Skip to main content

நிவாரணத்தில் அசத்திய கனிமொழி! தடைபோட்ட எடப்பாடி!   

Published on 12/04/2020 | Edited on 12/04/2020

 

ஊரடங்கு உத்தரவால் வாழ்வாதாரம் இழந்து தவிக்கும் மக்களுக்கு கொடுக்கப்பட்டுவரும் நிவாரண உதவிகளுக்கு எடப்பாடி அரசு தடை விதித்திருப்பது மக்களிடையே பெரும் அதிர்ச்சியைத் தந்திருக்கிறது. இந்த தடை உத்தரவுக்கு பின்னணியில் அரசியல் இருப்பதாக குற்றம் சாட்டுகின்றனர் திமுக உள்ளிட்ட எதிர்க்கட்சிகள்!

 

kkkk


           

கரோனா வைரஸ் பரவுதலை தடுக்க தேசிய ஊரடங்கை மத்திய அரசும், 144 தடை உத்தரவை எடப்பாடி அரசும் அமல்படுத்தியிருக்கின்றன. இதனால் மக்கள் வீட்டுக்குள்ளே முடங்கிக் கிடக்கிறார்கள். ஏழை மற்றும் நடுத்தரவர்க்கத்தினரின் வாழ்வாதாரம் பெரிதும் பாதிக்கப்பட்டிருக்கிறது. இந்த நிலையில், அவர்களுக்கான அன்றாட அத்யாவசிய பொருட்களை தமிழக அரசியல்கட்சிகளும், தன்னார்வ தொண்டு நிறுவனங்களும் ஒவ்வொரு பகுதிகளிலும் வழங்கி வருகின.  
            

இந்த நிவாரண உதவிகளுக்குத்தான் தற்போது தடைவிதித்திருக்கும் எடப்பாடி அரசு, ’’ நிவாரண உதவிப் பொருட்களை வழங்கும் சேவையிலிருந்து அரசியல்கட்சிகளும் தொண்டு நிறுவனங்களும் விலகிக்கொள்ள வேண்டும். நிவாரணப் பொருட்களை மாவட்ட ஆட்சியர் மற்றும் உள்ளாட்சி அலுவலர்களிடம் கொடுக்க வேண்டும். இதனை மீறுபவர்கள் மீது ஊரடங்கு சட்டத்தை மீறியதாக நடவடிக்கை எடுக்கப்படும் ‘’ என உத்தரவு பிறப்பித்துள்ளது.  
             

இந்த தடை உத்தரவு, நிவாரண உதவி வழங்கி வரும் அரசியல் கட்சிகளிடத்திலும் மக்களிடமும் கடும் அதிர்ச்சியை ஏற்படுத்தியிருக்கிறது. இது குறித்து நம்மிடம் பேசிய திமுக மா.செ.க்கள், ‘’ கரோனா வைரசை தடுப்பதற்காக தனது தொகுதி மேம்பாட்டு நிதியிலிருந்து நிதி ஒதுக்கிய கையோடு, தனது தூத்துக்குடி தொகுதிக்குள் களமிறங்கினார் திமுக எம்.பி. கனிமொழி. அரசு மருத்துவமனைக்கு சென்று பாதிக்கப்பட்டவர்களின் நிலை குறித்து விசாரித்த அவர், டாக்டர்களுக்கும் செவிலியர்களுக்கும் தூய்மை பணியாளர்களுக்கும் தேவையான கரோனா தடுப்பு கவசங்கள், சானிடைஷர்கள், கவச உடைகள் உள்ளிட்ட அனைத்து விதமான மருத்துவ உதவிகளையும் செய்தார். 
                 

இதனையடுத்து, பசியால் யாரும் உயிரிழந்து விடக்கூடாது என திட்டமிட்டு, தொகுதி முழுவதுமுள்ள தூய்மைப் பணியாளர்கள் மற்றும் மருத்துவ பணியாளர்களின் குடும்பங்களுக்கும், அமைப்புச்சார தொழிலாளர் குடும்பங்களுக்கும் தேவையான அத்யாவசிய பொருட்கள் அனைத்தும் வழங்கினார் கனிமொழி. இதற்காக, தொகுதிக்குள்ளே 7 நாட்கள் தங்கியிருந்தார். தொகுத்திக்குள்ளேயே தங்கியிருந்த கனிமொழியை தொடர்புகொண்ட அரசு டாக்டர்கள்,  தங்களுக்கு பாதுகாப்பு கவச உடைகள் இல்லை என்பதையும், 100 ஆடைகள் கொடுத்து உதவ முடியுமா? என்றும் கோரிக்கை வைத்தனர். அவசரம் அவசரமாக  175 ஆடைகளை ஏற்பாடு செய்து உடனே அரசு மருத்துவர்களுக்கு அனுப்பி வைத்தார் கனிமொழி.   
         

