Skip to main content

கட்சியில் சேர்ந்தவுடனேயே அண்ணாமலைக்கு உயரிய பொறுப்பு ஏன்? நாராயணன் திருப்பதி பேட்டி

Published on 02/09/2020 | Edited on 02/09/2020

 

Narayanan Thirupathy

 

 

பாஜகவின் செய்தி தொடர்பாளர் நாராயணன் திருப்பதி நக்கீரன் இணையதளத்திடம் பல்வேறு கருத்துகளை பகிர்ந்து கொண்டார். 

 

பணமதிப்பிழப்பு, தவறான சரக்கு மற்றும் சேவை வரிக் கொள்கை, கரோனா பரவலைக் கட்டுப்படுத்த கொண்டுவரப்பட்ட ஊரடங்கு நடவடிக்கையை தவறாக பயன்படுத்தியது என நாட்டின் பொருளாதாரம் மூன்று செயல்களால் அழிக்கப்பட்டதாக ராகுல் காந்தி குற்றம் சாட்டியிருக்கிறாரே... 

 

ராகுல்காந்தி இப்படி விமர்சனம் செய்வது ஒன்றும் வியப்பில்லை. ஊரடங்கை உடனடியாக அமல்படுத்த வேண்டும் என்று கூறியது ராகுல்காந்திதான். ஊரடங்கை அமல்படுத்திய உடனேயே ஏன் ஊரடங்கை அமல்படுத்தினீர்கள் என்று கேட்டதும் ராகுல்காந்திதான். ஜி.எஸ்.டி., பணமதிப்பிழப்பு நடவடிக்கை குறித்து மிக தகுந்த முறையில் இதுவரை நாங்கள் கூறியிருக்கிறோம். பொருளாதார சீர்திருத்தம் மிகச் சிறப்பான முறையில் எதிர்கால சந்ததியினருக்காக, அடுத்த தலைமுறையினருக்காக உருவாக்கப்பட்ட விஷயங்கள் அக்கட்சியினருக்கு புரியவில்லை என்பதுதான் உண்மை. 

 

மத்திய அரசிடம் இருந்து வரவேண்டிய ஜி.எஸ்.டி. பகிர்வு தமிழகத்திற்கு வரவில்லை என்கிறார்களே...

ஜி.எஸ்.டி. பகிர்வை மத்திய அரசு எப்போதும் முறையாக கொடுத்திருக்கிறது. இந்தியா முழுவதும் தற்போது முடங்கி கிடக்கும் காரணத்தினால் அகில இந்திய அளவில் வருவாய் இழப்பு ஏற்பட்டிருக்கிறது. தற்போது இழப்பீடு வழங்க முடியாது என்பதினால் நிதி நிலையை சரி செய்து கொள்வதற்கு கடன் பெறுமாறு மத்திய அரசு கூறியிருக்கிறது. 

 

ஜிஎஸ்டியினால் மாநிலங்களின் வருவாய் இழப்புக்கு மத்திய அரசு இழப்பீடு வழங்காமல் கடன் பெறுவது உள்ளிட்ட மாநிலங்களுக்கு இரண்டு தெரிவுகளை வழங்கியிருப்பது ஏற்றுக்கொள்ளக் கூடியதல்ல. இது முழு துரோகம் எனத் தெரிவித்துள்ளாரே ப.சிதம்பரம்...

 

இதை சொல்பவர்கள் வேறு என்ன தீர்வு வைத்திருக்கிறார்கள். எல்லா மாநிலங்களிலும் வரி வருவாயை சீராக விதித்து அதன் மூலமாக வரும் வருவாயை வைத்து மாநிலங்களுக்கு பகிர்ந்து அளித்து, அதன் பிறகு மத்திய அரசினுடைய நிதி திட்டங்களுக்கு மாநிலங்கள் மூலமாகவே பணம் அளிப்பதுதான் முறை. மத்திய அரசு வசூலிக்கும் வரிகள் மாநிலங்களுக்குத்தான் செலவிடப்படுகிறது. தற்போது வருவாயே இல்லாத நிலையில் எப்படி செலவிட முடியும். இன்று வருவாய் இல்லாத நிலையில் நீங்கள் கடன் பெற்றுக்கொள்ளலாம் என்பதில் என்ன தவறு இருக்கிறது.

 

தமிழகத்தில் 20 சுங்கச்சாவடிகளில் கட்டணம் உயர்வுக்கு எதிர்க்கட்சிகள் கடும் கண்டனம் தெரிவித்திருக்கின்றன. கரோனாவால் பாதிக்கப்பட்டுள்ள நேரத்தில் சிரமத்தை கொடுப்பதாக எதிர்ப்பு தெரிவிக்கிறார்களே... 

