Skip to main content

“தீபக் ராஜா கொலை பற்றி எனக்கு எதுவும் தெரியாது” - ஹிப் ஹாப் ஆதி

Published on 27/05/2024 | Edited on 27/05/2024
Hip Hop Adhi said I know nothing about Deepak Raja case

திருச்சி மாரிஸ் எல்.ஏ.  திரையரங்கில் நேற்று(26.5.2024) ஹிப் ஹாப் தமிழா ஆதி நடித்த பி.டி. சார் திரைப்படம் திரையிடப்பட்டது. திரைப்படத்தின் இடைவேளையில் தோன்றிய படத்தின் கதாநாயகன் ஹிப் ஹாப் ஆதி, ரசிகர்களிடம் இந்த திரைப்படத்தை வெற்றி அடையச் செய்ததற்கு தனது நன்றியை தெரிவித்து மகிழ்ச்சியை வெளிப்படுத்தினார். பின்னர் ரசிகர்கள் அவருடன் செல்பி எடுத்துக் கொண்டனர். திரையரங்கில் ஹிப் ஹாப் பாடலை ஆதி பாட, ரசிகர்களும் அவருடன் இணைந்து பாடினர்.

முன்னதாக செய்தியாளர்களைச் சந்தித்த ஹிப் ஹாப் ஆதி, “படத்தை வெற்றி அடையச் செய்த அனைவருக்கும் நன்றி. இரவு காட்சி திருச்சியில் 800 இருக்கைகளுக்கு மேல் கொண்ட இந்த திரையரங்கில் ஹவுஸ்புல் காட்சிகளாக ஓடுவது எனக்கு மிக்க மகிழ்ச்சியை ஏற்படுத்தியுள்ளது. பெண்கள் கூட்டமாக வந்து படத்தை பார்ப்பது எனக்கு மிகவும் சந்தோஷமாக இருக்கிறது.

இங்கு வந்தபோது ரசிகர்கள் எங்களை வரவேற்ற விதம் எங்களது களைப்பை போக்கிவிட்டது. இத்தகைய ரசிகர்கள் எனக்கு கிடைத்தது மிகவும் பெருமையாக உள்ளது. நான் கொடுத்து வைத்தவன். சில யூடியூப்களில் இத்திரைப்படத்தை பற்றி நெகட்டிவ் கமெண்ட்ஸ் வருவதை பற்றி எனக்கு கவலை இல்லை. அது அவர்களின் கருத்து. திரையரங்குகளில் இந்த படத்தின்  வெற்றியை நீங்களே பார்க்கின்றீர்கள். அப்படி எதுவும் குறை இருந்தால் அதை அடுத்தடுத்த படங்களில் நிவர்த்தி செய்வேன். தொடர்ந்து நல்ல படைப்புகளை தருவேன் நடிகர்,  இசையமைப்பாளர், ஹிப் ஹாப் பாடகர் என என்னை அனைத்து பரிமாணங்களிலும் பார்க்கலாம். நான் கலைஞனாக சமுதாய கருத்துள்ள படைப்புகளை கொடுக்கவே விருப்பப்படுவேன்” என்றார்.

தொடர்ந்து பத்திரிக்கையாளர்களின் கேள்விக்கு பதிலளித்து வந்த ஆதியிடம், நெல்லையில் தீபக் ராஜா கொல்லப்பட்டதற்கு பா.ரஞ்சித்தின் கருத்து குறித்து நீங்கள் என்னை நினைக்கிறீர்கள் என்று கேள்வி எழுப்பபட்டது. அதற்கு,  ஆணவக் கொலையா? என்று கேட்ட ஆதி, எனக்கு இந்த கொலையைப் பற்றி எதுவும் தெரியாது; முதலில் என்ன நடந்தது என்று தெரிந்துகொள்கிறேன். தெரியாததைப் பற்றி எப்படி கருத்துசொல்ல முடியும். ஆணவக் கொலைக்கு என்றைக்கும் நான் எதிரானவன்; நான் மட்டுமல்ல இங்க இருக்க எல்லாரும் ஆணவக் கொலைக்கு எதிரானவர்கள்தான் என பதிலளித்தார்.

மேலும், “ஆணவக் கொலைக்கு எதிராக நான் சினிமாவிற்கு வருவதற்கு முன்பே ஹிப் ஹாப் பாடல் எழுதியுள்ளேன்” என கூறி அப்பாடலில் சில வரிகளை பாடிக் காட்டினார்.

