Skip to main content

யாருக்கு நம்பிக்கை அளிக்கிறது நம்பிக்கையில்லாத் தீர்மானம்?

Published on 24/07/2018 | Edited on 24/07/2018
நம்பிக்கை அளித்திருக்கிறதா நம்பிக்கை இல்லாத் தீர்மானம்?

 

“என்னை மக்களவையில் பேசவிட்டு பாருங்கள். நிலநடுக்கத்தையே ஏற்படுத்துவேன்” என்று சில மாதங்களுக்கு முன் ராகுல்காந்தி சவால் விடுத்திருந்தார். தனது கேள்விகளுக்கு மோடியால் பதில் சொல்லவே முடியாது என்றும் கூறியிருந்தார். மோடி அரசுக்கு எதிரான நம்பிக்கையில்லாத் தீர்மானத்தை ஆதரித்து ராகுல் பேசியபோது மக்களவை நிஜமாகவே அதிர்ந்ததை பார்க்க முடிந்தது.

 

2014 ஆம் ஆண்டு மக்களவைக்கு நடைபெற்ற தேர்தலில் பாஜகவும் அதன் கூட்டணிக் கட்சிகளும் 336 இடங்களில் வெற்றிபெற்றன. பாஜக மட்டுமே 282 தொகுதிகளைக் கைப்பற்றி தனிப்பெரும்பான்மை பெற்றது. இந்நிலையில்தான் போதுமான பெரும்பான்மை அரசுக்கு இருந்தாலும்,  கடந்த நான்காண்டு மோடி ஆட்சியில் மக்கள் சந்தித்த லாபநட்ட கணக்குகளை பட்டியலிடுவதற்கான வாய்ப்பாக, எதிர்க்கட்சிகள் சார்பில் நம்பி்ககையில்லாத் தீர்மானம் கொண்டுவரப்பட்டது. கூட்டணிக் கட்சியாக இருந்த தெலுங்குதேசம் கட்சியே இந்த தீர்மானத்தை முதலில் கொண்டுவந்தது கூடுதல் சிறப்பாக அமைந்தது.

 

 

 

விவாதத்தில் பங்கேற்றுப் பேசிய ராகுல் சபையை அதிரவிட்டார் என்பதே நிஜம். அவருடைய ஆவேசமான பேச்சு புதிய உச்சத்தை தொட்டது. நாடுமுழுவதும் புதிய ராகுலை பார்த்து ரசித்தார்கள். தனது கண்ணை நேருக்கு நேர் பார்த்து பேசமுடியாதவர் மோடி என்று ராகுல் பேசியபோது பிரதமர் மோடியின் முகம் வாடிப்போயிருந்தது. நாட்டுக்கு காவலனாக இருப்போம் என்ற மோடி, சீனாவுடன் கூட்டாளியாகி இருக்கிறார் என்று கிண்டல் செய்தார் ராகுல்.

 

no confidence motion


 

ரபேல் விமான கட்டுமானப் பணியை மோடிக்கு வேண்டிய முன் அனுபவமில்லாத தனியார் நிறுவனத்துக்கு கொடுக்கப்பட்டதை ராகுல் கிழித்துத் தொங்கவிட்டார். கருப்புப்பணத்தை மீட்டு ஒவ்வொருவர் கணக்கிலும் 15 லட்சம் போடுவேன் என்ற மோசடிப் பிரச்சாரத்தையும், அவரைப் பிரபலப்படுத்த சில நிறுவனங்கள் செய்த புரமோஷன் வேலைகளையும் புட்டுப்புட்டு வைத்தார்.

 

ஆயிரக்கணக்கான கோடி ரூபாய் செலவு செய்து வெளிநாடுகளுக்கு டூர் அடிக்கும் மோடி, பெரிய நிறுவனங்களுக்கு இரண்டரை லட்சம் கோடி ரூபாய் கடனை தள்ளுபடி செய்ததையும், விவசாயிகளுக்கு கடன் தள்ளுபடி செய்ய மறுப்பதையும் அம்பலப்படுத்தினார். மோடியையும் அரசாங்கத்தையும் நார்நாராக கிழித்துத் தொங்கவிட்ட ராகுல், மோடியைக் கட்டியணைத்து கைகுலுக்கி தன்னை ஒரு உண்மையான இந்தியன் என்று நிரூபித்தார்.

 

 

 

ராகுலின் பேச்சும் அவருடைய எதார்த்தமான நடவடிக்கையும் மக்களைக் கவர்ந்ததைக்கூட தாங்கமுடியாத பாஜக, அதை நடிப்பு என்று கேலிபேசியது. ஆனால், இந்தியாவுக்கு அடுத்த பிரதமர் வேட்பாளர் ராகுல்தான் என்பது உறுதியாகிவிட்டதாக அரசியல் விமர்சகர்கள் ஒப்புக்கொள்ளத் தொடங்கிவிட்டனர்.

