Skip to main content

இதுனாலதான் இரண்டு லட்சம் வாக்கு வித்தியாசத்தில் வெற்றிபெறுவேன் என்று சொன்னாரா ?

Published on 28/03/2019 | Edited on 28/03/2019

கொங்கு மண்டலத்தின் பல்ஸைக் காட்டக் கூடிய கரூர் எம்.பி. தொகுதியில் அ.தி.மு.க. கூட்டணியில் சிட்டிங் எம்.பி. தம்பிதுரையும், தி.மு.க. கூட்டணியில் காங்கிரஸ் வேட்பாளர் ஜோதி மணியும், அ.ம.மு.க. தங்கவேலும் போட்டியிடுகின்றனர். இவர்கள் மூவரும் ஒரே குலதெய்வத்தை வணங்கும் பங்காளிகள்.

துணை சபா தம்பிதுரை தேர்தல் தேதி அறிவிப்பதற்கு சில மாதங்களுக்கு முன்பே கரூர் உள்ளடக்கிய ஆறு சட்டமன்றத் தொகுதிகளிலும் கலெக்டர், அதிகாரிகள் படைபலத்தோடு 40 முறைக்குமேல் வலம்வந்து மக்களிடம் குறைகேட்டார். பல இடங்களில் மக்கள் மறித்தும், ஆத்திரம் காட்டியும்கூட தனது பயணத்தை நிறுத்தவில்லை. செல்லும் இடங்களிலெல்லாம் "மத்திய அரசுதான் எல்லாப் பிரச்சனைகளுக்கும் காரணம்' எனவும் பேசிக்கொண்டிருந்தார். 

 

jothimani



இப்போது அதே மத்திய அரசுக்கு ஆதரவாகப் பேசி தம்பிதுரை ஓட்டுக் கேட்பதை அ.தி.மு.க.வினரே ரசிக்கவில்லை. இதற்கிடையே சுகாதாரத்துறை அமைச்சரின் தந்தையும், அ.தி.மு.க. சீனியருமான சின்னசாமி கரூரில் போட்டியிட விருப்ப மனு அளித்ததில் தம்பிதுரை அதிருப்தியில் இருக்கிறார். இருந்தாலும் சென்ற தேர்தலைப் போலவே வைட்டமின் "ப'வை வாரி இறைத்தால் வெற்றி பெற்றுவிடலாம் என்ற நம்பிக்கை பலமாக உள்ளது.

காங்கிரஸ் வேட்பாளர் ஜோதிமணி கரூர் சட்டமன்றம், நாடாளுமன்றம் என இரண்டு தேர்தல்களில் போட்டியிட்டும் தோல்வியைத் தழுவியவர். இந்தமுறையும் அவருக்கே வாய்ப்பு கொடுக்கப்பட்டிருப்பதை காங்கிரஸில் இருக்கும் சில கோஷ்டிகள் விரும்பவில்லை. பேங்க் சுப்பிரமணியன் தரப்பு எதிர்த்தது. முன்னாள் எம்.எல்.ஏ. ராமநாதன் தரப்பு எதிர்ப்புத் தீர்மானம் போட்டது. அதற்கு ஒருபடி மேலே போன மாநில விவசாயிகள் அணி செயலாளர் ஜெயப்பிரகாஷ், "ஜோதிமணி தனது சொந்த கிராமமான பெரிய திருமங்கலத்திலேயே ஏழு ஓட்டுகள்தான் வாங்கினார். அவரை வேட்பாளராக்கியது தவறு' எனக் கூறி தனது ஆதரவார்களுடன் அ.தி.மு.க.வில் இணைந்துவிட்டார். ஆனாலும் ராகுலின் நேரடி பரிந்துரையில் கரூர் வேட்பாளராக களமிறங்கியுள்ளார் ஜோதிமணி.

 

senthil balaji



சென்றமுறை தம்பிதுரையின் வெற்றிக்கு முக்கியக் காரணமாக செயல்பட்ட செந்தில் பாலாஜி, இந்தமுறை தி.மு.க. கூட்டணிக்காக 90% வேலைகளை முடித்துவிட்டார். வாரம் ஒருமுறை கட்சியின் ரிவியூவ் கூட்டம், வார்டுக்கு எத்தனை ஓட்டு என்கிற கணக்கெடுத்து, 10 ஓட்டுக்கு இரண்டுபேர் வீதம் ஓட்டுகளை கேன்வாஸ் செய்த விவரங்களை ஒரு நோட்டில் குறித்துக் கொடுக்கச் சொல்லியிருக்கிறார். செயல்வீரர்கள் கூட்டங்களை செந்தில்பாலாஜி தொடர்ச்சியாக நடத்திவருகிறார். இதன் அடிப்படையில்தான் வேட்புமனுத் தாக்கல் செய்துவிட்டு வரும்போது, "2 லட்சம் வாக்குகள் வித்தியாசத்தில் வெற்றி பெறுவேன்'’என்று நம்பிக்கை தெரிவித்திருக்கிறார் ஜோதிமணி. 
 

அ.ம.மு.க. சார்பில் போட்டியிடும் மா.செ. தங்கவேலு, செந்தில்பாலாஜிக்கு நெருக்கமானவர்' என்கிறார்கள் பழைய கட்சிக்காரர்கள்.
 

