Skip to main content

ரசிக்க வைத்தாரா இயக்குநர் விக்ரமனின் மகன் - ‘ஹிட் லிஸ்ட்’ விமர்சனம்!

Published on 01/06/2024 | Edited on 01/06/2024
ks ravikumar vijay kanishka hit list movie review

வெற்றி இயக்குநர் விக்ரமன் மகன் விஜய் கனிஷ்கா நாயகனாக அறிமுகமாகும் திரைப்படம் ஹிட் லிஸ்ட். இப்படத்தை மற்றொரு வெற்றியை இயக்குநரான கே.எஸ். ரவிக்குமார் தயாரிக்கிறார் என்ற செய்தி வந்தவுடன் இப்படத்திற்கு எதிர்பார்ப்பு கிளம்பியது. தற்போது வெளியாகி இருக்கும் இத்திரைப்படம் அந்த எதிர்பார்ப்பை பூர்த்தி செய்ததா, இல்லையா?


ஈ, எறும்புக்கு கூட துரோகம் நினைக்காத விஜய் கனிஷ்கா ஐ.டி கம்பெனியில் வேலை பார்க்கிறார். இவர் தன் தாய் சித்தாரா, தங்கை அபி நட்சத்திரா ஆகியோருடன் வசிக்கிறார். ஒரு நாள் இவரது தாயையும் தங்கையையும் முகமூடி அணிந்த ஒருவர் கடத்தி விடுகிறார். அவரை கண்டுபிடிக்க விஜய் கனிஷ்காவுடன் இணைந்து போலீஸ் ஆபீஸர் சரத்குமாரும் களத்தில் குதிக்கிறார். இருவரும் அந்த முகமூடி ஆசாமியை தேடும் சமயத்தில் அந்த முகமூடி சாமி ஹீரோ விஜய் கனிஷ்காவை தொடர்பு கொண்டு வில்லன் கன்னட நடிகர் ராமச்சந்திர ராஜுவை கொலை செய்தால் தாயையும் தங்கையையும் விடுவிப்பதாக கூறுகிறார். தன் வாழ்நாளில் கொசுவை கூட அடித்துக் கொள்ளாத நாயகன் விஜய் கனிஷ்கா, தன் தாய்க்காக யாருக்கும் தீங்கு நினைக்காத கொள்கைகளை விட்டுவிட்டு அந்த வில்லனை போட்டு தள்ளுகிறார். இதனால் மிகுந்த மன உளைச்சலுக்கு ஆளாகும் அவரை மீண்டும் தொடர்பு கொள்ளும் முகமூடி மனிதன் மீண்டும் டாக்டர் கௌதம் மேனனை கொலை செய்ய தூண்டுகிறார். அப்படி அவர் இந்த கொலையையும் செய்தால்தான் அவரின் தாயையும் தங்கையையும் விடுவிப்பதாக கூறுகிறார். ஏற்கனவே செய்த ஒரு கொலையால் மிகுந்த வேதனையும் மன உளைச்சலையும் கொண்டுள்ள நாயகன் விஜய் கனிஷ்கா கௌதம் மேனனை கொலை செய்தாரா இல்லையா? தன் தாய் மற்றும் தங்கையை முகமூடி மனிதனிடமிருந்து மீட்டாரா, இல்லையா? அந்த முகமூடி மனிதனை போலீஸ் ஆபீஸர் சரத்குமார் கண்டுபிடித்தாரா, இல்லையா? என்பதே படத்தின் மீதி கதை. 

ks ravikumar vijay kanishka hit list movie review

கொரோனா காலகட்டத்தில் நடந்த உண்மை சம்பவங்களை அடிப்படையாக வைத்து திரில்லர் பாணியில் உருவாகி இருக்கும் இந்தப் படத்தை மிகவும் விறுவிறுப்பாக கொடுத்து ரசிக்க வைத்திருக்கிறார்கள் இயக்குநர்கள் சூரிய கதிர் மற்றும் கார்த்திகேயன் ஆகியோர். படம் ஆரம்பம் ஆகும் பொழுது சாதரண படம் போல் ஆரம்பித்து போகப் போக வேகம் எடுத்து கதையில் ஒரு பிடிப்பை உருவாக்கி ரசிகர்களை சீட்டு நுனியில் வர வைக்கும் அளவுக்கு சிறப்பான த்ரில்லர் படமாக இப்படம் அனைந்திருக்கிறது. படம் கதைக்குள் பயணம் பட ஆரம்பிக்கும் சமயத்தில் தொடங்கி முடியும் வரை எந்த ஒரு இடத்திலும் தொய்வில்லாமல் மிக வேகமாகவும், அடுத்து என்ன நடக்கும் என எதிர்பார்ப்பை உண்டாக்கும் படியாக சிறப்பாக நகர்ந்து பார்ப்பவர்களுக்கு பதட்டத்தையும் கொடுத்து கைதட்டலையும் பெற்று இருக்கிறது. குறிப்பாக படத்தின் சஸ்பென்ஸை இறுதிக்கட்ட காட்சி வரை எடுத்துச் சென்று நிறைவான திரில்லர் படம் பார்த்த உணர்வை கொடுத்திருக்கிறார்கள் படக்குழுவினர். அதற்கு முத்தாய்ப்பாக வரும் சென்டிமென்ட் காட்சியும் சிறப்பாக அமைந்து பார்ப்பவர்களை கலங்கடிக்க செய்கிறது. இருந்தும் இரண்டாம் பாதியில் இருந்த அழுத்தமும் விறுவிறுப்பும் முதல் பாதியில் சற்றே இல்லாததால் அயர்ச்சியை கொடுக்கிறது. 

