Skip to main content

"அம்பேத்கரின் குரலை ஓங்கி ஒலிக்க விட்டேன்" - ஃபகத் ஃபாசில் குறித்து மாரி செல்வராஜ்

Published on 08/08/2023 | Edited on 08/08/2023

 

mari selvaraj about fahadh faasil

 

மலையாளத்தில் முன்னணி நடிகராக வலம் வந்த ஃபகத் ஃபாசில், மோகன் ராஜா இயக்கிய 'வேலைக்காரன்' படம் மூலம் தமிழில் அறிமுகமானார். இதில் வில்லனாக நடித்திருந்த அவர் தொடர்ந்து தியாகராஜன் குமாரராஜா இயக்கிய  'சூப்பர் டீலக்ஸ்', லோகேஷ் கனகராஜ் இயக்கிய 'விக்ரம்' உள்ளிட்ட படங்களில் முக்கிய கதாபாத்திரங்களில் நடித்திருந்தார். அடுத்து சமீபத்தில் மாரி செல்வராஜ் இயக்கத்தில் வெளியான 'மாமன்னன்' படத்தில் மீண்டும் வில்லனாக நடித்திருந்தார். இதில் அவர் நடித்திருந்த ரத்னவேல் கதாபாத்திரம் ரசிகர்களால் கொண்டாடப்பட்டு இந்திய அளவில் ட்விட்டரில் ட்ரெண்டிங்கில் இருந்தது. 

 

இந்நிலையில் இன்று பிறந்தநாள் காணும் அவருக்கு திரை பிரபலங்கள், ரசிகர்கள் எனப் பலரும் தங்களது வாழ்த்துகளைத் தெரிவித்து வருகின்றனர். அந்த வகையில் மாரி செல்வராஜ், "வணக்கம் பகத் சார். உங்கள் இரண்டு கண்களும் எனக்கு அவ்வளவு பிடிக்கும். அந்த இரண்டு கண்களை வைத்துதான் என் ரத்தினவேல் கதாபாத்திரத்தை உருவாக்கினேன். ஒரு கண்ணில் பல தலைமுறைகளாக சொல்லிக்கொடுக்கப்பட்ட வாழ்க்கைமுறை சரி என்ற நம்பிக்கையை தீர்க்கமாக வையுங்கள் என்றேன்.

 

மற்றொரு கண்ணில் புதிய தலைமுறைகள் முளைத்து வந்து கேட்கும் வாழ்வியல் முரணுக்கான ஆக்ரோஷ கேள்விகளையும் குழப்பங்களையும் வையுங்கள் என்றேன். மிகச்சரியாக இரண்டு கண்களிலும் இரண்டு நேரெதிர் வாழ்வை வைத்து என் படம் முழுக்க அப்படியே பயணித்தீர்கள். இறுதியாக இரண்டு கண்களையும் மூட சொன்னேன். ஏனென்று கேட்காமல் மூடினீர்கள். உங்கள் நெஞ்சுக்கூட்டுக்குள் டாக்டர்.அம்பேத்கரின் குரலை ஓங்கி ஒலிக்க விட்டேன். அவ்வளவுதான் உடல் சிலிர்த்து நீங்கள் ஓடிவந்து என்னை அணைத்துக் கொண்ட அந்த நொடி தீரா பரவசத்தோடு சொல்கிறேன். இனிய பிறந்தநாள் வாழ்த்துகள் பகத் சார்" எனத் தனது ட்விட்டர் பதிவில் குறிப்பிட்டுள்ளார். 

 

 

 

 

சார்ந்த செய்திகள்

Next Story

“என்னைக் கண்காணித்து வருகிறார்கள்; பதற்றமாக இருக்கிறது” - மாரி செல்வராஜ்

Published on 19/07/2024 | Edited on 19/07/2024
Mari Selvaraj said that im being watched so I'm nervous

தமிழ் சினிமாவில் முன்னணி இயக்குநராக இருக்கும் மாரி செல்வராஜ் தற்போது வாழை என்ற படத்தை இயக்கியுள்ளார். இப்படத்தின் ‘தென் கிழக்கு..’ என்ற முதல் பாடல் வெளியீட்டு விழா நேற்று(18.7.2024) சென்னையில் நடைபெற்றது. இவ்விழாவில், சிறப்பு விருந்தினராக இயக்குநர்கள் ராம், பா.ரஞ்சித், பி.எஸ்.வினோத் ராஜ் உள்ளிட்டவர்களுடன் படக்குழுவினர்களும் கலந்துகொண்டனர்.

