Skip to main content

15 ஆண்டுகளாக தவில் வாசித்து சாதனை படைக்கும் பெண்!  

Published on 08/03/2020 | Edited on 08/03/2020

கடலூர் மாவட்டம் விருத்தாச்சலத்தில் வசித்து வருபவர்கள் சின்னப்பிள்ளை- திலகவதி தம்பதியினர். இவர்களின் மகள் சரோஜினி(21). சின்னப்பிள்ளை கோயில் நிகழ்ச்சிகள், திருமணங்கள் மற்றும் கச்சேரிகளில் நாதஸ்வரம் வாசிக்கும் கலைஞராவார். 


இவர் தனது பெண் பிள்ளையான சரோஜினிக்கு பாரம்பரிய கலையான தவில் இசை வடிவத்தை கற்று தந்துள்ளார்.  பெண்கள் வாழ்க்கையில் முன்னேறுவதற்கும், பெண்ணால் சாதிக்க முடியாதது எதுவும் இல்லை என்று பறை சாற்றவும் இந்த இசை வடிவத்தை பயிற்றுவித்து, இசையில் தனது மகளை சாதிக்கவும் வைத்துள்ளார். 

 Playing in dawil for 15 years  Achievement Girl!

சரோஜினி தனது ஜந்து வயது முதலே தந்தை செல்லும் நிகழ்ச்சிகளுக்கு சென்று நாதஸ்வரம் மற்றும் தவில் வாசிப்பு முறைகளை கற்றுக் கொண்டு வந்தார். தந்தையின் ஊக்கத்தாலும், தனது தீவிர முயற்சியாலும் ஐந்தாம் வகுப்பு படிக்கும் கால கட்டத்திலேயே  தவிலில் உள்ள தாளங்கள், கோர்வைகள், சொல்கள் உள்ளிட்டவைகளை முழுவதுமாக கற்று தேர்ந்தார். தனது மகளின் ஆசையை நிறைவேற்றும் தந்தையாக செயல்பட்ட சின்னப்பிள்ளை, சரோஜினி ஆறாம் வகுப்பு படிக்கின்ற போது புகழ்பெற்ற விருத்தகிரீஸ்வரர் ஆலயத்தில் தவில் இசை அரங்கேற்ற நிகழ்ச்சி நடத்தப்பட்டது. 


பெண்ணாகப் பிறந்து, தந்தையின் ஊக்கத்தால், சிறப்பான முறையில் தவில் கலையை கற்றுக்கொண்டு தமிழகத்திலேயே முதல் தவில் அடிக்கும் பெண்ணாக கை தேர்ந்தார். பள்ளிப் படிப்பு முடித்தபின், கல்லூரியில் பொறியியல் படிப்பைத் தொடர்ந்து கொண்டே சரோஜினி தனக்கு பிடித்த தவில் கலையில் கலைஞராகவும் வலம் வந்தார். பொறியியல் படிப்பை நல்ல முறையில் முடித்தவர் தவில் கலை மீது கொண்ட ஆர்வத்தினால், தொடர்ச்சியாக தனது பணியை சிறப்பாக செய்து கொண்டு வந்தார்.

 Playing in dawil for 15 years  Achievement Girl!

சிறு வயது முதல் 15 ஆண்டுகளாக தனது தாளத்தின் வாயிலாக இறைவனை மகிழ்ச்சி அடைய வைப்பதிலும், பல்வேறு நிகழ்ச்சியில் பங்கு பெற்றதாலும் தனக்கென்று ரசிகர்களை தக்க வைத்துக் கொண்டுள்ளார் சரோஜினி. தமிழகத்தில் முதன்முதலாக பெண் ஒருவர் தவில் வாசிக்கும் விதத்தினை அறிந்து கொண்டு, பல்வேறு பெண்கள் தற்போது தவில் கலையை நோக்கி செல்வதற்கு முன்னுதாரணமாக திகழ்ந்து வரும் சரோஜினி திறமையை மென்மேலும் வளர்த்துக்கொண்டார். 
 