நாயகனாக நடித்திருக்கும் விஜய் கனிஷ்கா அறிமுக நாயகன் என்ற உணர்வை தர மறுக்கும் படியாக சிறப்பான நடிப்பை கொடுத்திருக்கிறார். படத்தில் நடிப்புக்கு பெரிதாக ஸ்கோப் இருக்கும் காட்சிகள் அதிகம் இல்லாமல் இருந்தாலும் கொடுத்த காட்சிகளை சிறப்பாக நடித்து அதேசமயம் தன் உடல், பொருள், ஆவி என அனைத்தையும் கொடுத்து ஆக்சன் காட்சிகளில் சிறப்பாக பங்களிப்பு கொடுத்து பாஸ் மார்க் வாங்கி இருக்கிறார். போலீஸ் ஆபீசராக நடித்திருக்கும் சரத்குமார் தன் சிறப்பான அனுபவ நடிப்பை வெளிப்படுத்தி படத்திற்கு பக்கபலமாக அமைந்திருக்கிறார். படத்தின் இன்னொரு நாயகனாக வரும் இவரின் கதாபாத்திரம் சிறப்பாக அமைந்திருக்கிறது. நாயகனின் தாயாராக வரும் சித்தாரா, தங்கையாக வரும் அபி நட்சத்திரா, நண்பனாக வரும் பால சரவணன், ரெடின் கிங்ஸ்லி, நாயகிகளாக வரும் பிக் பாஸ் ஐஸ்வர்யா தத்தா, ஸ்மிருதி வெங்கட், வில்லன்கள் ராமச்சந்திர ராஜு, கௌதம் வாசுதேவ மேனன் ஆகியோர் அவரவருக்கான வேலையை மிக சிறப்பாக செய்து படத்திற்கு வலு சேர்த்து இருக்கின்றனர். குறிப்பாக அப்பாவாக வரும் சமுத்திரகனி சில காட்சிகளே வந்தாலும் மனதில் பதிகிறார். 

ks ravikumar vijay kanishka hit list movie review

படத்தின் ஒளிப்பதிவும் இசையும் படத்திற்கு பக்கபலமாய் அமைந்து படத்தை கரை சேர்க்க உதவி இருக்கிறது. பாடல்களை காட்டிலும் சத்யாவின் பின்னணி இசை சிறப்பு. பெரிதாக பாடல்கள் இல்லாமல் இரண்டரை மணி நேரம் படத்திற்கு என்ன தேவையோ அதற்கான காட்சிகளை மையமாக வைத்து படம் ஆரம்பம் முதல் இறுதி வரை சஸ்பென்ஸ் நிறைந்த திரில்லர் படமாக இருந்து இறுதியில் ஒரு நல்ல மெசேஜை கூறி பார்ப்பவர்களுக்கு நிறைவான படமாக அமைந்திருக்கிறது இந்த ஹிட் லிஸ்ட்.

ஹிட் லிஸ்ட் - நேர்த்தியான திரில்லர்!

சார்ந்த செய்திகள்

Next Story

பார்த்திபனின் புதிய முயற்சி கை கொடுத்ததா? இல்லையா? - டீன்ஸ் விமர்சனம்

Published on 13/07/2024 | Edited on 13/07/2024
Teenz movie Review

வழக்கமாக எப்பொழுதும் வித்தியாசமான திரைப்படங்கள் மூலம் ரசிகர்களை ஈர்க்கும் முயற்சியில் இடைவிடாது ஈடுபட்டுக் கொண்டிருக்கும் நடிகரும் இயக்குநருமான பார்த்திபன் இந்த முறையும் அதேபோல் ஒரு புதிய முயற்சியை டீன்ஸ் படம் மூலம் கொடுத்து இருக்கிறார். 13 சிறுவர்களை வைத்துக்கொண்டு அப்படி என்ன புது முயற்சியை கையில் எடுத்திருக்கிறார் பார்த்திபன் என்பதை பார்ப்போம்.

