Skip to main content

ஓ.பன்னீர்செல்வத்தை நீக்கித்தான் பாருங்களேன்! - வரலாற்றைப் புரட்டி விளக்கம்!

Published on 28/06/2022 | Edited on 28/06/2022

 

ADMK History repeats on OPS issue

 

முக்குலத்தோர் சமுதாய மக்கள் மற்றும் இளைஞரணியினர் என்ற பெயரில் விருதுநகர் மாவட்டம் – சாத்தூர் – ஓ.மேட்டுப்பட்டியில் ஓ.பன்னீர்செல்வத்துக்கு ஆதரவாக போஸ்டர் ஒட்டியிருந்தனர். எடப்பாடி பழனிசாமியையும், சி.வி.சண்முகத்தையும் மட்டமான அடைமொழியோடு, அந்தக் கண்டன போஸ்டரில் விமர்சித்திருந்தனர். 

 

சரி, ஓ.பன்னீர்செல்வத்தை அதிமுகவிலிருந்து பெரும்பான்மை எடப்பாடி ஆதரவாளர்களால் நீக்கிவிட முடியுமா? என்ற கேள்விக்கு, ஓ.பி.எஸ். தரப்பிலிருந்து விரிவாக விளக்கம் அளிக்கின்றனர். 

 

'நான் தான்' அதிமுக என எம்.ஜி.ஆர். மனைவி வி.என்.ஜானகியும், ஜெயலலிதாவும் பிரிந்து நடத்திய யுத்தத்தில் இரட்டை இலைச் சின்னம் 1988 இறுதியில் தேர்தல் ஆணையத்தால் முடக்கப்பட்டது. 1989 தேர்தலில் ஜானகி அம்மாள் இரட்டைப் புறாவையும், ஜெயலலிதா சேவலையும் சின்னமாகப் பெற்றனர்.  இரு அணிகளும் மோதின. ஜானகி Vs ஜெயலலிதா என்றிருந்தாலும், அது ஆர்.எம்.வீரப்பன் Vs ஜெயலலிதா என்ற யுத்தமாகவே பார்க்கப்பட்டது. அந்தத் தேர்தலில்,  27 எம்.எல்.ஏ.க்களைப் பெற்று 22.37% வாக்குகளை வென்றெடுத்தது ஜெயலலிதா அணி. ஜானகி அணியோ, 9.19% வாக்குகளையும் 2 தொகுதிகளையும் மட்டுமே பெற்றிருந்தது.

 

ADMK History repeats on OPS issue

 

அப்போது,  அதிமுகவின் 31% வாக்குகள் இரண்டாகப் பிரிந்ததால், திமுக ஆட்சிக்கு வந்தது என்று நம்பப்பட்டது. ஒரு கட்டத்தில் ஜானகி, தான் பெற்ற 9.19% வாக்குகளுக்கான அணியை அப்படியே ஜெயலலிதாவிடம் ஒப்படைத்தார். ஜெ மற்றும் ஆர்.எம்.வீரப்பன் இணைப்புக்குப் பிறகே, இரட்டை இலைச் சின்னம் மீண்டது. இதுதான் வரலாறு. 

 

இதே நிலை 2017-லும் வந்தது. சசிகலாவையும், டிடிவி தினகரனையும், அவரால் முதல்வராக்கப்பட்ட எடப்பாடி பழனிசாமி அரசுக்கு எதிராகவும், ஓபிஎஸ் கிளர்ந்தெழுந்தார். மீண்டும் அதிமுக சின்னம் முடங்கியது.

 

தான் முதல்வராக வேண்டும் என்று, காலியான ஆர்.கே.நகர் இடைத்தேர்தலில் இரட்டை இலைச் சின்னம் இல்லாமல், அதிமுக தேர்தலைச் சந்திக்க வேண்டிய நிலை வந்தது. டிடிவி அணி தொப்பியையும், ஓபிஎஸ் அணி மின்விளக்கையும் பெற்று தேர்தலில் போட்டியிட்டது. இன்று இ.பி.எஸ்ஸோடு உள்ள அனைவரும் அன்று டிடிவியோடு இருந்தார்கள். முதல்வர் இபிஎஸ் கூட டிடிவி-க்காகப் பிரச்சாரம் செய்தார். ஆனால், யாருடைய பலமும் நிரூபிக்கப்படாமல், அந்தத் தேர்தல் இடைநிறுத்தம் செய்யப்பட்டது. பின்னாளில்,  இபிஎஸ் Vs டிடிவி என்றானது. ஓ.பி.எஸ்ஸும், இ.பி.எஸ்ஸும் இணைந்தனர். 