சார்ந்த செய்திகள்

Next Story

பா.ரஞ்சித்திற்கு எதிராக பரமக்குடியில் புகார்

Published on 25/05/2024 | Edited on 25/05/2024
complaint against pa ranjith

திருநெல்வேலி மாவட்டம் நாங்குநேரி, வாகைகுளம் பகுதியைச் சேர்ந்தவர் தீபக் ராஜா (வயது 35). இவர் மீது கொலை உட்பட பல்வேறு வழக்குகள் நிலுவையில் உள்ள நிலையில் கடந்த 20ஆம் தேதி மதியம் 02:00 மணியளவில், தான் திருமணம் செய்து கொள்ளும் பெண் மற்றும் அவரது தோழிகளுடன் சேர்ந்து கே.டி.சி நகர் பகுதியில் உள்ள ஹோட்டலுக்கு சாப்பிட சென்றுள்ளார். பின்பு தனது வாகனத்தை எடுப்பதற்காக வெளியே வந்த போது, அங்கு மறைந்திருந்த மர்ம கும்பல் தீபக் ராஜாவை சரமாரியாக வெட்டி படுகொலை செய்தது. இதில் சம்பவ இடத்திலேயே தீபக் ராஜா துடிதுடித்து உயிரிழந்தார்.

இந்த கொலை வழக்கு தொடர்பாகத் திருநெல்வேலி மாநகர காவல் ஆணையர் தலைமையில் ஆறு தனிப்படைகள் அமைக்கப்பட்டு விசாரணை நடந்து வருகிறது. மேலும் கொலை வழக்குடன் எஸ்.சி., எஸ்.டி. வன்கொடுமை தடுப்புச் சட்டம் உள்ளிட்ட 5 பிரிவின் கீழ் வழக்குப்பதிவு செய்யப்பட்டது. இதற்கிடையே இந்தக் கொலை வழக்கில் தொடர்புடைய குற்றவாளிகளைக் கைது செய்த பிறகே தீபக் ராஜ் உடலை வாங்குவோம் எனக் கூறி அவரது உறவினர்கள் போராட்டம் நடத்தினர்.

இந்தச் சம்பவம் தமிழகத்தில் பரபரப்பைக் கிளப்பிய நிலையில், பலரும் தங்களது கண்டனங்களைத் தெரிவித்தனர். அந்த வகையில் இயக்குநர் பா.ரஞ்சித் நடத்தி வரும் நீலம் பண்பாட்டு மையம், அவர்களது எக்ஸ் பக்கத்தில், “திருநெல்வேலியில் மீண்டும் ஒரு சாதிய தீண்டாமை படுகொலை, நீலம் பண்பாட்டு மையம் மிக வன்மையாகக் கண்டிக்கிறது. கடந்த 2021-ஆம் ஆண்டு பாளையங்கோட்டை சிறையில் சாதிவெறி கும்பல்களால்  படுகொலை செய்யப்பட்ட முத்துமனோவின் நண்பர் பட்டியலின சமூகத்தைச் சேர்ந்த சகோதரர் தீபக்ராஜா, பாளையங்கோட்டையில் உணவகத்திற்கு முன்பு படுகொலை செய்யப்பட்டுள்ளது பெரும் அவலம். சக மனிதனைப் படுகொலை செய்யும் மாற்றுச் சமூகத்தைச் சேர்ந்த சாதிவெறி பிடித்த குற்றவாளிகளை உடனடியாக எஸ்.சி.எஸ்.டி வன்கொடுமை தடுப்புச்சட்டத்தில் கைது செய்து பாதிக்கப்பட்ட குடும்பத்திற்கு நீதி வழங்கிட வேண்டும்” எனக் குறிப்பிடப்பட்டிருந்தது. 

இந்த நிலையில் பா.ரஞ்சித் தென்மாவட்டங்களில் சாதிய மோதலை தூண்டி விடுகிறார் எனக் கூறி ராமநாதபுரம் பரமக்குடி டி.எஸ்.பி சபரிநாதனிடம் புகார் கொடுக்கப்பட்டுள்ளது. இதைத் தென் தமிழக கட்சி மாநில ஒருங்கிணைப்பாளர் கொடுத்துள்ளார். அந்தப் புகாரில் குறிப்பிட்ட சமுதாயத்தின் பெயரைக் குறிப்பிட்டு குற்றம் சுமத்தப்பட்டுள்ளதால், அவர் மீது நடவடிக்கை எடுக்க வேண்டும் எனக் கோரிக்கை வைக்கப்பட்டுள்ளது.