இந்நிகழ்வில் பேசிய மாரி செல்வராஜ், “என்னுடைய கலையை என் அரசியலை மக்கள் கொண்ட சென்ற விதம் எனக்குத் தெரியும். அவர்களின் நம்பிக்கைதான், எனக்கு தொடர்ந்து படங்கள் எடுக்க நம்பிக்கை அளித்தது. நான் சினிமாவுக்கு வந்ததும் முதன்முதலில் எழுதிய கதை 'வாழை'தான். இந்தக் கதையை எடுத்தால்தான் அடுத்த படத்திற்குப் போக முடியும் என நம்பினேன். இது மிகவும் பாதிப்பை ஏற்படுத்தின கதை. ‘மாமன்னன்’ படம் வெளியாவதற்கு முன்னரே இப்படத்தை எடுத்துவிட்டேன்.

நான் கிரியேட் செய்கிற எல்லா கதாபாத்திரமும் என் வாழ்க்கையில் பார்த்த மனிதர்களாக உள்ளனர். அவர்கள் இன்னும் வாழ்ந்து வருகின்றனர். அவர்கள் நான் பேசுவதில் எந்தளவு உண்மையுள்ளது, பொய் உள்ளது எனக் கண்காணித்து வருகின்றனர்.அதனால் எனக்குப் பதற்றமாகவுள்ளது. அது மட்டுமில்லாமல் எனக்கு ஒரு கடமை உள்ளது. நான் இப்போது மகிழ்ச்சியாக இருக்க, இப்படத்தில் நடித்த சிறுவர்கள் ராகுல், பொன்வேல் ஆகியோர்  இந்த மேடையில் இருப்பதுதான் காரணம். இருவரும் என் சொந்த அக்கா மற்றும் மாமன் மகன்கள். அந்த வயதில் நான் என்னவாக இருந்தேன் என்று எனக்குத் தெரியும்.

இனிமேல் இந்த கலையின் வழியாக இந்த உலகத்தை அவர்கள் புரிந்து கொள்வார்கள். என் ஊருக்குள் கலை நுழையப்போகிறது என்று சந்தோஷமாக உள்ளது, இனிமேல் பசங்களுக்குப் பொறுப்பு வரும். அந்த வயதில் நான் மூர்க்கமாக  இருந்தேன். என் மண்டையில் தோன்றும் விஷயத்திற்கு நான் என்ன பண்ணுவது என்று பைத்தியம் பிடித்த வயதில் அவர்கள் இங்கு உள்ளனர். நான் முட்டி, மோதி அவர்களை உருவாக்குவதற்கான மேடையை கிரியேட் பண்ணிவிட்டேன் என்பதில் மகிழ்ச்சி. அப்படி என்னை உருவாக்கின இயக்குநர் ராம் சாருக்கு என்னுடைய நன்றி” என்றார்

Next Story

‘மாரி செல்வராஜின் அரசியல் காலத்தின் கட்டாயம்’ - இயக்குநர் ராம் 

Published on 19/07/2024 | Edited on 19/07/2024
Director Ram said that Mari Selvaraj's Political Imperative of Time

மாரி செல்வராஜ் இயகத்தில் உருவாகியுள்ள வாழை படத்தின் முதல் பாடல் வெளியிட்டு நிகழ்ச்சி சென்னையில் நடைபெற்றது. அதில், சிறப்பு விருந்தினராக இயக்குநர்கள் ராம், பா.ரஞ்சித், பி.எஸ்.வினோத் ராஜ் உள்ளிட்டவர்களுடன் படக்குழுவினர்களும் கலந்துகொண்டனர்.

இந்த நிகழ்வில் பேசிய இயக்குநர் ராம், “2018 ஆம் ஆண்டு இதே மேடையில் இருந்துதான் 'பரியேறும் பெருமாள்' படத்தின் மூலம் நீலம் புரோடக்‌ஷன் ஆரம்பமானது. தற்போது அதே மேடையில் இருந்து வாழை மூலம் நவிஸ் ஸ்டுடியோவும் தொடங்கியிருக்கிறது. ரஞ்சித்திற்கும் நன்றி; பறியேறும் பெருமாளுக்கும் நன்றி. 

என்னுடன் யாராவது ஏழு கடல், ஏழு மலை ஏறி இறங்கி இருக்கிறார்கள் என்றால் அது மாரி செல்வராஜ் தான். 'தங்க மீன்கள்'  படத்திற்காக நாகர்கோவிலில் உள்ள அனைத்து மலைகளிலும் என்னுடன் மாரி செல்வராஜ் ஏறி இறங்கியிருக்கிறார். அப்போது அவரிடம் இருந்து நான் ஒன்றக் கண்டுபிடித்தேன். ஒரு பள்ளத்தாக்கு அளவிற்கு மாரி செல்வராஜிடம் கதை கொட்டிக் கிடக்கிறது. அவர் சொன்ன காதல் கதையெல்லாம் படமாக எடுத்தால், எடுத்துக்கொண்டே இருக்கலாம். அவ்வளவு கதை இருக்கிறது. அதிலிருந்து ஒரு சின்ன க்ரஸை எடுத்து எந்தவிதமான க்ரிஞ்சும் இல்லாமல் பண்ணிருக்கிறார்; அதுதான் வாழை. 

