Skip to main content

சீனர்கள் தமிழை அதிகமா கத்துக்கிட்டு ஊக்குவிக்குறாங்க; தமிழர்கள்? - முத்து கனகலெட்சுமி ஆதங்கம்

Published on 11/05/2023 | Edited on 11/05/2023

 

 Muthu Kanagalakshmi Interview

 

நம்முடைய தாய்மொழியை வைத்து மட்டுமே உலகம் முழுவதும் பயணிக்க முடியும் என்கிற நம்பிக்கையை ஊட்டி, வெளிநாட்டவர்க்கும் தமிழ் கற்றுக்கொடுக்கும் அரும்பணியைச் செய்த இடைநிலை ஆசிரியர், முனைவர் முத்து கனகலட்சுமி அவர்களுடன் ஒரு சிறப்பு நேர்காணல்...

 

இயல்பிலேயே எனக்கு ஆய்வு மனப்பான்மை உண்டு. 2001 ஆம் ஆண்டு தொடங்கிய என்னுடைய மொழி ஆய்வு இன்று வரை தொடர்ந்து கொண்டிருக்கிறது. உச்சரிப்பின் முக்கியத்துவத்தை நாம் மறந்த காரணத்தினால் தான் நம்முடைய குழந்தைகளுக்கு சரியாகத் தமிழ் பேச வரவில்லை. கடந்த நூறு ஆண்டுகளாக நாம் தமிழைத் தவறாகத் தான் உச்சரித்துக் கொண்டிருக்கிறோம். வரி வடிவம் என்பது எழுதவும் பயன்படும், வாசிக்கவும் பயன்படும். இதையே நான் குழந்தைகளுக்கு சொல்லிக் கொடுக்கிறேன். 12 நாட்களில் இதைக் கற்றுக்கொள்ளலாம். 

 

திருவண்ணாமலை மாவட்டத்தில் பால்வாடி குழந்தைகளுக்கு இந்தப் பயிற்சியை வழங்கினோம். ஏழு நாள் பயிற்சியில் வரி வடிவங்கள் அனைத்தையும் மூன்று வயது குழந்தைகள் சரியாகக் கற்றுக்கொண்டனர். பேச்சு வராத ஒரு குழந்தையாலும் வரி வடிவங்களை சரியாகக் கற்றுக்கொள்ள முடிந்தது. வெளிநாட்டில் பயிற்சி எடுத்துக்கொண்டிருந்த ஒரு தமிழ் ஆசிரியருக்கு 'ழ' எழுத்தை சரியாக எழுத வரவில்லை. அவருக்கும் இந்த வரி வடிவ முறை கைகொடுத்தது. தமிழை வைத்து மட்டுமே அனைத்து இடங்களுக்கும் பயணிக்க வேண்டும் என்று முடிவெடுத்ததால் நான் ஆங்கிலம் கற்றுக்கொள்ளவில்லை. 

 

தொடக்கக் கல்வித் திட்டத்தில் அனைவரையும் படிக்க வைக்க வேண்டும் என்கிற முயற்சி நடந்தது. அப்போது ராமநாதபுரம் மாவட்ட ஆட்சியரின் உதவியுடன் செங்கல் சூளையில் வேலை செய்து வந்த குழந்தைகளை பள்ளி அமைத்துப் படிக்க வைத்தோம். தமிழ் மொழியை வளர்க்க வேண்டும், பரப்ப வேண்டும் என்பதற்காக தலைமையாசிரியராக வேலை செய்துகொண்டிருந்த நான் இடைநிலை ஆசிரியராக விருப்பத்தின் பேரில் மாறினேன். சென்னையில் எனக்கு அப்போதைய மேயர் மா.சுப்பிரமணியன் அவர்களும் தங்கம் தென்னரசு அவர்களும் மிகுந்த ஊக்கமும் உற்சாகமும் அளித்தனர்.

