Skip to main content

கலைஞர் இல்லையென்றால் தமிழிசை டாக்டர் ஆகியிருப்பாரா? - ஆண்டாள் பிரியதர்ஷினி! 

Published on 08/09/2023 | Edited on 08/09/2023

 

Andal Priyadarshini Interview

 

உதயநிதியின் சனாதனம் குறித்த பேச்சு உள்ளிட்ட பல்வேறு விஷயங்கள் பற்றி தன்னுடைய கருத்துக்களை ஆண்டாள் பிரியதர்ஷினி எடுத்துரைக்கிறார்

 

தம்பி உதயநிதி பேசியது முற்றிலும் சரி. சனாதனத்தை அழிக்கவே முடியாது என்று அவர்கள் சொல்கிறார்கள். பிறகு எதற்காக உதயநிதியின் பேச்சுக்கு பயப்படுகிறார்கள்? அவர்களே அவர்களுடைய கருத்துக்கு மாறாக நடந்துகொள்கிறார்கள். டெங்கு, மலேரியா போல் ஒழிக்க வேண்டியது சனாதனம் என்றார் உதயநிதி. போலியோ ஒழிப்பில் நாம் வெற்றிகரமாக ஈடுபட்டோம். மனதில் நோயை உருவாக்குவது சனாதனம். கொடுமையான ஒரு நோய் அது. அதற்கான மருந்து நம்முடைய திராவிட தர்மம் தான். அதை உதயநிதி மிகச்சரியாகவே பேசியிருக்கிறார்.

 

உதயநிதியுடன் நாம் அனைவரும் நிற்கிறோம். அவருடைய பேச்சை எதிர்ப்பவர்கள் யாருக்கும் சனாதனம் என்றால் என்னவென்று புரியவில்லை. இந்தியாவில் சிறுபான்மையினருக்கு பாதுகாப்பில்லை என்று உலக நாடுகள் எல்லாம் பேச ஆரம்பித்துவிட்டன. தங்களுக்கு எதிராக எழுந்துள்ள எதிர்ப்பை மறைப்பதற்காகத்தான் திசைதிருப்பும் வேலைகளை பாஜகவினர் செய்துவருகின்றனர். சனாதனத்துக்கு ஆதரவாக தமிழிசை பேசுகிறார். திராவிட சித்தாந்தம் இங்கு இல்லையென்றால் தமிழிசை பள்ளிக்கு சென்றிருக்க முடியாது. 

 

தமிழுக்காக தொண்டு செய்தவர்களின் குழந்தைகளுக்கு மருத்துவ படிப்பில் இடஒதுக்கீடு உண்டு என்று கலைஞர் கொண்டுவந்த திட்டத்தால் தான் தமிழிசைக்கு மருத்துவக் கல்லூரியில் சீட் கிடைத்தது. இது உண்மையல்ல என்று தமிழிசை சொல்லட்டும். சனாதனிகள் யாரையும் படிக்க விடவில்லை. கலைஞர் பள்ளிகள் கட்டி, கல்லூரிகள் கட்டி, இடஒதுக்கீடு வழங்கி அனைவரையும் படிக்க வைத்தார். தமிழிசை, அண்ணாமலை உள்ளிட்டோர் எல்லாம் திராவிட திட்டங்களால் பயன்பெற்றவர்கள். புதிய நாடாளுமன்ற திறப்பு விழாவுக்கு குடியரசுத் தலைவரையே இவர்கள் அழைக்கவில்லை. அதையும் தீட்டு என இவர்கள் நினைத்தனர். 

