Skip to main content

வறுமை ஒழிப்பு... காலத்தின் கட்டாயம்...

Published on 29/03/2019 | Edited on 29/03/2019

மில்லியன் கணக்கான நம் சகோதர சகோதரிகள் வறுமையின் பிடியில் இருக்கும்போது ஒரு புதிய இந்தியாவை உருவாக்க முடியாது. 2019-ல் நாங்கள் ஆட்சிக்கு வந்தால், குறைந்தபட்ச அடிப்படை வருமான உறுதி திட்டம் நிறைவேற்றப்படும் என்று ராகுல் காந்தி அறிவித்துள்ளார். இது சாத்தியமே என்று ஒரு சாரரும், வெற்று வாக்குறுதி என மற்றொரு சாரரும் சொல்ல, இது பெரிய விவாதப் பொருளாக மாறியுள்ளது.

 

poverty

 

கடந்த சில ஆண்டுகளாக வளர்ந்துவரும் சமத்துவமின்மை மற்றும் வேலைவாய்ப்பை அச்சுறுத்தும் ஆட்டோமேசன் என இரண்டு பெரிய சவால்களை உலகம் சந்தித்து வருகிறது. இதனால் பெரிய மாற்றங்களை செய்ய வேண்டிய கட்டத்தில் பல நாடுகள் உள்ளன. அதற்கான விவாதங்கள் உலகம் முழுவதும் நடந்து வருகின்றன. 
 

இந்தியாவில் 1 சதவிகிதத்தனரிடம்  பெரும்பாலான செல்வம் குவிந்து கிடக்கிறது. இந்த அசாதாரண சமத்துவமின்மை தொடர்ந்தால், அது இந்திய நாட்டின் சமூக மற்றும் ஜனநாயக கட்டமைப்பை பாதிக்கும் என சமீபத்திய ஆக்ஸ்பாம் சர்வதேச அறிக்கை தெரிவித்துள்ளது. 

 

ஆண்டுக்கு 2 கோடி வேலைவாய்ப்புகள் உருவாக்கப்படும் என்ற வாக்குறுதி பொய்த்துப்போனது. 20 லட்சம் வேலைவாய்ப்புகளைகூட உருவாக்க முடியாத சூழ்நிலை நிலவுகிறது. பொருளாதார வளர்ச்சிக்கும், உருவான வேலைவாய்ப்பிற்கும் பெரிய வேறுபாடுகள் உள்ளதாக கருதப்படுகிறது.  

 

அதிகரித்துவரும் வருமான சமத்துவமின்மை மற்றும் வேலைவாய்ப்பின்மை ஆகியவை இன்றைய இந்தியாவின் பெரும் அச்சுறுத்தல்களாக உருவெடுத்துள்ளன. இந்தநிலையில் காங்கிரஸ் மட்டுமல்ல, யார் ஆட்சிக்கு வந்தாலும் குறைந்தபட்ச அடிப்படை வருமானம் போன்றதொரு திட்டத்தை நடைமுறைப்படுத்த வேண்டிய அவசியம் ஏற்பட்டுள்ளது. 

 

bad debt

 

பெருநிறுவனங்களின் வராக் கடன்களுக்கான விதிவிலக்குகளை அகற்றுதல், தற்போதுள்ள சில அத்தியாவசியமற்ற மானியங்களை நீக்குதல், செல்வந்தர்களுக்கு 1-2% வரியை அமல்படுத்துதல், ஆடம்பர பொருட்களுக்கான வரியை அதிகப்படுத்துதல் உள்ளிட்ட சில நடவடிக்கைகள் மூலம் குறைந்தபட்ச வருமான உத்தரவாத திட்டத்தை நடைமுறைப்படுத்த முடியும் என்று பொருளாதார  நிபுணர்கள் கருத்து தெரிவித்துள்ளனர். 
 

திட்டம் அமல்படுத்தப்பட்டால் ஏழைகளின் வாழ்வில் பெரிய மாற்றத்தை ஏற்படுத்தும். மற்ற நாடுகளுக்கு முன்னுதாரணமாக அமையும். அதேசமயம் 1.37 பில்லியன் மக்கள்தொகை கொண்ட இந்தியா போன்றதொரு ஜனநாயக நாட்டில் இது போன்ற திட்டத்தை செயல்படுத்துவது என்பது மிகப்பெரிய சவால்.

