Skip to main content

கல்வித்துறையில் புரட்சி காணும் கடலூர் மாவட்ட பெண் ஆசிரியைகள்! தாயன்பால் அரவணைக்கும் தலைமை ஆசிரியை

Published on 10/03/2019 | Edited on 10/03/2019

 

 

சு.தமிழ்ச்செல்வி. மாணிக்கம், அளம், கற்றாழை, ஆறுகாட்டுத்துறை என பத்துக்கும் மேற்பட்ட நாவல்கள் எழுதியுள்ளார். தமிழ்நாடு அரசின் தமிழ்வளர்ச்சிக்கான விருது உள்ளிட்ட பல விருதுகளை தனது எழுத்துக்களுக்காக பெற்றுள்ளார். தமிழ்நாட்டின் முதன்மையான பெண் எழுத்தாளர்களுள் ஒருவரான இவர் கடலூர் மாவட்டம் விருத்தாசலம் அருகிலுள்ள கோ.ஆதனூர் ஊராட்சி ஒன்றிய நடுநிலைப்பள்ளியில் தலைமையாசிரியராக பணியாற்றுகிறார்.

 

Tamilselvi Teacher


எழுத்திலும் சரி, ஆசிரிய பணியிலும் தான் எடுத்துக் கொண்ட பொறுப்பை, வேலையை மிகவும் அர்ப்பணிப்போடு செய்யக் கூடியவரான தமிழ்ச்செல்வி,  தான் தலைமை ஆசிரியராக பணிபுரியும் பள்ளியின் பின்தங்கிய நிலைமையை மாற்ற வேண்டும் எனகனவு கண்டார். இப்பள்ளிக்கு வரும் பிள்ளைகள் மிகவும் பின் தங்கிய, ஏழ்மையான வீட்டு பிள்ளைகள். அப்பிள்ளைகளின் வாழ்க்கையை அர்த்தமுள்ளதாக்க வேண்டும் என நினைத்து பள்ளியின் வளர்ச்சியிலும், மாணவர்களின் முன்னேற்றத்திலும் அக்கறையுடன் செயல்பட்டு வருகிறார்.

 

Tamilselvi Teacher


2015 ஆம் ஆண்டு இப்பள்ளிக்கு தமிழ்ச்செல்வி வந்தபோது குளம்-குட்டைக்கு நடுவில் பள்ளி இருப்பது போல் சுற்றிலும் மழை நீர் சூழ்ந்திருந்தது. மூன்று நாள் மழை பெய்தாலும் முப்பது நாளைக்கு தண்ணீர் சூழ்ந்திருக்கும். பள்ளிக்கு வரும் வழியையும் சாக்கடை மறித்திருந்தது. அவற்றை மாற்ற தனது சொந்த பணத்தை முதலீடாக்கி அத்துடன் நண்பர்கள், ஊர் முக்கியஸ்தர்கள் உதவியுடன் பள்ளியை சுற்றிலும் மண் அடித்து மேடாக்கினார். வரும் வழியில் சிறு பாலம் அமைத்து வழி ஏற்படுத்தினார்.
 

அடுத்து பள்ளி கட்டிடத்துக்கு பெயிண்ட் அடித்து, அதில் பூக்கள், தவாரங்கள், தமிழ்ப்புலவர்கள், தேசத்தலைவர்களின் படங்களை வரைந்து அழகாக்கினார். வகுப்பறைகளுக்கு பீரோ, கணினி, மேஜை, நாற்காலிகள் என தனியார் பள்ளிக்கு இணையான தரம் உயர்த்தினார்.

 