 

ADMK History repeats on OPS issue

 

ஓ.பி.எஸ். - இ.பி.எஸ். இணைந்தவுடன், டிடிவி தன் ஆதரவு எம்.எல்.ஏக்களை பிரித்துக்கொண்டு வெளியேறினார். அவர்கள் நீக்கப்பட்டனர். மீண்டும் நடந்த ஆர்.கே. நகர் இடைத்தேர்தலில், ஓ.பி.எஸ் - இ.பி.எஸ் இணைந்ததால்,  இரட்டை இலை சின்னத்தில் அதிமுக போட்டியிட்டது, சுயேட்சையாக குக்கர் சின்னத்தில் போட்டியிட்டு, இரட்டை இலை – உதயசூரியன் என இரண்டு பெரிய கட்சிகளையும்  டிடிவி தினகரன் வென்றார்.

 

பிறகு 2019-ல், நீக்கப்பட்ட எ.எல்.ஏ.க்களுக்காக இடைத்தேர்தல் நடந்து, அதில் வென்று, அதிமுக ஆட்சியை தக்க வைத்ததை அறிவோம். இதில், ஜெயலலிதா Vs ஜானகிக்கும், ஓபிஎஸ் Vs இபிஎஸ்க்கும் நுட்பமான வேறுபாடு உள்ளது. இரட்டை இலைச் சின்னம் முடங்கி, வேறு சுயேட்சை சின்னங்களில், ஒரு பொதுத்தேர்தலில் இருவரும் போட்டியிட்டு தங்கள் பலத்தை நிரூபித்தவர்கள் ஜெயலலிதாவும், ஜானகியும். 

 

அதில் ஜெயலலிதாவால்தான் கட்சியை நடத்த முடியும் என்று ஜானகி அணி ஜெயலலிதா அணியோடு இணைந்து இரட்டை இலையைப் பெற்றது. ஆனால், ஒரு தேர்தலில் இபிஎஸ் – ஓபிஎஸ் ஆகிய இரு அணிகளும், தங்கள் பலத்தை நிரூபிப்பதற்கு முன்பே, சசிகலா - டிடிவி தலைமைமை ஏற்க விரும்பவில்லை என்ற பொதுப்புள்ளியில் இணைந்தது.

 

ADMK History repeats on OPS issue

 

ஓபிஎஸ் - இபிஎஸ் இணைந்த பிறகு அவைத்தலைவர் மதுசூதனன் தலைமையிலான அணிக்கு இரட்டை இலையை வழங்கியது தேர்தல் ஆணையம். தன் பலத்தை நிரூபித்து, தன் தலைமையை ஏற்றுக் கொண்டவர்களுடன் ஜெயலலிதா இரட்டை இலையைப் பெற்றதையும், ஓபிஎஸ் பலத்தை ஏற்றுக் கொண்டு அவருக்கு ஒருங்கிணைப்பாளர் பதவியை வழங்கி, இபிஎஸ் அணி இரட்டை இலையை மீட்டதையும், ஒரே அளவுகோலாகப் பார்க்கமுடியாது.

 

2017-ல் மீண்ட இரட்டை இலைச் சின்னத்திற்கு இபிஎஸ் மட்டும் உரிமை கோர முடியாது. யாருடைய பலத்தையும் நிரூபிப்பதற்கு முன்பே, இரட்டை இலையை ஓபிஎஸ் உதவியுடன் மீட்டு, அவரை ஒருங்கிணைப்பாளராக ஏற்றுக்கொண்டாகிவிட்டது. நாடாளுமன்றம், இடைத்தேர்தல், ஊரக உள்ளாட்சி, சட்டமன்றம், நகர்ப்புற உள்ளாட்சி என எல்லா தேர்தலுக்கும், இருவரும் கையெழுத்திட்டே இரட்டை இலை சின்னத்தைக் கொடுத்துள்ளனர். அது அறுவடை செய்த அனைத்து வாக்குகளுக்கும், இருவருக்குமே உரிமை கோரும் அதிகாரம் உள்ளது.