பெண்களால் சாதிக்க முடியும் என்று தனது திறமை மூலம் நிரூபித்துக் காட்டிய சரோஜினியின் தைரியத்தையும், திறமையையும் பாரட்டி 'தவில் பேரொளி', 'தவில் சுடரொளி' உள்ளிட்ட பட்டங்கள் கிடைத்தன. மேலும் தமிழ்நாடு மட்டுமல்லாது பல்வேறு வெளிநாடுகளிலும் பல்வேறு இடங்களில் தனது நிகழ்ச்சிகளை நடத்தி 50- க்கும் மேற்பட்ட விருதுகளை வாங்கி குவித்துள்ளார். திருமணமான பின்பும் குடும்பப் பொறுப்பையும் ஏற்றுக்கொண்ட சரோஜினி. கலைப் பயணத்திற்கு, அவரது கணவர் மணிகண்டன் எவ்வித தடைகளும் விதிக்காததால், தொடர்ச்சியாக தனது பயணத்தை மேற்கொண்டு வருகிறார். 

 Playing in dawil for 15 years  Achievement Girl!

"உறவினர்கள், நண்பர்கள் பலபேர் பெண்ணாக இருந்துகொண்டு தவில் வாசிக்கிறாயே... என கேலி பேசினர். படித்த படிப்புக்கு அதிக சம்பளதில் நல்ல வேலை கிடைக்குமே...' என்றனர். ஆனால் தவில் கலை மீது எனக்கிருந்த ஆர்வத்தினால தொடர்ச்சியாக தொய்வின்றி கற்றுக் கொண்டேன். பல்வேறு துறைகளில் சாதிக்கத் துடிக்கும், ஒவ்வொரு பெண்களும், தங்களின் திறமைகள் மீது நம்பிக்கை வைத்து, தடைகளைத் தாண்டி முன்னேறி செல்ல வேண்டும். எனது கலைப்பயணத்துக்கு என் தந்தை, கணவர் மணிகண்டன் என இரு ஆண்கள் ஊக்கமாகவும், உறுதுணையாகவும் விளங்குகின்றனர். பெண்கள் தங்களது சுதந்திரத்தை நல்லவைகளுக்காக கையில் எடுத்து, நாட்டிற்கும், வீட்டிற்கும் பெருமை சேர்க்க வேண்டும். அதுவே தனது மகளிர் தின வாழ்த்து" என்கிறார் சரோஜினி.

 Playing in dawil for 15 years  Achievement Girl!

விருத்தாசலம் பகுதியில் தனது திறமையின் மூலம் சிறு வயது முதல் தவில் கலையினை சிறப்பாக செய்துவரும் சரோஜினி தற்போது விருத்தாச்சலம் விருத்தகிரீஸ்வரர் கோவிலில் தற்காலிக தவில் கலைஞராக இறைவனுக்கு நற்பணி செய்துவருகிறார். இவருக்கு அறநிலையத்துறை சார்பில் கோயிலில் நிரந்தமாக தவில் இசைக்கும் பணியினை தமிழக அரசு கொடுக்க வேண்டும் என இசை ஆர்வலர்கள் கோரிக்கை வைக்கின்றனர். 

தவில் கலைஞராக திகழ்ந்து சாதனைகள் படைக்கும்  சரோஜினி மென்மேலும் வளர நாமும் வாழ்த்துவோம்!


 

 

Next Story

ஏறத்தாழ 5 ஆண்டுகளுக்குப் பின் தீர்ப்பு; அதிமுக பிரமுகர் கொலை வழக்கில் திருப்பம்

Published on 28/04/2023 | Edited on 28/04/2023

 

Judgment after approximately 5 years; A twist in the case of AIADMK leader Panchanathan

 

கடலூர் தேவனாம்பட்டினம் மீனவர் மற்றும் அதிமுக நிர்வாகியான பஞ்சநாதன் கொலை வழக்கில் 10 பேருக்கு ஆயுள் தண்டனை விதித்து கடலூர் மாவட்ட கூடுதல் அமர்வு நீதிமன்றம் உத்தரவிட்டுள்ளது.

