Skip to main content

"அண்ணன் ஜெயிச்சி வரும்போது நானும் குடும்பத்தோடு வர்றேம்மா" வைகோ வீட்டில் விஜயகாந்த்! - கடந்த கால தேர்தல் கதைகள் #6 

Published on 15/04/2019 | Edited on 15/04/2019

உடல்நலம் குன்றியிருந்த தேமுதிக தலைவர் அமெரிக்காவில் சிகிச்சை பெற்றுத் திரும்பினார். நாடாளுமன்ற தேர்தல் கூட்டணிக்கான பேச்சுவார்த்தைகளில் அவர் கலந்துகொண்டாலும் தொண்டர்களிடம் நேரடியாகப் பேசக்கூடிய நிகழ்வுகள் எதிலும் கலந்துகொள்ளவில்லை. தேர்தல் பிரச்சாரத்தில் அவர் கலந்துகொள்வார் என்று அவ்வப்போது கூறப்பட்டது. அவரே ஒரு பேட்டியில் மருத்துவர் அறிவுரைப்படி பிரச்சாரத்தில் கலந்துகொள்வேன் என்று கூறினார். ஆனாலும், ஆரம்ப கட்ட தேர்தல் பிரச்சாரங்களில் எதுவும் கலந்துகொள்ளவில்லை. நாளை பிரச்சாரம் முடியவிருக்கும் நிலையில் இன்று சென்னையில் விஜயகாந்த் அதிமுக கூட்டணிக்கு ஆதரவாகப் பிரச்சாரம் செய்வார் என்று நேற்று ஒரு அறிவிப்பு வந்தது. வடசென்னையில் விஜயகாந்த்தின் குரலைக் கேட்க தொண்டர்கள் ஆர்வத்துடன் கூடினார்கள்.

 

vaiko with vijayakanth



கடந்த 2014 நாடாளுமன்ற தேர்தலில் பாஜக அமைத்த கூட்டணியில் தேமுதிக, பாமக, மதிமுக உள்ளிட்ட பல கட்சிகள் இருந்தன. அதில் மதிமுக - தேமுதிக இரண்டு கட்சித் தலைவர்களிடையே நல்ல உறவும் நெருக்கமும் இருந்தது. பாமக - தேமுதிக இரண்டு கட்சிகளும் சற்று விலகியே நின்றிருந்தன. தேர்தலுக்கு முன்பும் தேர்தலுக்கு பின்பும் அவர்களிடையே நல்லுறவு இல்லை. இப்பொழுது மதிமுக, திமுக தலைமையிலான கூட்டணிக்கு சென்றுவிட்டது. தேமுதிகவும் பாமகவும் பாஜகவுடன் அதிமுக தலைமை என்று சொல்லப்படும் கூட்டணியில் இருக்கின்றன. இப்பொழுது முழு வீச்சில் பிரச்சாரத்தில் கலந்துகொள்ள முடியாத நிலையில் இருக்கும் விஜயகாந்த், கடந்த 2014 நாடாளுமன்ற தேர்தலில் தமிழ்நாடு முழுவதும் சுழன்று பிரச்சாரம் செய்தார். அப்போது அவர் கலிங்கப்பட்டியில் உள்ள மதிமுக தலைவர் வைகோ வீட்டிற்கும் சென்றார். 

கடந்த நாடாளுமன்ற தேர்தலின்போது விஜயகாந்த் தன் இரண்டாவது கட்ட தேர்தல் பிரச்சாரத்தைத் தொடங்குவதற்கு முன்பு சென்னையில் இருந்தபோது அவரை போனில் தொடர்புகொண்ட வைகோ, "கேப்டன்.. நான் இப்ப கலிங்கப்பட்டி வீட்டிலே இருக்கேன். எங்கம்மா உங்ககிட்டே பேசணும்னு சொன்னாங்க கேப்டன்" என்று சொல்ல, விஜயகாந்த்தும் ஆர்வத்தோடு, "அம்மாகிட்டேயா.. கொடுங்கண்ணே"ன்னு சொல்லியிருக்கிறார். விஜயகாந்த்கிட்டே போனில் பேசிய வைகோவின் அம்மா மாரியம்மா, "தம்பீ உங்களை போட்டோவுல பார்த்திருக்கேன், டி.வி.யில பார்த்திருக்கேன். உங்களைப் பத்தி, உங்க பூர்வீகம் பத்தியெல்லாம் புள்ள சொல்லுச்சு. இங்கதான் உங்கம்மா பொறந்த ஊராமே, நீங்களும் எனக்குப் புள்ளதான். இங்கே பிரச்சாரத்துக்கு வரும்போது எங்க வீட்டுக்கு வாங்க. எனக்கு வயசாயிடிச்சி. என்னால அங்க வந்து உங்களைப் பார்க்க முடியாது. உங்களை நேரிலே பார்க்க ஆசையா இருக்குது தம்பி"ன்னு அன்போடு சொல்ல, விஜயகாந்த்தும் நெகிழ்ந்து போய், "என் அம்மாவைப்போலத்தான் நீங்களும். உங்க வீட்டுக்கு வந்து கண்டிப்பா பாக்குறேன். அது உங்க வீடல்ல. நம்ம வீடு.. வந்து சாப்பிடுறேம்மா" என்று சொன்னாராம்.