பள்ளியில் படிக்கும் சிறுவர்கள், வெளிநாடுகளைப் போல் நம் நாட்டிலும் பிள்ளைகளுக்கு சுதந்திரம் கொடுக்க வேண்டும் எனத் தங்கள் ஆதங்கத்தை வெளிப்படுத்துகின்றனர். அதனை நாமே கையில் எடுக்க வேண்டும் என எண்ணும் அந்தச் சிறுவர்கள் அவர்களுக்குள் உள்ள ஒரு பெண்ணின் சொந்த கிராமத்திற்கு ஸ்கூலை கட் அடித்து விட்டு செல்கின்றனர். அந்த ஊரில் ஒரு பேய் இருப்பதாக அந்தப் பெண் சொல்ல அந்தப் பேயை பார்த்து விட வேண்டும் என முடிவெடுத்த 13 சிறுவர்கள் பாதை மாறி ஒரு காட்டுப் பகுதிக்கு சென்று விடுகின்றனர். போன இடத்தில் ஒவ்வொரு சிறுவர்களாக தானாகவே அமானுஷ்யமாக காணாமல் போகின்றனர். இதனால் மற்ற சிறுவர்கள் அனைவரும் மிகவும் அதிர்ச்சியும், பதற்றமும் ஆகி அலறுகின்றனர். தங்கள் உயிரைக் காப்பாற்றிக் கொள்ள அனைவரும் தப்பி ஓடுகின்றனர். வழியில் மீண்டும் ஒருவர் பின் ஒருவராக அமானுஷ்ய முறையில் காணாமல் செல்ல இவர்களுக்கு உதவ பார்த்திபன் வருகிறார். இதையடுத்து அமானுஷ்யமாக காணாமல் போன சிறுவர்கள் எப்படி மாயமானார்கள்? அவர்கள் கிடைத்தார்களா, இல்லையா? இவர்களை பார்த்திபன் காப்பாற்றினாரா, இல்லையா? என்பதே இப்படத்தின் மீதி கதை. 

எப்பொழுதும் புது முயற்சியில் ஈடுபட்டுக் கொண்டிருக்கும் பார்த்திபன் இந்தப் படத்தையும் ஒரு புதுவித கதை கருவை வைத்துக்கொண்டு அதற்கு ஏற்றவாறு புதுவிதமான திரைக்கதை அமைத்து அதன் மூலம் ரசிக்க வைக்க முயற்சி செய்திருக்கிறார். இந்தக் கால ஜென் ஆல்ஃபாவான 13 சிறுவர்களை வைத்துக்கொண்டு அவர்களுக்குள் நடக்கும் ஹைடெக்காண பேச்சுகளும், அதற்கேற்ற அவர்களின் உடல் மொழிகளையும் வைத்துக்கொண்டு அதன் மூலம் தன் திரைக்கதையையும் வித்தியாசமாக அமைத்து அதன் மூலம் புதுவித அனுபவத்தை இந்த டீன்ஸ் மூலம் கொடுத்திருக்கிறார் இயக்குநர் நடிகர் பார்த்திபன். படம் ஆரம்பித்தது முதல் இறுதி வரை ஒரே நேர்கோட்டில் படம் பயணிக்கிறது. முதல் பாதி முழுவதும் அமானுஷ்யம் கலந்த திகிலான காட்சிகளாக படம் நகர்ந்து போக போக இரண்டாம் பாதியில் படம் வேறு ஒரு பாதையில் பயணித்து முடிவில் விஞ்ஞான ரீதியாக இதற்கு தீர்வு காண்பித்து படம் முடிந்திருக்கிறது. முதல் பாதியில் படம் ஆரம்பிக்கும் பொழுது ஏதோ ஒரு புதுமையான விஷயத்தை இப்படம் கொடுக்கப் போகிறது என்ற உணர்வு பார்ப்பவர்களுக்கு ஏற்படுகிறது. அது போக போக அயற்சியை கொடுத்து காட்சிகளில் பெரிதாக எங்கும் திருப்பங்கள் இல்லாமல் ஒரே பிளாட்டாக நகர்ந்து அதே சமயம் கதையிலும் தெளிவில்லாமல் குழப்பமாக நகர்ந்து பார்ப்பவர்களை சற்றே சோதிக்கவும் வைத்திருக்கிறது. பார்த்திபனின் இந்தப் புதிய முயற்சியையும் கண்டிப்பாக பாராட்டலாம் ஆனால், இந்தப் புதிய முயற்சிக்கு அவர் கொடுத்த முக்கியத்துவத்தை சற்றே திரைக்கதையிலும் கொடுத்திருந்தால் இந்தப் படமும் அவரது பட வரிசையில் இன்னொரு மைல் கல்லாக அமைந்திருக்கும். 