Tamilselvi Teacher


மாணவர்களுக்கு பாட படிப்புடன் பொது அறிவு, நாட்டு நடப்பு, தமிழர்களின் வாழ்வியல் முறை, வரலாறு என சமூக கல்வியையும் சொல்லி கொடுக்கிறார். ஒரு மாணவருக்கு பிறந்த நாள் என்றால் அன்று வகுப்பறையில் வரைந்துள்ள பிறந்த நாள் கேக் படத்தில் அம்மாணவரின் பெயர், பெற்றொர் பெயர் எழுதி ஆசிரியைகளுடன் படம் எடுத்து சக மாணவர்கள் வாழ்த்து கூறி மகிழ்ச்சி படுத்துகின்றார். இதுபோன்ற சின்ன சின்ன மகிழ்ச்சியான மாற்றங்களை தருவதால் மாணவர்கள் விடுப்பு எடுக்காமலும், இடை நிற்றல் இல்லாமலும் பள்ளிக்கு வருகிறார்கள். இவைகளால் தனியார் பள்ளிக்கு சென்று கொண்டிருந்த 20-க்கும் மேற்பட்ட மாணவர்கள் இப்பள்ளியில் சேர்ந்துள்ளனர். 2015-ஆம் ஆண்டு புதிதாக சேர்ந்த மாணவர்களுக்கு மாலை அணிவித்து நடிகர் சமுத்திரகனி தலைமையில் மேளதாளங்கள் முழங்க அழைத்து வந்து, அரசு பள்ளியில் மாணவர்களை சேர்க்க வேண்டும் என விழிப்புணர்வு ஏற்படுத்தினார்.
 

பணியாற்றும் பள்ளி மீதும், படிக்க வரும் பிள்ளைகள் மீதும் அக்கறையுடன் செயலாற்றுவதாலேயே கடந்தாண்டு பள்ளியில் நடந்த விரும்பத்தாகாத நிகழ்வுகளால் பணியிலிருந்து விடுபட விரும்பி விருப்ப ஓய்வு கொடுத்த போது மாணவர்கள் போரட்டங்கள் செய்து பணி தொடர வைத்தனர்.
 

தன் பிள்ளைகளை போல ஒவ்வொரு பிள்ளையையும் நினைத்து பழகுவதாலேயே ‘அம்மா… அம்மா…’ என அழைக்கின்றனர் பிள்ளைகள். அதே தாயன்புடன் கல்வியுடன் கனிவையும் தரும் தமிழ்ச்செல்வியை வாழ்த்துவோம்!.

 

நாடோடிகளின் மொழியில் வகுப்பெடுக்கும் நல்லாசிரியை: 
 

கடலூர் மாவட்டம்   பெண்ணாடம் (மேற்கு) ஊராட்சி ஒன்றிய நடுநிலை பள்ளியில் நரிக்குறவர், மலையாள ஜோதிடர் போன்ற நாடோடி மக்களின் பிள்ளைகளும், மிகவும் பின் தங்கிய  பழங்குடி இருளர்கள் சமூகத்தை சார்ந்த குழந்தைகளும் அதிகளவில் படிக்கின்றனர். நாடோடி சமூகத்தை சார்ந்த குழந்தைகள் படிப்பில் நன்கு கவனம் செலுத்தி ஆர்வமுடன் பயின்று வந்தாலும் அவர்களுக்கு ஆங்கில மொழி பாடம் கற்பது பெரும் சவாலாக இருந்துள்ளது. பாடத்தை புரிந்து படிக்க வேண்டும் என்றால் முதலில் ஆசிரியருக்கும், மாணவர்களுக்குமான அந்நியோன்யம் நெருக்கமாக இருக்க வேண்டும். அதன் பிறகுதான் கல்வி என உணர்ந்தார் மூன்றாம் வகுப்பு ஆசிரியையான கீதா.

 

Geetha Teacher




 இந்த குறையை எப்படியாவது போக்க வேண்டும் என்று எண்ணினார். தாய் மொழிக்கல்வி மூலமே தரமான கல்வியை கொடுக்க முடியும் என முடிவெடுத்தவர் நரிக்குறவர்களின் மொழியான “வக்ரிபோலி”என்கின்ற எழுத்துகளற்ற, ஒலிவடிவம் மட்டுமே உள்ள மொழியையும், மலையாள ஜோதிடர்கள், பழங்குடி இருளர்கள் பேசும் மொழியையும் தான் முதலில் கற்றுக்கொள்ள வேண்டும் என முடிவெடுத்தார். நரிக்குறவர்களின் வாக்ரி போலி மொழியை கற்பது அவ்வளவு எளிதானதாக இல்லாத நிலையிலும்   அப்பிள்ளைகளின் எதிர்காலம் கருதி ஓய்வு நேரங்களில் அப்பள்ளியின் அருகில் வசித்து வரும் நாடோடி சமூக மக்களிடம் பழகி அவர்களின் மொழிகளை கற்றுக்கொண்டு அம்மொழியிலேயே ஆங்கில பாடங்களை சொல்லிக்கொடுக்கிறார் கீதா.

