Skip to main content

விடுதலை வெற்றியை சூரி தக்க வைத்தாரா? - ‘கருடன்’ விமர்சனம்!

Published on 01/06/2024 | Edited on 01/06/2024
soori garudan movie review

விடுதலை படம் கொடுத்த வெற்றிக்கு பிறகு கதையின் நாயகனாக மீண்டும் கோதாவில் குதித்திருக்கிறார் முன்னாள் காமெடி நடிகர் சூரி. விடுதலைப் பெற்றுத் தந்த பெரும் வெற்றியை இந்த படம் தக்க வைத்ததா...?


தேனியில் ஒரு கிராமத்தில் இருக்கும் கோயிலுக்குச் சொந்தமான ஒரு இடம் சென்னையில் இருக்க அதனை எப்படியாவது கைப்பற்றி விட வேண்டும் என திட்டம் தீட்டுகிறார் பத்திரப்பதிவு அமைச்சர் ஆர்.வி.உதயகுமார். இதற்காக அந்தக் கோயிலுக்குள் இருக்கும் செம்பு பட்டயத்தை கைப்பற்ற அந்த ஊருக்கு நேர்மையான இன்ஸ்பெக்டர் சமுத்திரகனியை அனுப்பி வைக்கிறார். அவருடன் உதவிக்கு அதே ஊரில் தியேட்டர் வைத்து அதனுள் கள்ளச் சாராயம் காய்ச்சி லோக்கல் சரக்கில் கலந்து கொள்ளச் சந்தையில் விற்கும் மைம் கோபியை சமுத்திரக்கனிக்கு உதவியாக அனுப்புகிறார். இவர்கள் அந்தக் கோயிலின் டிரஸ்டியாக இருக்கும் சசிகுமார், உன்னி முகுந்தன், சூரி ஆகியோரை மீறி அந்த செம்பு பட்டயத்தை திருட முயற்சி செய்கின்றனர். ஆனால் அவர்களை மீறி அந்த செம்பு பட்டயத்தை இவர்களால் திருட முடியவில்லை. இதனால் சசிகுமார், உன்னி முகுந்தன், சூரி ஆகியோருக்குள் பிரிவினையை ஏற்படுத்துகின்றனர். இதன் காரணமாக மூன்று பேருக்குள்ளும் பிரச்சனை உருவாகி பிரிவினை ஏற்பட்டு சசிகுமாரும் கொல்லப்படுகிறார். இதையடுத்து அந்த செம்பு பட்டயம் கயவர்கள் கையில் சிக்கியதா, இல்லையா? இதை தடுக்க சூரி எப்படி எல்லாம் போராடுகிறார் என்பதே படத்தின் மீதி கதை.

soori garudan movie review

தமிழ் சினிமாவில் நீண்ட இடைவெளிக்கு பிறகு ஒரு ரூரல் சம்பந்தப்பட்ட நட்புகளுக்குள் நடக்கும் பழிவாங்கல் கதையை மீண்டும் கையில் எடுத்து அதை ரசிக்கும்படி கொடுத்து கைதட்டல் பெற்று இருக்கிறார் இயக்குநர் துரை செந்தில் குமார். படத்தின் கதையும் திரைக்கதையும் ஏற்கனவே நாம் பார்த்து பழகியபடி இருந்தாலும் கதையின் மாந்தர்களும், காட்சிகளும் பிரஷ்ஷாக அமைந்து அதே சமயம் துடிப்பாகவும் இருந்து காட்சிகளுக்கு உயிரூட்டி படத்தை பாஸ் மார்க் வாங்க செய்திருக்கிறது. அதேபோல் படம் ஆரம்பித்தது முதல் இறுதி வரை ஆங்காங்கே சிறப்பான திருப்பங்கள் நிறைந்த திரைக்கதையும் குறிப்பாக இடைவேளை காட்சியும் மற்றும் கிளைமாக்ஸ் காட்சியும் மிகச் சிறப்பாக அமைந்து கூஸ்பம்ப்ஸ் மொமெண்ட்ஸை கொடுத்து தியேட்டரில் கைத்தட்டல் பெற்று படத்தை கரை சேர்த்திருக்கிறது. முதல் பாதி வேகமாக நகர்ந்து இரண்டாம் பாதியில் நட்பு, துரோகம், அரசியல் என பல்வேறு பரிமாணங்களில் கதை பயணித்து இறுதியில் மிக வேகமாகவும், அதேசமயம் நிறைவாகவும் முடிந்து ரசிக்க வைத்திருக்கிறது. கதையும் காட்சி அமைப்புகளும் ஒரு நாயகனை மட்டும் மையப்படுத்தி இல்லாமல் சசிகுமார் மற்றும் சூரியை மையப்படுத்தி கூட்டணி அமைத்து படத்தை ரசிக்க வைத்திருக்கிறது. அதுவே இப்படத்தில் ஆங்காங்கே சில அயர்ச்சியான விஷயங்கள் தென்பட்டாலும் அவற்றை மறக்கடிக்க செய்து ரசிக்க வைத்திருக்கிறது. 

