ஆர்.ஜே பாலாஜி - என்.ஜே சரவணன் இயக்கத்தில் கடந்த 2020ஆம் ஆண்டு வெளியான திரைப்படம் மூக்குத்தி அம்மன். இப்படத்தில் நயன்தாரா, ஆர்.ஜே பாலாஜி முதன்மை கதாபாத்திரத்தில் நடித்திருக்க ஊர்வசி, ஸ்மிருதி வெங்கட், இந்துஜா உள்ளிட்ட பலர் முக்கிய கதாபாத்திரங்களில் நடித்திருந்தனர். ஐசரி கணேஷ் தயாரிப்பில் காமெடி ஃபேண்டசி ஜானரில் உருவாகியிருந்த இப்படம் நேரடியாக டிஸ்னி ப்ளஸ் ஹாட்ஸ்டார் ஓடிடி தளத்தில் வெளியாகி நல்ல வரவேற்பை பெற்றது.
மூக்குத்தி அம்மன் முதல் பாகத்திற்குக் கிடைத்த வரவேற்பையடுத்து. இப்படத்தின் இரண்டாம் பாகம் எடுக்க படக்குழு முடிவெடுத்துள்ளதாகத் தகவல் வெளியாகியிருந்தது. இதையடுத்து அம்மன் கதாபாத்திரத்தில் திரிஷா நடிக்கவுள்ளதாக தகவல் உலா வந்த நிலையில், கடந்த ஜூலை 12ஆம் தேதி நயன்தாராவே மீண்டும் அம்மனாக இப்படத்தில் நடிக்கவுள்ளதாக அதிகாரப்பூர்வ அறிவிப்பு வீடியோ வெளியானது. ஆனால் இயக்குநர் மற்றும் மற்ற நடிகர், நடிகைகள் குறித்த அறிவிப்பு அந்த வீடியோவில் இடம்பெறவில்லை.
இந்நிலையில் ஆர்.ஜே பாலாஜி - என்.ஜே சரவணன் ஆகியோர் இணைந்து மூக்குத்தி அம்மன் 2 படத்தை இயக்குவார்கள் என்ற எதிர்பார்ப்புகள் இருந்த நிலையில், தற்போது இயக்குநர் குறித்த தகவல் வெளியாகியுள்ளது. அதன்படி சுந்தர்.சி இப்படத்தை இயக்கவுள்ளதாகக் கூறப்படுகிறது. இவர் கடைசியாக அரண்மனை 4 படத்தை இயக்கியிருந்தார். இப்படம் வசூல் ரீதியாக நல்ல வரவேற்பை பெற்றது. இந்த சூழலில் இவர் மூக்குத்தி அம்மன் 2 படத்தை இயக்கவுள்ளதாக வெளியான தகவல் ரசிகர்களிடையே எதிர்பார்ப்பை ஏற்படுத்தியுள்ளது.