 

Geetha Teacher


அவருடைய இம்முயற்சிகள் நல்ல பலனை கொடுத்துள்ளதாகவும்,  பிற மொழியின் மேல் அக்குழந்தைகளுக்கு இருந்த தயக்கம் விலகி  இப்பொழுது அந்த குழந்தைகள் ஆங்கிலத்தில் எழுதுவது,  வாசிப்பது, ஸ்போக்கன் இங்கிலீஷ் வரை முன்னேறி உள்ளதாக தெரிவிக்கிறார். மேலும் இந்த குழந்தைகளின் பெற்றோர்கள் திருவிழா காலங்களில் ஊசி, பாசி விற்க,  ஜோதிடம் பார்க்க செல்கையில் அந்த பிள்ளைகளையும் அழைத்து சென்று விடுவதால் பள்ளியில் நாடோடி சமூக பிள்ளைகளின் வருகை பதிவு மிகவும் குறைவாக இருந்துள்ளது. அதனால் குழந்தைகளின் படிப்பு பாதிக்கபடுவது தொடர் கதையாகயாகவும்  இருந்துள்ளது.

 

Geetha Teacher

 

அதற்கும்  தீர்வை யோசித்தவர்  “மாதம் முழு வருகை பதிவு; முகம் மலர பரிசு திட்டம்” என்ற திட்டத்தை துவங்கி ஒவ்வொரு மாதமும் விடுப்பு எடுக்காமல் பள்ளிக்கு வரும் குழந்தைகளின் படிப்புக்கு  தேவையான பொருட்களை தன்னுடைய சொந்த செலவில் வழங்குகிறார்.  இதனால்  குழந்தைகள் விடுப்பு எடுக்காமல் வருவது அதிகரித்துள்ளதாகவும், இந்நடவடிக்கைகளால் நாடோடி சமூக மக்கள் இவரை தங்கள் குடும்பத்தில் ஒருவராகவே எண்ணுவதாக கூறுகிறார் கீதா. இவருடைய நல் முயற்சிகளை அறிந்து சில தனியார் அமைப்புகள். தொண்டு நிறுவனங்கள் இவருக்கு விருதுகள் வழங்கி ஊக்க படுத்தியுள்ளன. அரசு பள்ளியில் பயிலும் நாடோடி சமூகத்தினரின் குழந்தைகளின் மொழி அறிவை மேம்படுத்த அவர்களின் மொழியை தானும் கற்றுகொண்டு, விளிம்பு நிலை குழந்தைகளை ஆங்கிலம் வாசிக்க பேச. வைக்கும் அரசு பள்ளி  ஆசிரியையின் முயற்சிக்கு பாராட்டுகள்.

 

மாடல் பள்ளியை உருவாக்கும் மாற்றுத்திறன் ஆசிரியை:

அரசு பள்ளியில் பணிபுரியும் மாற்றுத் திறனாளியான இடை நிலை ஆசிரியையால் உருவாக்கப்பட்ட ஸ்மார்ட் வகுப்பறை அனைவரின் பாரட்டையும் பெறுகிறது. 

கடலூர் மாவட்டம்  பெண்ணாடத்தில் உள்ள  ஊராட்சி ஒன்றிய நடுநிலைப் பள்ளியில்  இடைநிலை ஆசிரியராக பணிபுரிந்து வருபவர் மாற்றுத்திறனாளியான ஹேமகுமாரி. இவர் உயர்கல்வி படிப்பிற்காக தமிழக அரசு கொடுத்த ஊக்க தொகையான 60 ஆயிரம் ரூபாய் மற்றும் தனது சம்பளத்தில் சேமித்த தொகையை வைத்து  சொந்த செலவில் அவர் பணிபுரியும் பள்ளியில் 90 ஆயிரம் மதிப்பிலான ‘ஸ்மார்ட் கிளாஸ்’ எனப்படும் நவீன வகுப்பறையை நிறுவியுள்ளார்.