 

vijayakanth at vaiko's house



பின்னர் தென்தமிழகத்தில் தனது பிரச்சாரப் பயணத்தின் போது, வைகோ வீட்டிற்குச் சென்றார் விஜயகாந்த். கலிங்கப்பட்டி வீட்டில் வைகோ அம்மாவும் உறவினர்களும் இருந்திருக்கிறார்கள். எல்லோரையும் விஜயகாந்த்துக்கு வைகோ அறிமுகப்படுத்தி வைத்திருக்கிறார். வீட்டில் விடுதலைப்புலிகள் தலைவர் பிரபாகரனோடு வைகோ இருந்த படத்தை விஜயகாந்த் ஆச்சரியமாகப் பார்க்க, தோணியிலே ஈழத்துக்குப் போனப்ப உதவியவரை விஜயகாந்த்திடம் வைகோ அறிமுகப்படுத்தினார். பின்னர்  அவரை சாப்பிட அழைத்தார் வைகோ. தோசை, வடை, தேங்காய் சட்னி, தக்காளி சட்னி என்று டிபன் பரிமாறப்பட, ருசித்து சாப்பிட்ட விஜயகாந்த்துக்கு அல்வாவும் பரிமாறப்பட்டது.

விருந்துக்குப் பிறகு வீட்டில் உள்ள அறையில் இரண்டு பேரும் 15 நிமிடம் பேசியிருக்கிறார்கள். பேசியது சம்பந்தமாக இரண்டு பேருமே தங்களுக்கு வேண்டியவர்களிடம் சொல்லியிருக்கிறார்கள். அதாவது, தே.மு.தி.க நின்ற தொகுதிகளில் பா.ம.ககாரர்கள் சரியாக  ஒத்துழைப்பு தருவதில்லையென்று விஜயகாந்த் சொன்னதோடு, 'சேலத்தில் சுதீஷை நிற்கச் சொன்னதே அன்புமணிதான். ஆனா சேலத்துல உள்ள பா.ம.க.காரங்க எங்களோட ஒட்டாம இருக்காங்க' என்று வருத்தத்தோடு விஜயகாந்த் சொல்ல, அவரை சமாதானப்படுத்திய வைகோ, "விடுங்க கேப்டன், அடுத்த சட்டமன்றத் தேர்தலை நாமதான் நிர்ணயிக்கப்போறோம். நாம இனி இணைந்தே இருப்போம்" என்று சொல்லியிருக்கிறார். கலிங்கப்பட்டி வீட்டிலிருந்து விஜயகாந்த் புறப்படும்போது வைகோ அம்மாவிடம், "அண்ணன் வைகோ ஜெயிச்சி மத்திய மந்திரியா இங்கே வரும்போது நானும் குடும்பத்தோடு நம்ம வீட்டுக்கு வர்றேம்மா" என்று  சொல்லிவிட்டுக் கிளம்பியிருக்கிறார்.

நாடாளுமன்ற தேர்தலைத் தொடர்ந்து சட்டமன்ற தேர்தலிலும் மக்கள் நல கூட்டணியுடன் தேமுதிக சேர்ந்து போட்டியிட்டது.  இப்படியிருந்த இரு கட்சிகளும் தலைவர்களும் இன்று எதிரெதிர் முகாம்களில் இருக்கிறார்கள். அரசியலில் எதுவும் நிரந்தரமில்லை, இப்போதிருக்கும் நிலையும் நிரந்தரமில்லை. 