 

அதிமுக சட்டவிதிகளின் படி, பொதுச் செயலாளரை பொதுக்குழுவோ, நிர்வாகிகளோ சேர்ப்பதோ, நீக்குவதோ முடியாது. திமுகவில் கலைஞர் அப்படித்தான், தன்னை எளிமையாக நீக்கிவிட்டாரென யோசித்த எம்.ஜி.ஆர்., அதிமுகவுக்கு சிறப்பான சட்டங்களை வகுத்துள்ளார். பொதுச் செயலாளரையோ அல்லது அதற்கு நிகராக மாற்றப்பட்ட ஒருங்கிணைப்பாளர், துணை ஒருங்கிணைப்பாளர் பதவியையோ பொதுக்குழுவால் நீக்கவோ, நியமிக்கவோ முடியாது. அதேநேரத்தில், நியமிக்கப்பட்ட பொதுச் செயலாளர் சசிகலாவையும், துணை பொதுச் செயலாளர் டிடிவி தினகரனையும் நீக்கியது செல்லுபடியானது.

 

ஒருங்கிணைப்பாளர் - இணை ஒருங்கிணைப்பாளர் பதவியை, சட்டவிதிகளின்படி தேர்தல் முறையில் தேர்ந்தெடுத்துவிட்டனர். அதை பொதுக்குழு ஏற்றுக்கொள்ள வேண்டும் என்பது ஒரு புள்ளி என்றாலும், பொதுக்குழுவே செல்லுமா? செல்லாதா? எனக் கேள்விகள் எழுந்தபிறகு, அவைத்தலைவர் நியமனம் செல்லுமா என்ற குழப்பமும் வந்தபிறகு, தேர்தல் ஆணையத்தில் அளிக்கப்பட்ட ஒருங்கிணைப்பாளர் - இணை ஒருங்கிணைப்பாளர் என்பதுதான் நிற்கும்.

 

ஒருவேளை,  ஒருங்கிணைப்பாளர் - இணை ஒருங்கிணைப்பாளர் காலாவதி ஆனது செல்லும் என்றாலும்கூட,  அவைத்தலைவர் நியமனமானது கேள்விக்குள்ளாகும். அதிமுக சட்ட விதிகளின்படி, பொதுச் செயலாளர் - துணை பொதுச் செயலாளர், அடுத்து பொருளாளர், அதற்கடுத்து தலைமை நிலையச் செயலாளர் என்பது தான் அதிகாரப் படிநிலை.

 

ஆகவே, பொதுச் செயலாளர் பதவிக்கு நிகரான ஒருங்கிணைப்பாளர் / இணை ஒருங்கிணைப்பாளர் பதவிகள் காலாவதியானாலும் கூட, ஓபிஎஸ்-க்கு அதிமுகவின் மறைந்த பொதுச் செயலாளர் ஜெயலலிதாவால்  அளிக்கப்பட்ட பொருளாளர் பதவியை யாராலும் நீக்க முடியாது. இபிஎஸ் தலைமை நிலையச் செயலாளராக இருந்தாலும், பொருளாளர் பதவிக்கும் பாதி அதிகாரம் போய்விடும். அதை, தற்காலிக பொதுச்செயலாளர் சசிகலாவாலும் நீக்க முடியவில்லை. 

 

ADMK History repeats on OPS issue

 

திமுக - அதிமுகவில் மிக முக்கியமான அதிகாரப் பதவி பொருளாளர். அதுவும் அதிமுக சட்டவிதிகளின்படி, தலைமைப் பதவியான பொதுச் செயலாளர் / துணை பொதுச் செயலாளர் அல்லது ஒருங்கிணைப்பாளர் / இணை ஒருங்கிணைப்பாளர் பதவிகள் காலி என்றால், அதுவரையிலும் நிர்வாகமானது, பொருளாளர் மற்றும் தலைமை நிலையச் செயலாளர் கைக்கு மாறும். அப்படியே பார்த்தாலும், 50/50 கட்சி ஓபிஎஸ் - இபிஎஸ்க்குத்தான்.  ஓபிஎஸ்ஸை யாராலும் நீக்க முடியாது. நீக்கி அறிவித்தாலும் செல்லாது.  ஓ.பி.எஸ். கையெழுத்தில்லாமல், வருகிற ஜூலை 9-ம் தேதி நடக்கவுள்ள உள்ளாட்சித் தேர்தலில் (இடைத்தேர்தல்) இரட்டை இலைச் சின்னத்தை கொடுக்க முடியாது. அதிமுகவினர் சுயேட்சை சின்னத்தில் போட்டியிடும் சூழல் வரும்.