Teenz movie Review

படத்தை தயாரித்து இயக்கியது மட்டுமல்லாமல் வழக்கம்போல் படத்திலும் நடித்திருக்கிறார் ராதாகிருஷ்ணன் பார்த்திபன். இந்தப் படத்தில் ஆபத் பாண்தவனாக வரும் அவர், படத்தில் இருக்கும் ஃப்லாசை ஒரு வழியாக போக்கி இறுதிக்கட்டத்தில் காண்ஃபிலிட்டுக்கான சொல்யூஷனையும் கொடுக்கும் கதாபாத்திரத்தில் நடித்து கவனம் ஈர்க்க முயற்சி செய்திருக்கிறார். இவருடன் நடித்த 13 சிறுவர் சிறுமிகளும் மிக மிக சிறப்பான நடிப்பை வெளிப்படுத்தி தேர்ந்த நடிகர்கள் போல் நடித்து கைதட்டல் பெற்று இருக்கின்றனர். அவர்கள் அனைவருமே அவரவருக்கு கொடுத்த கதை பாத்திரத்தை மிக சிறப்பாக செய்து தாங்கள் ஒரு தேர்ந்த நடிகர்கள் என்பது போல் நடித்து கவனம் பெற்று இருக்கின்றனர். பல்வேறு காட்சிகளில் மிக மிக சிறப்பாக எதார்த்தமான வசன உச்சரிப்புகளை சிறப்பாக கையாண்டு இருக்கின்றனர். இவர்கள் அனைவரையும் நன்றாக வேலை வாங்கி இருக்கிறார் இயக்குநர் பார்த்திபன். கடமைக்கு சில காட்சிகளில் வந்து செல்கின்றார் யோகி பாபு. ஏதோ போற போக்கில் வரும் யோகி பாபு, லேசாக கிச்சு கிச்சு மூட்ட முயற்சி செய்திருக்கிறார். வழக்கமான போலீஸ் அதிகாரியாக வழக்கமான நடிப்பை வெளிப்படுத்திவிட்டு சென்றிருக்கிறார் நடிகை சுபிக்ஷா. மற்றபடி உடனடித்த மற்ற நடிகர்களும் அவரவர் வேலையை செய்து விட்டு சென்று இருக்கின்றனர். 

கௌமிக் ஆரி ஒளிப்பதிவில் விஞ்ஞானம் சம்பந்தப்பட்ட காட்சிகள் சிறப்பாக காட்சிப்படுத்தப்பட்டுள்ளன. டி இமான் இசையில் பாடல்கள் சுமார், பின்னணி இசை ஓகே. பொதுவாக டி.இமானின் இசை என்றாலே கொஞ்சம் எதிர்பார்ப்பு அதிகமாக இருக்கும். அந்த எதிர்பார்ப்பை இமான் இந்தப் படத்தில் பூர்த்தி செய்ய சற்று தவறி இருக்கிறார். 

புதிய முயற்சியாக இப்படத்தை கொடுத்து இருக்கும் பார்த்திபன், இப்படிப்பட்ட கதைக்கு இந்த மாதிரியும் ஒரு ஆங்கில் இருக்கின்றது என்ற புதிய கோணத்தில் கதையைக் காட்டிய விதத்தை நாம் பாராட்டினாலும் அதற்கான திரைக்கதையில் ஏனோ அவர் சற்று தடுமாறி இருப்பதை மட்டும் ரீ கன்சிடர் செய்திருக்கலாம்.

 

டீன்ஸ் - முயற்சி ஓகே! எழுச்சி குறைவு!!

