Skip to main content

பள்ளி, உறைவிட வசதி, இட்லி, பூரி, சப்பாத்தி இலவசம்! -தீயாய்ப் பரவும் தகவலின் பின்னணி!

Published on 13/06/2020 | Edited on 13/06/2020

 

Free Education - whatsapp Information - investigation

 

போலியான பல வாட்ஸ்-அப் தகவல்கள், ஆண்டுக்கணக்கில், உலக அளவில் பரவியபடியே இருக்கின்றன.  காரணம், அந்தத் தகவல் மிகவும் ஈர்க்கக்கூடியதாக அமைந்திருக்கும். ‘அப்படி ஒரு தகவலாகத்தான் இதுவும் இருக்கும்’ என்றே,  அதைப் படிக்கும்போது சந்தேகம் எழுந்தது. 

அந்தத் தகவல் இதுதான் -

‘முற்றிலும் கட்டணம் எதுவும் இல்லாமல் தமிழ் / ஆங்கில வழியில் 1-ஆம் வகுப்பு முதல் +2 வகுப்புகள் வரை SC, ST, BC, MBC, ஆண் / பெண் மாணவ, மாணவிகள் கல்வி கற்க,  பள்ளியும், உறைவிடமும் கூடிய விடுதி வசதி உள்ளது. அத்துடன் தினந்தோறும் காலை, இரவு ஆகிய இரண்டு வேளையிலும் இட்லி, தோசை, ரவை உப்புமா, கோதுமை உப்புமா, பூரி, சப்பாத்தி, வெண்பொங்கல், லெமன் சாதம், தக்காளி சாதம், ஆகிய உணவுகளும், தினந்தோறும் மாலை வேளையில்  டீ, காபியுடன்  ஸ்னாக்ஸ் , ஒவ்வொரு மாதமும் ரூ 80/= வீதம்,  குளியல் சோப், துணி சோப், தேங்காய் எண்ணெய், ஷாம்பு,  புவுடர் ஆகியவையும் வழங்கப்படும். 

 

Free Education - whatsapp Information - investigation



வாரம் ஒருமுறை அசைவம், 10, 11, 12,  ஆகிய வகுப்பு மாணவ, மாணவிகளுக்கு சிறப்பு வழிகாட்டி (நோட்ஸ்), வருடத்திற்கு 4 ஜோடி பள்ளிச் சீருடையோடு, 2  ஜோடி கலர் டிரஸ்சும், பாய், பெட்ஷீட், தலையணையும்,  தாய் அல்லது தகப்பனார் இல்லாத மாணவ, மாணவிகளுக்கு மாதம் ரூ 2000/= வீதம் அரசு உதவித் தொகையும், மாலை நேரங்களில் யோகா, கராத்தே, சிலம்பாட்டம் போன்ற பயிற்சிகளும், முற்றிலும் கட்டணமில்லாமல் வழங்கப்படும்.

ஆதரவற்றோர், வறுமைக் கோட்டிற்கு கீழ் உள்ளோர், தாய், தகப்பனார் இல்லாதோர் ஆகியோருக்கு  முன்னுரிமை வழங்கப்படும். தயவுகூர்ந்து இந்தச் செய்தியை அனைத்து நண்பர்களுக்கும், குருப்களுக்கும் பகிருமாறு அன்போடு கேட்டுக்கொள்கிறேன்.

 

Free Education - whatsapp Information - investigation



சேர விருப்பமுள்ள மாணவ, மாணவிகள் கீழ் உள்ள அலைபேசி எண்ணைத் தொடர்பு கொள்ளவும்.  என்று, விருதுநகர் மாவட்டத்திலுள்ள அந்தக் குழந்தைகள் காப்பக முகவரியோடு, இரண்டு மொபைல் எண்களையும் குறிப்பிட்டிருந்தனர். 