Next Story

விக்கிரவாண்டி இடைத்தேர்தல்; திமுக முன்னிலை!

Published on 13/07/2024 | Edited on 13/07/2024
DMK lead in Vikravandi by-election!

விக்கிரவாண்டி சட்டமன்றத் தொகுதியில் கடந்த 2021 ஆம் ஆண்டு நடைபெற்ற சட்டமன்றத் தேர்தலில் திமுக சார்பில் போட்டியிட்டு வெற்றி பெற்றவர் புகழேந்தி. இவர் கடந்த ஏப்ரல் 6 ஆம் தேதி (06.04.2024) உடல்நலக்குறைவால் காலமானார். இவர் மறைந்ததைத் தொடர்ந்து விக்கிரவாண்டி சட்டமன்றத் தொகுதிக்கு ஜூலை 10 ஆம் தேதி இடைத்தேர்தல் நடைபெற்றது.

இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா, பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியிட்டனர். அதோடு 11 அரசியல் கட்சிகளின் வேட்பாளர்கள், 18 சுயேட்சைகள் என மொத்தம் 29 வேட்பாளர்கள் களத்தில் இருந்தனர். அதிமுக, தேமுதிக ஆகிய இருகட்சிகளும் இந்த இடைத்தேர்தலைப் புறக்கணித்திருந்தது. தவெக தலைவரும், நடிகருமான விஜய் விக்கிரவாண்டி இடைத்தேர்தலில் தமிழக வெற்றிக் கழகம் போட்டியிடாது என்றும், எந்தக் கட்சிக்கும் ஆதரவு இல்லை என்றும் தெரிவித்திருந்தார்.

இந்த தேர்தலில் மும்முனை போட்டி நிலவும் சூழலில் ஜூலை 10 ஆம் தேதி பதிவான வாக்குகள் இன்று எண்ணப்பட்டு வருகிறது. சரியாகக் காலை 8 மணிக்கு வாக்கு எண்ணிக்கை தொடங்கிய நிலையில் முதலில் தபால் வாக்குகள் எண்ணப்பட்ட நிலையில் அதனைத் தொடர்ந்து மின்னணு வாக்குப்பதிவு இயந்திரத்தில் பதிவான வாக்குகள் எண்ணப்பட்டு வருகிறது. தபால் வாக்குகள் எண்ணப்பட்டத்தில் திமுக வேட்பாளர் 470 வாக்குகள் பெற்று முன்னிலையில் உள்ளார்.  பாமக வேட்பாளர் அன்புமணி 450 வாக்குகளும், நாம் தமிழர் வேட்பாளர் அபிநயா 47 வாக்குகளும் பெற்றுள்ளார்.

Next Story

செந்தில் பாலாஜி தாக்கல் செய்த மனு தள்ளுபடி!

Published on 12/07/2024 | Edited on 12/07/2024
Petition filed by Senthil Balaji dismissed

சட்டவிரோத பணப்பரிமாற்ற தடை சட்ட வழக்கில் முன்னாள் அமைச்சர் செந்தில் பாலாஜி கைது செய்யப்பட்டு சிறையில் உள்ளார். ஒரு வருடத்திற்கு மேல் நீதிமன்ற காவலில் புழல் சிறையில் உள்ள நிலையில் ஜாமீன் கோரி செந்தில் பாலாஜி தாக்கல் செய்த மனுக்களைச் சென்னை மாவட்ட முதன்மை அமர்வு நீதிமன்றம் மற்றும் சென்னை உயர்நீதிமன்றம் ஆகியவை  தொடர்ச்சியாகத் தள்ளுபடி செய்திருந்தது.

இந்த நிலையில் அமலாக்கத்துறை தொடர்ந்த வழக்கில் இருந்து தன்னை விடுவிக்க வேண்டும் என்று செந்தில் பாலாஜி சென்னை உயர்நீதிமன்றத்தில் மனுத்தாக்கல் செய்திருந்தார். இந்த மனு மீதான விசாரணை நிலுவையில் இருந்த நிலையில் மீண்டும் செந்தில் பாலாஜி தன்னை விடுவிக்க வேண்டும் என்று தொடர்ந்த வழக்கின் உத்தரவைத் தள்ளி வைக்க வேண்டும் என்று மேலும் ஒரு மனுவைத்தாக்கல் செய்திருந்தார். ஏற்கெனவே எம்.பி, எம்.எல்.ஏ.விற்கான நீதிமன்றத்தில் வழக்கு நடந்துவருவதால் மனு மீதான விசாரணையைத் தள்ளிவைக்க வேண்டும் எனக் கேட்டுக்கொண்டார். 

இந்த மனு தொடர்பான விசாரணை இன்று நீதிபதி அல்லி அமர்வு முன் விசாரணைக்கு வந்தபோது, செந்தில் பாலாஜி தாக்கல் செய்த மனுவை தள்ளுபடி செய்த நீதிபதி அமலாக்கத்துறை வழக்கிலிருந்து விடுவிக்க வேண்டும் என்று செந்தில் பாலாஜி தாக்கல் செய்த மனு மீதான உத்தரவு வரும் 16 ஆம் தேதி பிறப்பிக்கப்படும் எனத் தெரிவித்துள்ளார்.