Next Story

கதறவிட்டாரா தாத்தா? - இந்தியன் 2 விமர்சனம்

Published on 13/07/2024 | Edited on 13/07/2024
Indian 2 review

பிரம்மாண்ட இயக்குநர் ஷங்கர் இயக்கத்தில் சமீபமாக வெளியான ஐ, 2.0 திரைப்படங்கள் போதிய வரவேற்பை பெறவில்லை. இதனால் 1996 ஆம் ஆண்டு ஷங்கர் இயக்கத்தில் வெளியான இந்தியன் படத்தின் இரண்டாம் பாகத்தை கம் பேக் கொடுப்பதற்காக கையில் எடுத்தார் ஷங்கர். வயதான சுதந்திரப் போராட்ட தியாகி கமல் லஞ்சம் வாங்கும் ஊழல்வாதிகளை மட்டுமல்லாமல் தப்பு செய்த பெற்ற மகனையே கொன்றுவிட்டு வெளிநாட்டுக்கு தப்பி சென்று விடுகிறார். பிறகு எப்பொழுதெல்லாம் லஞ்சம் தலை விரித்து ஆடுகிறதோ அப்போதெல்லாம் இந்தியன் திரும்ப வருவார் என அறிவித்துவிட்டு சென்ற இந்தியன் தாத்தா சேனாபதி 28 வருடங்கள் கழித்து இப்பொழுது உள்ள சூழலில் நடக்கும் ஊழல்களை எதிர்த்து குரல் கொடுக்க மீண்டும் அவர் இந்தியா வந்தால் எப்படி இருக்கும்? என்ற ஒற்றை வரி கதையை வைத்துக்கொண்டு கம் பேக் கொடுக்கும் முயற்சியில் இறங்கி இருக்கும் ஷங்கருக்கு இந்தியன் 2 கை கொடுத்ததா, இல்லையா?

பார்க்கிங் டாக் என்ற யூடியூப் சேனலை நடத்திக் கொண்டிருக்கும் சித்தார்த் மற்றும் குழுவினர் நாட்டில் நடக்கும் ஊழல்களை எதிர்த்து அவர்களுடைய சேனலில் வீடியோ வெளியிட்டு வருகின்றனர். இவர்கள் எவ்வளவோ ஊழல்களை வெளிச்சத்துக்கு கொண்டு வந்தும் ஊரில் எந்த ஒரு மாற்றமும் நிகழாததால் மிகவும் கவலைக்கு ஆளாகும் இவர்கள், எப்படியாவது வெளிநாடு தப்பி சென்ற இந்தியன் தாத்தாவை மீண்டும் இந்தியாவுக்கு கொண்டு வரும் முயற்சியில் இறங்குகின்றனர். கம் பேக் இண்டியன் என்ற ஹேஷ்டாக்கை ட்ரெண்ட் செய்து அதன் மூலம் இந்தியன் தாத்தா சேனாபதியை கவனிக்க வைக்க செய்கின்றனர். தைவானில் வர்மக்கலை ஆசிரியராக 100 வயதையும் கடந்து மிகவும் ஆரோக்கியமாக இருக்கும் இந்தியன் தாத்தா சேனாபதி ஊழல்களை ஒழிக்க மீண்டும் இந்தியா வருகிறார். வந்த இடத்தில் 40 வயதிற்கு குறைவாக இருக்கும் இளைஞர்களுக்கு ஒரு டாஸ்கை கொடுத்து அதை செய்ய சொல்லிவிட்டு இவரும் இந்தியாவில் பல்வேறு மாநிலங்களில் இருக்கும் ஊழல்வாதிகளை தேடி தேடி தன் வர்மக்கலைகள் மூலம் கொல்ல ஆரம்பிக்கிறார். மீண்டும் சிபிஐ இவரை வலை வீசி தேடுகிறது. இதற்கிடையே இவர் இளைஞர்களுக்கு கொடுத்த டாஸ்கால் நடந்த விபரீதம் என்ன? போலீஸ் கையில் மீண்டும் இந்தியன் தாத்தா சிக்கினாரா இல்லையா? என்பதே இந்தியன் 2 படத்தின் மீதி கதை. 

