sheela akka hotel at viluppuram district
                                                        ஷீலா அக்காவின் குடும்பம்


இதே விலையில் இதே ஏரியாவில் போட்டிக்கடைகள் சில இருந்துவந்தாலும், ஷீலா அக்காவின் கடைக்கு மட்டும் எப்போதுமே தனி மவுசு உண்டு. சுமார் 30 ஆண்டு பாரம்பரியத்துடன் பந்தாவோ படாடோபமோ இல்லாமல் விறகு அடுப்பில் கடை நடத்தி வருகிறார் ஷீலா அக்கா. வெளியாட்கள் யாரும் வேலைக்கு இல்லை. சமையலராக, சர்வராக, பார்சல் கட்டுபவராக கல்லாவில் பணம் வாங்கிப் போடுபவராக எங்கும் ஷீலா அக்காவின் குடும்பத்தாரே சுற்றிச் சுற்றி வேலை செய்கின்றனர்.


இது எப்படிச் சாத்தியம்.. இந்த விலையில் கடை நடத்துவதால் சாப்பிடுபவரின் வயிறு நிறையலாம்.. முதல் போட்டு கடை நடத்தும் உங்களது வயிறும் வாழ்வும் நிறையுமா எனக் கேட்டோம்..

 

Sheela akka hotel at viluppuram district


கொஞ்சமும் சலனமில்லாமல் பேசத் தொடங்கிய ஷீலா அக்கா, இதுவே எங்களுக்கு போதுமானதா இருக்கு சார். 10 பைசாவுக்கு ஒரு தோசை என ஆரம்பிச்சாங்க. வருஷங்கள் ஓட ஓட 2 ரூபாயில வந்து நின்னுச்சு. இதோ.. இப்போ இந்த கொரோனா லாக்டவுனால 1 ரூபா ஏத்த வேண்டியதா போச்சு. இப்போ 3 ரூபாய்க்கு ஒரு தோசை குடுக்குறோம். பரபரப்பான நாளுல ஒரு நாளைக்கு 1000 தோசை ஓடும். மத்த நாளுல 600 தோசை வரைக்கும் ஓடும். எல்லாம் போக எங்களுக்கு 500 ரூபா கைல நிக்கும். எங்களுக்கு அது போதும். நிறைவா இருக்கு சார் வாழ்க்கை என மெல்லிய புன்னகையுடன் கண்சிமிட்டுகிறார் ஷீலா அக்கா.


கடவுள் தூணிலும் துரும்பிலும் மட்டுமல்ல ஷீலா அக்காக்களின் கடைகளிலும் மெல்லிய புன்னகையுடன் நிறைந்திருக்கிறார்.

 

 

சார்ந்த செய்திகள்

 

Next Story

லஞ்சம் லஞ்சம் லஞ்சம்... விழுப்புரம் ஆட்சியர் அலுவலகத்தைக் கதறவிட்ட ‘இந்தியன் 2’

Published on 18/07/2024 | Edited on 18/07/2024
 Villupuram Collectorate noticed with the name 'Indian 2' has been pasted

தமிழகம் முழுவதும் வாரம் தோறும் திங்கட்கிழமை மக்கள் குறைதீர்க்கும் முகாம் மாவட்ட ஆட்சியர் அலுவலகத்தில் நடைபெற்று வருகிறது. இந்த முகாமில் ஏராளமான பொதுமக்கள் கலந்துக்கொண்டு தங்களின் கோரிக்கைகள், புகார்கள், குறைகள் எனப் பலவற்றையும் மனுவாகக் கொடுத்துத் தீர்வு கண்டு வருகின்றனர். அந்த வகையில் கடந்த திங்கட்கிழமை விழுப்புரம் ஆட்சியர் அலுவலகத்தில் மக்கள் குறைத்தீர்க்கும் முகாம் நடந்தது. 

அப்போது ஆட்சியர் அலுவலகத்தில் உள்ள ஆண்கள் கழிவறையின் கதவுக்குப் பின்னால் யாரோ ஒரு மர்ம நபர் ஓட்டிய நோட்டீஸில், “அலுவலகத்திற்கு வரும் ஏழை, எளிய, பாமர மக்களின் குறைகளைப் பூர்த்தி செய்யுங்கள்; ஏழை, எளிய மக்களின் கோரிக்கை மனுவை வாங்கி உதவி செய்யுங்கள். லஞ்சம் வாங்காமல் பணியை செய்யுங்கள்:” என்று குறிப்பிட்டு கடைசியாக இந்தியன் 2 என்று எழுதிவைத்துவிட்டுச் சென்றுள்ளார். இதனைப் பார்த்த அதிகாரிகள் மற்றும் அலுவலர்கள் அதிர்ச்சி அடைந்தனர்.

