Skip to main content

நிலம் வழங்கிய விவசாயிகளை வஞ்சிக்கும் ஆவின் நிர்வாகம்; 44 ஆண்டுகளாக தொடரும் போராட்டம்!

Published on 25/10/2023 | Edited on 25/10/2023

 

Administration of Aain deceiving farmers who have given land; The struggle continues for 44 years!
ஆவின் பால் பண்ணை

 

சேலம் ஆவின் பால் பண்ணைக்கு நிலம் வழங்கிய விவசாயிகளுக்கு ஒதுக்கப்பட்ட வீட்டு மனைகளுக்கு பட்டா வழங்காமல் 44 ஆண்டுகளாக ஏமாற்றி வரும் நிர்வாகத்தைக் கண்டித்து, சாகும் வரை உண்ணாவிரத போராட்டம் நடத்த தீர்மானித்துள்ளனர்.

 

சேலத்தை அடுத்த சித்தனூரில், 1984ம் ஆண்டு முதல் ஆவின் பால் பண்ணை இயங்கி வருகிறது. இதற்காக சித்தனூர், ரொட்டிக்காரன் வட்டம், தளவாய்பட்டி ஆகிய கிராமங்களைச் சேர்ந்த 44 விவசாயிகளிடம் இருந்து 1979ம் ஆண்டு, 54 ஏக்கர் நிலத்தை ஆவின் நிர்வாகம் கையகப்படுத்தியது. 

 

Administration of Aain deceiving farmers who have given land; The struggle continues for 44 years!

 

கையகப்படுத்தப்பட்ட நிலத்தில் வீடு கட்டி வசித்து வந்த 25 குடும்பத்தினருக்கு மட்டும், பால் பண்ணைக்கு ஒதுக்குப்புறமாக தலா மூன்று சென்ட் பரப்பளவுள்ள 38 வீட்டு மனைகளை ஆவின் நிர்வாகம் ஒதுக்கியது. அந்த நிலத்தில் விவசாயிகள் வீடு கட்டி வசித்து வருகின்றனர். 

 

நிலம் வழங்கியவர்களின் குடும்பத்தினருக்கு கல்வித் தகுதிக்கேற்ப வேலைவாய்ப்பு, வாழ்வாதாரத்திற்கு வீட்டு மனை ஒதுக்கீடு, மனைக்கான கிரயப் பத்திரம் ஆகியவை வழங்கப்படும் என அப்போது ஆவின் நிர்வாகம் உறுதி அளித்துள்ளது. ஆனால் 44 ஆண்டுகள் ஆகியும் வீட்டு மனைகளுக்கு கிரயம் செய்து தராமல் ஆவின் நிர்வாகம், ஏழை விவசாயிகளை வயிற்றில் அடித்து விட்டதாக புலம்புகின்றனர்.  

 

நிலம் வழங்கிய விவசாயிகள் தமிழக முதல்வர், பால்வளத்துறை ஆணையர், செயலாளர் முதல் மாவட்ட ஆட்சியர் வரை அனைவரின் அலுவலக கதவுகளையும் தட்டிப்பார்த்தும், தீர்வு கிடைக்கவில்லை என்கிறார்கள். இது தொடர்பாக, சேலம் ஆவின் பால் பண்ணைக்கு நிலம் கொடுத்து பாதிக்கப்பட்டவர்கள் சங்கத்தின் ஒருங்கிணைப்பாளர் சிவராமன் நக்கீரனிடம் பேசினார். 

 

Administration of Aain deceiving farmers who have given land; The struggle continues for 44 years!
சிவராமன்

 

அவர் தெரிவித்ததாவது; ''சேலம் ஆவின் பால் பண்ணைக்கு நிலம் கொடுத்த விவசாயிகளுக்கு, அன்றைய அரசு வழிகாட்டி மதிப்பின்படி உரிய விலையைக் கொடுத்து நிர்வாகம் கிரயம் செய்து கொண்டது. அப்போது ஏற்பட்ட உடன்படிக்கையின்படி, ஆர்ஜிதம் செய்யப்பட்ட நிலத்தில் குடியிருந்த 25 குடும்பத்தினருக்கு 38 காலி மனைகளை நிர்வாகம் ஒதுக்கியது. 