soori garudan movie review

விடுதலை படத்திற்குப் பிறகு நடிப்பில் வேறு ஒரு பரிமாண வளர்ச்சியை அடைந்திருக்கிறார் முன்னாள் காமெடி நடிகர் சூரி. படத்தின் ஆரம்பம் முதல் இறுதி வரை தனக்கு கொடுத்த கதாபாத்திரத்திற்கு என்ன தேவையோ அதை மிகச் சிறப்பாக செய்து நன்றாக கவனம் பெற்று இருக்கிறார். குறிப்பாக பொய் சொல்ல முடியாமல் கடகடவென்று உண்மையை உடைக்கும் காட்சிகளிலும், விசுவாசத்திற்காக அவர் எடுக்கும் விஸ்வரூபமும் மிக மிக சிறப்பாக அமைந்து அவரை வேறு ஒரு தளத்திற்கு எடுத்துச் சென்றிருக்கிறது. தமிழில் முன்னணி நடிகர்களின் வரிசையில் சூரி இணைவது நிச்சயம். இவருக்கு பக்கபலமாக நடிகர் சசிகுமார் மிகச் சிறப்பான நடிப்பை வெளிப்படுத்தி இருக்கிறார். வழக்கம்போல் நண்பர்களின் துரோகத்துக்கு ஆளாகும் கதாபாத்திரத்தில் நடித்திருக்கும் அவர் வழக்கமாக அந்தந்த கதாபாத்திரத்திற்கு என்னவெல்லாம் செய்து சிறப்பு கூட்டுவாரோ அதையே இப்படத்திற்கும் செய்து கைதட்டல் பெற்று இருக்கிறார். இவரது கதாபாத்திரம் படத்திற்கு மிகப் பெரிய பிளஸ் ஆக அமைந்து படத்தை தூக்கி நிறுத்தி இருக்கிறது.

சைலன்ட் வில்லனாக நடித்திருக்கும் உன்னி முகுந்தன் தனக்கு கொடுத்த கதாபாத்திரத்தை சிறப்பாக செய்திருக்கிறார். இவருக்கும் சூரிக்கும் சசிகுமாருக்கும் இடையேயான கெமிஸ்ட்ரி சிறப்பாக அமைந்து படத்தை தாங்கி பிடித்து இருக்கிறது. நேர்மையான போலீசாக வரும் சமுத்திரகனி நேரம் பார்த்து காலை வாரும் கதாபாத்திரத்தில் சிறப்பாக  நடித்திருக்கிறார். தேர்ந்த அரசியல்வாதியாக வரும் ஆர்.வி. உதயகுமார் கதாபாத்திரத்திற்கு என்ன தேவையா அதை சிறப்பாக செய்திருக்கிறார். மற்றொரு வில்லத்தனம் காட்டும் கதாபாத்திரத்தில் வரும் மைம் கோபியும் நிறைவாக நடித்திருக்கிறார். நாயகிகளாக வரும் ரேவதி சர்மா, சிவதா, ரோஷிணி, ஹரி பிரியன் ஆகியோர் அவரவருக்கு கொடுக்கப்பட்ட வேலையை மிக மிக சிறப்பாக செய்திருக்கின்றனர். அம்மாவாக வரும் வடிவுக்கரசி சிறப்பு. 


யுவன் சங்கர் ராஜா இசையில் பின்னணி இசை மிக சிறப்பு. குறிப்பாக இடைவேளை காட்சியும் கிளைமாக்ஸ் காட்சியும் வாசிப்பில் பின்னி பெடலெடுத்து இருக்கிறார். ஆர்தர் வில்சன் ஒளிப்பதிவில் ஆக்சன் காட்சிகள் சிறப்பாக காட்சிப்படுத்தப்பட்டுள்ளன.எதிர்நீச்சல், கொடி, பட்டாஸ் போன்று கமர்சியல்களுக்கு முக்கியத்துவம் கொடுத்து படத்தை இயக்கி வந்த துரை செந்தில்குமார் இந்த தடவை கமர்சியலை சற்று குறைத்துக் கொண்டு உணர்ச்சிகளுக்கும் கதைக்கும் முக்கியத்துவம் கொடுத்து சற்று கிராமத்துக்கு பக்கம் சென்று அதை சிறப்பாக எடுத்து ரசிகர்களுக்கு நிறைவான படத்தை கொடுத்திருக்கிறார். 