 

தமிழ்நாட்டில் எப்போது அனைத்து குழந்தைகளும் தமிழ் படிக்கின்றனரோ அன்றுதான் கார் வாங்க வேண்டும் என்று முடிவு செய்துள்ளேன். திருவண்ணாமலையில் சமீபத்தில் 1,57,000 மாணவர்களுக்குப் பயிற்சி கொடுத்து அவர்களை வாசிக்க வைத்திருக்கிறோம். அது உலக சாதனைக்கான முயற்சியாகவும் மாறியுள்ளது. இந்த முயற்சிகளுக்கு என்னுடைய குடும்பத்தில் என்னை ஊக்குவிக்கவில்லை என்றாலும் தடுக்கமாட்டார்கள். இந்திய கம்யூனிஸ்ட் தலைவர் நல்லகண்ணு அவர்கள் என்னுடைய பெரியப்பா. அவர் கொடுத்த ஊக்கத்தில் தான் நான் எழுதியவற்றை புத்தகங்களாக மாற்றினேன்.

 

என்னுடைய ஆய்வுகளை முழுமைப்படுத்திவிட்டு அதன் பிறகு கலைஞர் அவர்களை சந்திக்க வேண்டும் என்று நினைத்தேன். கணக்குப் பாடத்தை குழந்தைகளுக்கு எளிமைப்படுத்தும் முறைகள் குறித்தும் ஆய்வு செய்துள்ளேன். தமிழ் உயிர் எழுத்துக்களை நாம் சரியாக உச்சரித்தால் ஐம்புலன்களும் சரியாக இயங்கும். எழுந்து நின்று மெய்யெழுத்துக்களை உச்சரிக்கும்போது ரத்த ஓட்டம் சீராகும். தமிழ் மொழி பேசுபவர்களுக்கு யோகா தேவையில்லை. உயிர் எழுத்துக்களையும் மெய்யெழுத்துக்களையும் தினமும் சரியாக உச்சரித்தாலே நமக்குத் தேவையான ஆற்றல் கிடைத்துவிடும். 

 

தமிழ் மொழியின் சிறப்பு சீனர்களுக்குப் புரிந்துள்ளது. இன்று அவர்கள் வேகமாகத் தமிழ் கற்று வருகின்றனர். நாம் தான் ஆங்கிலம் கலந்த தமிழை உபயோகித்து வருகிறோம். அனைவருக்கும் சரியான தமிழைக் கற்றுக்கொடுப்பதே நம்முடைய நோக்கம்.

 


 

 

Next Story

நீதிபதி மகாதேவனுக்கு அன்புமணி ராமதாஸ் வாழ்த்து!

Published on 11/07/2024 | Edited on 11/07/2024
Anbumani Ramadoss wishes to Justice Mahadevan!

உச்ச நீதிமன்றத்தில் நீதிபதி பணியிடங்களில் காலியாக உள்ள 2 இடங்களுக்கு நீதிபதிகளை நியமிக்க கொலீஜியம் அமைப்பு பரிந்துரை செய்துள்ளது. அதன்படி சென்னை உயர் நீதிமன்ற பொறுப்பு தலைமை நீதிபதியாக பதவி வகித்து வரும் மகாதேவனை உச்ச நீதிமன்ற நீதிபதியாக நியமிக்க கொலீஜியம் பரிந்துரை செய்துள்ளது. அதே போன்று ஜம்மு - காஷ்மீர் நீதிமன்றத்தின் தலைமை நீதிபதியாக பணியாற்றி வரும் கோட்டீஸ்வர் சிங்கை உச்சநீதிமன்ற நீதிபதியாக நியமிக்கவும் கொலிஜியம் பரிந்துரை செய்துள்ளது. இந்த நியமனத்தின் மூலம் நீதிபதி கோட்டீஸ்வர் சிங் மணிப்பூர் மாநிலத்தில் இருந்து உச்ச நீதிமன்ற நீதிபதியாக நியமிக்கப்படும் முதல் நீதிபதி ஆவார் என்பதும் குறிப்பிடத்தக்கது.