 

ஆனால், அந்த வீட்டு மனைகளுக்கு இன்று வரை பயனாளிகள் பெயரில் தனி நபர் கிரயம் செய்து கொடுக்காமல் ஆவின் நிறுவனம் தந்திரமாக இழுத்தடித்து வருகிறது. ஆவின் பொது மேலாளரைக் கேட்டால், பால்வளத்துறை ஆணையர்தான் இப்பிரச்சனையில் முடிவெடுக்க முடியும் என்கிறார். ஆணையர் அலுவலகத்தில் கேட்டால், வருவாய்த்துறையைக் கையைக் காட்டுகின்றனர். கடந்த 2022ம் ஆண்டு, ஆவின் முன்பு காத்திருப்பு போராட்டம் நடத்தியபோது, அப்போது பால் வளத்துறை அமைச்சராக இருந்த ஆவடி நாசர் நேரடியாக எங்களிடம் பேசினார். 30 நாள்களில் கிரய பத்திரம் வழங்கப்படும் என்றார். அதுவும் பொய்யாகி விட்டது. 

 

வீட்டு மனைகளுக்கு தனி நபர் கிரயம் செய்து கொடுக்கப்படாததால் பட்டா பெற முடியவில்லை. பட்டா இல்லாததால் மின் இணைப்பு, குடிநீர் இணைப்பு, பிரதமர் வீடு கட்டும் திட்டத்தில் மானியம், வங்கிக் கடன் உள்ளிட்ட பயன்களைப் பெற முடியவில்லை. நிலத்தையும் விற்க முடியவில்லை. ஆவின் அதிகாரிகள் திடீரென்று, 'மேற்கூரை உங்களுக்கு; அடிநிலம் எங்களுக்கு,' எனக் கூறுகின்றனர். 

 

எங்கள் பிரச்சனையை ஆரம்பம் முதல் நக்கீரன் பத்திரிகை தொடர்ந்து வெளியிட்டு வருகிறது. நக்கீரனில் செய்தி வந்த பிறகுதான் எங்கள் பிரச்சனை மீது அரசின் கவனம் குவிந்தது. இத்தனை நாளாக எங்களுக்கும் ஆவினுக்கும் மட்டுமே பேச்சுவார்த்தை நடந்து வந்தது. இந்நிலையில், நிலம் கொடுத்த விவசாயிகளுக்கு வேறு இடத்தில் 2 ஏக்கர் நிலத்தை ஒதுக்கித் தரும்படி வருவாய்த்துறையிடம் ஆவின் நிர்வாகம் கேட்கிறது. 

 

ஆனால் வருவாய்த்துறையோ, வணிக ரீதியான பயன்பாட்டிற்காக தனியார் கிரயம் பெற்ற நிலத்திற்கு மாற்று இடம் ஒதுக்க முடியாது என கைவிரித்துவிட்டது. இதில், வருவாய்த்துறையை சம்பந்தப்படுத்தவே தேவை இல்லை என்பதுதான் எங்கள் தரப்பு வாதம். நிலம் வழங்கிய அப்பாவி விவசாயிகளை ஏமாற்றுவதற்காக ஆவின் நிர்வாகம் இப்படியான தந்திரங்களை கையாள்கிறது. எங்கள் கோரிக்கையை வலியுறுத்தி சாகும்வரை உண்ணாவிரத போராட்டத்தில் ஈடுபட முடிவு செய்துள்ளோம்'' என்கிறார் சிவராமன். 

