Skip to main content

நேற்று அம்பி, இன்று அந்நியன்; பிரதமர் மோடியை வறுத்தெடுக்கும் நெட்டிசன்கள்!

Published on 16/05/2024 | Edited on 16/05/2024
Prime Minister Modi again speech about congress

நாடாளுமன்ற மக்களவைத் தேர்தல் நாடு முழுவதும் நடைபெற்று வருகிறது. அதன்படி முதற்கட்டமாக ஏப்ரல் 19ஆம் தேதியும், இரண்டாம் கட்டமாக ஏப்ரல் 26ஆம் தேதியும், மூன்றாம் கட்டமாக மே 7ஆம் தேதியும் பல்வேறு மாநிலங்களில் நடந்து முடிந்துள்ளது. இதனைத் தொடர்ந்து, அடுத்த கட்டத் தேர்தலான நான்காம் கட்ட வாக்குப்பதிவு, கடந்த 13ஆம் தேதி நடைபெற்று முடிந்தது. இதனைத் தொடர்ந்து, மே 20ஆம் தேதி நடைபெறும் ஐந்தாம் கட்டத் தேர்தலை எதிர்கொண்டு அரசியல் கட்சிகள் தீவிர தேர்தல் பிரச்சாரத்தில் ஈடுபட்டு வருகின்றன. 

இதனிடையே, கடந்த ஏப்ரல் மாதம் ராஜஸ்தானில் தேர்தல் பிரச்சாரம் மேற்கொண்ட பிரதமர் மோடி, “இந்துக்களின் பணத்தை எடுத்து இஸ்லாமியர்களுக்கு கொடுக்க நினைக்கிறது காங்கிரஸ். இதன் பொருள் அவர்கள் இந்தச் செல்வத்தை அதிக குழந்தைகளைப் பெற்றவர்களுக்கும், ஊடுருவல்காரர்களுக்கும் பகிர்ந்தளிப்பார்கள். நீங்கள் கஷ்டப்பட்டு சம்பாதித்த பணம் ஊடுருவல்காரர்களுக்கு செல்ல வேண்டுமா? இதை நீங்கள் அங்கீகரிக்கிறீர்களா? இந்த நகர்ப்புற நக்சல் சிந்தனை என் தாய்மார்கள் மற்றும் சகோதரிகளின் மாங்கல்யத்தைக் கூட விட்டுவைக்காது.." எனச் சர்ச்சையாகப் பேசினார். இஸ்லாமியர்கள் ஊடுருவல்காரர்கள் என நாட்டின் பிரதமர் மோடி பேசிய சர்ச்சை பேச்சுக்கு நாடு முழுவதும் பலத்த கண்டனம் எழுந்து வந்தது. 

இதனையடுத்து, பிரதமர் மோடி நேற்று முன்தினம் (14-05-24) தனியார் தொலைக்காட்சி ஒன்றுக்கு பேட்டி அளித்தார். அப்போது அவரிடம், ராஜஸ்தானில் பேசிய சர்ச்சை பேச்சு குறித்து கேள்வி எழுப்பப்பட்டது. அதற்கு பதிலளித்த அவர், “அதிக குழந்தைகளைப் பற்றி பேசும்போது இஸ்லாமியர்களை மட்டுமே பேசினேன் என்று உங்களுக்கு யார் சொன்னது? இஸ்லாமியர்களுக்கு ஏன் அநியாயம் செய்கிறீர்கள்? ஏழைக் குடும்பங்களிலும் இதுதான் நிலை. வறுமை இருக்கும் இடத்தில், அவர்களின் சமூக வட்டத்தைப் பொருட்படுத்தாமல், அதிகமான குழந்தைகள் உள்ளனர்.