Next Story

இந்திய போர் வீரர்களின் கதை - உலக சினிமா தயாரிக்கும் பா.ரஞ்சித்

Published on 16/05/2024 | Edited on 16/05/2024
pa.ranjith papa buka movie update

இயக்குநர் மற்றும் தயாரிப்பாளரான பா.ரஞ்சித் தற்போது தங்கலான் பட பணிகளில் உள்ளார். விக்ரம், பார்வதி, மாளவிகா மோகனன் உள்ளிட்ட பலர் நடிக்கும் இந்த படம் விரைவில் வெளியாகவுள்ளது. இதனிடையே நீலம் புரொடக்‌ஷன் மூலமாக படங்களையும் தயாரித்து வருகிறார். இதில் அட்டகத்தி தினேஷ் நடிக்கும் தண்டகாரண்யம், மாரி செல்வராஜ் இயக்கத்தில் துருவ் விக்ரம் நடிக்கும் பைசன் உள்ளிட்ட படங்கள் தயாரிப்பில் உள்ளது. 

இந்த நிலையில் பா.ரஞ்சித் தயாரிக்கும் அடுத்த பட அறிவிப்பு வெளியாகியுள்ளது. இப்படத்தை டாக்டராக இருந்து இயக்குநராக மாறி மூன்று தேசிய விருதுகள் வாங்கிய மலையாள இயக்குநர் டாக்டர்.பிஜு இயக்குகிறார். ரிதாபரி சக்ரவர்த்தி மற்றும் பிரகாஷ் பாரே ஆகியோர் இப்படத்தில் முதன்மை கதாபாத்திரத்தில் நடிக்கின்றனர். பாப்பா புக்கா (Papa Buka) என்ற தலைப்பில் உருவாகும் இப்படம் ரிக்கி கேஜ் இசை இசையில் உருவாகிறது. இப்படம் இந்திய வரலாற்று ஆசிரியர்களான ரொமிலா மற்றும் ஆனந்த் இருவரும், இரண்டாம் உலகப் போரின் போது ஜப்பானியர்களுக்கு எதிராக பிரிட்டிஷ் மற்றும் ஆஸ்திரேலியப் படைகளுடன் போரிட்ட இந்திய வீரர்களைப் பற்றி ஒரு புத்தகம் எழுத, பப்புவா நியூ கினியாவின் போர்ட் மோர்ஸ்பிக்கு செல்கின்றனர். அவர்களுக்கு 80 வயதான போர் வீரர் ஒருவர் வழிகாட்டியாக உதவுகிறார். இந்த பயணத்தை மையமாக வைத்து இப்படம் உருவாகுவதாக தெரிவிக்கப்பட்டுள்ளது. 

ரிக்கி கேஜ் இசையமைக்கும் இப்படத்தை நீலம் புரொடக்‌ஷன் நிறுவனத்துடன் இணைந்து பல நிறுவனங்கள் தயாரிக்கிறது. நீலம் மற்றும் சிலிக்கான் மீடியா ஆகிய இந்திய நிறுவனங்களுடன் பப்புவா நியூ கினி நாட்டின் ‘நேட்டிவ் ஆர்ட்ஸ் அண்ட் ஃபேஷன் அகாடமி’யும் இணைந்து இப்படத்தை தயாரிக்கிறது. படத்தின் அறிவிப்பு போஸ்டர் பலரது கவனத்தை ஈர்த்துள்ளது. மேலும், இரு நாடுகளில் இருக்கும் நிறுவனங்கள் ஒரு படத்திற்கு இணைந்துள்ளதால் இப்படத்திற்கு எதிர்பார்ப்பு அதிகரித்துள்ளது. ஜுன் முதல் படப்பிடிப்பு தொடங்கவுள்ளதாக அறிவிக்கப்பட்டுள்ளது. இந்தியா - பப்புவா நியூ கினியா இணைந்து தயாரிக்கும் முதல் படமாக இப்படம் உருவாகிறது.