 

“திட்டத்திற்கு நாட்டிலுள்ள 5 கோடி குடும்பங்களை அடையாளம்காண போதுமான தரவுகள் உள்ளன. இந்த விவகாரத்தில் நிபுணர்களை நாங்கள் ஆலோசித்திருக்கிறோம். இந்த வகையான திட்டத்தை பல கட்டங்களாக இந்தியா செயல்படுத்த முடியும்” என்று முன்னாள் அமைச்சர் சிதம்பரம் சமீபத்தில் தெரிவித்தார்.
 

திட்டமானது இந்திய மொத்த உள்நாட்டு உற்பத்தியில் 1.3 சதவீதத்தை செலவழிக்கும் என்றும், சூப்பர் பணக்காரர்களுக்கு கூடுதல் செல்வு வரியை அமலாக்குவதன் மூலம் இந்த திட்டத்தை செயல்படுத்த முடியும் என்றும் பாரிஸின் உலக சமத்துவமின்மை ஆய்வறிக்கை குறிப்பிட்டுள்ளது. 

 

இந்தியாவில் தற்போது முன்மொழியப்பட்ட திட்டத்தின் பெயர் 'Nyuntam Aay Yojana(NYAY). இந்த வார்த்தை ஹிந்தி மொழியில் நீதி என்பதை குறிக்கிறது. சில நிபந்தனைகளின் அடிப்படையில் பிரேசிலில் “போல்சோ பேமிலியா” என்ற பெயரில் இதே போன்றதொரு திட்டம் நடைமுறையில் உள்ளது. இந்த திட்டம் பல லட்சக்கணக்கான மக்களை வறுமையிலிருந்து வெளிக்கொண்டுவந்து, வரலாற்றில் இடம்பிடித்தது. 

 

பிரேசிலில் அமல்படுத்தப்பட்டதை போல இந்தியாவில் நடைமுறை படுத்துவது எளிதல்ல. வருமானத்தை கணக்கிட துல்லியமான அளவீடுகள் இந்தியாவில் இல்லை. பல பொருளாதாரம் சார்ந்த பிரச்சனைகள் உருவாக வாய்ப்புண்டு. இது போன்று பல காரணிகள் இந்த திட்டத்திற்கு பெரிய சவாலாக இருக்கும்.
 

mahatma Gandhi

 

உணவு பாதுகாப்பு சட்டத்திற்கும், 100 நாள் வேலைவாய்ப்பு திட்டத்திற்கும் பணம் எங்கிருந்து வரும் என்ற கேள்வி அப்போதும் எழுந்தது. ஆனால் அந்த திட்டங்கள் நடைமுறைப்படுத்தப்பட்டன. மகாத்மா காந்தி தேசிய ஊரக வேலைவாய்ப்பு திட்டம் மூலம் 14 கோடி மக்கள் வறுமையின் பிடியிலிருந்து விடுபட்டனர்.
 

RBI அறிக்கையின்படி 2016-17 களில் 108,500 கோடியும், 2017-18 ஆம் ஆண்டுகளில் 162,700 கோடி ரூபாயும் பெருநிறுவனங்களின் வராக் கடன்கள் தள்ளுபடி செய்யப்பட்டுள்ளது. வறுமை ஒழிப்பு திட்டத்திற்கு வருடம் கிட்டத்தட்ட 3 லட்சம் கோடி தேவைப்படும். பெருநிறுவனங்களின் வராக்கடன்கள் தள்ளுபடி தவிர்க்கப்பட்டால் பெரும்பாலான நிதியை அதிலிருந்து இந்த திட்டத்திற்கு திரட்ட முடியும்.

 

மத்திய பிரதேசத்தில் இந்த மாதிரியான திட்டம் சோதனை முறையில் 8 கிராமங்களில் அமல்படுத்தப்பட்டது. இது ஏழை மக்களின் வாழ்க்கை தரத்தை உயர்த்தியுள்ளதாக ஆய்வறிக்கைகள் தெரிவிக்கின்றன.  

 

தற்போது காங்கிரசால் அறிவிக்கப்பட்ட NYAY திட்டம் அடிமட்டத்தில் வளர்ச்சியை ஊக்குவிக்கும். இந்திய பொருளாதாரம் அத்தகைய திட்டத்தைத் தக்கவைக்க முடியுமா என்பது குறித்து சந்தேகம் உள்ளது. ஆனால் நிபந்தனைகளின் அடிப்படையில் திட்டத்தை அமல்படுத்த முடியும் என ரகுராம் ராஜன் தெரிவித்துள்ளார். 