 

தமிழகத்தில் 20 சுங்கச்சாவடிகளில் செப்டம்பர் 1ஆம் தேதியும், மீதியுள்ள சுங்கச்சாவடிகளில் ஏப்ரல் மாதத்திலேயும் கட்டணம் வருடா வருடம் விலை உயரும். இதற்கு காரணம், மத்தியில் திமுக அங்கம் வகித்த காங்கிரஸ் ஆட்சியில் ஏற்படுத்தப்பட்ட ஒப்பந்தம்தான். மத்தியில் வாஜ்பாய் தலைமையிலான பாஜக ஆட்சி இருந்தபோது அரசே என்பது சதவீத சாலைகளை போட்டது. அதன்பிறகு வந்த காங்கிரஸ் அரசு, தனியாரிடம் சாலை பணிகளுக்கான ஒப்பந்தங்களை செய்து கொண்டது. அதற்கான தொகையை 20 வருடம், 25 வருடத்தில் எடுத்துக்கொள்ளலாம் என ஒப்பந்தம் போட்டது. அவர்கள் போட்ட ஒப்பந்தத்தின்படிதான் இன்று நடக்கிறது. கட்டண உயர்வு என்று யார் எதிர்ப்பு தெரிவிக்கிறார்கள் என்றால், அன்று இந்த ஒப்பந்தங்களை வாரி வழங்கியவர்கள்தான் எதிர்ப்பு தெரிவிக்கிறார்கள். வேண்டுமென்றே திட்டமிட்டு பரப்புகிறார்கள். 

 

கரோனா முடிந்து இயல்பு நிலை திரும்புகிற வரை அனைத்து வகையான கடன் வசூலையும் ஒத்திவைக்க வேண்டும். மேலும் இக்காலத்திற்கான வட்டித்தொகையினையும் ரத்து செய்ய வேண்டும் என்று மத்திய அரசுக்கு பல்வேறு தரப்பில் இருந்து கோரிக்கை வைக்கப்படுகிறதே... 

 

இதுதொடர்பான வழக்கில் மத்திய அரசு ஒரு நிலைப்பாட்டை எடுத்திருக்கிறது. ரிசர்வ் வங்கி இரண்டு வருடங்கள் வரை கொடுக்கலாம் என்று விதிகளில் இருப்பதாக சொல்லியிருக்கிறது. மத்திய அமைச்சர் நிர்மலா சீதாராமன் இதுதொடர்பாக வங்கி இயக்குநர்களிடம் விரைவில் பேச இருக்கிறார். உறுதியாக இந்த விஷயத்தில் முடிவு எட்டப்படும். 

 

பல வருடங்களாக கட்சியில் இருப்பவர்களுக்கு, மாற்று கட்சியில் இருந்து வந்தவர்களுக்கு உயரிய பொறுப்புகள் கிடைக்கவில்லை. கட்சியில் சேர்ந்த உடனேயே அண்ணாமலைக்கு துணை தலைவர் பொறுப்பு கொடுக்கப்பட்டிருப்பதாக விமர்சனம் வைக்கப்படுகிறதே... 

 

இது முழுக்க முழுக்க எங்கள் கட்சி சார்ந்த விவகாரம். அண்ணாமலை நேர்மையான அதிகாரி என பெயர் எடுத்தவர். இளைஞர்களுக்கு எடுத்துக்காட்டாக விளங்குவார். தமிழகத்தில் 40 விழுக்காடுக்கு மேல் எங்கள் கட்சியில் இளைஞர்கள் இருக்கிறார்கள். அவர்களை வழிநடத்துவதற்கு அவர் ஒரு சரியான நபராக இருப்பார் என்பதால் அவருக்கு ஒரு பொறுப்பு கொடுக்கப்பட்டிருக்கிறது. இதில் என்ன தவறு இருக்கிறது. எங்கள் கட்சியில் ஒவ்வொருவருக்கும் ஒவ்வொரு விதமான பணிகள் இருக்கிறது. அந்த வகையில் அண்ணாமலைக்கு பொறுப்பு வழங்கப்பட்டுள்ளது. இதனால் எங்கள் கட்சிக்குள் எந்த கருத்து வேறுபாடும் இல்லை. 