 

ஆனால், வழக்கம்போல மோடி அதிகநேரம் பேசினாலும், அரைத்தமாவையே அரைத்தாரே தவிர, ராகுலின் குற்றச்சாட்டுகளை, திசைதிருப்புவதிலேயே குறியாக இருந்தார். வழக்கமான பொய்களையே அடுக்கினார். வளர்ச்சி என்ற வார்த்தையை விடாமல் உச்சரித்த மோடி காங்கிரஸை தாக்குவதற்கே முன்னுரிமை கொடுத்தார். ராகுல் கட்டிப்பிடித்து கைகுலுக்கியதை, தன்னை வெளியேற்ற அவர் அவசரப்படுவதாக திரித்துக் கூறி பாஜகவினரை சிரிக்க வைத்தார். மோடியின் பதில்கள் எதுவுமே பலனளிக்காமல், ராகுல் உலக அளவில் ட்ரெண்டாகிவிட்டார் என்பதே உண்மை.

 

no confidence motion


 

15 ஆண்டுகளுக்குப் பிறகு மத்தியில் ஆளுங்கட்சிக்கு எதிராக மக்களவையில் கொண்டுவரப்பட்ட இந்த நம்பிக்கையில்லாத் தீர்மானம் எதிர்பார்த்தபடியே தோல்வி அடைந்துள்ளது. ஆனால், ஆட்சிப் பொறுப்பேற்றபோது பாஜக கூட்டணி பெற்றிருந்த 336 உறுப்பினர்களையும், கூட்டணிக் கட்சிகளையும்  தக்கவைக்க முடியவில்லை என்ற உண்மை வெளிப்பட்டது. ரெய்ட் அச்சுறுத்தல் மூலமாக அதிமுகவின் 37 வாக்குகளை வாங்கியும்கூட 325 வாக்குளை மட்டுமே தீர்மானத்துக்கு எதிராக பெற்றிருக்கிறது பாஜக. அதேசமயம், இந்தத் தீர்மானம் தோல்வி அடைந்தாலும், 2003 ஆம் ஆண்டு நம்பிக்கையில்லா தீர்மானத்தின் மூலம் சோனியாவின் தலைமைப்பண்பு வெளிப்பட்டதைப் போல, இந்த ஆண்டு, ராகுலின் தலைமைப் பண்பு வெளிப்பட்டிருக்கிறது.

 

 

 

பிஜு ஜனதாதளம், தெலங்கானா ராஷ்டிர சமிதி, சிவசேனா ஆகிய கட்சிகள் தனக்கு ஆதரவளிக்கும் என்று பாஜக கூறியிருந்தது. ஆனால், அவை இந்த விவாதத்திலும், வாக்கெடுப்பிலும் பங்கேற்காமல் தவிர்த்துவிட்டன. ஆனால், காங்கிரஸுடன் சேருவதில் தங்களுக்கு தயக்கமில்லை என்று திரிணாமுல் காங்கிரஸ், சமாஜ்வாதி, பகுஜன் சமாஜ், தெலுங்குதேசம், திமுக, மதசார்பற்ற ஜனதாதளம் உள்ளிட்ட சில கட்சிகள் தெளிவுபடுத்தி உள்ளன. இடதுசாரிக் கட்சிகள் தீர்மானத்தை ஆதரித்தாலும், காங்கிரஸுடன் அணிசேர்வது குறித்து தேர்தல் சமயத்தில்தான் முடிவெடுக்கும் என்று தெரிகிறது.

 

எது எப்படியோ, 2019 ஆம் ஆண்டு மக்களவைத் தேர்தலில் மாற்றம் நிச்சயம் என்பதற்கான முன்னோட்டமாகவே இந்த தீர்மானம் கருதப்படுகிறது. 

 

 

 

 

Next Story

தண்ணீர் தர மறுக்கும் கர்நாடகா; தமிழக காங்கிரஸ் கண்டனம்

Published on 12/07/2024 | Edited on 12/07/2024
Tamil Nadu Congress condemns Karnataka government on Cauvery issue

தமிழகத்திற்கு நாள் ஒன்றுக்கு 1 டிஎம்சி தண்ணீர் திறக்க வேண்டும் என்று காவிரி ஒழுங்காற்று குழு பரிந்துரை செய்திருந்தது. இந்த நிலையில் கர்நாடக முதல்வர் சித்தராமையா மற்றும் துணை முதல்வர் டி.கே.சிவக்குமார் தலைமையில் தமிழகத்திற்குத் தண்ணீர் திறப்பது குறித்து அதிகாரிகளுடன் ஆலோசனை நடத்தப்பட்டது. இதையடுத்து, தமிழகத்திற்குத் தண்ணீர் தரவே முடியாது என்று கர்நாடக முதல்வர் சித்தராமையா திட்டவட்டமாகத் தெரிவித்துள்ளார்.