 

இது ஒருபுறம் இருக்க, 1987ம் ஆண்டு மே 5ம் தேதி நடந்த ஆவின் நிர்வாகக்குழுக் கூட்டத்தில், 'பால் பண்ணைக்கு நிலம் வழங்கியவர்களுக்கு அளித்த வீட்டு மனைகளுக்கு பால்வளத்துறை ஆணையரின் அனுமதி பெற்று தனிநபர் கிரயம் செய்து கொடுக்கலாம்,' என தீர்மானம் கொண்டு வரப்பட்டுள்ளது நமது விசாரணையில் உறுதி செய்யப்பட்டது. 

 

அதேநேரம், 1997ம் ஆண்டு செப். 11ம் தேதி, ஐஏஎஸ் அதிகாரி முத்துசாமி தலைமையில் நடந்த நிர்வாகக்குழு கூட்டத்தில், 'நிலம் வழங்கிய விவசாயிகள் அல்லது அவர்களின் வாரிசுகளுக்கு கிரய பத்திரம் வழங்க ஆவின் நிர்வாக இயக்குநருக்கே அதிகாரம் உள்ளது,' என பதிவு செய்யப்பட்டுள்ளது.

 

பாதிக்கப்பட்டவர்களுக்கு சாதகமாக இவ்வளவு தரவுகள் இருந்தும் சேலம் ஆவின் அதிகாரிகளும், சென்னை பால்வளத்துறை அதிகாரிகளும் மாறி மாறி கடிதம் அனுப்பிக் கொண்டிருக்கின்றனர். 

 

Administration of Aain deceiving farmers who have given land; The struggle continues for 44 years!
சரோஜா

 

ஆவினுக்கு நிலம் வழங்கியவர்களுள் ஒருவரான சரோஜா கூறுகையில், ''பால் பண்ணைக்கு நிலம் கொடுத்தோம். அதற்காக எங்களுக்கு கொடுத்த வீட்டு மனைக்கு தனி நபர் கிரயமோ பட்டாவோ ஆவின் தரவில்லை. வீட்டுக்கு பட்டா இல்லாததால் எங்களை புறம்போக்குனு சொல்றாங்க. சொந்தமாக வீடு இல்லாததால் மகன், மகளுக்கு திருமணம் கூட செய்து வைக்க முடியல. 

 

எங்களுக்கு ஒதுக்கப்பட்ட வீட்டு மனையில் 10 லட்ச ரூபாய் கடனை உடனை வாங்கி இரண்டு வருஷத்துக்கு முன்பு வீடு கட்டிட்டோம். கரண்டு ஆபீசுல போய் கரண்டு கேட்டோம். அவங்களோ ஆவின் பால் பண்ணையில் போயி தடையில்லா சான்று வாங்கிட்டு வாங்கனு சொல்லிட்டாங்க. மறுபடியும் அவங்க காலில் போயி விழணுமான்னு போகவே இல்ல. ரெண்டு வருஷமாக கரண்டு இல்லாம மண்ணெண்ணெய் விளக்கு வெளிச்சத்துலதான் இருக்கோம்'' என்றார். 

 

Administration of Aain deceiving farmers who have given land; The struggle continues for 44 years!
மயில்வேல்

 

விவசாயிகள் அலங்காரம்மாள், மயில்வேல் கவுண்டர் ஆகியோர் கூறுகையில், ''44 வருஷத்துக்கு முன்னாடி போலீசு வண்டிய கூட்டிக்கிட்டு வந்து ஆறு காசுக்கும் மூணு காசுக்கும் எங்க நிலத்தை எல்லாம் பால் பண்ணைக்கு எடுத்துக்கிட்டாங்க. தண்ணீ பாயற காட்டுக்கு 6000 ரூபாயும், தண்ணீ பாயாத காட்டுக்கு ஏக்கருக்கு 5000 ரூபாயும் கொடுத்தாங்க. 