 

கடலூரில் தேவனாம்பட்டினம் பகுதியைச் சேர்ந்த மீனவர்களுக்கும், சோனாங்குப்பம் பகுதியைச் சேர்ந்த மீனவர்களுக்கும் இடையே அடிக்கடி தகராறு ஏற்படுவது வழக்கமாம். சுருக்குமடி வலையைப் பயன்படுத்தி மீன் பிடிப்பது தொடர்பாக இந்த தகராறு ஏற்படும் என்று கூறப்படுகிறது. இந்நிலையில் 2018 ஆம் ஆண்டு மே மாதம் 15 ஆம் தேதி இருதரப்பிற்கும் இடையே மோதல் ஏற்பட்டது. இந்த மோதலில் சோனாங்குப்பத்தைச் சேர்ந்த அதிமுக பிரமுகர் பஞ்சநாதன் கொலை செய்யப்பட்டார்.

 

இது குறித்து காவல்துறையினர் தொடர் விசாரணையில் ஈடுபட்டு வந்தனர். 21 பேர் கைது செய்யப்பட்டு 20 பேர் மீது குற்றப்பத்திரிகையும் தாக்கல் செய்யப்பட்டது. விடுபட்ட நபர் வழக்கு விசாரணையின் போதே இறந்துவிட்டார் என்பதும் குறிப்பிடத்தக்கது. தொடர்ந்து நடைபெற்று வந்த இந்த வழக்கின் விசாரணை தற்போது முடிவுக்கு வந்துள்ளது. இவ்வழக்கில் 10 பேர் குற்றவாளிகள் என கடலூர் முதலாவது கூடுதல் மாவட்ட அமர்வு நீதிமன்றம் தீர்ப்பளித்தது.

 

இதன்படி, கந்தன், ஆறுமுகம், சரண்ராஜ், சுரேந்தர், ஓசைமணி உள்ளிட்ட 10 பேர் குற்றவாளிகள் என நீதிமன்றம் தீர்ப்பளித்தது. இந்நிலையில் 10 பேருக்கும் ஆயுள் தண்டனை விதித்து கடலூர் மாவட்ட கூடுதல் அமர்வு நீதிமன்ற நீதிபதி பிரகாஷ் தீர்ப்பளித்து உத்தரவிட்டுள்ளார்.

 

 

Next Story

யார் முதலில் முந்துவது என போட்டி - பள்ளி வேன் கவிழ்ந்து விபத்து

Published on 11/10/2022 | Edited on 11/10/2022

 

school vans incident students cuddalore district



பள்ளி வாகனங்கள் ஒன்றையொன்று முந்தும் முயற்சியில் ஒரு வாகனம் கவிழ்ந்து விபத்துக்குள்ளானதில் 25 மாணவ, மாணவிகள் காயமடைந்தனர். 

 

கடலூர் மாவட்டம், விருத்தாசலம் அருகே உள்ள கோபாலபுரத்தில் செயல்பட்டு வரும் தனியார் பள்ளியில் படிக்கும் மாணவ, மாணவியர்களை ஏற்றிக் கொண்டு அப்பள்ளியைச் சேர்ந்த இரு வேன்கள் போட்டிப்போட்டு வந்து கொண்டிருந்தனர். அப்போது ஒரு வேன் முந்த முயன்ற போது, கட்டுப்பாட்டை இழந்து கவிழ்ந்தது. இதில், 25 மாணவ, மாணவிகள் காயமடைந்து சிகிச்சைக்காக மருத்துவமனைக்கு அனுப்பி வைக்கப்பட்டனர். 

 

இதற்கிடையே பள்ளி வாகன ஓட்டுநர்கள் பொறுப்பின்றி செயல்படுவதாகக் குற்றஞ்சாட்டி கோ.ஆதனூர் கிராம மக்கள், சாலை மறியலில் ஈடுபட்டனர். 

 

விபத்து குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.