Skip to main content

மருத்துவர்களின் அர்ப்பணிப்பை கொச்சைப்படுத்தும் மத்திய அரசு!

Published on 26/04/2021 | Edited on 26/04/2021
ddd

 

இந்தியா முழுவதும் கொரோனா இரண்டாவது அலை, முன்பைவிட வெகுதீவிரமாகப் பரவிவரும் சூழலில், கொரோ னாவுக்கு எதிரான யுத்தத்தில் முன்நின்று பணியாற்றும் சுகாதாரப் பணியாளர்களுக்கு, கடந்த 2020, மார்ச் மாதத்தில் அறிவிக்கப் பட்டிருந்த ரூ.50 லட்சம் ரூபாய் காப்பீட்டுத் திட்டம் முடிவுக்கு வந்ததாக வெளியான தகவல், மருத்துவர்கள் மத்தியில் கடும் அதிருப்தியை ஏற்படுத்தியுள்ளது.

 

கொரோனா தடுப்புப் பணியில் முன்களப் பணியாளர்களாகச் செயல்படுவோர், உயிரிழக்க நேர்ந்தால், அவர்களின் குடும்பத்துக்கு ரூ.50 லட்சம் ரூபாய் காப்பீட்டுத்தொகை கிடைக்கும். இதுவரை 287 பேருக்கு காப்பீட்டுத்தொகை வழங்கப்பட்டுள்ள தாகக் குறிப்பிட்டுள்ள மத்திய சுகாதாரத் துறை அமைச்சகம், இந்த காப்பீடு தற்போது முடிவுக்கு வருவதாகவும், இத்திட்டத்தைத் தொடர்ந்து செயல்படுத்த வேறொரு காப்பீட்டு நிறுவனத்துடன் பேசிவருவதாகவும் கூறியிருக்கிறது. இதனை எதிர்க் கட்சித்தலைவர் ராகுல் காந்தி கடுமையாக விமர் சித்துள்ளார். கொரோனாவுக்கு எதிராகப் போரா டும் சுகாதாரப் பணியாளர்களிடம் நன்றியில்லாமல் நடந்துகொண்டுள்ளதாகவும், தற்போது அவர்கள், காப்பீடு இல்லாத சூழலில் பணியாற்றிவருகிறார்கள் என்றும் குற்றம்சாட்டியுள்ளார்.

 

சுகாதாரப்பணியாளர்களுக்கு இதுவரை மத்திய அரசு அறிவித்த காப்பீட்டுத் திட்டத்தின் மூலம், காப்பீட்டுத்தொகை உரியவர்களுக்குக் கிடைத்திருக்கிறதா, இத்திட்டம் நன்முறையில் செயல்படுத்தப்படுகிறதா என்பது குறித்து, சமூக சமத்துவத்திற்கான டாக்டர்கள் சங்கத்தின் பொதுச் செயலாளர் டாக்டர் ஜி.ஆர்.இரவீந்திர நாத்திடம் கேட்டபோது, ""மத்திய அரசு அறிவித்த மருத்துவக் காப்பீட்டுத் திட்டத்தின்மூலம், கடந்த ஓராண்டு காலத்தில் உயிரிழந்த சுகாதாரப் பணியாளர்களுக்கு, காப்பீட்டுத்தொகை முறையாக வழங்கப்பட வில்லை. கொரோனாவுக்கு எதிரான போரில் பாதிக்கப்பட்டு உயிரிழந்த மருத்துவர்களுக்கு இன்சூரன்ஸ் தொகையை வழங்குவதற்கு, முதலில் அதுகுறித்த விவரங்கள் மத்திய அரசிடம் இருக்க வேண்டும்.