 

Administration of Aain deceiving farmers who have given land; The struggle continues for 44 years!
அலங்காரம்மாள்

 

எங்களுக்கு பால் பண்ணை நிர்வாகம் இலவச வீட்டு மனை கொடுத்தாங்க. அந்த நிலத்தை எங்கள் பெயரில் கிரயம் செய்து, பட்டா கொடுக்கும்படி யார் யார் காலிலோ விழுந்துட்டோம். இதுவரை கிடைக்கல. எங்களுக்கு இப்பவே 85 வயசாச்சுங்க. சாகும்போது நாங்க புறம்போக்கா சாகக்கூடாது. எங்கள் நிலத்துக்கு ஆவின் நிர்வாகம் கிரய பத்திரம் கொடுக்கணும்'' என கண் கலங்கச் சொன்னார்கள்.

 

சேலம் ஆவின் நிறுவன பொது மேலாளர் (பொறுப்பு) சண்முகத்திடம் கேட்டபோது, ''நிலம் வழங்கிய விவசாயிகளுக்கு ஆவின் ஒதுக்கீடு செய்த நிலத்திற்கு தனி நபர் கிரயம் வழங்குவது தொடர்பான கோப்புகள் பரிசீலனையில் உள்ளது. இது தொடர்பாக பால்வளத்துறை ஆணையர், ஆவின் நிர்வாக இயக்குநர் ஆகியோர்தான் முடிவெடுக்க முடியும். எங்கள் அளவில் எந்த முடிவும் எடுக்க இயலாது'' எனத் தெரிவித்தர். 

 

Administration of Aain deceiving farmers who have given land; The struggle continues for 44 years!
அமைச்சர் மனோ தங்கராஜ் 

 

இதுகுறித்து தமிழக பால்வளத்துறை அமைச்சர் மனோ தங்கராஜிடம் கேட்டபோது, ''சேலம் ஆவின் நிறுவனத்துக்கு நிலம் கொடுத்தவர்கள் தொடர்பான பிரச்சனை குறித்து கவனத்துக்கு வந்தது. அது தொடர்பான கோப்புகளை விரைவில் ஆய்வு செய்து நல்ல முடிவெடுக்கப்படும்'' என நம்பிக்கையூட்டும் பதிலைச் சொன்னார். 

 

 

 

Next Story

பெரியார் பல்கலை. பதிவாளர் விவகாரம்; உயர்நீதிமன்றம் சரமாரி கேள்வி!

Published on 28/02/2024 | Edited on 28/02/2024
Periyar University Registrar Matters The High Court questions

'பியூட்டர் பவுண்டேஷன்' என்ற தனியார் நிறுவனத்தை தொடங்கி பெரியார் பல்கலைக்கழக துணை வேந்தராக இருக்கக்கூடிய ஜெகநாதன் மற்றும் பதிவாளர் பொறுப்பு வகித்த தங்கவேல், இணை பேராசிரியராகப் பணியாற்றி வந்த சதீஷ், பாரதிதாசன் பல்கலைக்கழக பேராசிரியராக இருந்த ராம் கணேஷ் ஆகியோர் கல்விக் கட்டணம் பெற்று மோசடி செய்ததாக புகார்கள் எழுந்தன. இதனடிப்படையில் பெரியார் பல்கலைக்கழகத்தில் பணியாற்றி வந்த தொழிலாளர் சங்க சட்ட ஆலோசகர் இளங்கோவன் கொடுத்த புகாரில் சேலம் கருப்பூர் போலீசார் வழக்குப்பதிவு செய்து, பல்கலைக்கழக துணைவேந்தர் ஜெகநாதனை கைது செய்தனர். ஜாமீனில் வெளிவந்த ஜெகநாதன் மீண்டும் துணை வேந்தராகப் பணியாற்றி வருகிறார்.