 

 

 

Next Story

“ஸ்மிருதி இராணியை இழிவுபடுத்த வேண்டாம்” - ராகுல் காந்தி வேண்டுகோள்

Published on 12/07/2024 | Edited on 12/07/2024
Rahul Gandhi said that Don't insult Smriti Irani

கடந்த 2019 நாடாளுமன்றத்  தேர்தலில் காங்கிரஸ் தலைவர் ராகுல் காந்தியை அவரது குடும்பத் தொகுதியான அமேதியில் பாஜக வேட்பாளர் ஸ்மிருதி இராணி தோற்கடித்தார். அதேபோன்று இந்த முறையும் ராகுல் காந்தியை அமேதி தொகுதியில் தோற்கடிப்பேன் என்று ஸ்மிருதி இராணி சவால் விடுத்தார். ஆனால் கடைசி நேரத்தில் ராகுல் காந்தி அமேதி தொகுதியில் போட்டியிடாமல், காந்தி குடும்பத்தின் பாரம்பரிய தொகுதியான ரேபரேலி தொகுதியில் போட்டியிட்டு வெற்றியும் பெற்றார். 

அதே சமயம் அமேதியில் ஸ்மிருதி இராணியை எதிர்த்து ராகுல் காந்தி குடும்பத்தின் நம்பிக்கைக்குரிய நபரான கிஷோரி லால் சர்மாவைக் காங்கிரஸ் நிறுத்தியது. பின்னர் 2 லட்சம் வாக்குகள் வித்தியாசத்தில் ஸ்மிருதி இராணியைத் தோற்கடித்து கிஷோரி லால் சர்மா அமோக வெற்றிபெற்றார். இதனைத் தொடர்ந்து தோல்வியை ஒப்புக்கொண்ட ஸ்மிருதி இராணி, தொடர்ந்து அமேதி தொகுதி மக்களுக்காக பணியாற்றுவேன் என்று தெரிவித்தார். இதனைத் தொடர்ந்து, காங்கிரஸ் கட்சியினர் ஸ்மிருதி இராணிக்கு எதிராக சமூக வலைத்தளங்களில் கருத்து தெரிவித்து கடுமையான விமர்சனங்களை முன்வைத்து வருகின்றனர். 

இந்த நிலையில் ஸ்மிருதி இராணியை இழிவுபடுத்த வேண்டாம் என நாடாளுமன்ற எதிர்க்கட்சி தலைவர் காங்கிரஸ் எம்.பி ராகுல் காந்தி கேட்டுக்கொண்டுள்ளார். இது தொடர்பாக அவர் வெளியிட்டுள்ள சமூக வலைத்தள பக்கத்தில், “வாழ்க்கையில் வெற்றியும் தோல்வியும் சகஜம். அதனால் அந்த விஷயத்தில் ஸ்மிருதி இராணி அல்லது வேறு எந்தத் தலைவர்களையும், இழிவான வார்த்தைகளைப் பயன்படுத்துவதையும், கேவலமாக நடந்து கொள்வதையும் தவிர்க்குமாறு அனைவரையும் கேட்டுக்கொள்கிறேன். மக்களை அவமானப்படுத்துவதும் அவமதிப்பதும் பலவீனத்தின் அடையாளம், வலிமை அல்ல” எனக் குறிப்பிட்டுள்ளார். 

Next Story

‘ஜூன் 25 அரசியல் சாசன படுகொலை தினம்’ - மத்திய அரசு அறிவிப்பு

Published on 12/07/2024 | Edited on 12/07/2024
central govt said June 25 to be observed as Constitution black Day

1971 ஆம் ஆண்டு நடந்த இந்திய நாடாளுமன்றத் தேர்தலில் காங்கிரஸ் கட்சி 352 தொகுதிகளையும், கம்யூனிஸ்ட்கள் 48 தொகுதிகளையும், ஜனசங்கம் 22 தொகுதிகளையும், காமராஜர் தலைமையிலான ஸ்தாபன காங்கிரஸ் 16 தொகுதிகளையும் கைப்பற்றியது. உத்தரப்பிரதேச மாநிலம் ரேபரேலி தொகுதியில் அப்போதைய பிரதமர் இந்திரா காந்தி போட்டியிட்டார். அவரை எதிர்த்து சோசலிஸ்ட் கட்சியின் தலைவர் ராஜ் நாராயணன் போட்டியிட்டார். இதில் ராஜ் நாராயனணை தோற்கடித்து ரேபரேலி தொகுதியில் இந்திரா காந்தி வெற்றிபெற்றார்.