Prime Minister Modi again speech about congress

நான் இந்து என்றோ அல்லது இஸ்லாமியர்கள் என்றோ குறிப்பிடவில்லை. ஒருவர் எவ்வளவு குழந்தைகளைப் பெற்றுக் கொள்ள முடியுமோ அவ்வளவு குழந்தைகளைப் பெற்றுக் கொள்ள வேண்டும் என்று நான் கூறியுள்ளேன். உங்கள் குழந்தைகளை அரசே கவனிக்க வேண்டிய சூழ்நிலையை உருவாக்கி விடாதீர்கள். என் நாட்டு மக்கள் எனக்கு வாக்களிப்பார்கள் என்று நம்புகிறேன். நான் இந்து-முஸ்லிம் பிரிவினை பற்றி பேசும் நாளில், நான் பொது வாழ்க்கைக்கு தகுதியற்றவனாக இருப்பேன். மேலும் நான் இந்து-முஸ்லிம் என்று வேறுபாடு பார்க்க மாட்டேன். இதுதான் என் தீர்மானம்” என்று கூறினார். 

இந்த நிலையில், மத்தியப் பிரதேச மாநிலத்தில் நேற்று (15-05-24) பா.ஜ.க சார்பில் நடத்தப்பட்ட தேர்தல் பிரச்சாரத்தில் பிரதமர் மோடி கலந்து கொண்டு பேசினார். அப்போது அவர், “நாட்டின் வளங்களில் இஸ்லாமியர்களுக்கே முதல் உரிமை என காங்கிரஸ் அரசு வெளிப்படையாக கூறியது. இதை முன்னாள் பிரதமர் மன்மோகன் சிங் கூறிய கூட்டத்தில் நான் கலந்து கொண்டு எனது ஆட்சேபனையை தெரிவித்தேன். காங்கிரஸும் அதன் கூட்டணி கட்சிகளும் இந்துக்களுக்கும் இஸ்லாமியர்களுக்கும் தனித்தனி பட்ஜெட்டை ஒதுக்க விரும்பின. இஸ்லாமியர்களுக்கு 15% பட்ஜெட் ஒதுக்க வேண்டும் என்று காங்கிரஸ் விரும்புகிறது. தனி இந்து மற்றும் முஸ்லீம் வரவு செலவுத் திட்டங்கள் நாட்டுக்கு நன்மை தருமா? குஜராத் முதல்வராக இருந்த நான்தான் முதலில் எதிர்த்தேன். காங்கிரஸ் மற்றும் இந்தியா கூட்டணி மீண்டும் ஆட்சிக்கு வந்தால், அதைச் செய்வார்கள். அப்படிப்பட்டவர்கள் மகாராஷ்டிராவில் ஒரு இடத்தில் கூட வெற்றி பெற அனுமதிக்கக் கூடாது. முதல் நான்கு கட்டங்களில் மகாராஷ்டிரா இந்திய கூட்டணியை வீழ்த்தியது என்பதுதான் உண்மை.

Prime Minister Modi again speech about congress

காங்கிரஸும், இந்தியா கூட்டணியும் ஆட்சிக்கு வந்தால், மக்களைப் பிளவுபடுத்த முயற்சிப்பார்கள். காங்கிரஸின் இளவரசரும், இந்தியக் கூட்டணியும் சமாதானப்படுத்தும் பழைய விளையாட்டை விளையாடி வருகின்றன. பட்டியலின, பழங்குடியின மற்றும் பிற்படுத்தப்பட்டவர்களுக்கான இடஒதுக்கீட்டை அவர்கள் கண்காணித்து வருகின்றனர். அவர்கள் தங்கள் சோதனைகளைத் தொடங்கி, தங்கள் ஆய்வகத்தில் கர்நாடகாவை மாற்றியுள்ளனர். கர்நாடகாவில் ஆட்சிக்கு வந்த பிறகு, ஒரே இரவில் முஸ்லிம்களை பிற்படுத்தப்பட்டோர் பட்டியலில் சேர்த்துள்ளனர். காங்கிரசுக்கு இந்து-முஸ்லிம் அரசியல் மட்டுமே தெரியும், அவர்களுக்கு வாக்களிப்பவர்களுக்கே வளர்ச்சி. நான் அவர்களை அம்பலப்படுத்தும்போது, மோடி வகுப்புவாத அரசியலில் ஈடுபடுகிறார் என்று அவர்களின் சுற்றுச்சூழல் அமைப்பு அலறுகிறது. அவர்களின் செயல்களுக்கு வரலாறு சாட்சி. நாட்டை ஒன்றாக வைத்திருக்க வேண்டுமா இல்லையா?. இந்தியர்களை இப்படி பிரிப்பது நல்லதா?” என்று கூறி கடுமையாக விமர்சனம் செய்தார். 