இந்நிலையில் உச்சநீதிமன்ற நீதிபதியாக பரிந்துரைக்கப்பட்டுள்ள நீதிபதி மகாதேவனுக்கு பாமக தலைவர் அன்புமணி ராமதாஸ் தனது வாழ்த்துகளை தெரிவித்துள்ளார். இது தொடர்பாக அவர் தனது எக்ஸ் தளத்தில் வெளியிட்டுள்ள பதிவில், “சென்னை உயர்நீதிமன்றத்தின் பொறுப்பு தலைமை நீதிபதியாக பதவி வகித்து வரும் அரங்க. மகாதேவன் உச்சநீதிமன்றத்தின் நீதிபதியாக நியமிக்க உச்சநீதிமன்ற கொலீஜியம் பரிந்துரைத்திருப்பது மகிழ்ச்சியளிக்கிறது. அவருக்கு எனது வாழ்த்துகளைத் தெரிவித்துக் கொள்கிறேன். 

Anbumani Ramadoss wishes to Justice Mahadevan!

சென்னை உயர்நீதிமன்றத்தின் நீதிபதியாக கடந்த 2013ஆம் ஆண்டு நியமிக்கப்பட்ட மகாதேவன் அவர்கள் கடந்த 11 ஆண்டுகளில் சிறப்பான பல தீர்ப்புகளை வழங்கியுள்ளார். தமிழ் மொழி மீது மிகுந்த பற்றும், தமிழ் மொழியில் புலமையும் கொண்ட மகாதேவன், தமிழ் மொழி வளர்ச்சிக்காகவும் பல தீர்ப்புகளை வழங்கியுள்ளார். உச்சநீதிமன்றத்தில் 4 ஆண்டுகள் பணியில் இருக்கப் போகும் நீதிபதி மகாதேவன், சமூகநீதி, மொழி சார்ந்த சிறப்பான தீர்ப்புகளை வழங்கி நீதித்துறை வரலாற்றில் நீங்காத இடம் பிடிக்க வேண்டும் என்று வாழ்த்துகிறேன்” எனக் குறிப்பிட்டுள்ளார். 

Next Story

சாகித்ய அகாடமி விருது; எழுத்தாளர்களுக்கு முதல்வர் மு.க. ஸ்டாலின் வாழ்த்து!

Published on 16/06/2024 | Edited on 16/06/2024
Sahitya Akademi Award; CM MK Stalin Greetings 

ஒவ்வொரு ஆண்டும் சாகித்ய பால புரஸ்கார் விருது மற்றும் சாகித்ய யுவ புராஸ்கார் விருது எனச் சிறந்த எழுத்தாளர்களுக்கு விருதுகள் வழங்கப்பட்டு வருகிறது. இந்த விருதுகள் இலக்கியத்துறையில் தேசிய அளவில் வழங்கப்படும் உயர்ந்த விருதுகளில் ஒன்றாகக் கருதப்படுகிறது. அதன்படி தமிழ், ஆங்கிலம், இந்தி, அசாமி, பெங்காலி, குஜராத்தி உள்ளிட்ட 23 இந்திய மொழிகளில் வெளிவந்த சிறந்த படைப்புகளுக்கு இந்த விருதுகள் வழங்கப்படுகின்றன.