இந்த நிலையில், இந்திராகாந்தியின் வெற்றியை எதிர்த்து ராஜ் நாராயணன் அலகாபாத் உயர்நீதிமன்றத்தில் மனு தாக்கல் செய்தார். இந்த வழக்கில் இந்திராகாந்தியின் வெற்றி செல்லாது என்று கடந்த 1975 ஆம் ஆண்டு ஜூன்12 ஆம் தேதி அலகாபாத் நீதிமன்றம் தீர்ப்பளித்தது.  நீதிபதி ஜக்மோகன்லால் சின்ஹ தேர்தலில் வெற்றிபெற இந்திராகாந்தி பல்வேறு முறைகேடுகளில் ஈட்டுப்பட்டுள்ளார். அதனால் அவரது வெற்றி செல்லாது என்று தீர்ப்பளித்தார். மேலும், தேர்தல் முறைகேடுகளில் ஈடுபட்டதால் அடுத்த 6 ஆண்டுகளுக்குத் தேர்தலில் இந்திராகாந்தி போட்டியிட முடியாது என்றும் உத்தரவிட்டார். 

நாடு முழுவதும் பெரும் கொந்தளிப்பை இந்த தீர்ப்பு ஏற்படுத்திய நிலையில், அலகாபாத் நீதிமன்ற தீர்ப்பை எதிர்த்து உச்சநீதிமன்றத்தில் மனுத் தாக்கல் செய்தார் இந்திராகாந்தி. ஆனால் 1975 ஆம் ஆண்டு ஜூன் 24 ஆம் ஆண்டு அப்போதைய உச்சநீதிமன்ற நீதிபதி, கிருஷ்ண ஐயர் இந்திராகாந்தி மனுவைத் தள்ளுபடி செய்து அலகாபாத் உயர்நீதிமன்றம் வழங்கிய தீர்ப்பை உறுதி செய்தார். இதனால் இந்திராகாந்திக்கு நெருக்கடி அதிகரித்து, கட்டாயம் பதவி விலகி ஆக வேண்டிய சூழல் உருவானது.

இந்த சூழலில் 1975 ஆம் ஆண்டு ஜூன் 25 ஆம் தேதி நள்ளிரவில் இந்தியாவில் அவசரநிலை சட்டத்தை அப்போதைய பிரதமர் இந்திராகாந்தி அமல்படுத்தினார். இந்தியாவில் முதல்முறையாக எமர்ஜென்சி அமல்படுத்தப்பட்டது. நாடுமுழுவதும் எதிர்க்கட்சிகள் கடும் நடவடிக்கைகளுக்கு உள்ளாகினர். எதிர்க்கட்சி தலைவர்கள் மீசா சட்டத்தின் கீழ் கைது செய்யப்பட்டுச் சிறைப்படுத்தப்பட்டு சித்ரவதைகள் செய்யப்பட்டனர். பத்திரிக்கைகள் தனிக்கை செய்யப்பட்டது. இதனால் மக்கள், அரசியல் கட்சியினர் கடுமையாகப் பாதிக்கப்பட்டனர். பலரும் உயிரிழந்தனர். இதனைத் தொடர்ந்து, இரண்டு ஆண்டுகள் கழித்து 1977-ம் ஆண்டு மார்ச் 21-ந் தேதி இந்தியாவில் அவசர நிலை பிரகடனம் திரும்பப் பெறப்பட்டது. பிற்காலங்கள் நாட்டில் எமர்ஜென்சி அமல்படுத்தியதற்காக மக்களிடம் இந்திராகாந்தி மன்னிப்பு கேட்டதாக  கூறப்படுகிறது. இன்றளவும் எமர்ஜென்சி கலத்தை இந்தியா நாட்டின் கருப்பு தினமாகப் பலராலும் விமர்சிக்கப்படுகிறது.

மத்தியில் ஆளும் பாஜக காங்கிரசுக்கு எதிராக எமர்ஜென்சி காலத்தையே முன்வைத்து மக்களிடம் பிரச்சாரம் செய்துவருகிறது. இந்த நிலையில்தான், ஜூன் 25 ஆம் தேதி அரசியல் சாசன படுகொலை தினமாக கடைப்பிடிக்கப்படும் என மத்திய அரசு அறிவித்துள்ளது. அவசர நிலையால் பாதிக்கப்பட்டோருக்கு ஒவ்வொரு ஆண்டும் ஜூன் 25 ஆம் தேதி அஞ்சலி செலுத்தப்படும் என்று தெரிவிக்கப்பட்டுள்ளது.