அதே சமயம் பல்கலைக்கழகத்தின் பதிவாளராகவும் கணினி அறிவியல் துறைக்கு தலைவராகவும் பணியாற்றி வந்த தங்கவேல், தனது துறைக்குத் தேவையான கணினி, இணைய சேவைக்கான பொருட்களை வாங்கியதில் முறைகேடு செய்ததாகவும், ஆதிதிராவிடர் இளைஞர்களுக்கு நடத்தப்படும் திறன் மேம்பாட்டு பாடத் திட்டங்களில் பெரும் முறைகேடு நிகழ்ந்துள்ளதாகவும் புகார் எழுந்தது. இந்த முறைகேடு தொடர்பாக எழுந்த புகாரின் பேரில் தணிக்கைக் குழு ஆய்வு செய்திருந்தது. இந்த ஆய்வில் முறைகேட்டில் தங்கவேல் ஈடுபட்டது நிரூபணமானது.

அதன்பின்னர் பல்கலைக்கழக பதிவாளர் தங்கவேலை பணியிடை நீக்கம் செய்ய பல்கலைக்கழக துணை வேந்தருக்கு தமிழக அரசு கடந்த 7 ஆம் தேதி உத்தரவிட்டிருந்தது. பல்கலைக்கழகத்தில் நடைபெற்ற முறைகேடு தொடர்பாக விசாரணை நடத்த அமைக்கப்பட்ட அரசு கூடுதல் தலைமைச் செயலாளர் பழனிசாமி குழு அறிக்கை அடிப்படையில் இந்த நடவடிக்கை எடுக்கப்பட்டது. இதற்கான உத்தரவை தமிழக உயர்கல்வித் துறைச் செயலாளர் கார்த்திக் பிறப்பித்திருந்தார். இருப்பினும் பல்கலைக்கழக துணைவேந்தர் ஜெகநாதன் பதிவாளர் தங்கவேலை பணியிடை நீக்கம் செய்யாமல் இருந்து வந்தார். இதற்கு ஆசிரியர் சங்கங்களை சேர்ந்தவர்கள் கடும் கண்டனம் தெரிவித்து வருகின்றனர்.

இதனையடுத்து பதிவாளர் பொறுப்பில் இருந்து விடுவிக்கப்பட்டு கணினி அறிவியல் துறை தலைவராக உள்ளார். அதே சமயம் தங்கவேல் மீதான குற்றச்சாட்டுகளுக்கு ஆதாரங்கள் கேட்டு துணைவேந்தர் ஜெகநாதன் உயர்கல்வித் துறைக்கு கடிதம் எழுதி இருந்தார். இது தொடர்பாக தமிழக உயர்கல்வித் துறைச் செயலாளர் கார்த்திக், துணை வேந்தருக்கு மீண்டும் எழுதியிருந்த கடிதத்தில், “பதிவாளராக இருந்த தங்கவேலு மீதான குற்றச்சாட்டுகளுக்கான ஆதாரங்கள் அனுப்பப்பட்டுள்ளது. தங்கவேல் மீது 8 புகார்கள் உறுதி செய்யப்பட்டுள்ளது. எனவே தங்கவேலுவை பணியிடை நீக்கம் செய்ய நடவடிக்கை எடுத்து அரசுக்கு தெரிவிக்க வேண்டும்” எனத் தெரிவிக்கப்பட்டிருந்தது.