 

 

 

Next Story

“ஏ.ஐ மூலம் விஜயகாந்தைத் திரைப்படங்களில் பயன்படுத்தக் கூடாது” - பிரேமலதா விஜயகாந்த்

Published on 05/07/2024 | Edited on 05/07/2024
 Premalatha Vijayakanth Vijayakanth should not be used in films by AI without permission

நடிகரும், தே.மு.தி.க தலைவருமான நடிகர் விஜயகாந்த் கடந்த ஆண்டு டிசம்பர் மாதம் மறைந்தார். அவரது மறைவுக்கு பலரும் அஞ்சலி செலுத்தினர். இதன் பிறகு, மறைந்த விஜயகாந்தை ஏ.ஐ தொழில்நுட்பத்தின் மூலம் பலரும் நடிக்க வைப்பதாகத் தகவல் வெளியானது. குறிப்பாக இயக்குநர் வெங்கட் பிரபு இயக்கத்தில் விஜய் நடிப்பில் உருவாகும் ‘தி கிரேட்டஸ்ட் ஆஃப் ஆல் டைம்’ படத்தில் மறைந்த விஜயகாந்தை ஏ.ஐ தொழில்நுட்பத்தின் மூலம் நடிக்க வைத்திருப்பதாக கூறப்படுகிறது. அதனைத் தொடர்ந்து, பலரும் இந்த விஷயத்தை கையில் எடுக்கயிருப்பதாக அவ்வப்போது கூறி வந்தனர். 

இந்த நிலையில், விஜயகாந்தின் மனைவியும், தே.மு.தி.க பொதுச் செயலாளருமான பிரேமலதா விஜயகாந்த், அனுமதியின்றி எந்தவிதமான அறிவிப்பையும் வெளியிடக் கூடாது எனத் தெரிவித்துள்ளார். இது தொடர்பாக பிரேமலதா விஜயகாந்த் வெளியிட்ட அறிவிப்பில் கூறியதாவது, ‘தமிழ் திரை உலகைச் சேர்ந்த அனைவருக்கும் அன்பான வேண்டுகோள். விஜயகாந்தை ஏ.ஐ தொழில்நுட்பத்தின் (AI TECHNOLOGY) மூலம் திரைப்படங்களில் பயன்படுத்த இருப்பதாகத் தொடர்ந்து செய்திகள் வருகிறது. எனவே, இதுபோன்ற செய்திகள் ஆடியோ வெளியீட்டு விழாவில் வருகின்றது.

எங்களிடம் முன் அனுமதியில்லாமல் இது மாதிரியான அறிவிப்புகள் வருவதை தவிர்த்துக் கொள்ளவேண்டும். எந்த விதத்தில் பயன்படுத்துவதாக இருந்தாலும் முறையாக அனுமதி பெற்ற பின்பே அறிவிப்பை வேளியிட வேண்டும். ஏ.ஐ தொழில்நுட்பத்தின் (AI TECHNOLOGY) மூலம் திரைப்படங்களில் பயன்படுத்த இருப்பதாக இதுவரை யாகும் எந்த அனுமதியும் பெறவில்லை என்பதை நாங்கள் தெரிவித்துக்கொள்கிறோம். எனவே அனுமதியில்லாமல் பத்திரிகை செய்திகள், ஊடகச் செய்திகள், ஆடியோ வெளியீட்டு விழா போன்ற நிகழ்ச்சிகளில் வெளியிடுவதை தவிர்த்துக்கொள்ள வேண்டும் என்று அன்புடன் கேட்டுக்கொள்கிறோம்’ எனக் குறிப்பிடப்பட்டுள்ளது. 

Next Story

தரப்பட்ட இரண்டு நிமிடம்; தரவுகளுடன் வலியுறுத்தல் - மக்களவையில் துரை வைகோ எம்.பி!

Published on 03/07/2024 | Edited on 03/07/2024
 Durai Vaiko's Maiden Speech in the Lok Sabha

இந்திய நாடாளுமன்றத்தின் 18 ஆவது மக்களவைத் தேர்தல் சமீபத்தில் நடைபெற்று முடிந்தது. தேர்தலுக்குப் பிறகு கடந்த ஜூன் 24 ஆம் தேதி முதன்முறையாக நாடாளுமன்றம் கூடியது. ஜூன் 25 ஆம் தேதி மக்களவை உறுப்பினராக நாடாளுமன்றத்தில் துரை வைகோ பதவியேற்றுக் கொண்டார். இந்நிலையில், குடியரசுத் தலைவரின் உரைக்கு நன்றி தெரிவிக்கும் தீர்மானத்தின் மீதான விவாதத்தில் நேற்று (02.07.2024) பங்கேற்று துரை வைகோ தன்னுடைய கன்னிப்பேச்சினை பதிவு செய்தார்.