 

வாக்கு வங்கிக்காக பேச வேண்டிய அவசியம் எங்களுக்கு எப்போதுமே இல்லை. இந்த நாட்டில் பெண்கள் மார்பை மறைக்கும் உரிமையைக் கூட போராடித்தான் பெற முடிந்தது. தேவதாசி என்கிற முறையை வைத்து பெண்களை அடிமைப்படுத்தினார்கள். கணவனோடு சேர்ந்து மனைவியும் இறக்க வேண்டும் என்றனர். முத்துலெட்சுமி ரெட்டி படிக்கக்கூடாது என்று போராடினார்கள். இதெல்லாம் தான் ஒழுக்கமான வாழ்வியல் முறையா? இவர்களுடைய கொள்கைகள் அனைத்தும் மனுதர்மத்தில் இருக்கிறது. இளைய தலைமுறையின் தலைவராக உதயநிதி இன்று உருவாகி நிற்கிறார். அந்த அச்சம் தான் பாஜகவுக்கு அதிகம் இருக்கிறது.

 

 

 

 

 

 

Next Story

விளையாட்டு வீராங்கனைகளுக்குக் காசோலைகளை வழங்கிய அமைச்சர் உதயநிதி!

Published on 11/07/2024 | Edited on 12/07/2024
Minister Udhayanidhi gave checks to sport swomen

அமெரிக்காவின் கலிபோர்னியா நகரில் நவம்பர் 10 முதல் 17 வரை உலக கேரம் போட்டி நடைபெற உள்ளது. இதில் தமிழ்நாட்டின் சார்பில் கே.நாகஜோதி, எம்.காசிமா, வி.மித்ரா என மூன்று கேரம் விளையாட்டு வீராங்கனைகள் பங்கேற்க உள்ளனர். இந்நிலையில் இந்தப் போட்டியில் பங்கேற்க உள்ள 3 விளையாட்டு வீராங்கனைகளுக்கும், பயிற்றுநர் மரியா இருதயத்திற்கும் செலவீனத் தொகையாக தலா ரூ.1.50 லட்சத்திற்கான காசோலைகளை தமிழ்நாடு சாம்பியன்ஸ் அறக்கட்டளை நிதியிலிருந்து தமிழக இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின் வழங்கினார்.

மேலும் நியூசிலாந்தில் ஜூலை 16 முதல் 19 வரை நடைபெற உள்ள ஜூனியர் காமன்வெல்த் வாள்வீச்சு சாம்பியன்ஷிப் போட்டியில் பங்கேற்கவுள்ள ஜாய்ஸ் அஷிதாவுக்கு செலவீனத் தொகையாக ரூ.2.00 லட்சத்திற்கான காசோலைகளை வழங்கினார். இந்நிகழ்ச்சியில், இளைஞர் நலன் மற்றும் விளையாட்டு மேம்பாட்டுத் துறை கூடுதல் தலைமைச் செயலாளர் அதுல்ய மிஸ்ரா, தமிழ்நாடு விளையாட்டு மேம்பாட்டு ஆணைய உறுப்பினர் செயலர் ஜெ.மேகநாத ரெட்டி, மற்றும் அரசு உயர் அலுவலர்கள் பலர் கலந்து கொண்டனர்.

இது தொடர்பாக அமைச்சர் உதயநிதி ஸ்டாலின் தனது எக்ஸ் சமூக வலைத்தளத்தில் வெளியிட்டுள்ள பதிவில், “விளையாட்டு வீரர்கள் சாதிக்க, வறுமை தடையாகக் கூடாது என்பதே முதலமைச்சர் மு.க.ஸ்டாலின் தலைமையிலான திராவிட மாடல் அரசின் நோக்கம். அந்தத் தடையை நீக்க, தொடங்கப்பட்டதே தமிழ்நாடு சாம்பியன்ஸ் அறக்கட்டளை. தமிழ்நாடு சாம்பியன்ஸ் அறக்கட்டளை மூலம் பிறருக்கு உதவவும், உதவிகளைப் பெறவும் இந்த இணைப்பில் சென்று தகவல்களை அறியலாம்: https://tnchampions.sdat.in/home” எனத் தெரிவித்துள்ளார்.  

Next Story

விக்கிரவாண்டி இடைத் தேர்தலுக்கான பரப்புரை ஓய்ந்தது!