 

hema kumari Teacher




அரசு பள்ளியும், அதில் பயிலும் ஏழை மாணவர்களும் வளர்ச்சி பெறவதற்காக தனியார் பள்ளிகளில் இருப்பதை போன்று  தொடு திரை மூலம் மாணவர்களுக்கு கல்வி கற்பிக்க வேண்டும் என்ற முயற்சியினால் நவீன வகுப்பறையை உருவாக்கியுள்ளார்.   ‘இதன் மூலம் அரசு பள்ளியில் பயிலும் ஏழை , எளிய மாணவர்களின் கல்வி திறன் உயரும்” என்கிறார் ஹேமகுமாரி.

மாற்றுத்திறனாளியாக இருந்தாலும் மற்றவர்களையும் திறமைசாலிகளாக மாற்ற வேண்டும் என நல்ல மனதுடன் செயல்படும் ஹேமகுமாரியை மனதார வாழ்த்தலாம்.
 

தாங்கள் இணைத்துக்கொண்ட துறைகளில் அர்ப்பணிப்போடும், அக்கறையோடும் பணீயாற்றும் இப்புரட்சி பெண்களை இந்த மகளிர் நாளில் வாழ்த்தி மகிழ்வோம்!

சார்ந்த செய்திகள்

 

Next Story

மைசூர் விரைவு ரயில் கடலூர் வரை நீட்டிப்பு; கடலூர், சிதம்பரம் பகுதி மக்கள் மகிழ்ச்சி

Published on 17/07/2024 | Edited on 17/07/2024
people are happy as the Mysore Express has been extended to Cuddalore

கடலூர் மாவட்டத்தில் கடலூர் தொழிற்சாலைகள் நிறைந்த நகரமாகவும், சிதம்பரம் நகரம் அண்ணாமலை பல்கலைக்கழகம்,  நடராஜர் கோவில், பிச்சாவரம் சுற்றுலா மையம் எனச் சிதம்பரம் சுற்றுலா மற்றும் ஆன்மீக நகரமாக இருந்து வருகிறது. 

இந்த நிலையில் கடலூர் மற்றும் சிதம்பரம் வழியாகக் கோயம்புத்தூர், கேரளா, கர்நாடகா மாநிலங்களுக்கு போதிய ரயில் வசதி இல்லாததால் பொதுமக்கள் வணிகர்கள், அரசு, தனியார் துறைகளில் பணியாற்றுபவர்கள், மாணவர்கள் என அனைத்து தரப்பினரும் மயிலாடுதுறை மைசூர் விரைவு ரயில், மயிலாடுதுறை கோவை ஜென் சகாப்தி விரைவு ரயில்களை கடலூர் துறைமுகம் வரை நீட்டிக்க வேண்டும். அதேபோல் அயோத்தி - ராமேஸ்வரம் சாரதா சேது விரைவு வண்டி, தாம்பரம்-செங்கோட்டை, சென்னை எழும்பூர்-காரைக்கால் ஆகிய 3 ரயில்களும் சிதம்பரம் ரயில் நிலையத்தில் நின்று செல்ல நடவடிக்கை எடுக்கவேண்டும் உள்ளிட்ட கோரிக்கைகளை வலியுறுத்தி கடலூர் மற்றும் சிதம்பரம் பகுதியில் உள்ள வர்த்தக சங்கத்தினர், பொதுமக்கள், ரயில் பயணிகள் சங்கத்தினர், சிபிஎம், திமுக, காங்கிரஸ், விடுதலை சிறுத்தைகள் கட்சி,  உள்ளிட்ட பல்வேறு அரசியல் கட்சிகள்  மற்றும் சமூக அமைப்புகள் தொடர்ந்து வலியுறுத்தி வந்தனர். 