 

திட்டம் அமலுக்கு வந்தால் ஏழைகளின் வாழ்க்கை தரம் உயரும். இந்த திட்டம் பல சோதனைகளை சந்திக்கும். இது சாத்தியமா அல்லது வெறும் இனிக்கும் வாக்குறுதியா என்பதை காலம் தான் பதில் சொல்லும். ஆனால் ஒன்று மட்டும் நிச்சயம். எந்த கட்சி ஆட்சிக்கு வந்தாலும் வறுமையை ஒழிக்க இது போன்றதொரு திட்டத்தை அமல்படுத்த வேண்டியது காலத்தின் கட்டாயம்.

 

 

 

 

Next Story

புறாவால் தொலைத்த வாழ்க்கையை அந்தப் புறாவே வாழ வைக்கும் சுவாரஸ்யமான கதை !

Published on 06/03/2019 | Edited on 06/03/2019

சக உயிர்களை நேசித்த இச்சமூகம் தொழில்நுட்ப வளர்ச்சியால் பறவை, விலங்குகளிடமிருந்து விலகி, ஏன் மனிதர்களிடத்தில் இருந்தும் அந்நியப்படத் துடிக்கும் காலகட்டத்தில் இருப்பது என்பது மிகப் பெரிய கொடுமை. இப்படி மனிதனோடு ஒட்டி வாழக் கூடிய உயிர்களில் புறாக்களும் ஒன்று. மனிதனோடு பழகி, அவர்கள் கட்டளைக்கு கட்டுப்பட்டு நடப்பதும் கூட புறாவின் சிறப்பு. மன்னர்கள் காலத்தில் கடிதம் மூலம் தூது அனுப்பக் கூடிய அளவிற்கு மனிதர்களின் நம்பிக்கையைப் பெற்றது புறாக்கள். ஏன் முதல் மற்றும் இரண்டாம் உலகப் போரில் கலந்துகொண்டு பணியாற்றியதும் புறாக்களின் கூடுதல் சிறப்பு. அனைத்து மத வழிபாட்டுத் தளங்களின் கோபுரம்தான் புறாக்களின் வாழ்விடங்கள். இப்படி சுத்திரமாக பறந்து திரியும் புறாக்களுக்கு பயிற்சி கொடுத்து பந்தயத்திற்கு அனுப்புவதும் தமிழ்நாட்டில் நடைமுறையில் உள்ளது. அப்படி சென்னையில் நடந்த பந்தயத்தில் விடப்பட்ட புறா ஒன்று மின்கம்பங்கள் மற்றும் செல்போன் டவர்களினால் ஏற்படும் காந்தவிசைகளால் திசை மாறி திண்டுக்கல்லில் தஞ்சம் அடைந்தது. புறாவைப் பறிகொடுத்து தவித்த ஒரு குடும்பத்தின் உண்மைக் கதைதான் இது.
 

dove photo

திண்டுக்கல் மாவட்டம் இன்னாசியார்புரம் என்ற குக்கிராமத்தில் உள்ள புஷ்பராஜ் என்பவரின் வீட்டருகே வந்தது திசை மாறித் திரிந்த அந்த புறா. அழகானப் புறாவைப் பார்த்தவர், அதற்கு உணவு அளித்து பத்து நாட்கள் வளர்த்து வந்திருக்கிறார். இவரது வீட்டிற்கு வந்த நெல்லையைச் சேர்ந்த சாந்தப்பன் என்பவர், புறாவைப் பற்றி விசாரித்திருக்கிறார். போன் நம்பரோடு கூடிய பேப்பர் காலில் கட்டியிருந்ததைப் பார்த்துவிட்டு, அந்த எண்ணிற்கு தொடர்பு கொண்டு புறாவை உங்கள் வீட்டிலேயே வந்து ஒப்படைக்கிறோம் என்று சொன்னதும்தான் உயிரே வந்திருக்கிறது புறாவைப் பறிகொடுத்த முத்துவின் குடும்பத்திற்கு. இதைப் பற்றிக் கேள்விப்பட்ட நாமும், சாந்தப்பன் அவர்களோடு இந்தப் புறாக் காதலர்களை சந்திப்பதற்காக அக்கிராமத்திற்கே பயணமானோம்.
 