Periyar University Registrar Matters The High Court questions

இதற்கிடையே பணிநீக்கம் தொடர்பான உத்தரவை எதிர்த்து சென்னை உயர்நீதிமன்றத்தில் பதிவாளராக இருந்த தங்கவேல் வழக்கு தொடர்ந்திருந்தார். இந்த வழக்கு நீதிபதி இளந்திரையன் முன்பு இன்று (28.02.2024) விசாரணைக்கு வந்தது. அப்போது மனுதாரர் தங்கவேல் தரப்பில் ஆஜரான மூத்த வழக்கறிஞர் ஐசக் மோகன்லால், “பல்கலைக்கழகம் என்பது தனிச் சட்டத்தின் கீழ் உருவாக்கப்பட்டது. இதில் சிண்டிகேட், செனட் உறுப்பினர்கள் உள்ளனர். மனுதாரர் 34 ஆண்டுகள் பணி அனுபவம் கொண்டவர். நாளை ஓய்வு பெற உள்ள நிலையில் பணிநீக்கம் செய்வது தொடர்பான பரிந்துரை தங்கவேலுக்கு அச்சத்தை ஏற்படுத்தியுள்ளது. எனவே பணிநீக்கம் தொடர்பான பரிந்துரைக்கு தடை விதிக்க வேண்டும்” என வாதிட்டார். அப்போது குறுக்கிட்ட நீதிபதி இளந்திரையன், “உயர் கல்வித்துறை செயலாளரின் பரிந்துரை குறித்து பல்கலைக்கழக நிர்வாகம் என்ன நடவடிக்கை எடுத்துள்ளது” எனக் கேள்வி எழுப்பினார்.

Periyar University Registrar Matters The High Court questions

இதற்குப் பதிலளித்த தற்போதைய பதிவாளர் தரப்பில் ஆஜரான வழக்கறிஞர் சந்திரகுமார், “பணி நீக்கம் குறித்து பல்கலைக்கழகத்தின் சிண்டிகேட் நிர்வாகம் தான் முடிவெடுக்க வேண்டும். இது தொடரான பரிந்துரை சிண்டிகேட் குழுவிற்கு அனுப்பி வைக்கப்பட்டுள்ளது” எனத் தெரிவித்தார். இதனைப் பதிவு செய்துகொண்ட நீதிபதி, “நிதி முறைகேடு புகார் தொடர்பான விசாரணை அறிக்கையைத் தமிழக அரசு நீதிமன்றத்தில் தாக்கல் செய்ய வேண்டும். உயர் கல்வித்துறை செயலாளரின் பரிந்துரை மீது உரிய நடவடிக்கை எடுக்காமல் துணைவேந்தர் தமிழக அரசிடம் விளக்கம் கேட்டது ஏன்? முறைகேடு புகார் தொடர்பாக சேலம் பல்கலைக்கழக பதிவாளர் தங்கவேல் மீது துணைவேந்தர் உரிய நடவடிக்கை எடுக்கலாம். மார்ச் 14 ஆம் தேதி இந்த வழக்கு தொடர்பான உத்தரவு பிறப்பிக்கப்படும்” எனத் தெரிவித்தார். பதிவாளராக இருந்த தங்கவேல் நாளையுடன் (29.02.2024) பணி ஓய்வு பெற உள்ளது குறிப்பிடத்தக்கது.

Next Story

பெரியார் பல்கலை. பதிவாளர் விவகாரம்; உயர் கல்வித்துறை அதிரடி உத்தரவு

Published on 27/02/2024 | Edited on 27/02/2024
Periyar University. Registrar Matters; Higher Education Action Order

'பியூட்டர் பவுண்டேஷன்' என்ற தனியார் நிறுவனத்தை தொடங்கி பெரியார் பல்கலைக்கழக துணை வேந்தராக இருக்கக்கூடிய ஜெகநாதன் மற்றும் பதிவாளர் பொறுப்பு வகித்த தங்கவேல், இணை பேராசிரியராகப் பணியாற்றி வந்த சதீஷ், பாரதிதாசன் பல்கலைக்கழக பேராசிரியராக இருந்த ராம் கணேஷ் ஆகியோர் கல்விக் கட்டணம் பெற்று மோசடி செய்ததாக புகார்கள் எழுந்தன. இதனடிப்படையில் பெரியார் பல்கலைக்கழகத்தில் பணியாற்றி வந்த தொழிலாளர் சங்க சட்ட ஆலோசகர் இளங்கோவன் கொடுத்த புகாரில் சேலம் கருப்பூர் போலீசார் வழக்குப்பதிவு செய்து, பல்கலைக்கழக துணைவேந்தர் ஜெகநாதனை கைது செய்தனர். ஜாமீனில் வெளிவந்த ஜெகநாதன் மீண்டும் துணை வேந்தராகப் பணியாற்றி வருகிறார்.