இதற்கு ரயில்வே நிர்வாகம் எந்த நடவடிக்கையும் எடுக்காததால் உண்ணாவிரதம், ரயில் மறியல், கோரிக்கை முழக்கப் போராட்டம் என முன்னெடுத்தனர். இதனைத் தொடர்ந்து சிதம்பரம் சார் ஆட்சியர் அலுவலகத்தில் சார் ஆட்சியர் ராஷ்மிராணி தலைமையில் இது குறித்து 2 கட்ட அமைதி பேச்சுவார்த்தைக் கூட்டம் நடைபெற்றது. இதில் ரயில்வே நிர்வாகம் நடவடிக்கை எடுப்பதாகவும் உறுதி அளித்தது. இதனைத் தொடர்ந்து மார்ச் மாதம் 7-ஆம் தேதி ஜென்சதாப்தி, மைசூர் ரயிலைக் கடலூர் துறைமுகம் வரை நீட்டிக்கப்படும் என ரயில்வே நிர்வாகம் அறிவிப்பு வெளியிட்டது. அதனைத் தொடர்ந்து நடைபெற்ற நாடாளுமன்றத் தேர்தலால் ரயிலை இயக்குவதில் தாமதம் ஏற்பட்டு வந்தது. பின்னர் அறிவித்த ரயிலை உடனே இயக்க வலியுறுத்தி மார்க்சிஸ்ட் கம்யூனிஸ்ட் கட்சி, வர்த்தக சங்கத்தினர் சார் ஆட்சியரைச் சந்தித்து ஜூன் மாதம் கடிதம் அளித்தனர்.

இதனையொட்டி நீண்ட கால பொதுமக்களின் கோரிக்கையை ஏற்றுத் தென்னக ரயில்வே முதல் கட்டமாக மயிலாடுதுறை - மைசூர் 16231/ 16232 விரைவு ரயில் கடலூர் துறைமுகம் வரை ஜூலை 19 ஆம் தேதியில் இருந்து இயக்கப்படும் என அறிவிப்பு வெளியிட்டுள்ளது. இதனையறிந்த சிதம்பரம், கடலூர் பகுதியில் உள்ள பொதுமக்கள் மகிழ்ச்சி அடைந்துள்ளனர். அதே நேரத்தில் கடலூர் துறைமுகத்தில் ரயில் பெட்டிகளுக்குத் தண்ணீர் நிரப்பும் வசதி, ரயில் ஓட்டுநர் மற்றும் பாதுகாவலர் ஆகியவர்கள் தங்கும் அறைகள் உள்ளிட்ட அடிப்படை வசதிகளை மேம்படுத்தும் பணிகள் கடலூர் துறைமுகம் ரயில் நிலையத்தில் நடைபெற்று முடியும் தறுவாயில் உள்ளது.

இதுகுறித்து ரயில்வே உயர் அதிகாரி ஒருவர் கூறுகையில் மயிலாடுதுறைக்குக் காலை 7 மணிக்கு மைசூர் ரயில் வரும் 7.05 கடலூர் துறைமுகத்திற்கு புறப்பட்டுச் செல்லும் முதல் நாள் பரிசோதனை அடிப்படையில் இயக்கப்படும் அடுத்த நாள் தான் நேரம் அறிவிக்கப்படும் எனக் கூறினார்.

Next Story

ஜன்னல் வழியே வெளியான புகை; எரித்து கொல்லப்பட்ட மூவர்;காவல்துறை தீவிர விசாரணை

Published on 15/07/2024 | Edited on 15/07/2024
Smoke from the window; Three were burnt to death

கடலூரில் ஒரே குடும்பத்தில் 3 பேரை கொலை செய்து உடல்கள் எரிக்கப்பட்ட சம்பவம் பரபரப்பை ஏற்படுத்திய சம்பவம் தொடர்பாக போலீசார் விசாரணை நடத்தி வருகின்றனர். ராஜஸ்தான் மாநிலத்தைச் சேர்ந்த கமலேஸ்வரி, சுரேஷ்குமார் தம்பதியினர் சுரேஷ்குமார் நெல்லிக்குப்பத்தில் உள்ள இஐடி சர்க்கரை ஆலையில் மருந்தாளுனராக பணியாற்றி ஓய்வு பெற்றுள்ளார். இவருக்கு 70 வயதான நிலையில் வயது மூப்பின் காரணமாக கடந்த 6 மாதங்களுக்கு முன் உயிரிழந்தார்.

