Skip to main content

"அண்ணாமலை தரவுகள் அடிப்படையில் பேசமாட்டார்... என்ன தோன்றுகின்றதோ அதைத்தான் பேசுவார்" - இள. புகழேந்தி குற்றச்சாட்டு

Published on 17/06/2023 | Edited on 17/06/2023

 

ela pugazhendi  interview

 

அமைச்சர் செந்தில் பாலாஜி அமலாக்கத்துறையினரால் கைது செய்யப்பட்டு நீதிமன்றக் காவலில் வைக்கப்பட்டுள்ளார். அமலாக்கத்துறையின் நடவடிக்கைகளுக்கு எதிராக திமுக சார்பில் நீதிமன்றத்தில் வழக்குகள் தொடரப்பட்டு அவை விசாரணையில் இருக்கின்றன. இந்நிலையில், செந்தில் பாலாஜியின் கைது தொடர்பாக  திமுக தேர்தல் பணிக்குழு செயலாளர் இள. புகழேந்தியை சந்தித்து பேட்டி கண்டோம். அதற்கு அவர் அளித்த பதில் பின்வருமாறு..

 

அண்ணாமலை கொடுத்த ஆதாரத்தினால் தான் நாசர் பதவி இழந்தார், அதுபோல தற்போது அண்ணாமலை கொடுத்த புகாரின் பேரில் செந்தில் பாலாஜியும் அமைச்சர் பதவி இழப்பார் என்று பாஜகவினர் கூறுகின்றார்களே?

“அண்ணாமலை எப்போதும் தரவுகள் அடிப்படையில் பேசமாட்டார். அவருக்கு என்ன தோன்றுகின்றதோ அதைத்தான் பேசுவார். அதை பாஜக  கட்சியை சார்ந்த நபர்களே கூறுகிறார்கள். தற்போது கூட எஸ்.வி சேகர் அண்ணாமலையை கடுமையாக விமர்சித்து வருகிறார். ஆக, அண்ணாமலை எதையாவது பேசிவிட்டு திடீரென்று காணாமல் போய்விடுவார். மேலும், நாசர் அவர்களை சில பணிகளை பார்ப்பதற்கு அவருக்கு மாவட்டச் செயலாளர் பதவி கொடுத்திருக்கிறார் முதல்வர். இதற்கும் அண்ணாமலைக்கும் எந்த வித சம்பந்தமும் இல்லை”.

 

செந்தில் பாலாஜி கைதுக்கு பிறகு தமிழகத்தில் உள்ளவர்களை சி.பி.ஐ விசாரிக்க வேண்டுமென்றால் தமிழக அரசின் அனுமதி பெறவேண்டும் என்று உத்தரவு போட்டிருக்கிறார்கள். எதற்கு இந்த அவசரம் என்று விமர்சனம் வருகிறதே?

“இனிமேல், சட்டத்தை மதிக்க கூடியவர்களாக பாஜகவினர் இருப்பார்கள் என்ற ஒரு நம்பிக்கை தான். மேலும், 1946 ஆம் ஆண்டில் ஆங்கிலேயர் ஆட்சியில் டெல்லி காவல் அமைப்பு சட்டம் ஒன்று உருவாக்கப்பட்டது. அந்த சட்டத்தில், ஒரு மாநிலத்தில் சென்று ரெய்டு நடத்த வேண்டுமென்றால் அந்த மாநிலத்தின் அனுமதி பெற வேண்டும் என்பதே. மேலும், அந்த சட்டத்தில், பிரிவு 6 இன் படி சோதனை செய்பவர்களிடம் இணக்கமாகச் செயல்படும்போது அனுமதியின்றி சோதனையில் ஈடுபடலாம். அதனால் தான் சோதனை நடைபெற தமிழக அரசு அனுமதித்தார்கள். இந்நிலையில், மேற்கு வங்கம், ராஜஸ்தான் மாநிலங்களில், சோதனை நடத்த வேண்டுமென்றால் அந்த மாநில அரசினுடைய அனுமதி பெற வேண்டும் என்று அந்த சட்டத்தை புதுப்பித்துக் கொண்டார்கள். அதே போல தான், தமிழகத்தில் சோதனை நடத்த வேண்டுமென்றால் தமிழக அரசின் அனுமதி பெற வேண்டும் என்று  சட்டத்தை புதுப்பித்து உத்தரவு போடப்பட்டது”.