முதல்வர் வேட்பாளர், சட்டமன்ற எதிர்க்கட்சித் தலைவர் பதவி போல,  இதை ஒருக்காலும் விட்டுக்கொடுக்க மாட்டார் ஓபிஎஸ். காரணம், இரட்டை இலைச் சின்னம்தான் வாக்குகளைப் பெற்றது, அந்தச் சின்னத்திற்கு தன்னுடைய கையெழுத்து வேண்டும்; அதை, தான் விட்டுக் கொடுக்காதவரை, யாராலும் பறிக்க முடியாது என்பதைப் புரிந்துள்ளார். 

 

இறுதியாக,  இந்தப் பிரச்சனை ஒரு நிலையை அடையும். அது, முறையாக பொதுச் செயலாளருக்கு தேர்தல் வைப்பது. அல்லது  ஒருங்கிணைப்பாளருக்கு தேர்தல் வைத்து தேர்ந்தெடுப்பது. அப்படி நகர்ந்தால்,  பலர் அந்த தலைமை பதவிக்குப் போட்டி போடலாம். அதில் ஒன்றிய, நகர, மாவட்ட, மாநகர என எல்லா கிளைகளிலும் பெட்டியை வைத்து, மினி தேர்தலையே ஆணையம் நடத்தும். இதில் ஓபிஎஸ் - இபிஎஸ் மட்டுமல்ல,  செங்கோட்டையனும் போட்டியிடலாம். இப்படி ஒரு நிலை வருவதற்கு முன்பே ஓபிஎஸ்ஸை நீக்கிவிடலாம் என்று நினைத்தால், அது நடப்பதற்கான சாத்தியம் இல்லை. இவ்வாறு வரலாற்றைப் புரட்டுகிறது ஓ.பி.எஸ். தரப்பு. 


இ.பி.எஸ். – ஓ.பி.எஸ். மோதலில் நிரந்தரத் தீர்வோ, தீர்ப்போ காலத்தின் கையிலிருக்கிறது. 

 

 

Next Story

“கூட்டணி கட்சி வேட்பாளர்களுக்கு அதிகமாக உழைக்க வேண்டும்” - இ.பி.எஸ்.

Published on 28/03/2024 | Edited on 28/03/2024
alliance Party Candidates Need To Work More EPS

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

அதே சமயம் தேர்தலுக்கான வேட்புமனு தாக்கல் நேற்று (27.03.2024) முடிவடைந்தது. அந்த வகையில் 39 மக்களவை தொகுதிகளுக்கு 1749 வேட்பு மனுக்கள் பெறப்பட்டன. அதிகபட்சமாக கரூர் தொகுதியில் 62 வேட்பாளர்கள் வேட்பு மனுவைத் தாக்கல் செய்திருந்தனர். அதனைத் தொடர்ந்து இன்று (28.03.2024) வேட்புமனு பரிசீலனை நடைபெற்றது. அதாவது 39 மக்களவைத் தொகுதிகளில் தாக்கலான வேட்புமனுக்கள் மீதான பரிசீலனை நிறைவடைந்துள்ளது. வேட்புமனுக்களை திருப்பப் பெற மார்ச் 30 ஆம் தேதி கடைசி நாள் ஆகும்.

இந்நிலையில் தே.மு.தி.க. சார்பில் விருதுநகரில் போட்டியிடும் விஜய பிரபாகரனை ஆதரித்து அ.தி.மு.க. பொதுச்செயலாளர் எடப்பாடி பழனிசாமி சிவகாசியில் இன்று (28.03.2024) பிரச்சார்ம் மேற்கொண்டார். அப்போது அவர் பேசுகையில், “எம்.ஜி.ஆரும், ஜெயலலிதாவும் தமிழக மக்களுக்கு இறைவனால் கொடுக்கப்பட்ட கொடை. ஒரு மனிதன் பிறக்கின்றான், வாழ்கின்றான், இறக்கிறான். இந்த இடைப்பட்ட காலத்தில் நாட்டு மக்களுக்கு என்ன செய்கிறானோ அந்த தலைவர்கள் தான் மக்கள் மனதில் வாழ்வார்கள். அவ்வாறு எம்.ஜி.ஆரும், ஜெயலலிதாவும் வாழ்ந்து கொண்டிருக்கிறார்கள்.