இரண்டு படங்கள் கொடுத்த சறுக்கல்களுக்குப் பிறகு மிகவும் ஜாக்கிரதையாக அதேசமயம் தன் பாணியையும் கைவிடாமல் இரண்டையும் சரிசம தராசில் வைத்து திரைக்கதை அமைத்து அதன் மூலம் படத்தையும் ரசிக்கும்படி கொடுத்திருக்கிறார் இயக்குநர் ஷங்கர். ஏற்கனவே வயது முதிர்ந்த கதாபாத்திரமான இந்தியன் தாத்தா சேனாபதி, இந்தியாவை விட்டு தப்பி செல்கிறார். அவரை மீண்டும் இந்தியாவுக்கு கொண்டு வர எந்த அளவுக்கு லாஜிக் இடிக்காமல் இருக்கும்படியான கதையை தேர்வு செய்ய முடியுமோ அதை சரியாக தேர்வு செய்து அதற்கு ஏற்ப தனக்கே உரித்தான பாணியில் கச்சிதமான திரைக்கதையும் அமைத்து காட்சிகளில் பிரம்மாண்டத்தை காட்டி ரசிகர்களுக்கு விருந்து படைத்திருக்கிறார். இன்றைய காலகட்டத்தில் நடக்கும் ஊழல்களை எதிர்த்து ஒரு யூடியூப் சேனல் வைத்து நடத்திக் கொண்டிருக்கும் இளைஞர்கள் எப்படி எல்லாம் கொதித்து வெகுண்டு எழுந்து அதை தடுக்க நினைக்கிறார்கள் என்ற சுவாரசியமான விஷயத்தை சிறப்பாக கையாண்ட இயக்குநர் ஷங்கர் முதல் பாதியில் அதை மிக சிறப்பாக செய்து ரசிக்க வைத்திருக்கிறார். அதேசமயம் இரண்டாம் பாதியில் இந்தியன் தாத்தா வருகைக்குப் பிறகு அவர் ஒரு பக்கம் தன்பானியில் ஊழல்வாதிகளை கொன்றுவிட்டு இருக்க இன்னொரு பக்கம் யூடியூப் சேனல் நடத்திக் கொண்டிருக்கும் சித்தார்த் அன்ட் கோ சம்பந்தப்பட்ட காட்சிகள் மிக நீண்ட சென்டிமென்ட் காட்சிகளாக விரிகிறது. முதல் பாதி கொடுத்த வேகமும் விறுவிறுப்பும் இரண்டாம் பாதியில் சற்றே மிஸ்ஸிங். அதற்கு படத்தின் நீளமும் தடையாக இருக்கிறது.

படத்தின் நீளத்தை இன்னமும் கூட குறைத்து இருக்கலாம். அதேபோல் முதல் பாதியில் இருந்த சுவாரசியமும் விறுவிறுப்பும் பல்வேறு ஊழல் சம்பந்தப்பட்ட காட்சிகளை விரிவாகவும் சுவாரசியமாகவும் காட்டியதால் அவை ரசிக்கும்படி அமைந்திருந்தது. அதுவே இரண்டாம் பாதியில் வெறும் சென்டிமென்ட் காட்சிகளை மட்டும் வைத்துக்கொண்டு மிக நீளமாக திரைக்கதையை வேண்டுமென்றே இழுத்து கூடவே மிக நீண்ட ஆக்சன் கலந்த சேஸிங் காட்சியை மட்டும் வைத்து விட்டு இந்த இரண்டாம் பாகத்தை முடித்து இருப்பது சற்றே அயற்சியை கொடுத்து கூடவே ஏமாற்றத்தையும் கொடுத்திருக்கிறது. இந்தியன் படத்தின் மூன்றாம் பாகம் படத்தில் பல்வேறு சுவாரஸ்யமான காட்சிகள் நிறைந்து இருப்பதால் அதற்கு ஒரு ட்ரெய்லராக இந்த இந்தியன் 2 படத்தை கொடுத்திருக்கும் சங்கர் திரைக்கதையில் இன்னமும் கூட குறிப்பாக இரண்டாம் பாதியில் சுவாரசியத்தை கூட்டி படத்தின் நீளத்தையும் குறைத்து இருந்தால் இன்னமும் இந்த படம் நன்றாக பேசப்பட்டு இருக்கும். இருந்தும் ஷங்கருக்கு உரித்தான பாணியில் பிரம்மாண்டமும் அதற்கு ஏற்றவாறான உழைப்பும் படம் நெடுக நிறைந்து காணப்படுவதும், அதேசமயம் ஊழல் குறித்த விஷயங்களும் அதற்கான மாஸ் ஆக்சன் காட்சிகளும் கமர்சியலாக மக்களுக்கு ரசிக்கும்படி இருப்பது இவை அனைத்தையும் மறக்கடிக்க செய்து விட்டு படத்தையும் கரை சேர்க்க உதவி இருக்கிறது. குறிப்பாக குடும்பம் குடும்பமாக சென்று இப்படத்தை கண்டிப்பாக மக்கள் ரசிக்கும்படி இப்படத்தை கொடுத்திருக்கிறார். என்னதான் படத்தில் பல மைனஸ்கள், லாஜிக் மீரல்கள் இருந்தாலும் அவைகள் கமல்ஹாசனின் ஸ்கிரீன் ப்ரெசென்ஸ் மற்றும் ஷங்கரின் பிரம்மாண்ட இயக்கம் ஆகியவைகளால் மறக்கடிக்கப்பட்டு ஒரு வெற்றி படமாக இது அமைந்திருக்கிறது.