கனிமொழியின் வேகம், திமுகவில் சுறுசுறுப்பை ஏற்படுத்தியது. திமுக தலைவர் மு.க.ஸ்டாலின் உள்பட திமுக எம்.பி.க்கள், எம்.எல்.ஏ.க்கள், மா.செ.க்கள் தொடங்கி திமுகவின் அனைத்து நிர்வாகிகளும் தங்களது மாவட்டத்திலும் தொகுதிக்குள்ளும் களமிறங்கினார்கள். வாழ்வாதாரம் இழந்து தவிக்கும் மக்களுக்கான நிவாரண உதவிகளை வழங்கினர். 
 

eps


                

திமுகவின் வேகம் கண்டு தன்னார்வ தொண்டு நிறுவனங்களும் களமிறங்கின. ஆனால், ஆளும் கட்சியில் அமைச்சர்கள் சிலரைத் தவிர பெரும்பாலும் முடங்கியே கிடந்தனர். இதனால், நெருக்கடியான இந்த சூழலில் திமுகவின் பணிகள் மக்களிடம் நன்மதிப்பை பெற்றதுமல்லாமல், ஆளும் கட்சிக்கு எதிரான விமர்சனங்களையும் உருவாக்கியது. இதனை ஜீரணிக்க முடியாமல்தான் நிவாரண உதவிகளுக்கு தடை விதித்திருக்கிறது எடப்பாடி அரசு. கூட்டம் சேர்க்காமல் சமூக இடைவெளியை பின்பற்றியும் ஊரடங்கு சட்டத்திற்குட்பட்டும்தான் நிவாரணம் வழங்கி வருகிறோம். மக்களை வீட்டுக்குள் முடக்கி வைத்துவிட்டு அரசாங்கமே எல்லாம் செய்து விடலாம் என நினைத்தால் அது முடியாது. அனைத்து தரப்பு மக்களின் அடிப்படைத் தேவைகளை அரசாங்கத்தால் நிறைவேற்றிட முடியாதுங்கிறதுதான் எதார்த்தம். 
 

இன்றைக்கு பல ஆயிரம் மக்களுக்கு ரேசன் அட்டை கிடையாது. அவர்களுக்கு எப்படி அரசின் நிவாரண உதவி கிடைக்கும் ? அனைத்து ரேசன் அட்டைதாரர்களுக்கும் அரசின் நிவாரண உதவி கொடுக்கப்படும் என எடப்பாடி அரசு அறிவிக்கிறது. ஆனால், சர்க்கரை அட்டைத்தாரர்களுக்கு நிவாரண உதவி இல்லை என பல மாவட்டங்களில் ரேசன் கடைக்காரர்கள் மறுத்திருக்கிறார்கள். இப்படிப்பட்ட நிலையில், எல்லாத்தையும் அரசாங்கமே பார்த்துக்கும் என்றால் எப்படி ? உதவி செய்பவர்கள், சமூக இடைவெளியை கடைப்பிடிக்க வேண்டும் ; கூட்டம் சேர்க்கக் கூடாது என அரசாங்கம் கட்டளையிட்டு அதனை ஒருங்கிணைக்க முன் முயற்சி எடுத்தால் அது ஆரோக்கியமானதாக  இருக்கும். அரசியல்கட்சிகள், தன்னர்வர்கள் என பலரும் உதவி செய்ய களமிறங்கினால்தான் வாழ்வாதாரங்களை இழந்துள்ள மக்களை காப்பாற்ற முடியும். . இதனைவிடுத்து, நிவாரண உதவிகளுக்கு தடை விதிப்பதும், நாடு எதிர்கொண்டிருக்கும் ஒரு பிரச்சனையில் ஆளும் வர்க்கம் அரசியல் செய்யத் துடிப்பதும் மக்களை வஞ்சிக்கும் செயல் ! ‘’ என்கிறார்கள் ஆவேசமாக.
 