அதிலுள்ள மொபைல் எண்ணைத் தொடர்புகொண்டோம். “வாட்ஸ்-அப் தகவல் உண்மைதான். நான்தான் பெருந்தலைவர் காமராஜர் குழந்தைகள் காப்பகத்தின் நிறுவனர்..” என்று அறிமுகப்படுத்திக் கொண்ட அன்புச்செல்வம், “இந்த ஃபீல்டில் எனக்கு 13 வருட அனுபவம் உண்டு. இங்கே சத்திரரெட்டியாபட்டிக்கு வந்து 3 வருடங்கள்தான் ஆகிறது. அதற்கு முன் வத்திராயிருப்பு பகுதியில் காப்பகம் நடத்தினேன். இங்கே உள்ளூரில் 200 மாணவர்களுடன் காப்பகம் செயல்பட்டு வருகிறது. காப்பக மாணவர்களின் எண்ணிக்கையை அதிகரிப்பதற்காக, ஆசிரியர் கூட்டணி நண்பர்களிடம் வாட்ஸ்-அப் மூலம் தகவல் அனுப்பினேன். அதுதான், இந்த அளவுக்கு பரவிவிட்டது. வாட்ஸ்-ஆப்பிலிருந்த போன் நம்பரை பார்த்து இதுவரை 1360 பேர் என்னிடம் பேசிவிட்டார்கள். பதில் சொல்லிச் சொல்லி ஓய்ந்துவிட்டேன்.  வெளிமாவட்டத்தை சேர்ந்த 817 மாணவர்கள்  ‘அட்மிஷன்’ கேட்டிருக்கிறார்கள். இதுவே மிக அதிகம். இனிமேல் யாரும் என்னைத் தொடர்புகொள்ளாமல் இருந்தால் நல்லது.” என்று பெருமூச்சுவிட்டார். தகவல் உண்மையோ, வதந்தியோ, வலைத்தளங்களில் தீயாய்த்தான் பரவிவிடுகிறது. 
 

 

Next Story

திருமணத்திற்குத் தயாராகிக் கொண்டிருந்த இளம்பெண்; முன்னாள் காதலனின் வெறிச்செயல்!

Published on 24/06/2024 | Edited on 24/06/2024
Incident happened on A young woman preparing for marriage in madhya pradesh

மத்தியப் பிரதேச மாநிலம், டாடியா பகுதியைச் சேர்ந்தவர் காஜல் அஹிர்வார்(22). இவருக்கும், இளைஞர் ஒருவருக்கு நேற்று (23-06-24) திருமண ஏற்பாடு செய்யப்பட்டிருந்தது.

மணப்பெண்ணான காஜல் திருமணம் நடைபெறுவதற்கு சில மணி நேரத்திற்கு மேக்கப் போடுவதற்காக உத்தரப் பிரதேச மாநிலம், ஜான்சியில் உள்ள அழகு நிலையத்திற்கு தனது சகோதரியுடன் வந்தார். மேலும், அந்த அழகு நிலையத்திற்கு உள்ளே சென்று காஜல் மேக்கப் போட்டுக் கொண்டிருந்தார்.  அப்போது, அங்கு அடையாளம் தெரியாத நபர் ஒருவர் முகத்தில் முகமூடி அணிந்து வெளியே நின்று கொண்டு, காஜலிடம் வெளியே வருமாறு கூறியுள்ளார். ஆனால், அதற்கு அந்த பெண் மறுப்பு தெரிவித்துள்ளார். மேலும், அந்த நபர், ‘வெளியே வா காஜல், நீ எனக்கு துரோகம் செய்துவிட்டாய்’ என்று கூறியதாக கூறப்படுகிறது. 

ஆனாலும், அந்த பெண் வெளியே வர மறுத்துள்ளார். இதில் ஆத்திரமடைந்த அந்த நபர், தான் மறைத்து வைத்திருந்த துப்பாக்கியை கொண்டு காஜலை சரமாரியாக சுட்டார். இதில் ரத்த வெள்ளத்தில் படுகாயமடைந்த காஜல் மயங்கி கீழே விழுந்தார். இதனிடையே, காஜலை துப்பாக்கியால் சுட்ட அந்த நபர் அங்கிருந்து தப்பிச் சென்றுள்ளார். இதில் அதிர்ச்சியடைந்த காஜலின் சகோதரி, காஜலை மீட்டு சிகிச்சைக்காக மருத்துவமனைக்கு கொண்டு சென்றார். அங்கு அவரை பரிசோதித்த மருத்துவர்கள், காஜல் ஏற்கெனவே இறந்துவிட்டதாகத் தெரிவித்துள்ளனர். 

இந்தச் சம்பவம் குறித்து போலீசாருக்கு தகவல் கொடுக்கப்பட்டது. தகவல் அறிந்து விரைந்து வந்த போலீசார் இந்தச் சம்பவம் தொடர்பாக வழக்குப்பதிவு செய்து விசாரணை நடத்தினர். அந்த விசாரணையில், இளம்பெண்ணை சுட்டுக்கொலை செய்தவர் தீபக்.  அந்தப் பெண் வசிக்கும் அதே ஊரில்தான் அவரும் வசித்து வந்துள்ளார். தீபக்கும், காஜலும் காதலித்து வந்ததாகக் கூறப்படுகிறது. இதனிடையே, காஜலுக்கு வேறு ஒருவருடன் திருமணம் ஏற்பாடு செய்யப்பட்டுள்ளதாகவும் கூறப்படுகிறது. இதில் ஆத்திரமடைந்த தீபக், காஜலை சுட்டுக் கொலை செய்துள்ளார் என்பது தெரியவந்தது. இதனையடுத்து, இளம்பெண்ணை சுட்டுக் கொன்ற தீபக்கை போலீசார் தீவிரமாக தேடி வருகின்றனர். திருமணம் நடைபெறுவதற்கு முன்பு இளம்பெண் ஒருவர் கொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. 