நம் தலைவர்களுக்கு அரசியல் வாரிசுகள் கிடையாது. எனவே தமிழ்நாட்டைச் சேர்ந்த நாம் தான் பிள்ளைகள். தங்கள் வாழ்நாள் முழுவதும் தம் பிள்ளைகள் வாழ்நாள் முழுவதும் செழிப்பாகவும், வளமாகவும் வாழ வேண்டும் என கருதி இரவு பகல் பாராமல் உழைத்து மறைந்த தலைவர்கள் உருவாக்கிய இயக்கம் அ.தி.மு.க. இது மக்களுக்காகவே துவக்கப்பட்ட இயக்கம். யார் யாரோ இந்த இயக்கத்தை அழிக்க முற்பட்டார்கள். யார் எல்லாம் இந்த இயக்கத்தை அழிக்க முற்பட்டார்களோ, அவர்கள் எல்லாம் அடையாளம் காணாமல் போய்விட்டார்கள்.

இந்த தேர்தல் முக்கியமான தேர்தல். நாடாளுமன்ற தேர்தலை பொறுத்த வரையில் கூட்டணி கட்சிகள் எல்லாம் ஒன்றாக இணைந்து இரவு பகல் பாராமல் வாக்கு சேகரித்து லட்சக்கானகான வாக்குகள் வித்தியாசத்தில் வேட்பாளரை வெற்றி பெற செய்ய வேண்டும். கூட்டணி கட்சி வேட்பாளர்களுக்கு அதிகமாக உழைக்க வேண்டும். அ.தி.மு.க. என்று சொன்னாலே அனைவரையும் மதிக்க கூடிய கட்சி. அதிலும் குறிப்பாக கூட்டணியை நேசிக்க கூடிய கட்சி. அ.தி.மு.க. வேட்பாளரை விட கூட்டணி கட்சி வேட்பாளருக்கு அதிக நேரம் செலவழித்து வெற்றி பெறச் செய்ய வேண்டும்” எனத் தெரிவித்தார். 

Next Story

“எடப்பாடி செய்த சதியை முறியடிக்கத் தயாராக இருக்கிறேன்” - ஓ.பி.எஸ்.ஸின் பிரத்யேக பேட்டி

Published on 28/03/2024 | Edited on 28/03/2024
ready to defeat tready to defeat the conspiracy of EPS says Exclusive interview with OPShe conspiracy of EPS says Exclusive interview with OPS

தேனி பாராளுமன்றத் தொகுதியில் பி.ஜே.பி. கூட்டணி சார்பில் அ.ம.மு.க. வேட்பாளராக டி.டி.வி. தினகரன் போட்டியிடுவதால் ஓ.பி.எஸ்.ஸின் முழு ஆதரவும் டிடிவிக்கு இருக்கிறது. அதோடு டிடிவியும் நான் போட்டி போடுகிறேன் என்று தெரிந்து தான் இத்தொகுதியை ஓ.பி.எஸ்.ஸும் அவரது மகன் ஓ.பி.ஆர்.ரும் எனக்காக விட்டுக் கொடுத்தும் இருக்கிறார்கள் என்று கூறியிருக்கிறார். அந்த அளவுக்கு ஓபிஎஸ்ஸும் டி.டி.வி.யும் தேர்தல் களத்தில் நெருக்கமாக இருந்து வருகிறார்கள்.

இந்த நிலையில் தான் வேட்புமனு தாக்கலின் இறுதி நாளான நேற்று 27 ஆம் தேதி வேட்புமனு தாக்கல் செய்ய டிடிவி தினகரன் மதியத்துக்கு மேல் தேனி ஆட்சியர் அலுவலகத்திற்கு வருவதாக இருந்தது. இந்த விஷயம் ஓபிஎஸ்-க்கு தெரியவே, மதியம் ஒன்னேகால் மணிக்கு எல்லாம் தேனி ஆட்சியர் அலுவலகத்திற்கு வந்தவர் அலுவலக வளாகத்தில் உள்ள மரத்தடியில் நின்று கொண்டு டிடிவியை வரவேற்க காத்துக் கிடந்தார். அவருடன் ஆதரவாளர்களான செல்லமுத்து மற்றும் சையதுகான் ஆகியோர் இருந்தனர்.