 

கொரோனா நோய்த்தொற்றுப்பரவல் தொடங்கியதிலிருந்து கடந்த மாதம் வரைக்குமே, 800க்கும் மேற்பட்ட மருத்துவர்கள், செவிலியர்கள் மற்றும் சுகாதாரப் பணியாளர்கள் உயிரிழந்துள்ளனர். ஆனால் இந்த டேட்டாவையே மத்திய அரசும், மாநில அரசும் சரியாகக் கணக்கெடுக்கவில்லை. வெறும் 120 பேர் மட்டுமே கொரோனாவால் உயிரிழந்துள்ளதாக் மத்திய சுகாதாரம் மற்றும் குடும்பநலத் துறை இணை அமைச்சர் அஸ்வினி குமார் சௌபே குறிப்பிட்டுள்ளார். மாநில அரசோ, தனியாரிடம் இதுகுறித்த விவரங்களைக் கேட்டுள்ளது. இப்படி மத்திய, மாநில அரசுகளே, கொரோனாவுக்கு எதிரான போரில் உயிரிழந்த மருத்துவர்களை மதிக்காமல், பொறுப்பில்லாமல் செயல்படும்போது, எப்படி உயிரிழந்தவர்களுக்கு உரிய நிவாரணம் கிடைத்திருக்கும்?

 

'மருத்துவர்களுக்கு நாங்கள் உதவுகிறோம்' என்று வெளியில் காட்டிக்கொள்ள மட்டுமே இந்த இன்சூரன்ஸ் அறிவிப்பு பயன்படும். இப்படி கொரோனாவுக்கு எதிரான போரில் உயிரிழந்தவர்களின் எண்ணிக்கையைக் குறைத்துக் குறிப்பிட்டால், அந்த இன்சூரன்ஸ் நிறுவனத்துக்குத்தான் லாபமாக அமையுமேயொழிய, சுகாதாரப்பணி யாளர்களுக்கும், அவர்களின் குடும்பத்தினருக்கும் பேரிழப்பு தான். கொரோனாவால் உயிரிழந்தவர்களைக் கணக்கிடுவதில் இன்னொரு நடைமுறைக் குழப்பமும் இருந்தது. இதில், ஆர்.டி. பி.சி.ஆர். டெஸ்ட்டில் நெகடிவ் என்று வந்தவர்களைக் கொரோனாவால் பாதிக்கப்பட்டவர்களாகக் கணக்கில் கொள்வதில்லை. ஆனால், இதில் நெகடிவாக வந்தாலும் கொரோனாவால் பாதிக்கப்பட்டவர்கள் உண்டு. எனவே இத்தகைய விதிமுறைகளால் உரியவர்களுக்கு இழப்பீடு கிடைக்காமல் போகிறது.

ddd

இதுபோன்ற குழப்பங்களைத் தவிர்க்க, அரசாங்கம் வழங்க நினைக்கும் இழப்பீட்டுத் தொகையை, இன்சூரன்ஸ் நிறுவனத்தின் மூலமாகச் செய்யாமல், நேரடியாகவே வழங்க வேண்டும். மத்திய அரசு 50 லட்சம் ரூபாயும், மாநில அரசு தனது பங்காக 50 லட்சம் ரூபாயும் வழங்கி, அவர்களின் குடும்பத்தின் எதிர்காலத்தைப் பாதுகாத்திட வேண்டும். இதுவே கொரோனா வுக்கு எதிரான போரில் உயிரையும் துச்சமாக மதித்து, 24 மணி நேரமும் போராடும் மருத்துவர்கள், செவிலியர்கள் மற்றும் முன்கள வீரர்களுக்குச் செய்யும் மரியாதையாக இருக்கும்'' என்றார்.

 

கொரோனா நோய்த்தொற்று பரவத் தொடங்கியதுமே கொரோனா நோயாளிகளை, அவர்களைச் சார்ந்தவர்களே நெருங்குவதற்கு அச்சப்படும் சூழலில், அந்த நோயாளி களுக்கு உரிய சிகிச்சைகளை அளித்து குணப்படுத்துவது சவாலான விஷயமாகும். கொரோனா நோயாளிகளிடமிருந்து தங்களுக்கு நோய் பரவிவிடாமலிருக்க மருத்துவர்கள் நாள்முழுக்க அணியும் பாதுகாப்பு உடைகள், அவர்களுக்கு மிகுந்த சிரமத்தைத் தரக்கூடியவை. எனினும், நோயாளிகளைக் குணப்படுத்த வேண்டுமென்ற உயரிய நோக்கத்துக்காகத் தங்களுக்கு நேரும் சிரமத்தைப் பொறுத்துக் கொண்டு சேவையாற்றும் மருத்துவர்கள், தெய்வத்துக்கு நிகரானவர்கள்.