இந்த ஆண்டுக்கான (2024) விருதுகள் தற்போது அறிவிக்கப்பட்டுள்ளன. அந்த வகையில் தமிழ் மொழியில் வெளியான படைப்புகளுக்கும் விருதுகள் அறிவிக்கப்பட்டுள்ளன. அந்த வகையில் பாரதி புத்தகாலயம் வெளியிட்ட ‘தன்வியின் பிறந்தநாள்’ என்ற சிறார் கதைக்காக எழுத்தாளர் யூமா வாசுகிக்கு பால புரஸ்கார் விருது அறிவிக்கப்பட்டுள்ளது. அதே போன்று சால்ட் பதிப்பகம் வெளியிட்ட ‘விஷ்ணு வந்தார்’ என்ற சிறுகதை தொகுப்பிற்காக லோகேஷ் ரகுராமனுக்கு யுவ புரஸ்கார் விருது அறிவிக்கப்பட்டுள்ளது. 

Sahitya Akademi Award; CM MK Stalin Greetings 

இந்நிலையில் இரு எழுத்தாளர்களுக்கும் பல்வேறு தலைவர்களும் தங்களது வாழ்த்துகளை தெரிவித்து வருகின்றனர். அந்த வகையில் தமிழக முதல்வர் மு.க. ஸ்டாலின் எக்ஸ் சமூக வலைத்தளத்தில் வெளியிட்டுள்ள பதிவில், “நாவல், கவிதை, சிறுகதை என அனைத்து வடிவங்களிலும் தமிழிலக்கியத்தில் தனி அடையாளத்துடன் பயணித்து வருபவர் யூமா வாசுகி. ஏற்கெனவே சிறந்த மொழிபெயர்ப்பிற்கான சாகித்ய அகாதமி விருது வென்றுள்ள அவர், தற்போது ‘தன்வியின் பிறந்தநாள்’ நூலுக்காக பால புரஸ்கார் விருதுக்கும் தேர்வாகியிருப்பது மகிழ்ச்சியளிக்கிறது. 

Sahitya Akademi Award; CM MK Stalin Greetings 

தமிழில் இன்னும் வளம்பெற வேண்டிய சிறார் இலக்கிய வகைமைக்கு அவர் ஆற்றிவரும் பாராட்டுக்குரிய பங்களிப்புக்கான உரிய அங்கீகாரம் இது! வாழ்த்துகள்!. காவிரிக்கரையில் இருந்து மற்றுமொரு இலக்கிய வரவாகத் தடம் பதித்து, ‘விஷ்ணு வந்தார்’ சிறுகதைத் தொகுப்பிற்காக யுவ புராஸ்கார்  விருதுக்குத் தேர்வாகியுள்ள நம்பிக்கைக்குரிய இளைஞர் லோகேஷ் ரகுராமன் அவர்களுக்கும் எனது பாராட்டுகள்!” எனக் குறிப்பிட்டுள்ளார். 

Sahitya Akademi Award; CM MK Stalin Greetings 

மேலும் மக்கள் நீதி மய்யம் கட்சியின் தலைவர் கமல்ஹாசன் எக்ஸ் மூக வலைத்தளத்தில் வெளியிட்டுள்ள பதிவில், “நீண்ட காலமாகத் தமிழ் நவீன இலக்கியத்தில் இயங்கிவருபவர் யூமா வாசுகி. அடிப்படையில் ஓவியராக இருந்து இவர் இயற்றிய கவிதைகளும், எழுதிய நாவல்களும் தமிழ்ப் பரப்பில் பரவலான வரவேற்பைப் பெற்றவை. மலையாளத்திலிருந்து சிறார் கதைகளை மொழிபெயர்த்துவந்த இவர், தனது நேரடி சிறுவர் கதைக்கொத்தான ‘தன்வியின் பிறந்தநாள்’ நூலுக்கு, சாகித்ய அகாடெமியின் பால புரஸ்கார் விருது பெற்றிருக்கிறார். இவருக்கும், ‘விஷ்ணு வந்தார்’ சிறுகதைத் தொகுப்பிற்காக சாகித்ய யுவ புரஸ்கார் விருது பெற்றிருக்கும் இளைஞர் லோகேஷ் ரகுராமனுக்கும் என் மனமார்ந்த வாழ்த்து” எனத் தெரிவித்துள்ளார்.