ad
ஓபிஎஸ் உடன் நமது நிருபர்

அப்போது நாம் முன்னாள் முதல்வரான ஓபிஎஸ்ஸிடம் சென்று நம்மை நக்கீரன் நிருபர் என்று அறிமுகப்படுத்திய உடனே ஆசிரியர் நல்லா இருக்காரா? என்று கேட்டார். அதைத் தொடர்ந்து நாமும் ஆசிரியர் நலமாக இருக்கிறார் என்று கூறியவாறே தொகுதியின் தேர்தல் பணி எந்த அளவுக்கு இருக்கிறது என்று கேட்டபோது, “நான் போட்டி போடும் அந்த தொகுதியில் பிரதமர் மோடி தான் போட்டிப் போடுவதாக இருந்ததால் அங்குள்ள கட்சியினர் தொகுதியை ஒரு கட்டுக்கோப்பாக பிரதமருக்காக தயார் செய்தும் வைத்திருந்தனர். ஆனால் பிரதமர் இங்கே போட்டி போடவில்லை என்பதால் என்னையத்தான் நிற்க சொன்னார். அதன்பேரில் தான் போட்டி போடுகிறேன்” என்றவரிடம் அத்தொகுதியில் முக்குலத்தோர் சமூக ஓட்டுக்கள் அதிகமாக இருக்கிறதா என்று கேட்டபோது, அத்தொகுதியில் மொத்தம் பதினாறு லட்சம் ஓட்டுகள் இருக்கிறது. இதில் சிறுபான்மை சமூக ஓட்டுகள் இரண்டு லட்சம் இருப்பதாக தெரிகிறது. அதுபோல் முக்குலத்தோர் சமூக ஓட்டுகள் ஆறு லட்சத்திற்கு மேல் இருப்பதாக தெரிகிறது. மீதி மற்ற சமூக மக்கள் இருக்கிறார்கள் என்றவரிடம், உங்களுடைய வெற்றி வாய்ப்பு எப்படி இருக்கிறது என்று கேட்டதற்கு என்னுடைய வெற்றி உறுதி இறைவன் இருக்கிறார்” என்றார்.

உங்களை பெயரிலேயே ஐந்து சுயேச்சைகள் வேட்புமனு தாக்கல் செய்து இருக்கிறார்கள். அது பற்றி என்ன நினைக்கிறீர்கள் என்று கேட்டதற்கு, “நான் வெற்றி பெறக் கூடாது என்பதற்காகவே எடப்பாடி செய்த சதி. அதையும் முறியடிக்க தயாராக இருக்கிறேன்” என்றார். தொடர்ந்து தேனி மாவட்டத்தில் உள்ள அ.தி.மு.க.வினர் கூட டிடிவிக்கு மறைமுகமாக சப்போர்ட் பண்ண இருப்பதாக ஒரு பேச்சு அடிபடுகிறதே என்று கேட்டதற்கு சிரித்துக் கொண்டே “அதுவும் நடக்கலாம் நான் சொன்னது போல் தமிழகம் முழுவதுமே அ.தி.மு.க. படுதோல்வி அடையும்” என்று சொல்லிக் கொண்டு இருந்தார்.

ready to defeat the conspiracy of EPS says Exclusive interview with OPS

அப்போது தேர்தல் பிரச்சார வாகனத்தில் ஆட்சியர் அலுவலகத்திற்குள் இரண்டேகால் மணிக்கு டிடிவி வந்தார். அவரை ஓபிஎஸ் சால்வை அணிவித்து வரவேற்றார். அதன்பின் ஓ.பி.எஸ். தனது ஆதரவாளர்களுடன் மீண்டும் மரத்தடியிலேயே நின்றார். அப்போது பயனாளிகளுக்காக போடப்பட்டிருந்த இரும்பு சேரில் ஓ.பி.எஸ் உடன் வந்த இருவரும் உட்கார்ந்து இருந்தனர். அதைத் தொடர்ந்து டிடிவி தினகரன் தனது வேட்புமனுவை தேர்தல் அதிகாரியான ஆட்சியரிடம் தாக்கல் செய்துவிட்டு வந்தார். வந்தவர் பத்திரிகையாளர்களை சந்தித்து பேட்டியும் கொடுத்தார். அதுவரை ஓபிஎஸ் டிடிவியுடனே நின்றுவிட்டு டிடிவியை பிரச்சார வேனில் திரும்ப வழியனுப்பி விட்டுத்தான் திரும்பினார்.