Published on 08/07/2024 | Edited on 08/07/2024
Campaigning for the Vikravandi by-election is over

கடந்த 2021ஆம் ஆண்டு நடைபெற்ற சட்டமன்ற தேர்தலில் விழுப்புரம் மாவட்டத்தில் உள்ள விக்கிரவாண்டி சட்டமன்றத் தொகுதியில் தி.மு.க சார்பில் போட்டியிட்டு வெற்றி பெற்றவர் புகழேந்தி. இவர் கடந்த ஏப்ரல் 6 ஆம் தேதி (06.04.2024) உடல்நலக் குறைவால் காலமானார். இவர் மறைந்ததைத் தொடர்ந்து விக்கிரவாண்டி சட்டமன்றத் தொகுதிக்கு ஜூலை 10 ஆம் தேதி இடைத்தேர்தல் நடைபெறும் எனத் தேர்தல் ஆணையம் அறிவித்திருந்தது. இதற்கான வேட்புமனுத் தாக்கல் கடந்த ஜூன் 14ஆம் தேதி தொடங்கியது. இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா, பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியில் உள்ளனர். இதன்  மூலம் இந்த இடைத்தேர்தலில் திமுக, பாமக நாதக உள்ளிட்ட 11 கட்சிகளின் வேட்பாளர்கள், 18 சுயேட்சை என மொத்தம் 29 பேர் களத்தில் உள்ளனர்.

அதே சமயம் அதிமுக, தேமுதிக ஆகிய இருகட்சிகளும் இந்த இடைத்தேர்தலைப் புறக்கணிக்கிறது எனத் தெரிவிக்கப்பட்டிருந்தது. மேலும் தவெக தலைவரும், நடிகருமான விஜய் விக்கிரவாண்டி இடைத்தேர்தலில் தமிழக வெற்றிக் கழகம் போட்டியிடாது என்றும், எந்தக் கட்சிக்கும் ஆதரவு இல்லை என்றும் தெரிவித்திருந்தார். இந்த தேர்தலில் மும்முனை போட்டி நிலவுகிறது. இதனால் அரசியல் கட்சியினர் தீவிர வாக்கு சேகரிப்பில் ஈடுபட்டு வந்தனர். அந்த வகையில் இன்று விக்கிரவாண்டியில் அமைச்சர் உதயநிதி ஸ்டாலின், விக்கிரவாண்டி அடுத்த கெடார் கிராமத்தில் பாமக தலைவர் அன்புமணி ராமதாஸ், ஒரத்தூர் பொதுக்கூட்டத்தில் நாதக கட்சியின் தலைமை ஒருங்கிணைப்பாளர் சீமான் ஆகியோர் அக்கட்சியின் வேட்பாளர்களை ஆதரித்து இறுதிக்கட்டமாக தீவிர வாக்கு சேகரிப்பில் ஈடுபட்டு பிரசாரம் செய்தனர்.

இந்நிலையில் விக்கிரவாண்டி இடைத்தேர்லில் நாளை மறுதினம் (10.07.2024) வாக்குப்பதிவு நடக்க உள்ள நிலையில் தேர்தலுக்கான பரப்புரை இன்று (08.07.2024) மாலை 6 மணியுடன் ஓய்ந்தது. விக்கிரவாண்டியில் கடந்த 20 நாள்களாக நடைபெற்று வந்த அரசியல் கட்சியினரின் தீவிர பரப்புரை மாலை 6 மணியுடன் நிறைவடைந்தது. இதனையடுத்து தேர்தல் நடத்தை விதிப்படி மாலை 6 மணிக்கு மேல் வாக்கு சேகரிக்கவும், பரப்புரை மேற்கொள்ளவும் தடை விதிக்கப்பட்டுள்ளது. அதே சமயம் விக்கிரவாண்டியில் இருந்து வெளிமாவட்டங்களைச் சேர்ந்தோர் உடனடியாக வெளியேறவும் உத்தரவு பிறப்பிக்கப்பட்டுள்ளது. விக்கிரவாண்டியில் ஜூலை 10 இல் வாக்குப்பதிவு நடைபெற்று ஜூலை 13 ஆம் தேதி தேர்தல் முடிவுகள் அறிவிக்கப்படவுள்ளன.