 

செந்தில் பாலாஜியை அமைச்சர் பதவியில் இருந்து நீக்க வேண்டும் என்றும் , தமிழகத்தில் சட்ட ஒழுங்கு சீர் குலைந்து விட்டது என்றும் எடப்பாடி, ஆளுநரிடம் புகார் அளிப்பதாகத் தகவல் வெளிவந்துள்ளதே?

“ஆளுநர் ரவி பாஜகவினுடைய ஆள் தானே. மேலும், செந்தில் பாலாஜியின் மீது போடப்பட்ட வழக்கை சட்டப்படியாக எதிர்கொள்வோம் என்று முதல்வர் அறிக்கை கொடுத்திருக்கிறார். அது போல, நீதிமன்றத்தில் இந்த குற்றம் நிரூபிக்கப்பட்டால் அவர்களுடைய பதவி விலக வாய்ப்பு இருக்கிறது. அந்த சட்டம்  கூட தெரியவில்லை என்றால் அறிவற்ற தனம் தான் என்று சொல்ல வேண்டும். மேலும் செந்தில் பாலாஜி தனது இலாகாவை திறம்படச் செய்து வருகிறார். அரவக்குறிச்சி, கொங்கு மண்டலம் போன்ற இடங்களில் அண்ணாமலையையும், எடப்பாடியையும் ஓட ஓட விரட்டியுள்ளார்கள் திமுகவினர். அதற்கு முக்கிய காரணம் செந்தில் பாலாஜி என்பதால் அவரது வீட்டில் சோதனை நடத்த அமலாக்கத்துறையை அனுப்பியுள்ளனர்.

 

சில நாட்களுக்கு முன் ஜெயலலிதாவை ஏ1 குற்றவாளி என்று அண்ணாமலை கூறியதற்கு அதிமுகவினர் எதிர்ப்பு தெரிவித்தார்கள். பின்பு அண்ணாமலையின் நண்பரான ஆளுநர் ஆர்.எஸ்.எஸ். ரவியிடம் புகார் அளித்துள்ளார் எடப்பாடி. இதுபோன்று தங்களுடைய நிலைப்பாட்டை நாட்களுக்கு நாள் மாற்றிக் கொள்வார்கள். பாஜகவும், அதிமுகவும் இப்படி மாறி மாறி குற்றம் சொல்லுகிறார்கள் என்றால் முதல்வர் ஸ்டாலின் மீது அமித்ஷா பயந்து விட்டார். எல்லாத்துக்கும் சகுனம் பார்க்கும் பாஜக கூட்டம், அமித்ஷா சென்னை விமான நிலையத்தில் கால் வைத்ததுமே மின் துண்டிப்பு ஏற்பட்டுவிட்டது. அதனால், இந்த சகுனத்தை நம்பும் அமித்ஷா தமிழகத்தில் நாடாளுமன்ற தேர்தலில் வெல்ல முடியாது என்ற பயத்தினால் தான் அமலாக்கத்துறை மூலம் சோதனை நடத்துகிறார்கள். அதனால், இதுபோன்ற செயல்களை தமிழக மக்கள் என்றைக்கும் நம்பமாட்டார்கள்”.

 

 

 

Next Story

ஆபாச அண்ணாமலையை புறக்கணிப்போம்! - ஒன்றிணையும் ஊடகங்கள்!

