Skip to main content

ஆசிய, இந்திய சாதனைகளை படைத்த திமுக, அமமுக... கம்ப அரசியல்!!! 

Published on 05/03/2019 | Edited on 05/03/2019

ஒரு கட்சியின் முக்கியமான அடையாளம் அதன் கொடி. அனைத்து கட்சிகளும் தனது கொடியை வடிவமைப்பது முதல்கொண்டு அனைத்திற்கும் அதிக முக்கியத்துவம் கொடுக்கும்.

 

dmk ammk flag


 

உள்ளூரில் ஒரு இடத்தில், ஒரு கட்சியின் கொடி ஏற்றப்பட்டால் அதற்கடுத்தடுத்து, அடுத்தடுத்த கட்சிகளின் கொடிகளும் அந்த இடத்தில் ஏற்றப்படும். இதில் முக்கியமாக  கவனிக்கப்படவேண்டியது அந்தக் கட்சிக்கொடி ஏற்றப்பட்டுள்ள கம்பம்தான். அந்தக் கொடிக்கம்பம் ஒவ்வொன்றும் ஒவ்வொரு உயரத்திலிருக்கும். இந்தக் கொடிக்கம்பத்தின் உயரத்தை அவர்கள் தன்மானப் பிரச்சனை போல் கருதுவர். இது இன்னும் அடுத்த கட்டத்தை எட்டியுள்ளது. திமுகவும், அமமுகவும் தங்களது கொடிக்கம்பத்தின் மூலம் இந்திய, ஆசிய சாதனைகளைப் படைத்துள்ளன.

 

கடந்த 12.12.2018 அன்று திமுக தலைமை அலுவலகமான அண்ணா அறிவாலயத்தில் திமுக தலைவர் ஸ்டாலின் அக்கட்சியின் கொடியான இருவண்ணக்கொடியை ஏற்றினார். இரும்பினாலான இந்தக் கொடிக்கம்பம் 2430 கிலோ எடை கொண்டது. 114 அடி உயரக் கொடிக்கம்பமான இது, கோட்டை கொத்தளத்தில் உள்ள தேசியக் கொடிக் கம்பத்தைவிட உயரமானது. இந்தியாவிலேயே அரசியல் கட்சி தலைமை அலுவலகத்தில் உள்ள உயரமான கொடிக் கம்பம் திமுகவினுடையது என்ற பெருமையை இதன்மூலம் அது பெற்றது.

 

கடந்த மார்ச் 04ம் தேதி (04.03.2019) விருதுநகர் மாவட்டம், கிருஷ்ணன்கோவிலில் அமமுக கூட்டம் நடைபெற்றது. அந்தக் கூட்டத்தில் அக்கட்சியின் தலைவர் டிடிவி தினகரன், 123 அடி உயரக் கொடிக்கம்பத்தில், 20 அடி நீளம், 30 அடி உயரம்கொண்ட கொடியை ஏற்றினார். இதுதான் ஆசியாவிலேயே மிக உயரமான கொடிக்கம்பம் ஆகும். தேர்தல் நெருங்க நெருங்க இன்னும் பல காட்சிகள், போட்டிகள் நமக்குக் காத்திருக்கின்றன.  

 

 

 

 

Next Story

அமைச்சர் துரைமுருகன் மருத்துவமனையில் அனுமதி!

Published on 13/07/2024 | Edited on 13/07/2024
Minister Durai Murugan suddenly fell ill

விக்கிரவாண்டி இடைத்தேர்தலில் பதிவான வாக்குகள் இன்று காலை முதல் எண்ணப்பட்டு வரும் நிலையில் தொடக்கத்திலிருந்தே திமுக வேட்பாளர் அன்னியூர் சிவா முன்னிலை வகித்துவருகிறார்.  மதியம் 12 மணி நிலவரப்படி திமுக வேட்பாளர் 69,855 வாக்குகள் பெற்று முன்னிலையில் உள்ளார்.  பாமக வேட்பாளர் அன்புமணி 30,421 வாக்குகளும், நாம் தமிழர் வேட்பாளர் அபிநயா 5,566 வாக்குகளும் பெற்றுள்ளார்.

கிட்டத்தட்ட விக்கிரவாண்டி இடைத்தேர்தலில் திமுகவின் வெற்றி உறுதியாகியுள்ள நிலையில் அறிவாலயம் வந்த முதல்வர் ஸ்டாலின் கட்சி நிர்வாகிகளுக்கு இனிப்புகள் வழங்கினார்.  இந்த நிலையில் முதல்வருடன் வந்த அமைச்சர் துரைமுருகனுக்கு திடீர் உடல்நலக்குறைவு ஏற்பட்டுள்ளது அவருக்கு முதலுதவி சிகிச்சை அளிக்கப்பட்ட பின் அப்போலோ மருத்துவமனைக்கு அழைத்துச் செல்லப்பட்டு  சிகிச்சைக்காக அனுமதிக்கப்பட்டுள்ளார். 

Next Story

விக்கிரவாண்டியில் திமுக முன்னிலை; இனிப்புகள் வழங்கி கொண்டாடிய முதல்வர்

Published on 13/07/2024 | Edited on 13/07/2024
 mk stalin  celebrated DMK lead in the Vikravandi by-election

விக்கிரவாண்டி சட்டமன்றத் தொகுதி திமுக எம்.எல்.ஏ புகழேந்தி உயிரிழந்ததை தொடர்ந்து அந்தத் தொகுதிக்குக் கடந்த 10 ஆம் தேதி இடைத்தேர்தல் நடைபெற்றது. இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா, பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியிட்டனர். அதோடு 11 அரசியல் கட்சிகளின் வேட்பாளர்கள், 18 சுயேட்சைகள் என மொத்தம் 29 வேட்பாளர்கள் களத்திலிருந்தனர். அதிமுக, தேமுதிக ஆகிய இருகட்சிகளும் இந்த இடைத்தேர்தலைப் புறக்கணித்திருந்தது.

இந்தத் தேர்தலில் மும்முனை போட்டி நிலவும் சூழலில் ஜூலை 10 ஆம் தேதி பதிவான வாக்குகள் இன்று எண்ணப்பட்டு வருகிறது. சரியாகக் காலை 8 மணிக்கு வாக்கு எண்ணிக்கை தொடங்கிய நிலையில் முதலில் தபால் வாக்குகள் எண்ணப்பட்ட நிலையில் அதனைத் தொடர்ந்து மின்னணு வாக்குப்பதிவு இயந்திரத்தில் பதிவான வாக்குகள் எண்ணப்பட்டு வருகிறது. மதியம் 12 மணி நிலவரப்படி திமுக வேட்பாளர் 69,855 வாக்குகள் பெற்று முன்னிலையில் உள்ளார். பாமக வேட்பாளர் அன்புமணி 30,421 வாக்குகளும், நாம் தமிழர் வேட்பாளர் அபிநயா 5,566 வாக்குகளும் பெற்றுள்ளார்.

விக்கிரவாண்டி இடைத்தேர்தலில் கிட்டத்தட்ட திமுகவின் வெற்றி உறுதியாகியுள்ள நிலையில் அக்கட்சியின் தலைவரும் முதல்வருமான ஸ்டாலின் சென்னையில் உள்ள அக்கட்சியின் தலைமை அலுவலகமான அறிவாலயத்திற்கு வருகை தந்துள்ளார். அங்கு திரண்டிருந்த நிர்வாகிகள் மற்றும் தொண்டர்களுக்கு இனிப்புகளை வழங்கி கொண்டாடினார்.