கருடன் - விசுவாசம்!  

சார்ந்த செய்திகள்

Next Story

ஆக்ரோஷமும்... அன்பும்... - வெளியான விடுதலை 2 அப்டேட்

Published on 17/07/2024 | Edited on 17/07/2024
vetrimaaran soori vijay sethupathi viduthalai 2 first look released

வெற்றிமாறன் இயக்கத்தில் சூரி, விஜய் சேதுபதி உள்ளிட்ட பலர் நடிப்பில் கடந்த ஆண்டு மார்ச் 31 ஆம் தேதி வெளியாகி பெரும் வரவேற்பைப் பெற்ற படம் ‘விடுதலை பாகம் 1’. எல்ரெட் குமார் தயாரித்திருந்த இப்படத்திற்கு இளையராஜா இசையமைத்திருந்தார். காவல்துறைக்கும் போராட்டக் குழுவுக்கும் இடையே நடக்கும் பிரச்சனைகளை அழுத்தமாகப் பேசியிருந்த இப்படம் ரசிகர்கள் மத்தியில் பெரும் வரவேற்பை பெற்றது. மேலும் தமிழைத் தாண்டி தெலுங்கிலும் வெளியானது. 

இந்தப் படத்தின் இரண்டாம் பாகம் வெளியாகும் எனப் படக்குழு அறிவித்த நிலையில், படத்திற்கு எதிர்பார்ப்பைக் கூட்டும் வகையில் முதல் பாகத்தின் இறுதியில் இரண்டாம் பாகத்தில் நடக்கும் சில காட்சிகளை வைத்திருந்தார் வெற்றிமாறன். இதையடுத்து, விடுதலை படத்தின் இரண்டாம் பாகத்திற்கான படப்பிடிப்பு தொடர்ந்து பல இடங்களில் நடைபெற்றது. இதில் விஜய் சேதுபதியின் மகன் சூர்யா, மஞ்சு வாரியர், பாலிவுட் இயக்குநர் அனுராஜ் காஷ்யப், கென் கருணாஸ் உள்ளிட்ட பலர் நடித்துள்ளனர். இதனிடையே கடந்த பிப்ரவரியில் நடந்த ரோட்டர்டாம் சர்வதேச திரைப்பட விழாவில் இப்படம் திரையிடப்பட்டது. அப்போது பார்வையாளர்கள் 5 நிமிடங்கள் கைத்தட்டி படக்குழுவினரை பாராட்டினர்.   


இந்த நிலையில், விடுதலை பாகம் 2 படத்தின் ஃபர்ஸ்ட் லுக் இன்று வெளியாகும் என அறிவித்திருந்த நிலையில் தற்போது வெளியாகியுள்ளது. இரண்டு போஸ்டர்கள் வெளியாகியுள்ள நிலையில் ஒன்றில் விஜய் சேதுபதியும் மஞ்சு வாரியரும் அன்பாக பேசிக்கொண்டிருக்கும் புகைப்படம் இடம்பெற்றுள்ளது. மற்றொன்றில் ஆக்ரோஷமாக கையில் கத்தியுடன் விஜய் சேதுபதி மட்டும் இடம் பெறுகிறார். கதை நாயகனான சூரி இரண்டு போஸ்டரிலும் இடம் பெறவில்லை. முன்னதாக சூரியை விட விஜய் சேதுபதியின் கதாபாத்திரம் தான் இரண்டாம் பாகத்தில் அதிகம் இடம் பெறும் என வெற்றிமாறன் கூறியிருந்தார் என்பது குறிப்பிடத்தக்கது. மேலும் போஸ்டரில் படப்பிடிப்பு இறுதிக் கட்டத்தில் இருப்பதாக குறிப்பிடப்பட்டுள்ளது. விரைவில் அடுத்தடுத்த அப்டேட்டுகள் வெளியாகும் என எதிர்பார்க்கப்படுகிறது.