Published on 23/01/2024 | Edited on 23/01/2024
Nakkheeran condemn to Annamalai

சமீபத்தில் இளைஞர் நலன் மற்றும் விளையாட்டுத்துறை அமைச்சர் உதயநிதி ஸ்டாலினின் பேட்டி தனியார் தொலைக்காட்சியில் ஒளிபரப்பானது. அந்த பேட்டி குறித்து பத்திரிகையாளர்களின் கேள்விக்குப் பதிலளித்த தமிழக பா.ஜ.க. தலைவர் அண்ணாமலை, அமைச்சர் உதயநிதியை பேட்டியெடுத்த ஊடகவியலாளரை, "பாத்து... பக்குவமா.. பல்லு பட்டுடப் போதுன்னு கிராமத்துல சொல்வாங்க... எங்க பகுதிகளில் சொல்வாங்க. அதுபோல அந்த பத்திரிகையாளர் கேள்விகளைக் கேட்டிருக்கிறார்'' என்று மிகவும் கீழ்த்தரமான இரட்டை அர்த்தத்தில் குறிப்பிட்டுப் பேசியிருந்தார். அதுகுறித்து அவரிடம் கேட்டதற்கு, எங்க ஊர்ப்பக்கம் இப்படித்தான் சொல்வார்கள் என்று அவர் குறிப்பிட்டதன் மூலம், மிகுந்த மரியாதையுடன் பழகக்கூடிய கொங்கு மண்டல மக்களின் மாண்பையும் கொச்சைப்படுத்தியிருக்கிறார். 

ஒரு அரசியல் கட்சியின் தலைமைப் பொறுப்பில் இருக்கக்கூடிய அரசியல்வாதியான அண்ணாமலை, இதுபோல் பத்திரிகையாளர்களை இழிவுபடுத்திப் பேசுவது முதல்முறை கிடையாது. இதற்கு முன்னரே, தன்னிடம் பேட்டியெடுக்க வரும் பத்திரிகையாளர்களை குரங்குகளோடு ஒப்பிட்டு இழிவுபடுத்திப் பேசியிருக்கிறார். அதேபோல் பத்திரிகையாளர்களை ‘அண்ணே’ என்று அன்பாகச் சொல்வதுபோல் பேசி ஆயிரம், இரண்டாயிரம், மூவாயிரம் என்று ஏலமிட்டு விலை நிர்ணயிப்பது போல் நக்கலடித்து அவமானப்படுத்தியிருக்கிறார். பத்திரிகையாளர்களை பா.ஜ.க.வுக்கு எதிரான கட்சிகளின் அடிமைகள் போலவும், கைக்கூலிகள் போலவும் சித்தரித்து தொடர்ச்சியாக நக்கலடித்து வருகிறார். அதேபோல் தன்னை எதிர்த்துக் கேள்வியெழுப்பும் பத்திரிகையாளர்களை அவர்களின் நிறுவனம் சார்ந்து குறிவைக்கும் மோசமான செயலிலும் ஈடுபடுகிறார்.

பத்திரிகையாளர்களின் பணி, போர் வீரர்களின் பணிக்கு ஒப்பானது. மிகுந்த நெருக்கடியான போர்ச் சூழலிலும்கூட பத்திரிகையாளர்கள் உயிரையும் துச்சமாக மதித்து களத்தில் இறங்கி செய்திகளைச் சேகரிப்பார்கள். அபாயகரமான கொரோனா கால கட்டத்தில் நாடே முடங்கியிருந்தபோதும் பத்திரிகையாளர்கள் துணிச்சலாகக் களமிறங்கி செய்திகளைச் சேகரித்து வழங்கி வந்தனர். எங்கெல்லாம் பத்திரிகை சுதந்திரம் நன்முறையில் செயல்படுகிறதோ, அங்கெல்லாம் ஜனநாயகம் பாதுகாக்கப்படும். பத்திரிகை சுதந்திரத்தை முடக்கும்போதுதான் சர்வாதிகாரம் தலைதூக்கும். 

மத்தியில் ஆட்சியிலிருக்கும் கட்சியின் மாநிலத் தலைமையில் இருக்கும் ஒரே காரணத்தால், தைரியத்தால், தமிழ்நாட்டு ஊடகவியலாளர்களையும், பத்திரிகையாளர்களையும் தொடர்ச்சியாகத் தரக்குறைவாக விமர்சித்து வரும் தமிழக பா.ஜ.க. தலைவர் அண்ணாமலையின் அடாவடித்தனத்தை நக்கீரன் வன்மையாகக் கண்டிக்கிறது. தனது அடாவடியான பேச்சுக்கு அண்ணாமலை மன்னிப்பு கேட்க வேண்டும். அவர் மன்னிப்பு கேட்கும்வரை அவரது செய்தியையோ, படத்தையோ நக்கீரன் வெளியிடாது என்பதைத் தெரிவித்துக் கொள்கிறோம்.