Indian 2 review

1996 ஆம் ஆண்டு எந்த இடத்தில் இந்தியன் தாத்தா சேனாபதி விட்டாரோ, அதே இடத்தில் இருந்து இப்பொழுது 28 வருடங்கள் கழித்து ஆரம்பித்து மாஸ் காட்டி அதகலப்படுத்தி இருக்கிறார். திரையில் கமல் தோன்றும் காட்சிகள் எல்லாம் தியேட்டர் அதிர்கிறது. குறிப்பாக வர்ம கலைகள் மூலம் அவர் செய்யும் சாகசங்கள் படத்தில் ரசிக்கும்படி அமைந்து கைதட்டல் பெறுகிறது. அதேபோல் பழையபடி அவர் பேசும் மாஸ் வசனங்களும், நாட்டில் நடக்கும் அவலங்களை தன் பஞ்ச் வசனங்கள் மூலம் நையாண்டி செய்வதும் படத்திற்கு மாஸ் கூட்டி இருக்கிறது. இருந்தும் இந்தியன் முதல் பாகத்தில் இருந்த கமல்ஹாசனின் மேக்கப் விஷயங்கள் இந்த படத்தில் சற்றே செயற்கை தனமாக தெரிகிறது. அந்தப் படத்தைக் காட்டிலும் இந்த படத்தில் கமல்ஹாசன் இன்னமும் இளமையாகவே தெரிகிறார்.

அதற்கு இந்த படத்தில் பல்வேறு ஜஸ்டிபிகேஷன் கொடுக்கப்பட்டிருந்தாலும் ஏனோ மனம் அவரை இந்த மேக்கப்பில் ஏற்க சற்று மறுக்கிறது. அதேபோல் செண்டிமெண்ட் காட்சிகளிலும் அவருடைய முகபாவனைகள் முதல் பாகத்தை போல் இருந்த அழுத்தத்தை இந்தியன் 2 வில் கொடுக்க தவறி இருக்கிறது. அதற்கு இந்த பிராஸ்தட்டிக் மேக்கப் சற்று தடையாக இருப்பது போல் தெரிகிறது. மற்றபடி கமல்ஹாசன் வழக்கம்போல் தனது அசுரத்தனமான நடிப்பின் மூலம் இந்த கதாபாத்திரத்தை வேறு ஒரு தளத்திற்கு எடுத்துச் சென்றிருக்கிறார். படத்தில் ஏகப்பட்ட நட்சத்திர பட்டாளமே நடித்திருக்கிறது. சின்ன சின்ன கதாபாத்திரங்களில் கூட பெரிய பெரிய நடிகர்கள் வந்து செல்கின்றனர். அவர்கள் அனைவருமே ஏதோ ஒரு வகையில் நம் மனதில் பதிகின்றனர். அந்த அளவு அவர்களின் கதாபாத்திரமும் அதற்கான அழுத்தமும் மிகச் சிறப்பாக அமைத்துக் கொடுத்திருக்கிறார் இயக்குநர் ஷங்கர். நாயகனாக வரும் சித்தார்த் மற்றும் தந்தை சமுத்திரகனியின் கெமிஸ்ட்ரி மிக மிக சிறப்பாக ஒர்க் அவுட் ஆகியிருக்கிறது.

இரண்டாம் பாதியில் வரும் இவர்களது சென்டிமென்ட் காட்சிகள் நன்றாக மனதில் பதிந்து பார்ப்பவர்களுக்கு கலக்கத்தை கொடுத்து ரசிக்க வைத்திருக்கிறது. இவர்களைத் தாண்டி சித்தார்த் நண்பர்களாக வரும் ஜெகன், பிரியா பவானி சங்கர், ரிஷிகாந்த் ஆகியோர் அவரவர் வேலையை நிறைவாக செய்து மனதில் பதிகின்றனர். நாயகியாக வரும் ரகுல் பிரீத் சிங் சில காட்சிகளே வந்தாலும் அவருக்கு பெரிதாக வேலையும் இல்லை. அதனால் அவர் பெரிதாக ஈர்க்கவும் இல்லை. முக்கிய கதாபாத்திரத்தில் வரும் நெடுமுடி வேணு, டெல்லி கணேஷ், ரேணுகா, இமான் அண்ணாச்சி, மனோபாலா, குல்சான், ஜாகிர் உசேன், தம்பி ராமையா, காளிதாஸ் ஜெயராம், எஸ் ஜே சூர்யா, மற்றும் சிபிஐ அதிகாரிகளாக வரும் பாபி சிம்ஹா மற்றும் விவேக் உட்பட பலர் அவரவர் வேலையை சிறப்பாக செய்து அவர்கள் வரும் காட்சிகளில் எல்லாம் சிறப்பான பங்களிப்பை கொடுத்து மனதில் பதியும்படி நடித்துவிட்டு சென்றிருக்கின்றனர். 