இந்நிலையில், முன்னாள் நிதியமைச்சர் ப.சிதம்பரம், பிரதமர் மோடி கூறிய கருத்துக்கு கண்டனம் தெரிவித்துள்ளார். இது குறித்து அவர் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “பிரதமரின் அறிக்கைகள் மேலும் மேலும் வினோதமானவை. மேலும், அவரது உரை எழுதுபவர்கள் தங்கள் சமநிலையை இழந்துவிட்டதைக் காட்டுகின்றன. நேற்று, இந்து-முஸ்லிம் பிரிவினையை விளையாடினால், பொது வாழ்வில் இருக்க தகுதியற்றவன் என்று கூறினார். இன்று அவர் தனது வழக்கமான விளையாட்டாக இந்துக்களையும் முஸ்லிம்களையும் பிரித்து விளையாடுகிறார். மத்திய பட்ஜெட்டில் 15 சதவீதத்தை முஸ்லீம்களுக்கு மட்டுமே செலவிட மன்மோகன் சிங் திட்டம் தீட்டியுள்ளார் என்ற பிரதமரின் குற்றச்சாட்டு முற்றிலும் தவறானது. இது யூனியன் பட்ஜெட். இரண்டு பட்ஜெட்டுகள் எப்படி இருக்க முடியும்? பிரதமரின் அறிக்கைகளை இந்திய மக்கள் மட்டுமல்ல, உலகமே உற்றுப் பார்க்கும். இது இந்தியாவுக்குப் பெருமை சேர்க்காது” என்று குறிப்பிட்டுள்ளார்.

தனியார் தொலைக்காட்சிக்கு பேட்டி அளித்த போது, இந்து என்றோ அல்லது இஸ்லாமியர்கள் என்றோ குறிப்பிடவில்லை என்று பேசிய பிரதமர் மோடி, மீண்டும் இஸ்லாமியர்கள் குறித்து பேசியதை நெட்டிசன்கள் விமர்சனம் செய்து வருகின்றனர். மேலும், இது குறித்து காங்கிரஸ், பிரதமர் மோடி பேசிய இரண்டு வீடியோக்களை இணைத்து தனது எக்ஸ் (ட்விட்டர்) பக்கத்தில் வெளியிட்டது. இது தற்போது சமூக வலைத்தளங்களில் வெளியாகி வைரலாகி வருகிறது. 

 

Next Story

“நீட் தேர்வில் பணம் கொடுப்பவர்களுக்கு ஆணையம் சாதகமாக இருக்கிறது” - செல்வப்பெருந்தகை

Published on 19/06/2024 | Edited on 19/06/2024
Selvaperunthagai strongly oppose NEET exam

சென்னை நுங்கம்பாக்கம் வள்ளுவர் கோட்டம் அருகில் திராவிடர் மாணவர் கழகம் சார்பில் இனியும் தேவையா நீட் என்ற தலைப்பில் ஒன்றிய அரசை நீட் தேர்வு ரத்து செய்ய வலியுறுத்தி கண்டன ஆர்ப்பாட்டம் நடைபெற்றது. இதில் கி.வீரமணி, திமுக செய்தித் தொடர்பு தலைவர் டி.கே.எஸ், இளங்கோவன் தமிழ்நாடு காங்கிரஸ் கமிட்டி தலைவர் செல்வபெருந்தகை, விசிக தலைவர் திருமாவளவன், இந்திய கம்யூனிஸ்ட் கட்சியின் மாநில செயலாளர் முத்தரசன், மார்க்சிஸ்ட் கம்யூனிஸ்ட் கட்சியின் அரசியல் தலைமை குழு உறுப்பினர் ஜி ராமகிருஷ்ணன், திருநெல்வேலி நாடாளுமன்ற உறுப்பினர் ராபர்ட் ப்ரூஸ் உள்ளிட்ட பலர் பங்கேற்றனர்.