பத்திரிகையாளர் சங்கங்கள் உள்ளிட்ட பல ஊடகங்களும் ஒன்றிணைந்து அண்ணாமலையின் இந்த அநாகரிகப் பேச்சுக்கு எதிராகக் குரல் கொடுத்துள்ளது வரவேற்கத்தக்கது.

ஆசிரியர்

Next Story

பிரதமர் மோடியுடன் தமிழக பாஜக நிர்வாகிகள் சந்திப்பு!

Published on 19/01/2024 | Edited on 19/01/2024
Tamil Nadu BJP executives meeting with Prime Minister Modi

கேலோ இந்தியா விளையாட்டுப் போட்டிகள் இன்று (19.01.2024) முதல் ஜனவரி 31ஆம் தேதி வரை சென்னை, கோயம்புத்தூர், மதுரை திருச்சி ஆகிய மாவட்டங்களில் நடைபெற உள்ளது. இதனையொட்டி சென்னை நேரு வெளிப்புற விளையாட்டு அரங்கில் பிரதமர் மோடி ‘கேலோ இந்தியா விளையாட்டு’ போட்டியை இன்று மாலை தொடங்கி வைத்தார். இந்த நிகழ்ச்சியில் தமிழக முதலமைச்சர் மு.க. ஸ்டாலின், ஆளுநர் ஆர்.என். ரவி, மத்திய அமைச்சர் அனுராக் சிங் தாகூர், மத்திய இணையமைச்சர் எல். முருகன், தமிழக அமைச்சர்கள், நாடாளுமன்ற உறுப்பினர்கள், சட்டப் பேரவை உறுப்பினர்கள் மற்றும் முக்கிய பிரமுகர்கள் விழாவில் பங்கேற்றனர்.

இதனையடுத்து பிரதமர் மோடி ஓய்வெடுப்பதற்காக சென்னை கிண்டியில் உள்ள ஆளுநர் மாளிகைக்கு சென்றார். அப்போது தமிழக பாஜக தலைவர் அண்ணாமலை உள்ளிட்ட கட்சி நிர்வாகிகள் பிரதமர் மோடியை வரவேற்றனர்.  மேலும் தமிழக பாஜக நிர்வாகிகள் உடன் பிரதமர் மோடி 10 நிமிடங்கள் ஆலோசனை நடத்தினார். இந்த சந்திப்பின் போது நாடாளுமன்ற தேர்தல் குறித்தும், தேர்தலுக்கு தமிழக பாஜக தயாராகி வருவது குறித்தும், கூட்டணி குறித்தும் விவாதிக்கப்பட்டதாகவும் தகவல் வெளியாகியுள்ளது.

அதனைத் தொடர்ந்து தமிழக பாஜக தலைவர் அண்ணாமலை செய்தியாளர்களை சந்தித்தார். அப்போது அவர் பேசுகையில், “என் மண் என் மக்கள் பாத யாத்திரையின் இறுதி நிகழ்வுக்கு பிரதமரை அழைத்து வர நேரம் கேட்டுள்ளோம். இது குறித்து அடுத்த நான்கு, ஐந்து நாட்களில் இறுதி செய்ய வேண்டும். பிப்ரவரி மாதம் 2 வது வாரத்தில் பாத யாத்திரையை முடிவுக்கு கொண்டு வர வேண்டும். எனவே பிப்ரவரி 2 வது வாரம் நிறைவடையும் பாதயாத்திரை நிகழ்வில் கலந்துகொள்ள பிரதமர் பங்கேற்பதற்காக மீண்டும் தமிழகம் வர வாய்ப்புள்ளது” எனத் தெரிவித்தார்.