குறைத்தீர்க்கும் முகாமில் மனு அளித்தவர்களில் யாரோ ஒருவரின் கோரிக்கை நிறைவேறாததால்தான் இப்படி விரக்தியில் எழுதி வைத்திருக்கிறார் என்று கூறப்படுகிறது. சமீபத்தில் வெளியான 'இந்தியன் 2' படத்தில் அரசின் நலத்திட்ட உதவிகள் கிடைப்பதற்கும், வேலை வாய்ப்பை பெறுவதற்கும் மக்களிடம் லஞ்சம் கேட்கும் சம்பந்தப்பட்ட அதிகாரிகளை இந்தியன் தாத்தா தேடிச் சென்று பழி வாங்குவது போன்று கதைக்களம் அமைக்கப்பட்டிருக்கும். மேலும் 'இந்தியன்' முதல் பாகத்தில், 'லஞ்சம் கேட்கும் அரசு ஊழியர்கள் தண்டிக்கப்படுவார்கள்..' என்று கடிதம் இடம்பெற்றிருக்கும். தற்போது அதேபோன்று ஒரு கடிதத்தை யாரோ ஒரு மர்ம நபர் விழுப்புரம் ஆட்சியர் அலுவலகத்தில் ஒட்டிச்சென்றுளது பரபரப்பை ஏற்படுத்தியுள்ளது. 

Next Story

தகராறு செய்த மனைவி; திருமணம் செய்து வைத்த புரோக்கரை தாக்கிய கணவர்

Published on 17/07/2024 | Edited on 17/07/2024
 husband  beaten broker who had married him because his wife had a dispute

விழுப்புரம் மாவட்டம் வடவாம்பழத்தைச் சேர்ந்த ஜானகிராமன் மகன் சக்திவேல். இவர் கூலி தொழில் பார்த்துவருகிறார். இவருக்கும் அதே பகுதியைச் சேர்ந்த ஜெகதீஸ்வரி என்வருக்கும் கடந்த 12 ஆண்டுகளுக்கு முன்பு திருமணம் நடந்துள்ளது. சக்திவேல் - ஜெகதீஸ்வரி இருவருக்கும் அரசமங்கலத்தை சேர்ந்த பெருமாள் என்ற கல்யாண புரேக்கர் திருமணம் செய்துவைத்திருக்கிறார். 

இந்த நிலையில் கணவன் சக்திவேலுக்கும், மனைவி ஜெகதீஸ்வரிக்கும் இடையே அடிக்கடி தகராறு ஏற்பட்டு வந்துள்ளது. அதேபோன்று சம்பவத்தன்று இருவருக்கும் இடையே குடும்ப பிரச்சனை தொடர்பாகத் தகராறு ஏற்பட்டுள்ளது. ஒரு கட்டத்தில் தகராறு முற்றிக் கைகலப்பு நடந்ததாக கூறப்படுகிறது. இதனைத் தொடர்ந்து மனைவி ஜெகதீஸ்வரி கோபித்துக்கொண்டு தாய் வீட்டிற்குச் சென்றுள்ளார். 

இதனால் ஆத்திரமடைந்த சக்திவேல் இருவருக்கும் வரன் பார்த்து திருமணம் செய்துவைத்த புரோக்கர் பெருமாளை தாக்கியுள்ளார். அரசமங்கலம் ரேஷன் கடையில் நின்றுக்கொண்டிருந்த அவரை சக்திவேல், “நீ தான எனக்குப் பெண் பார்த்து திருமணம் செய்து வச்ச, இப்போ பாரு என் மனைவி அடிக்கடி சண்டை போடுறா..” என்று ஆபாச வார்த்தையில் புரோக்கர் பெருமாளை திட்டி தாக்கியதாகக் கூறப்படுகிறது. இதனைத் தொடர்ந்து புரோக்கர் பெருமாள் கொடுத்த புகாரின் பேரில் சக்திவேல் மீது வழக்குப் பதிவு செய்த போலீசார், அவரை கைது செய்து விசாரணை நடத்தி வருகின்றனர்.