 

Next Story

'திமுக ஆட்சிபோல் மத்தியிலும் வரவேண்டும்' - தீவிர பரப்புரையில் கனிமொழி

Published on 05/04/2024 | Edited on 05/04/2024
'DMK must come to the center as a government' - Kanimozhi in intense lobbying

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாக தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

தூத்துக்குடியில் போட்டியிடும் கனிமொழி, அங்குள்ள பசுவந்தனை பகுதியில் தேர்தல் பிரச்சாரத்தில் ஈடுபட்டார். அப்போது பேசிய அவர், ''பெரும்பான்மையான இந்து மக்களை ஏமாற்றி நாங்கள் தான் உங்களுக்கு எல்லா உதவியும் செய்வோம் என்று சொல்கிறார்களே தவிர, அந்த மக்களுக்கு வேலை கூட கிடைப்பதில்லை. 2 கோடி இளைஞர்களுக்கு வேலை வாங்கித் தருகிறேன் என்று சொல்லி மோடி ஆட்சிக்கு வந்தார். போய் கேட்டால் பக்கோடா போடுங்க அதுவும் வேலை தான் என்கிறார். இப்படிப்பட்ட ஆட்சி முடிவுக்கு கொண்டு வரப்பட வேண்டும். எல்லா மக்களையும் அரவணைத்து நடக்கக்கூடிய ஆட்சி நம்முடைய திராவிட முன்னேற்றக் கழக ஆட்சி. அதே போன்ற ஒரு ஆட்சியை ஒன்றியத்தில் உருவாக வேண்டும்.

இந்தியா கூட்டணி ஆட்சி என்ற ஒன்றுதான் இந்த நாட்டின் மக்களை பாதுகாக்கும் என்பதை நாம் புரிந்து கொள்ள வேண்டும். அப்படி பாதுகாக்கக் கூடிய ஆட்சியை நாம் அங்கே உருவாக்க வேண்டும். நம்முடைய ஆட்சி ஒன்றியத்தில் வந்தவுடன் கேஸ் சிலிண்டர் விலை 500 ரூபாய். அதேபோல பெட்ரோல் 75 ரூபாய்க்கு வழங்கப்படும். அதேபோல் டீசல் 65 ரூபாய்க்கு வழங்கப்படும். விவசாயக் கடன்,கல்விக் கடன் ரத்து செய்யப்படும். டோல்கேட் எல்லாம் அகற்றப்படும். இதெல்லாம் நம்முடைய முதலமைச்சர் தந்திருக்கும் வாக்குறுதி. இவற்றையெல்லாம் நிறைவேற்ற வேண்டுமென்றால் நீங்கள் என்ன செய்ய வேண்டும் ஓட்டு போட வேண்டும். வெயிலாக இருக்கிறது என வீட்டில் உட்கார்ந்து இருக்கக் கூடாது. நம்முடைய ஜனநாயக கடமையாக ஓட்டு போட வேண்டும். அதேபோல் தூத்துக்குடியில் உங்களுக்காக மீண்டும் பணியாற்றக்கூடிய வாய்ப்பை எனக்கு நீங்கள் அளிக்க வேண்டும்''என்றார்.

Next Story

தேர்தலுக்குப்பின் சும்மா இருப்பார் மோடி! தமிழாசிரியரை அனுப்பிவைப்பார் ஸ்டாலின்!-விருதுநகரில் கனிமொழி எம்.பி.

Published on 04/04/2024 | Edited on 04/04/2024
Modi will be idle after the election! Stalin will send a Tamil writer!- Kanimozhi MP in Virudhunagar

விருதுநகர் தொகுதியின்  இந்தியா கூட்டணி காங்கிரஸ் வேட்பாளர் மாணிக்கம்தாகூரை ஆதரித்து விருதுநகரில் திமுக துணைப் பொதுச்செயலாளர்  கனிமொழி எம்.பி. பேசினார். நாடாளுமன்ற உறுப்பினர் மாணிக்கம் தாகூர், மக்கள் பிரச்சனையை முன்னிறுத்தி கேள்வி எழுப்பினார் என்பதற்காக, எத்தனை தடவை இடைநீக்கம் செய்யப்பட்டார் என்பதற்குக் கணக்கே கிடையாது. அதானி - மோடி தொடர்பு குறித்து தொடர்ந்து கேள்வி எழுப்பியதன் காரணமாக  ராகுல் காந்தியை  இடைநீக்கம் செய்தனர்.  மதத்தால் மக்கள் மத்தியில் பிரிவினைவாதத்தை ஏற்படுத்தி, இந்தியாவை  பிளவுப்படுத்திப்  பார்க்க  நினைக்கிறது பாஜக. தமிழ்நாடு என்றாலே பாஜகவுக்குப்  பிடிக்காது. நம்மிடம் இருந்து மொத்தமாகச் சுருட்டிச் சென்றுள்ளனர்.