 

அவர்களைப் போற்றுவதாகக் கூறிக்கொண்டு, ஹெலிகாப்டரில் பறந்து, மருத்துவமனையின் மீது பூக்களைத் தூவிய மத்திய அரசின் ஸ்டன்ட்டை விட, அவர்களுக்கு உளப்பூர்வமான மரியாதையை வழங்குவதே அவசியமாகும். எனவே, நிறுத்தப் பட்டுள்ள இன்சூரன்ஸ் திட்டத்தை மீண்டும் தொடங்குவது அல்லது நேரடியாகக் இழப்பீட்டுத் தொகையை மத்திய அரசே வழங்குவது என ஏதேனுமொரு வழியில், மத்திய, மாநில அரசுகள் துரிதமாகச் செயல்பட்டால்தான், மருத்துவர்களும் எவ்விதத் தொய்வுமின்றி, முழு ஈடுபாட்டோடும், எதிர்கால நம்பிக்கையோடும் தங்களது சேவையைத் தொடர்வார்கள்.

 

-தெ.சு.கவுதமன்

 

 


 

 

Next Story

தனிநபர் பெயரில் அதிகமான சிம் கார்டு வைத்திருந்தால் சிறை! - புதிய சட்டம் அமல்

Published on 18/07/2024 | Edited on 18/07/2024
 Implementation of new law on Jail if have too many SIM cards

இன்றைய டிஜிட்டல் யுகத்தில், பல சிம் கார்டுகளை வைத்திருப்பது நடைமுறையாகிவிட்டது. தனிநபர்கள் தங்கள் பெயரில் பல சிம் கார்டுகளை வைத்திருப்பதால் சட்ட மற்றும் நிதி சிக்கல்களுக்கு வழிவகுக்கும் என்று கருதப்படுகிறது. மேலும், நாட்டில் நடக்கும் குற்றச்செயல் பலவற்றுக்கு தொலைப்பேசி சாதனமே என்று கூறப்படுகிறது. இதனால், தொலைப்பேசி பயன்பாட்டில் புதிய நெறிமுறைகளை மத்திய தொலைத்தொடர்பு அமைச்சகம் உருவாக்கியுள்ளது. 

அதன்படி, 2023ஆம் ஆண்டின் தொலைத்தொடர்பு சட்டத்தின்படி, கடுமையாக விதிமுறைகளை உருவாக்கியுள்ளது. அதில், ஒரு தனிநபர் 9 சிம் கார்டுகள் வரை வைத்திருக்கலாம். ஆனால், அவர் 10 சிம் கார்டுகளையோ அல்லது அதற்கு மேலோ வைத்திருந்தாலோ அவர்களுக்கு ரூ50,000 முதல் ரூ.2 லட்சம் வரை அபராதம் விதிக்கப்படும் என்று தெரிவிக்கப்பட்டுள்ளது. மேலும், பதற்றமான மாநிலங்களான ஜம்மு & காஷ்மீர், அசாம் போன்ற மாநிலங்களில் ஒருவர் அதிகபட்சமாக 6 சிம் கார்டுகள் வரை தான் வைத்திருக்க முடியும் என்று தெரிவித்துள்ளது. 

வரையறுக்கப்பட்ட விதிமுறைகளை முதல் முறையாக மீறினால், அவர்களுக்கு ரூ.50,000 வரை அபராதம் விதிக்கப்படும். அந்தக் குற்றம் தொடருமானால் அதிகபட்சமாக அவர்களுக்கு ரூ.2 லட்சம் வரை அபராதம் விதிக்கப்படும். இந்தச் சட்டத்தில் மேலும் பல கட்டுப்பாடுகள் இருக்கின்றன. சிம் கார்டுகளைப் பெறுவதற்கு வேறு ஒரு பெயரை யாராவது மோசடியாகப் பயன்படுத்தினால், அவர்களுக்கு 3 ஆண்டுகள் சிறைத் தண்டனை அல்லது ரூ.50 லட்சம் வரை அபராதம் விதிக்கப்படும் என்று கூறியுள்ளது. மேலும், பயனரின் அனுமதியின்றி வணிகச் செய்திகளை அனுப்பினால், அந்தத் தொலைத்தொடர்பு நிறுவனத்துக்கு ரூ.2 லட்சம் வரை அபராதம் விதிக்கப்படும் போன்ற பல விதிமுறைகளை மத்திய தொலைத்தொடர்பு அமைச்சகம் தெரிவித்துள்ளது. 
 