dove image

பந்தயப் புறாக்கள் வளர்ப்பவர்கள் என்றால் பெரிய பணக்காரர்களாகத்தான் இருப்பார்கள் என்று பல கற்பனைகளோடு அக்கிராமத்தின் தெருக்களில் தேடினோம். பல மாடி வீடுகளை கடந்து வந்தபோது, ஒரு வீட்டின் அருகில் நின்று கொண்டு, அண்ணே ! இங்க வாங்க, இதுதான் நம்ம வீடு என்று புறா வந்த மகிழ்ச்சியில் நம்மை தனது வீட்டிற்கு அழைத்து சென்றார் முத்து. ஒரு சின்னஞ்சிறிய ஓட்டு வீட்டில் மிக மிக ஏழ்மையில் இருக்கும் குடும்பம் என்பது அப்போதுதான் தெரிந்தது. நாம் கொண்டு சென்ற புறாவைப் பார்த்த அவருக்கும், அவரது 5 வயது பையனுக்கும் அவ்வளவு பெரிய ஆனந்தம். இப்படித்தான் இந்த புறாக் காதலர்களிடம் அறிமுகமானோம்.சின்ன வயதில் கிளி, புறா, மைனா, நாய்க்குட்டி போன்று ஏதோ ஒரு பிராணிகளோடு கொஞ்சி விளையாட நாமும் ஆசைப்படுவோம். ஆனால் பல பெற்றோர்கள் வளர்க்க அனுமதிக்காததால், ஆசைகளை அடக்கி வைத்துவிட்டு பள்ளி, கல்லூரிகளுக்கு சென்று விடுவோம். ஆனால் அந்த சின்னஞ் சிறிய ஆசைகளையும் நிறைவேற்றி வாழ்பவர்கள் ஒரு சிலர் மட்டுமே. அந்த ஒருசிலரில் முத்து அண்ணனும் ஒருவர். கன்னியாகுமரி மாவட்டம் அஞ்சுகிராமம்தான் இந்தப் பேரன்புக்காரரின் சொந்த ஊர். 

ஆரம்பத்தில் காட்டு புறாக்கள் வளர்த்து வந்தவர், இப்போது பந்தயப் புறாக்களையும் வாங்கி வளர்த்து வருகிறார். கன்னியாகுமாரியில் புறாப் பந்தயங்களை நடத்தி வரும் ஆண்டனி ரேசிங் க்ளப்-ல் இணைந்து தனது புறாக்களையும் பந்தயத்தில் களம் இறக்குகிறார். முதலில் தோல்வி கண்ட புறாக்கள் ஒரு சில போட்டிகளில் வெற்றி பெற்றதும் உள்ளூரைத் தாண்டி வெளியூரிலும் களம் இறக்க ஆரம்பித்தார். முதலில் கயத்தாறு, திருமங்கலம், திருச்சி என்று ஆரம்பித்து சில வெற்றி, தோல்விகளைக் கண்டவர் பின்பு 600 கிலோமீட்டரைத் தாண்டி சென்னையில் புறாக்களைக் களம் இறக்கினார். சமீபத்தில் சென்னையில் நடந்த போட்டியில் சென்னையிலிருந்து விட்ட புறா, அஞ்சுகிராமத்தில் உள்ள தனது கூட்டிற்கு வந்து ஓவர் ஆல் சேம்பியன் மற்றும் முதல் இடத்தையும் தட்டிச் சென்றிருக்கிறது. புறாவோடு வாழும் முத்து அண்ணனிடமே அதைப்பற்றிக் கேட்டோம், “நெல்லை மாவட்டம்தான் எங்களது பூர்வீகம். தாத்தா காலத்திலேயே அஞ்சுகிராமத்துக்கு வந்துட்டோம். எங்க வீட்டுல கறவை மாடு வளக்குறதுதான் வழக்கம். நிறைய கறவை மாடு இருந்துச்சி. ஏன்னு தெரியல எனக்கு மட்டும் சின்ன வயசுல இருந்தே புறா’னா உசுரு. கன்னி போட்டு காட்டு புறாவைப் புடிச்சி வளத்துட்ருந்தேன். எனக்கு புறா மேல இருந்த ஆர்வம் படிப்புல இல்லாம போச்சி. அப்புறம் புறா வளத்தா வீட்டுக்கு நல்லதில்லனு சொல்லி சத்தம் போட்டாங்க. நான் சொன்ன பேச்சே கேக்கல. இதைப் பாத்து கடுப்பான எங்க அப்பா, என்னைய சென்னைக்கு வேலைக்கு அனுப்பிட்டாங்க. 15 வருசம் சென்னைலதான் வேலை பாத்தேன். ஆனா புறாக் கூட இல்லையேனு தினமும் கவலையாதான் இருக்கும். அப்புறம் கல்யாணம் பண்றதுக்காக ஊருக்கு வந்தேன். ஊருல அலையுற புறாவைப் பாத்தவுடனே பழைய நியாபகம் வர ஆரம்பிச்சிட்டு. மறுபடியும் புறா வளர்க்க ஆரம்பிச்சேன். 
 