இதில் பேசிய தமிழ்நாடு காங்கிரஸ் கமிட்டி மாநிலத் தலைவர் செல்வப்பெருந்தகை, “அரியலூர் அனிதா மரணத்திற்குப் பின்னர் நீட் தேர்வு தேவையா எனத் தேசம் முழுவதும் கேள்வி எழுந்தது. ஜெயலலிதா இருந்தவரை அனுமதிக்காத நீட் தேர்வு எடப்பாடி பழனிச்சாமி ஆட்சியில் உள்ளே நுழைந்து. தமிழ்நாடு அரசு அனுப்பிய நீட் ரத்து மசோதாவைக் கேள்வி மேல் கேள்வி கேட்டு ஆளுநர் திருப்பி அனுப்பினார். இப்படி ஒரு ஆளுநர் தமிழ்நாட்டிற்கு இதுவரை அமைந்ததில்லை. நீட் தேர்வு காங்கிரஸ் ஆட்சிக் காலத்தில் தான் வந்தது என ஒரு பரப்புரையைச் செய்து வருகிறார்கள். காங்கிரஸ் ஆட்சிக் காலத்தில் உச்ச நீதிமன்றத்தின் தடுப்பணையில் நீட் இருந்தது. ஆனால் மோடி ஆட்சிக்கு வந்ததுக்குப் பிறகு சங்கல்ஃப் என்ற இயக்கம் மனுதாரராகப் போய் நிட்டை நடத்தலாம் என அனுமதியைப் பெற்றுக் கொண்டு வந்தார்கள். 

நீட் நடத்துவதில் ஆளுநரும், பிரதமரும் தீர்மானமாக உள்ளனர். நீட் என்பது பல கோடி வருமானம் தரக்கூடிய விஷயமாக மாறி உள்ளது. நீட் தேர்வில் ஆள் மாறாட்டம் செய்வது, ஆசிரியர்களே தேர்வு எழுதுவது, சட்டத்தில் இல்லாததை எல்லாம் மோடியின் அரசு நீட்டில் நடைமுறைக்கு கொண்டு வருகிறது. நீட் வணிகமயமாக்கப்பட்ட பிறகு ஒவ்வொரு பள்ளிகளிலும் நீட் பயிற்சி மையங்கள் அலுவலகத்தை திறக்கிறார்கள். பள்ளிகளில் சேர வேண்டும் என்றால் நீட் தேர்விற்கும் இலட்ச கணக்கில் பணத்தை கட்ட வேண்டும். கிராம புறமானவர்கள் எப்படி இதில் சேர முடியும்? ஏழை எளிய மாணவர்கள் இந்த தேர்வில் எப்படி தேர்ச்சி பெறுவர்? இது சாதாரண மக்களுக்கே தெரியும் போது மாமனிதன் என்று சொல்லக்கூடிய மோடிக்கும், மத்திய அரசுக்கும் தெரியவில்லை. 