இது தொடர்பாகச் செய்தியாளர்களைச் சந்தித்த கர்நாடக முதல்வர் சித்தராமையா, “காவிரி பாசனப் பகுதியில் 28 சதவீதம் தண்ணீர் பற்றாக்குறை உள்ளது. கர்நாடகாவின் வலியுறுத்தலை மீறி தண்ணீர் திறக்க காவிரி ஒழுங்காற்று குழு உத்தரவிட்டுள்ளது. கர்நாடகாவில் பற்றாக்குறை இருப்பதால் தற்போதைக்கு தமிழகத்திற்கு தண்ணீர் திறந்துவிட  முடியாது” என்று தெரிவித்தார். மேலும் இது குறித்து ஆலோசனை நடத்தக் கர்நாடக மாநிலத்தில் உள்ள அனைத்து கட்சியினருக்கும் முதல்வர் சித்தராமையா அழைப்பு விடுத்துள்ளார். 

இந்த நிலையில் கர்நாடக அரசுக்கு தமிழக காங்கிரஸ் தலைவர் செல்வப்பெருந்தகை கண்டனம் தெரிவித்துள்ளார். இது தொடர்பாக அவர் வெளியிட்டுள்ள அறிக்கையில், “காவிரி நீரை ஆண்டுதோறும் குறுவை சாகுபடிக்காக தண்ணீரை திறக்க வேண்டிய ஜூன் 12 ஆம் தேதி திறக்காத காரணத்தால் டெல்டா விவசாயிகள் நிலத்தடிநீரை பயன்படுத்தி கடுமையான தண்ணீர் பற்றாக்குறையை எதிர்கொள்ளவேண்டியிருக்கிறது. இந்நிலையில் காவிரி ஒழுங்காற்றுக் குழு ஆணையின் படி 12 ஆம் தேதியில் இருந்து ஜூலை மாதம் இறுதிவரை நாளொன்றுக்கு 1 டி.எம்.சி. காவிரி நீரை திறந்து விட வேண்டும் என கர்நாடக அரசை அறிவுறுத்தியிருக்கிறது. ஆனால் கர்நாடக முதலமைச்சர் சித்தராமையா ஜூலை மாதம் வரை 1 டி.எம்.சி. நீரை திறந்துவிட முடியாது என்று கூறியிருக்கிறார். இதன் மூலம் காவிரி ஒழுங்காற்றுக் குழு ஆணையின் படி மிக மிக குறைந்த நீரை தான் வழங்கும்படி கோரியிருந்தது. அந்த குறைந்தபட்ச நீரை கூட கர்நாடக அரசு தர மறுப்பது எந்த வகையிலும் ஏற்கத்தக்கதல்ல. இந்த போக்கு காவிரி ஒழுங்காற்றுக் குழுவின் உத்தரவை உதாசீனப்படுத்துகிற செயலாகும். 

காவிரி நீர் பங்கீட்டின்படி தமிழகத்திற்கு ஜூன் மாதம் ஏறத்தாழ 9 டி.எம்.சி.யும், ஜூலை மாதத்தில் 31 டி.எம்.சி.யும் ஆக மொத்தம் 40 டி.எம்.சி. தண்ணீர் பெறுகிற உரிமை நமக்கு இருக்கிறது. ஆனால் இதுவரை 4.6 டி.எம்.சி. தான் கர்நாடக அரசு கடந்த 10 ஆம் தேதி வரை வழங்கியிருக்கிறது. இதன்படி ஏற்கனவே 19.3 டி.எம்.சி. தரவேண்டிய நீர் நிலுவையில் இருக்கிறது. இதுகுறித்து காவிரி ஒழுங்காற்றுக் குழு குறிப்பிடாமல் பொதுவாக 12 ஆம் தேதியில் இருந்து நாள் தோறும் 1 டி.எம்.சி. வீதம் ஜூன் 31 ஆம் தேதி வரை வழங்க வேண்டும் என்று கூறியிருப்பது மிகுந்த ஏமாற்றத்தை தருகிறது. இந்நிலையில் காவிரி ஒழுங்காற்றுக் குழுவின் குறைந்தபட்சமாக ஒரு நாளைக்கு 1 டி.எம்.சி. திறந்து விட வேண்டும் என்ற கோரிக்கையை மறுக்கிற வகையில் கர்நாடக அரசின் முடிவை தமிழ்நாடு காங்கிரஸ் சார்பில் வன்மையாக கண்டிக்க விரும்புகிறேன். தண்ணீர் பற்றாக்குறையில் குறுவை சாகுபடியை நிறைவு செய்யாமல் இருக்கும் சிரமமான நிலையை கர்நாடக முதலமைச்சர் புரிந்துகொண்டு காவிரி ஒழுங்காற்றுக் குழுவின் உத்தரவை நிறைவேற்ற வேண்டும் என கேட்டுக்கொள்கிறேன்.