dove man

முதல்ல காட்டு புறாதான் வளத்தேன். அப்புறம் ஒருசில புறா பந்தயத்தைப் பார்த்த பிறகு பந்தயப் புறா வாங்கி வளக்க ஆரம்பிச்சேன். 25,000 ரூபாய்க்கு கூட ஜோடி புறா வாங்கி வளத்துருக்கேன். ஆனா நான் இப்ப வளக்குறது ஹோமர் புறாக்கள் மட்டும்தான். நல்ல வேகமா பறந்து வரக் கூடிய புறா வகையில இதுவும் ஒன்னு. தினமும் இரண்டு மணி நேரம் வீட்டைச் சுத்தி ஆண் புறா தனியா, பெண் புறா தனியா பறக்க விடுவோம். ஆறு மாசம் கழிச்சி பத்து கிலோமீட்டர் தள்ளி உள்ள ஊர்ல கொண்டு பறக்க விட்டு, எங்க கூட்டுக்கு சரியா வந்து சேருதானு பாப்போம். இப்படிதான் பயிற்சி கொடுப்போம். இதுல சக்சஸ் ஆயிட்டுனா அப்புறம் போட்டியில இறக்க ஆரம்பிப்போம். இந்த நேரத்துல என்னோட மனைவிக்கு மனநிலை சரியில்லாத மாதிரி ஆயிட்டு. அதனால என்னோட இரண்டு பிள்ளைகளையும் எங்க அம்மாதான் பாத்துக்குறாங்க. புறா வளக்குறதுனால இந்த மாதிரி வாழ்க்கைல நடக்குற கஷ்டமான விசயங்கள்ல இருந்து என் மனசை தேத்திக்கிறேன். கொஞ்ச மாசத்துக்கு முன்னாடி கூட திருச்சியில இருந்து விட்ட புறா 3 மணி 40 நிமிசத்துல எங்க கூட்டுக்கு வந்து சேந்துட்டு. புறாவின் உணவுக்காக வருசத்துக்கு ஒரு லட்ச ரூபாய்க்கும் மேல செலவாகுது. இதுக்கு ஸ்பான்சர் கிடைச்சா என்னோட புறா 1000 கிலோமீட்டர் பந்தயத்துல ஜெயிக்கிற அளவிற்கு கூட திறமையா வள்த்துருவேன். புறா பந்தயத்துல கலந்துக்கிட்டது மூலமா பழக்கமானவர், என்னைய நம்பி இன்னிக்கு ஒரு பேக்கரியையே ஒப்படைச்சிட்டு வெளிநாட்டுல இருக்காங்க. எந்த புறாவால படிப்பையும் வாழ்க்கையையும் தொலைச்சனோ, அதே புறாதான் வேலை வாங்கி கொடுத்து என்னைய வாழ வச்சிட்ருக்கு” என்று பெருமிதத்தோடு கூறுகிறார் முத்து அண்ணன். தங்களது ரேசன் கார்டில் புறாவின் பெயரில்லையே தவிர, புறாக்களோடு கூட்டுக் குடும்பமாகத்தான் வசிக்கிறார்கள் இவர்கள். எளிமையான ஓட்டு வீட்டில் வாழ்ந்து கொண்டு, தன் புறாவை 1000 கிலோ மீட்டரைத் தாண்டி பறக்க விட வேண்டும் என்ற கனவுகளோடு இருப்பது ஆச்சரியமானதும் கூட. கடைசியில் அவர் வேலை பார்க்கும் பேக்கரிக்கே அழைத்து சென்று அவர் கையாலேயே டீ போட்டு கொடுத்து வழியும் அனுப்பினார். மனிதர்களை நேசிப்பது மட்டும் காதல் அல்ல பறவைகளை நேசிப்பதும் காதல்தான் என்பதை நிரூபித்திருக்கிறார் முத்து என்கிற பேரன்புக்கு சொந்தக்காரர்.