கலை இயக்குனர் முத்துராஜ் படம் முழுவதும் தன் கலை திறமையால் விளையாடி இருக்கிறார். எந்த இடம் ஒரிஜினல், எந்த இடம் செட் என கண்டுபிடிக்காதபடி மிக சிறப்பாக செட்டுகளை அமைத்து அவை மூலம் படத்திற்கு வலு சேர்த்து இருக்கிறார். குறிப்பிட்டுச் சொல்லும்படியாக அந்தந்த காட்சிகள் என சொல்ல முடியாதபடி படம் முழுவதும் தன் ஒளிப்பதிவால் பிரம்மாண்டத்தை இன்னும் ஒரு படி மேலே போய் அடுத்த தளத்திற்கு படத்தை எடுத்துச் சென்றிருக்கிறார் கேமராமேன் ரவிவர்மன். இவரது ஹாலிவுட் தரமான ஒளிப்பதிவு, இன்னும் சிறப்பாக மாற்றி இருக்கிறது. குறிப்பாக படத்தின் பிரம்மாண்ட காட்சிகளான இந்தியன் தாத்தா பயணப்படும் காட்சிகளும், படம் ஊர் ஊராக நகரும் காட்சிகளும் மிக மிக சிறப்பாக காட்சிப்படுத்தப்பட்டுள்ளன.

படத்தின் இன்னொரு நாயகனாக அனிருத்தின் இசை திகழ்ந்து இருக்கிறது. இந்தியன் முதல் பாகத்தில் ஏஆர் ரகுமான் இசையில் அனைத்து பாடல்களும் ஹிட். இதனால் மிகப்பெரிய பிரஷரில் இப்படத்திற்கு இசையமைத்திருக்கும் அனிருத் முதல் பாகம் கொடுத்த ஹிட்டை சரி செய்யும் வகையில் இப்படத்திற்கு பின்னணி இசையை மிக மிக பிரம்மாண்டமாக கொடுத்து அதே சமயம் கமர்சியலாகவும் பின்னி பெடல் எடுத்து இருக்கிறார். சில பாடல்கள் மட்டும் சிறப்பாக அமைந்திருந்தாலும் அதற்கு ஈடு கட்டும் வகையில் பின்னணி இசை மிக மிக சிறப்பாக அமைந்து படத்தை வேறு ஒரு தளத்திற்கு எடுத்துச் சென்று இருக்கிறது. குறிப்பாக இந்தியன் தாத்தா வரும் காட்சிகளில் மற்றும் அவர் சம்பந்தப்பட்ட காட்சிகளில் சிறப்பான மாஸ் கமர்சியல் பின்னணி இசையை கொடுத்து இந்த கால 2கே கிட்ஸ்சையும் குத்தாட்டம் போட செய்திருக்கிறார். 28 ஆண்டுகளுக்குப் பிறகும் இந்தியன் தாத்தா இந்த அளவு பிரபலமாவதற்கு அனிருத் இசை ஒரு பெரிய முக்கிய பங்கு ஆற்றியிருப்பது மிகையாகாது. இவரது இசையே இக்கால இளசுகளுக்கு இடையே இந்தியன் தாத்தாவை கொண்டு சென்று இருக்கிறது. 

Indian 2 review

இந்தியன் 2 படம் முடிந்த பிறகு இந்தியன் 3 படத்திற்கான முன்னோட்ட க் காட்சிகள் திரையில் விரிகின்றன. அவை கொடுத்த கூஸ்பம்ப் மொமெண்ட்ஸும், அவை ஏற்படுத்திய எதிர்பார்ப்பும் இந்த இந்தியன் 2 திரைப்படம், இந்தியன் 3 படத்திற்கான வெறும் ட்ரெய்லராகவே பார்க்கப்படுகிறது. அதனாலயே இப்படத்தை சற்று வேகமாக முடிக்காமல் கொஞ்சம் இழுக்கடிக்கப்பட்டு முடித்திருப்பது கண்கூடாக தெரிந்தாலும் இந்தியன் 3 பாகத்துக்கான லீடாக இந்த இந்தியன் 2 இருப்பதால் ஆயிரம் ஓட்டைகள் இருந்தாலும் அவை நம்மை ரசிக்க வைக்க தவறவில்லை.

இந்தியன் 2 - இட்ஸ் ஜஸ்ட் அ டிரைலர்!