அதே சமயம் பல்கலைக்கழகத்தின் பதிவாளராகவும் கணினி அறிவியல் துறைக்கு தலைவராகவும் பணியாற்றி வந்த தங்கவேல், தனது துறைக்குத் தேவையான கணினி, இணைய சேவைக்கான பொருட்களை வாங்கியதில் முறைகேடு செய்ததாகவும், ஆதிதிராவிடர் இளைஞர்களுக்கு நடத்தப்படும் திறன் மேம்பாட்டு பாடத் திட்டங்களில் பெரும் முறைகேடு நிகழ்ந்துள்ளதாகவும் புகார் எழுந்தது. இந்த முறைகேடு தொடர்பாக எழுந்த புகாரின் பேரில் தணிக்கைக் குழு ஆய்வு செய்திருந்தது. இந்த ஆய்வில் முறைகேட்டில் தங்கவேல் ஈடுபட்டது நிரூபணமானது.

அதன்பின்னர் பல்கலைக்கழக பதிவாளர் தங்கவேலை பணியிடை நீக்கம் செய்ய பல்கலைக்கழக துணை வேந்தருக்கு தமிழக அரசு கடந்த 7 ஆம் தேதி உத்தரவிட்டிருந்தது. பல்கலைக்கழகத்தில் நடைபெற்ற முறைகேடு தொடர்பாக விசாரணை நடத்த அமைக்கப்பட்ட அரசு கூடுதல் தலைமைச் செயலாளர் பழனிசாமி குழு அறிக்கை அடிப்படையில் இந்த நடவடிக்கை எடுக்கப்பட்டது. இதற்கான உத்தரவை தமிழக உயர்கல்வித் துறைச் செயலாளர் கார்த்திக் பிறப்பித்திருந்தார். இருப்பினும் பல்கலைக்கழக துணைவேந்தர் ஜெகநாதன் பதிவாளர் தங்கவேலை பணியிடை நீக்கம் செய்யாமல் இருந்து வந்தார். இதற்கு ஆசிரியர் சங்கங்களை சேர்ந்தவர்கள் கடும் கண்டனம் தெரிவித்து வந்தனர்.

Periyar University Registrar Matters Higher Education Action Order

இதனையடுத்து பதிவாளர் பொறுப்பில் இருந்து விடுவிக்கப்பட்டு கணினி அறிவியல் துறை தலைவராக உள்ளார். அதே சமயம் தங்கவேல் மீதான குற்றச்சாட்டுகளுக்கு ஆதாரங்கள் கேட்டு துணைவேந்தர் ஜெகநாதன் உயர்கல்வித் துறைக்கு கடிதம் எழுதி இருந்ததாக கூறப்பட்டது. இந்நிலையில் தமிழக உயர்கல்வித் துறைச் செயலாளர் கார்த்திக், துணை வேந்தருக்கு மீண்டும் எழுதியுள்ள கடிதத்தில், “பதிவாளராக இருந்த தங்கவேலு மீதான குற்றச்சாட்டுகளுக்கான ஆதாரங்கள் அனுப்பப்பட்டுள்ளது. தங்கவேல் மீது 8 புகார்கள் உறுதி செய்யப்பட்டுள்ளது. எனவே தங்கவேலுவை பணியிடை நீக்கம் செய்ய நடவடிக்கை எடுத்து அரசுக்கு தெரிவிக்க வேண்டும்” எனத் தெரிவிக்கப்பட்டுள்ளது. பிப்ரவரி 29 ஆம் தேதியுடன் ஓய்வு பெற இருக்கும் நிலையில், தங்கவேலை பணியிடை நீக்கம் செய்ய தமிழக அரசு உத்தரவிட்டு மீண்டும் கடிதம் எழுதியுள்ளது குறிப்பிடத்தக்கது.