Next Story

கள்ளச்சாராய வியாபாரி கொடுத்த வாக்குமூலம்; மீண்டும் தோண்டி எடுக்கப்பட்ட உடல்

Published on 23/06/2024 | Edited on 23/06/2024
Confession given by liquor dealer; The body was exhumed again


கள்ளக்குறிச்சி மாவட்டம் கருணாபுரத்தில் கள்ளச்சாராயம் குடித்து 4 பெண்கள் உட்பட 50க்கும் மேற்பட்டோர் உயிரிழந்த சம்பவம் நாட்டையே உலுக்கிக் கொண்டிருக்கிறது. சிகிச்சையில் இருப்பவர்களில் பலர் சிகிச்சை பலனின்றி உயிரிழந்து வருகின்றனர். இதனால் இறப்புகளின் எண்ணிக்கையும் தொடர்ந்து அதிகரித்து வருகிறது. அதே சமயம் கள்ளச்சாராயம் குடித்து பாதிக்கப்பட்டவர்களுக்கு கள்ளக்குறிச்சி, சேலம் மற்றும் விழுப்புரம் அரசு மருத்துவமனை, புதுச்சேரி ஜிப்மர் மருத்துவமனையில் தொடர்ந்து தீவிர சிகிச்சை அளிக்கப்பட்டு வருகிறது.

இந்தநிலையில் கள்ளக்குறிச்சி மாவட்டம் சின்னசேலம் பகுதியைச் சேர்ந்த ஜெயமுருகன் என்பவர் கடந்த 18 ஆம் தேதி அதே பகுதியைச் சேர்ந்த ராமர் என்பவர் விற்பனை செய்த சாராயத்தை வாங்கி குடித்துள்ளார். பின்னர் உடல்நலக்குறைவு ஏற்பட்டு மருத்துவமனைக்கு செல்லும் வழியிலேயே அவர் உயிரிழந்தார். இதனால் மீண்டும் உடலை வீட்டுக்கு எடுத்து வந்த ஜெயமுருகனின் உறவினர்கள் அவரது உடலை மறுநாள் அடக்கம் செய்தனர். ஆனால் ஜெயமுருகன் கள்ளச்சாராயம் குடித்து உயிரிழந்தது அவருடைய வீட்டாருக்கு தெரியவில்லை என்று கூறப்படுகிறது. இந்த நிலையில் கள்ளக்குறிச்சியில் கள்ளச்சாராயம் உயிரிழப்பு பரபரப்பை ஏற்படுத்தியது.

போலீசார் தொடர்ந்து கள்ளச்சாராய வியாபாரிகளை கைது செய்த நிலையில் ராமர் என்பவரையு விசாரித்த போது அதே ஊரில் உயிரிழந்த ஜெயராமன், ஜெயமுருகன் உட்பட பலர் தன்னிடம் சாராயம் வாங்கிக் குடித்ததாக வாக்குமூலத்தில் தெரிவித்தார். இதனையடுத்து ஜெயராமன், ஜெயமுருகன் ஆகியோர் வீட்டிற்குச் சென்ற போலீசார் இது குறித்து விசாரணை நடத்தினர். விசாரணையில் அவர்கள் கள்ளச்சாராயம் அருந்தியதால்தான் உயிரிழந்தார்களா என்பதை உறுதிசெய்ய உடல்கள் தோண்டி எடுக்க முடிவு செய்யப்பட்டது. அதன்படி இன்று மதியம் வருவாய் வட்டாட்சியர் கமலக்கண்ணன், காவல் ஆய்வாளர் கந்தகுமார் ஆகியோர் முன்னிலையில் தோண்டி எடுக்கப்பட்ட உடல் விழுப்புரம் முண்டியம்பாக்கம் அரசு மருத்துவக் கல்லூரி மருத்துவமனைக்கு பிரேதப் பரிசோதனைக்காக அனுப்பி வைக்கப்பட்டுள்ளது.