Next Story

பார்த்திபனின் புதிய முயற்சி கை கொடுத்ததா? இல்லையா? - டீன்ஸ் விமர்சனம்

Published on 13/07/2024 | Edited on 13/07/2024
Teenz movie Review

வழக்கமாக எப்பொழுதும் வித்தியாசமான திரைப்படங்கள் மூலம் ரசிகர்களை ஈர்க்கும் முயற்சியில் இடைவிடாது ஈடுபட்டுக் கொண்டிருக்கும் நடிகரும் இயக்குநருமான பார்த்திபன் இந்த முறையும் அதேபோல் ஒரு புதிய முயற்சியை டீன்ஸ் படம் மூலம் கொடுத்து இருக்கிறார். 13 சிறுவர்களை வைத்துக்கொண்டு அப்படி என்ன புது முயற்சியை கையில் எடுத்திருக்கிறார் பார்த்திபன் என்பதை பார்ப்போம்.

பள்ளியில் படிக்கும் சிறுவர்கள், வெளிநாடுகளைப் போல் நம் நாட்டிலும் பிள்ளைகளுக்கு சுதந்திரம் கொடுக்க வேண்டும் எனத் தங்கள் ஆதங்கத்தை வெளிப்படுத்துகின்றனர். அதனை நாமே கையில் எடுக்க வேண்டும் என எண்ணும் அந்தச் சிறுவர்கள் அவர்களுக்குள் உள்ள ஒரு பெண்ணின் சொந்த கிராமத்திற்கு ஸ்கூலை கட் அடித்து விட்டு செல்கின்றனர். அந்த ஊரில் ஒரு பேய் இருப்பதாக அந்தப் பெண் சொல்ல அந்தப் பேயை பார்த்து விட வேண்டும் என முடிவெடுத்த 13 சிறுவர்கள் பாதை மாறி ஒரு காட்டுப் பகுதிக்கு சென்று விடுகின்றனர். போன இடத்தில் ஒவ்வொரு சிறுவர்களாக தானாகவே அமானுஷ்யமாக காணாமல் போகின்றனர். இதனால் மற்ற சிறுவர்கள் அனைவரும் மிகவும் அதிர்ச்சியும், பதற்றமும் ஆகி அலறுகின்றனர். தங்கள் உயிரைக் காப்பாற்றிக் கொள்ள அனைவரும் தப்பி ஓடுகின்றனர். வழியில் மீண்டும் ஒருவர் பின் ஒருவராக அமானுஷ்ய முறையில் காணாமல் செல்ல இவர்களுக்கு உதவ பார்த்திபன் வருகிறார். இதையடுத்து அமானுஷ்யமாக காணாமல் போன சிறுவர்கள் எப்படி மாயமானார்கள்? அவர்கள் கிடைத்தார்களா, இல்லையா? இவர்களை பார்த்திபன் காப்பாற்றினாரா, இல்லையா? என்பதே இப்படத்தின் மீதி கதை. 

எப்பொழுதும் புது முயற்சியில் ஈடுபட்டுக் கொண்டிருக்கும் பார்த்திபன் இந்தப் படத்தையும் ஒரு புதுவித கதை கருவை வைத்துக்கொண்டு அதற்கு ஏற்றவாறு புதுவிதமான திரைக்கதை அமைத்து அதன் மூலம் ரசிக்க வைக்க முயற்சி செய்திருக்கிறார். இந்தக் கால ஜென் ஆல்ஃபாவான 13 சிறுவர்களை வைத்துக்கொண்டு அவர்களுக்குள் நடக்கும் ஹைடெக்காண பேச்சுகளும், அதற்கேற்ற அவர்களின் உடல் மொழிகளையும் வைத்துக்கொண்டு அதன் மூலம் தன் திரைக்கதையையும் வித்தியாசமாக அமைத்து அதன் மூலம் புதுவித அனுபவத்தை இந்த டீன்ஸ் மூலம் கொடுத்திருக்கிறார் இயக்குநர் நடிகர் பார்த்திபன். படம் ஆரம்பித்தது முதல் இறுதி வரை ஒரே நேர்கோட்டில் படம் பயணிக்கிறது. முதல் பாதி முழுவதும் அமானுஷ்யம் கலந்த திகிலான காட்சிகளாக படம் நகர்ந்து போக போக இரண்டாம் பாதியில் படம் வேறு ஒரு பாதையில் பயணித்து முடிவில் விஞ்ஞான ரீதியாக இதற்கு தீர்வு காண்பித்து படம் முடிந்திருக்கிறது. முதல் பாதியில் படம் ஆரம்பிக்கும் பொழுது ஏதோ ஒரு புதுமையான விஷயத்தை இப்படம் கொடுக்கப் போகிறது என்ற உணர்வு பார்ப்பவர்களுக்கு ஏற்படுகிறது. அது போக போக அயற்சியை கொடுத்து காட்சிகளில் பெரிதாக எங்கும் திருப்பங்கள் இல்லாமல் ஒரே பிளாட்டாக நகர்ந்து அதே சமயம் கதையிலும் தெளிவில்லாமல் குழப்பமாக நகர்ந்து பார்ப்பவர்களை சற்றே சோதிக்கவும் வைத்திருக்கிறது. பார்த்திபனின் இந்தப் புதிய முயற்சியையும் கண்டிப்பாக பாராட்டலாம் ஆனால், இந்தப் புதிய முயற்சிக்கு அவர் கொடுத்த முக்கியத்துவத்தை சற்றே திரைக்கதையிலும் கொடுத்திருந்தால் இந்தப் படமும் அவரது பட வரிசையில் இன்னொரு மைல் கல்லாக அமைந்திருக்கும். 