Next Story

புதிய பட்டியல் எடுத்து ரூபாய் 2 ஆயிரம் கொடுக்குமாறு அரசுக்கு கோரிக்கை!!

Published on 19/02/2019 | Edited on 19/02/2019

தமிழக அரசு கொடுக்கும் சிறப்பு நிதி ரூபாய் இரண்டாயிரத்தை வறுமை கோட்டிற்கு கீழே உள்ள ஏழை மக்களுக்கு மட்டுமே வழங்க வேண்டும், அதற்கு அரசு பழைய பட்டியலை ரத்து செய்து விட்டு புதிய பட்டியல் எடுக்க வேண்டும் என்று ஈரோடு மாவட்ட அருந்ததியினர் இளைஞர் பேரவை அமைப்பு அரசுக்கு கோரிக்கை வைத்துள்ளது. 

tngovt

 

அந்த அமைப்பின் மாநில தலைவர் வடிவேல் தலைமையில் அந்த அமைப்பின் நிர்வாகிகள் ஈரோடு மாவட்ட ஆட்சித் தலைவரிடம் கோரிக்கை மனு கொடுத்தனர்.

 

பிறகு அவர்கள் செய்தியாளர்களிடம் பேசுகையில், 

 

"கடந்த 15 ஆண்டுகளுக்கு முன்பு தேர்வு செய்தபடி, கடந்த 2003 ஆம் ஆண்டு மத்திய அரசு ஸ்வர்ண ஜெயந்தி நகர்புற வேலைவாய்ப்பு திட்டம் மற்றும் அந்தியோ தயா அன்ன யோஜனா திட்டத்தின் கீழ் தேர்வு செய்யப்பட்டவர்கள் வறுமைகோட்டிற்கு கீழ் உள்ளவர்கள் என அறிவிக்கப்பட்டது. அதன்படி, குடிசைவீட்டில் வசிப்பவர்களாகவும், சொந்தமாக நிலமோ வீடோ இல்லாமல் இருப்பவராகவும், குறிப்பாக ஆதரவற்றோர், உடல் ஊனமுற்றோர் மற்றும் எஸ்.சி. மக்களுக்கு முன்னுரிமை அளிக்கப்பட்டது.

 

ஆனால் தற்போது இந்த பட்டியலில் சுமார் 15 ஆண்டுகளுக்கு முன்பு எடுக்கப்பட்டது. இதல் பல குளறுபடிகள் உள்ளது. பட்டியலில் பெயர் உள்ளவர்கள்

பலர் இறந்து விட்டனர், அரசு பணியில் பலர் உள்ளனர். சொந்தமாக நிலம், வீடு உள்ளவர்கள் பெயர் இடம் பெற்றுள்ளது. எனவே, இதனை மறு ஆய்வு செய்ய வேண்டும். 

 

இந்த ஆண்டு வறுமைகோட்டிற்கு கீழ் உள்ளவர்கள் ஆண்டு வருமானம் ரூ. 24,000/- ஏழை கூலித்தொழிலாளர்கள், உடல் ஊனமுற்றோர்களுக்கும், ஆதரவற்றோர், விதவைகளுக்கு மற்றும் எஸ். சி. முன்னுரிமை அளித்து புதிய பட்டியலை தேர்வு செய்யவேண்டும். ஈரோடு மாவட்டத்தில் உள்ள மாநகராட்சி, நகராட்சி, பேரூராட்சி, ஊராட்சி அலுவலகங்கள் மூலம் பொதுமக்களிடம் நேரடியாக விண்ணப்பங்களை பெற்று ஆய்வு செய்து வறுமைகோட்டிற்கு கீழ் உள்ளோர் புதிய பட்டியல் தேர்வு செய்து  தமிழக அரசு வழங்கும் சிறப்பு உதவி தொகை ரூ. 2000/- வழங்க நடவடிக்கை எடுக்க வேண்டும் புதிய பட்டியல் எடுத்தால் தான் உண்மையான ஏழை மக்களுக்கு சிறப்பு நிதி இரண்டாயிரம் கிடைக்கும் இல்லையேல் ஆளுங்கட்சிக்காரர்கள் அதிக பயன்பெறும் நிலையே ஏற்படும்" என்றனர்.