இவர்கள் நெல்லிக்குப்பம் அருகே உள்ள காராமணிக்குப்பம் ஜோதி  நகரில் வாடகை வீட்டில் பல ஆண்டுகளாக வசித்து வருகின்றனர். தற்சமயம் கமலேஸ்வரி அவரது மகன் சுகந்தகுமார், பேரன் இஷான் ஆகியோர் வசித்து வருகின்றனர். சுகந்த குமார் திருமணம் ஆகி சில வருடங்களிலேயே அவர் மனைவி பிரிந்து சென்று விவாகரத்து பெற்று சென்றுவிட்டார். சுகந்தகுமார் ஹைதராபாத்தில் உள்ள ஐடி நிறுவனத்தில் பணி செய்து வரும் நிலையில் 15 நாட்கள் அலுவலகத்திலும் 15 நாட்கள் வீட்டில் இருந்தும் பணி செய்து வந்துள்ளார். இவர் கடந்த வெள்ளிக்கிழமை இரவு ஹைதராபாத்தில் இருந்து  வீட்டிற்கு வந்ததாக கூறப்படுகிறது.

இந்நிலையில் அதே தினம் கமலேஸ்வரி அவரது உறவினர் வீட்டிற்கு துக்க நிகழ்ச்சிக்கு சென்று விட்டு அவரும் இரவு 8 மணிக்கு வீட்டிற்கு வந்துள்ளார். இவர்களின் வீட்டு வேலை செய்யும் பணி பெண் சனிக்கிழமை காலை வீட்டிற்கு வந்து பார்க்கும் பொழுது வெளி இரும்பு கேட் பூட்டி இருந்த நிலையில் அவர் மீண்டும் சென்றுள்ளார்.  அதன் பிறகு அவரும் தொலைபேசியில் தொடர்பு கொண்ட பொழுது தொலைபேசி எண் சுவிட்ச் ஆப் செய்யப்பட்டிருந்ததால் அவரும் இரண்டு நாள் வேலைக்கு வரவில்லை.

திங்கட்கிழமை வீட்டின் ஜன்னல் பகுதியில் இருந்து லேசாக புகை வந்ததால் அக்கம்பக்கத்தினர் காவல் துறைக்கு தகவலளித்தனர். இதையடுத்து சம்பவம் குறித்து நெல்லிக்குப்பம் போலீசார்  தீயணைப்புத் துறைக்கு தகவல் கொடுத்தனர். இதையடுத்து வீட்டின் கதவை உடைத்து உள்ளே சென்று பார்க்கும் பொழுது, ஒவ்வொரு பகுதியிலும் கொலை செய்யப்பட்டு ரத்த வெள்ளத்தில் எரிந்த நிலையில் உடல்களை கண்டு அதிர்ந்து போன போலீசார் உடனடியாக மாவட்ட காவல் கண்காணிப்பாளருக்கு தகவல் அளித்தனர்.

Smoke from the window; Three were burnt to death

சம்பவ இடத்திற்கு மோப்ப நாய் கைரேகை நிபுணர்கள் வரவழைக்கப்பட்டு தடயங்கள் சேகரிக்கும் பணியில் போலீசார் ஈடுபட்டனர். சம்பவ இடத்திற்கு மாவட்ட காவல் கண்காணிப்பாளர் ராஜாராம் நேரடியாக வந்து விசாரணை செய்தார். சுமார் 3 மணி நேரம்  விசாரணை செய்தார். அதில் வீட்டில் பணிபுரியும் பெண் மற்றும் உறவினர்கள் வீட்டைச் சுற்றியுள்ள பலரிடம் தனித்தனியாக விசாரணை செய்தார். விசாரணை மேற்கொள்ள  5 தனிப்படை அமைக்கப்பட்டுள்ளதாகவும், முதல்கட்ட விசாரணையில் இது கொலையாக இருக்கும் என தெரிவித்தார். பின்னர் 3 பேர்களின் உடல்களைக் கைப்பற்றி பிரேதப் பரிசோதனைக்காக கடலூர் தலைமை அரசு மருத்துவமனைக்கு கொண்டு சென்று உள்ளனர். ஒரே குடும்பத்தைச் சேர்ந்த 3  பேர் கொலை செய்து எரிக்கப்பட்ட சம்பவம் சுற்றுவட்டப் பகுதியில் பரபரப்பை ஏற்படுத்தியது.