நீட் தற்கொலைகள் தொடர்ந்து நடந்து கொண்டுதான் இருக்கின்றன. இந்த தற்கொலை விவாகரத்தில் பிரதமர், மத்திய அரசும் மௌனமாக இருக்கிறார்கள். தமிழ்நாட்டு குழந்தைகள் தேர்வு எழுதச் சென்றால் ஆடையை கத்தரிப்பது, தாலி உள்ளிட்ட ஆபரணங்களைக் கழட்ட சொல்லும் ஆணையம், பணம் கொடுப்போருக்குச் சாதகமாக இருக்கிறது. தேசிய தேர்வு முகமையில் எப்படிப்பட்ட அநியாயம் நடந்து கொண்டிருக்கிறது. சந்திரபாபு நாயுடு, நிதிஷ்குமாரை வலது இடது புறங்களில் வைத்துக்கொண்டு நடக்கும் இந்த ஆட்சி எத்தனை நாட்களுக்கு நீடிக்கும் என்று தெரியாது. திமுக தலைவர் ஸ்டாலின் கொடுத்த வாக்குறுதி இப்போதே நிறைவேறுவதற்கு வாய்ப்பு உள்ளது. நீட் தேர்வை மாநிலங்கள் எப்போது ஏற்றுக் கொள்கிறதோ அப்போது நடத்திக்கொள்ள அனுமதிக்க வேண்டும். அதுவரை நீட் எதிர்ப்பு போராட்டம் தொடர வேண்டும்” விடக்கூடாது" என்றார்.

Next Story

ராகுல் காந்தி பிறந்த நாள்; நலத்திட்ட உதவிகளை வழங்கிய காங்கிரஸ் 

Published on 19/06/2024 | Edited on 19/06/2024
Congress has provided welfare assistance on the occasion of Rahul Gandhi's birthday

திருச்சி வடக்கு மாவட்ட காங்கிரஸ் கமிட்டி சார்பில் ராகுல்காந்தி எம்.பி பிறந்தநாள் விழா மாவட்ட தலைவர் திருச்சி கலை தலைமையில் வடக்கு மாவட்டம் முழுவதும் கொடியேற்றி, இனிப்பு வழங்கி கொண்டாடப்பட்டது. மண்ணச்சநல்லூர், துறையூர், லால்குடி, முசிறி, தா.பேட்டை, உப்பிலியபுரம், தொட்டியம். புள்ளம்பாடி உள்ளிட்ட 11 வட்டாரங்களில் கொடியேற்றி, இனிப்பு வழங்கப்பட்டது. சமயபுரம் நம்பர் ஒன் டோல்கேட்டில் பஸ் பயணிகள், பொதுமக்களுக்கு இனிப்பு வழங்கப்பட்டது. இதையடுத்து நம்பர் ஒன் டோல்கேட் அருகே உள்ள  பொதுமக்களுக்கு இலவச வேட்டி, சேலைகள் வழங்கப்பட்டன.


தொடர்ந்து பட்டத்தம்மாள் தெருவில் மதிய உணவு வழங்கப்பட்டது. இந்நிகழ்ச்சியில் மாவட்ட துணைத் தலைவர் ராஜா, மாநில பொதுக்குழு உறுப்பினர் வக்கீல் மோகனாம்பாள், மாநில மகளிர் அணி இணைச் செயலாளர் பிரமிளா, மகளிர் அணி சுதா, வட்டார தலைவர் சுப்பிரமணியன், மாவட்ட பொதுக்குழு அப்துல் காதர், சேவாதளம் தெற்கு மாவட்ட தலைவி லட்சுமி, சேவா தளம் வடக்கு மாவட்ட தலைவி மேரி ஆஷா, வட்டார பொறுப்பாளர் செல்வம், மண்ணச்சநல்லூர் நகர பொறுப்பாளர் பாட்ஷா, நிர்வாகிகள் செல்வராஜ், மாசிலாமணி, பழனியாண்டி, கணேசன், மூர்த்தி, சந்தியாகு அலெக்ஸாண்டர் உட்பட திருச்சி வடக்கு மாவட்ட நிர்வாகிகள், தொண்டர்கள் திரளாகக் கலந்து கொண்டனர். 

அனைத்து நிகழ்ச்சிகளிலும் மாவட்ட தலைவர் திருச்சி கலை கலந்து கொண்டு கட்சிகொடி ஏற்றி இனிப்பு வழங்கி நலத்திட்ட உதவிகளை வழங்கினார்.