Teenz movie Review

படத்தை தயாரித்து இயக்கியது மட்டுமல்லாமல் வழக்கம்போல் படத்திலும் நடித்திருக்கிறார் ராதாகிருஷ்ணன் பார்த்திபன். இந்தப் படத்தில் ஆபத் பாண்தவனாக வரும் அவர், படத்தில் இருக்கும் ஃப்லாசை ஒரு வழியாக போக்கி இறுதிக்கட்டத்தில் காண்ஃபிலிட்டுக்கான சொல்யூஷனையும் கொடுக்கும் கதாபாத்திரத்தில் நடித்து கவனம் ஈர்க்க முயற்சி செய்திருக்கிறார். இவருடன் நடித்த 13 சிறுவர் சிறுமிகளும் மிக மிக சிறப்பான நடிப்பை வெளிப்படுத்தி தேர்ந்த நடிகர்கள் போல் நடித்து கைதட்டல் பெற்று இருக்கின்றனர். அவர்கள் அனைவருமே அவரவருக்கு கொடுத்த கதை பாத்திரத்தை மிக சிறப்பாக செய்து தாங்கள் ஒரு தேர்ந்த நடிகர்கள் என்பது போல் நடித்து கவனம் பெற்று இருக்கின்றனர். பல்வேறு காட்சிகளில் மிக மிக சிறப்பாக எதார்த்தமான வசன உச்சரிப்புகளை சிறப்பாக கையாண்டு இருக்கின்றனர். இவர்கள் அனைவரையும் நன்றாக வேலை வாங்கி இருக்கிறார் இயக்குநர் பார்த்திபன். கடமைக்கு சில காட்சிகளில் வந்து செல்கின்றார் யோகி பாபு. ஏதோ போற போக்கில் வரும் யோகி பாபு, லேசாக கிச்சு கிச்சு மூட்ட முயற்சி செய்திருக்கிறார். வழக்கமான போலீஸ் அதிகாரியாக வழக்கமான நடிப்பை வெளிப்படுத்திவிட்டு சென்றிருக்கிறார் நடிகை சுபிக்ஷா. மற்றபடி உடனடித்த மற்ற நடிகர்களும் அவரவர் வேலையை செய்து விட்டு சென்று இருக்கின்றனர். 

கௌமிக் ஆரி ஒளிப்பதிவில் விஞ்ஞானம் சம்பந்தப்பட்ட காட்சிகள் சிறப்பாக காட்சிப்படுத்தப்பட்டுள்ளன. டி இமான் இசையில் பாடல்கள் சுமார், பின்னணி இசை ஓகே. பொதுவாக டி.இமானின் இசை என்றாலே கொஞ்சம் எதிர்பார்ப்பு அதிகமாக இருக்கும். அந்த எதிர்பார்ப்பை இமான் இந்தப் படத்தில் பூர்த்தி செய்ய சற்று தவறி இருக்கிறார். 

புதிய முயற்சியாக இப்படத்தை கொடுத்து இருக்கும் பார்த்திபன், இப்படிப்பட்ட கதைக்கு இந்த மாதிரியும் ஒரு ஆங்கில் இருக்கின்றது என்ற புதிய கோணத்தில் கதையைக் காட்டிய விதத்தை நாம் பாராட்டினாலும் அதற்கான திரைக்கதையில் ஏனோ அவர் சற்று தடுமாறி இருப்பதை மட்டும் ரீ கன்சிடர் செய்திருக்கலாம்.

 

டீன்ஸ் - முயற்சி ஓகே! எழுச்சி குறைவு!!