காவிரி ஒழுங்காற்றுக் குழுவின் உத்தரவை நிறைவேற்ற மறுக்கும் கர்நாடக அரசின் நடவடிக்கை குறித்து பிரதமர் மோடி தலைமையிலான தேசிய ஜனநாயக கூட்டணி அரசு மௌனம் காத்து வேடிக்கை பார்க்கிறது. கடந்த சில ஆண்டுகளாக தமிழகத்தை புறக்கணித்து வந்த ஒன்றிய பாஜக அரசின் நடவடிக்கை தமிழகத்தின் மீது அக்கறை இல்லை என்பதையே உறுதி செய்கிறது. எனவே காவிரி ஒழுங்காற்றுக் குழுவின் ஆணையை நிறைவேற்ற பிரதமர் மோடி உடனடியாக தலையிட வேண்டும் என கேட்டுக்கொள்கிறேன்.” எனத் தெரிவித்துள்ளார்.

Next Story

“ஸ்மிருதி இராணியை இழிவுபடுத்த வேண்டாம்” - ராகுல் காந்தி வேண்டுகோள்

Published on 12/07/2024 | Edited on 12/07/2024
Rahul Gandhi said that Don't insult Smriti Irani

கடந்த 2019 நாடாளுமன்றத்  தேர்தலில் காங்கிரஸ் தலைவர் ராகுல் காந்தியை அவரது குடும்பத் தொகுதியான அமேதியில் பாஜக வேட்பாளர் ஸ்மிருதி இராணி தோற்கடித்தார். அதேபோன்று இந்த முறையும் ராகுல் காந்தியை அமேதி தொகுதியில் தோற்கடிப்பேன் என்று ஸ்மிருதி இராணி சவால் விடுத்தார். ஆனால் கடைசி நேரத்தில் ராகுல் காந்தி அமேதி தொகுதியில் போட்டியிடாமல், காந்தி குடும்பத்தின் பாரம்பரிய தொகுதியான ரேபரேலி தொகுதியில் போட்டியிட்டு வெற்றியும் பெற்றார். 

அதே சமயம் அமேதியில் ஸ்மிருதி இராணியை எதிர்த்து ராகுல் காந்தி குடும்பத்தின் நம்பிக்கைக்குரிய நபரான கிஷோரி லால் சர்மாவைக் காங்கிரஸ் நிறுத்தியது. பின்னர் 2 லட்சம் வாக்குகள் வித்தியாசத்தில் ஸ்மிருதி இராணியைத் தோற்கடித்து கிஷோரி லால் சர்மா அமோக வெற்றிபெற்றார். இதனைத் தொடர்ந்து தோல்வியை ஒப்புக்கொண்ட ஸ்மிருதி இராணி, தொடர்ந்து அமேதி தொகுதி மக்களுக்காக பணியாற்றுவேன் என்று தெரிவித்தார். இதனைத் தொடர்ந்து, காங்கிரஸ் கட்சியினர் ஸ்மிருதி இராணிக்கு எதிராக சமூக வலைத்தளங்களில் கருத்து தெரிவித்து கடுமையான விமர்சனங்களை முன்வைத்து வருகின்றனர். 

இந்த நிலையில் ஸ்மிருதி இராணியை இழிவுபடுத்த வேண்டாம் என நாடாளுமன்ற எதிர்க்கட்சி தலைவர் காங்கிரஸ் எம்.பி ராகுல் காந்தி கேட்டுக்கொண்டுள்ளார். இது தொடர்பாக அவர் வெளியிட்டுள்ள சமூக வலைத்தள பக்கத்தில், “வாழ்க்கையில் வெற்றியும் தோல்வியும் சகஜம். அதனால் அந்த விஷயத்தில் ஸ்மிருதி இராணி அல்லது வேறு எந்தத் தலைவர்களையும், இழிவான வார்த்தைகளைப் பயன்படுத்துவதையும், கேவலமாக நடந்து கொள்வதையும் தவிர்க்குமாறு அனைவரையும் கேட்டுக்கொள்கிறேன். மக்களை அவமானப்படுத்துவதும் அவமதிப்பதும் பலவீனத்தின் அடையாளம், வலிமை அல்ல” எனக் குறிப்பிட்டுள்ளார்.