Next Story

புதிய குற்றவியல் சட்டங்கள்; எதிர்த்தும் ஆதரித்தும் வழக்கறிஞர்கள் மோதல்

Published on 01/07/2024 | Edited on 01/07/2024
nn

புதிதாக நிறைவேற்றப்பட்ட மூன்று குற்றவியல் நடைமுறை சட்டங்கள் ஜூலை ஒன்றாம் தேதியான (01/07/2024) இன்று நாடு முழுவதும் அமலுக்கு வந்துள்ளது. இந்தநிலையில் டெல்லியில் சாலையோர வியாபாரி மீது முதல் குற்றவியல் வழக்கு பதிவு செய்யப்பட்டுள்ளது.

டெல்லி கம்லா மார்க்கெட் பகுதியில் சாலையோர கடை நடத்தி வந்த ஒருவர் பாதசாரிகளுக்கு இடையூறாக நடந்து கொண்டதாக 'பாரதிய நியாய சன்ஹிதா' எனும் புதிய குற்றவியல் சட்ட வழக்கு முதல் முறையாக பதிவு செய்யப்பட்டுள்ளது.

புதிய குற்றவியல் சட்டங்களின் அம்சங்கள்: ஆங்கிலேயக் காலத்து ஐ.பி.சி, சி.ஆர்.பி.சி, ஐ.இ.ஏ சட்டங்களுக்கு மாற்றாகப் பாரதிய நியாய சன்ஹிதா, பாரதிய நாகரிக் சுரக்ஷா சன்ஹிதா, பாரதிய சக்ஷ்ய அதிநியம்  உள்ளிட்ட சமஸ்கிருத பெயர்களில் புதிய குற்றவியல் சட்டங்கள் உருவாக்கப்பட்டுள்ளது. விசாரணை நிறைவடைந்த 45 நாட்களுக்குள் தீர்ப்பு வழங்கப்பட வேண்டும்; முதல் நீதிமன்ற விசாரணை நடைபெற்ற நாளிலிருந்து அறுபது நாட்களுக்குள் குற்றச்சாட்டுகளைப் பதிவு செய்ய வேண்டும்; எங்குக் குற்றம் நடந்தாலும் எந்தக் காவல் நிலையத்திலும் புகார் செய்யலாம்; காவல்துறையிடம் இணைய வழியில் புகார்களைப் பதிவு செய்தல் மற்றும் அழைப்பாணைகளை அனுப்புதல்; குற்றம் நடைபெற்ற இடங்களைக் கட்டாயம் காணொளியாகப் பதிவு செய்தல் வேண்டும்; கொடூர குற்றங்களில் தடயவியல் நிபுணர்கள் குற்றம் நடந்த இடங்களுக்குச் சென்று சாட்சியங்களைச் சேகரிப்பது கட்டாயம்; பாலியல் வன்கொடுமையில் பாதிக்கப்பட்டவரின் பாதுகாப்பிற்காக வீடியோ, ஆடியோ மூலம் வாக்குமூலம் பதிவு செய்ய வேண்டும் உள்ளிட்ட அம்சங்கள் இடம்பெற்றுள்ளது.
 

புதுச்சேரியில் குற்றவியல் சட்டங்களை அம்மாநில முதல்வர் ரங்கசாமி அமல்படுத்தியுள்ளார். இந்நிலையில் மதுரையில் மாவட்ட நீதிமன்ற வளாகத்தில் நடைமுறைக்கு வந்துள்ள புதிய குற்றவியல் சட்டங்களை எதிர்த்து வழக்கறிஞர்களின் ஒரு பிரிவு உண்ணாவிரதப் போராட்டத்திற்கு ஏற்பாடு செய்திருந்தது. அதேபோல் சட்டங்களுக்கு ஆதரவு தெரிவித்து மற்றொரு வழக்கறிஞர்கள் குழு போராட்டம் நடத்தி வருகிறது. இதில் இருதரப்பு வழக்கறிஞர்களுக்கிடையே கைகலப்பு தள்ளுமுள்ளு ஏற்பட்டது. இதனால் அங்குப் பரபரப்பு ஏற்பட்டுள்ளது.