இங்கு ஆளுநர் ஒருவர் இருக்கிறார்.  அவர்  பாஜகவுக்கு  ஒரு படி மேல். விருதுநகர் மாவட்டத்தைச் சேர்ந்த  சங்கரலிங்கனார்,  தமிழ்நாடு என்று பெயர் வைக்க வேண்டும் என்று 75 நாட்கள் உண்ணாவிரதப் போராட்டம் நடத்தி உயிரிழந்தார். திமுக  ஆட்சி பொறுப்பேற்றதும், தமிழ்நாடு என்று பெயர் வைக்கப்பட்டது. இந்த ஆளுநர்  யார், நம் மாநிலத்திற்கு தமிழகம் என்று பெயர் வைப்பதற்கு? இவர் அதிகாரியாக இருந்தவராம். இன்னொரு அதிகாரி வேறு  இருக்கிறார். அவர் கர்நாடகாவில் பணியில் இருந்தபோது என்னைத் தமிழன் என்று சொல்லாதீர்கள். நான் இறுதிவரை கர்நாடியன் என்று கூறினார். அப்படிச் சொன்னவர் கோவை தொகுதியில் நிற்கிறார். கர்நாடகாவில் எங்காவது நிற்க வேண்டியதுதானே? அதிகாரிகளை எல்லாம் அரசியல் செய்வதற்கு  தமிழ்நாட்டிற்கு அனுப்பிவைத்துள்ளது பாஜக.

மாணிக்கம் தாகூருக்கு ஹிந்தி தெரியும். எனக்குத் தெரியாது. நான்  தமிழில்  கேள்வி கேட்டால், ஹிந்தியில் பதில் வரும்.  நான் யாரைத் தேடிச் சென்று கேட்பது? நாங்கள் மக்கள் பிரச்சனையைத்தானே பேசுகிறோம். எனக்குப் புரியாத மொழியில் பதில் கொடுத்தால் அது இந்தித் திணிப்பு இல்லையா? இதுதான் இந்த நாட்டின் மொழி என்று  இந்தியைத்  திணித்துக்கொண்டிருந்தீர்கள். தேர்தல் வந்தவுடன்  திடீரென்று  தமிழ் மீது பிரதமருக்குப்  பற்று வந்துவிட்டது. பற்று வந்தவுடன் நான் தமிழனாகப் பிறக்கவில்லையே. தமிழ் படிக்கவில்லையே,  தெரியவில்லையே, தமிழ் பேசத் தெரியவில்லையே,  எழுதத் தெரியவில்லையே என்று கூறுகிறார்.

ஒன்றும் கஷ்டம் இல்லை. தேர்தலுக்குப் பிறகு பிரதமர் மோடி ஃப்ரீயாகத்தானே இருப்பார். அப்போது தமிழ்நாடு முதல்வர் அவருக்கு  நல்ல தமிழ் ஆசிரியரை அனுப்பிவைத்து தமிழ் கற்றுக் கொடுப்பார்.  தமிழ் கற்றுக்கொண்ட பிறகாவது,  தமிழர்களின் தமிழ் நாட்டு மக்களின் உணர்வுகளைப்  பிரதமர் மோடி புரிந்து கொள்வாரா என்று பார்ப்போம்.  நாம் புயல்,  மழை,  வெள்ளத்தால் பாதிக்கப்பட்ட போதோ,  தேர்தலுக்கு முன்போ, எப்போதாவது பிரதமர் தமிழ்நாடு வந்திருக்கிறாரா?  ஒரு வாரத்திற்குள் தேர்தல்  என்றவுடன்,  ஐந்துக்கும் மேற்பட்ட முறை தமிழ்நாடு வந்தார்.  தற்போது  மீண்டும் தமிழ்நாடு வரவிருக்கிறாராம். அவர் எத்தனை முறை வந்தாலும் ஒரு பயனும் இல்லை.

ஏழைப் பெண்களுக்கு ஆண்டுக்கு ஒரு லட்சம் வழங்கப்படும் என்று  காங்கிரஸ் அளித்துள்ள வாக்குறுதி,  நாம் ஆட்சிப் பொறுப்பு ஏற்றவுடன் நிச்சயம் நிறைவேற்றப்படும். நம்மைப்போல், காங்கிரஸ் கட்சியும் சொன்ன வாக்குறுதிகளை நிறைவேற்றும். நாம் ஆட்சிக்கு வந்தால், சமையல் எரிவாயு விலை ரூ. 500 ஆகவும், பெட்ரோல் விலை ரூ.75 ஆகவும், டீசல் விலை ரூ.65 ஆகவும் குறைக்கப்படும்.” என்று பரப்புரை செய்தார்.