’ஆனந்த யாழை..’ பாடல் படப்பிடிப்பு அச்சன் கோவில் மலையில் நடந்தது; அப்போது மழை பெய்ததால் அடுத்தநாள் ஷூட் நடக்குமா? நடக்காதா? என்று பயந்து இரவெல்லாம் தூங்காமல் உக்காந்திருக்கும் போது என்னுடம் மாரிதான் அமர்ந்திருப்பார். மாரி செல்வராஜ் எனக்குக் கிடத்தப் பெரிய துணைவன். அவர் கூட இருக்கும்போது எந்த மலை வேண்டுமானாலும் ஏறலாம்; இறங்கலாம். அதே 'தங்க மீன்கள்' படத்திற்காக வயநாட்டில் உள்ள ஒரு மலையில் படப்பிடிப்பு நடத்தினோம். ரொம்ப கடினமான மலை. அதில் ஏறுவதற்கு 3 மணிநேரமாகும்; இறங்குவதற்கும் 2 மணி நேரமாகும். அங்கே படப்பிடிப்பு நடத்தவே முடியாது. ஆனால் அங்கே ஒரு அருவி இருக்கும் அதனால் அந்த மலையில் படப்பிடிப்பு நடத்தினோம். ‘யாருக்கும் தோழன் இல்லை...’ என்ற பாடலை சூட் செய்தோம்; அப்போது எனக்கொரு தோழனாக இருந்தவர் மாரி செல்வராஜ்.

ஒரு 40 பேர் அந்த மலையில் டெண்ட் அமைத்துத் தங்கிவிட்டோம். எங்களுக்கு 6 மணிக்குள்ளே இரவு உணவு மேலே எடுத்துட்டு வந்திடனும், ஆனால் 6.30 மணியைத் தாண்டியும் சாப்பாடு வரவில்லை. 6 மணிக்கு மேல் வந்தால் மலையில் யானைக் கூட்டம் சுற்றித்திரியும். அந்தமாதிரியான சூழலில் இனிமேல் எங்கே சாப்பாடு வரப்போகிறது என்று எண்ணி பலரும் நாளைக்கு கிளம்பிடுவோம்னு சொல்லிக்கொண்டு இருந்தார்கள். 

அந்தச்சமயத்தில் நானே கீழேபோய் பார்க்கப் புறப்பட்ட போது என்னுடன் வந்தவர் மாரி செல்வராஜ். வழியில் வந்துகொண்டு இருக்கும் போது இட்லி சாம்பார் எல்லாம் கொட்டு நின்றுகொண்டிருந்தார்கள். அப்புறம் திரும்பவும் கீழே சென்று புதிய உணவை வாங்கி எடுத்துக்கொண்டு இரவு நானும் மாரியும் மேலே சென்றோம். யானைகள் எல்லாம் பிளிறியது. வானில் நட்சத்திரம் இருந்தது. அந்த இரவுகளை என்னால் மறக்கவே முடியாது. அப்போதுதான் எனக்குப் புரிந்தது. மாரி செல்வராஜ் மலையேறுபவன். அவரின் கால்கள் மலை ஏறுவதற்காகச் செய்யப்பட்டது. எவ்வளவு எதிர்காற்று அடித்தாலும் மலையில் ஏறக்கூடியவர்.  அவரின் முதல் படத்தில் கறுப்பியைக் கூட்டிக்கொண்டு அச்சன் கோவில் மலையில் ஏறியதிலிருந்து தற்போது வரை மலை ஏறிக்கொண்டே இருக்கிறார். முகடுகளின் மீது கொடியை நட்டுக்கொண்டே இருக்கிறார். எதாவது மலையின் மீது அவர் கொடியை நடும்போது, அல்லது யாராவது மலையில் அவர் நட்ட கொடியைப் பற்றிப் பேசும் போது எனக்கு வருகிற சந்தோஷத்தை எப்படி வார்த்தையாக சொல்வதென்று தெரியவில்லை.

‘மாரி செல்வராஜ் மலைகள் மீது ஏறுவான். மலைகளின் முகடுகளின் மீது நிற்பான். அங்கிருந்து நம்மைக் கூவி அழைப்பான். அவனுடைய கருத்துகளை, காதலை, அன்பை, அரசியலைப் பேசிக்கொண்டேதான் இருப்பான். அதை நாம் கேட்டுத்தான் ஆகவேண்டும்; ஏனெனில் அது காலத்தின் கட்டாயம்.’” என்றார்.