துரை வைகோ பேசியதாவது 'ஜனநாயகக் கோவிலான இந்திய நாடாளுமன்றத்தில் எனது கன்னி உரையை நிகழ்த்த வாய்ப்பளித்ததற்காக நன்றி தெரிவிக்கிறேன்'. திருச்சி நாடாளுமன்றத் தொகுதியைச் சேர்ந்த பத்து இலட்சத்திற்கும் அதிகமான மக்களின் எதிர்பார்ப்பையும் நம்பிக்கையையும் என்னுடன் கொண்டு வந்திருக்கிறேன். இந்த நாட்டில் பற்றி எரியும் ஆயிரம் பிரச்சனைகள் இருந்தாலும் ஐந்து முக்கியமான பிரச்சனைகள் குறித்து கவனப்படுத்த விரும்புகிறேன்.

முதலாவதாக, இந்தியாவின் பொறியியல் ஆற்றல் மையமான திருச்சிக்குப் புத்துயிர் அளிப்பது தொடர்பாகப் பேச விரும்புகிறேன். பெல் தொழிற்சாலை, OFT, கோல்டன் ராக் ரயில்வே பணிமனை மற்றும் HAPP ஆகிய பொதுத்துறை நிறுவனங்களில் வேலை வாய்ப்பை அதிகப்படுத்தவும், இதை நம்பியிருக்கும் சிறு, குறு நிறுவனங்களுக்கு பணி வாய்ப்புகளை அதிகப்படுத்தி திருச்சி நகரத்தின் பொருளாதார வளத்தை உயர்த்தவும் கோரிக்கை வைக்கிறேன்.

இரண்டாவதாக, இலங்கை கடற்படையின் ஆக்கிரமிப்புகளையும் வன்முறைகளையும் பல ஆண்டுகளாக எதிர்கொண்டு வரும் தமிழக மீனவர்களின் அவல நிலையைக் கூற விரும்புகிறேன். இலங்கை கடற்படையால் பாதிக்கப்படும் பெரும்பாலான மீனவர்கள் பின்தங்கிய மாவட்டங்களான இராமநாதபுரம் மற்றும் புதுக்கோட்டை மாவட்டங்களைச் சேர்ந்தவர்களாக இருக்கிறார்கள். இதுவரை 3020 மீனவர்கள் கைது செய்யப்பட்டு 340 மீன்பிடி படகுகள் பறிமுதல் செய்யப்பட்டுள்ளன. நமது மீனவர்களின் எதிர்காலத்தைப் பாதுகாக்க இப்பிரச்சனைக்கு நிரந்தர தீர்வு காண வேண்டும். கட்சத்தீவை மீட்கவும், தமிழக மீனவர்களின் பாரம்பரிய மீன்பிடி உரிமைகளை நிலைநாட்டவும் ஒன்றிய அரசு உடனடியாக உறுதியான நடவடிக்கை எடுக்க வேண்டும் எனக் கேட்டுக் கொள்கிறேன்.

மூன்றாவதாக, மகாநதி, கோதாவரி, கிருஷ்ணா, பெண்ணாறு, காவிரி, வைகை, குண்டாறு ஆகிய தென்னக நதிகளை இணைப்பது முழு தீபகற்பப் பகுதிக்கும் வரப்பிரசாதமாக அமையும் எனக் கூறி, காவிரி - வைகை - குண்டாறு இணைப்புத் திட்டத்திற்கு மாநில சுற்றுச்சூழல் பாதிப்பு மதிப்பீட்டு ஆணையம் ஒப்புதல் அளித்துள்ளது. 7000 கோடி இதற்கு தேவைப்படும் நிலையில் தமிழக அரசு தனது சிறிய ஆதாரங்களுடன் இப்பணியை ஏற்கெனவே முன்னெடுத்துள்ளது. எவ்வாறாயினும் தீபகற்ப நதிகளை இணைக்கும் முழுத் திட்டத்தைத் தொடங்கவும், நிதி அளிக்கவும் ஒன்றிய அரசு முன் வரும் என நம்புகிறேன். இதனால் ஐந்து மாநிலங்களின் வறட்சி பாதித்த பகுதிகள் குறிப்பாக, எனது தொகுதிக்கு உட்பட்ட திருச்சி, புதுக்கோட்டை, கந்தர்வக்கோட்டை பகுதிகள் பயனடையும். தென்னக நதிகள் இணைப்பால் ஒரு கோடிக்கும் அதிகமாக மக்கள் பயனடைவார்கள். ஆகவே, தேவையான முன் முயற்சிகளை ஒன்றிய அரசு எடுக்க வேண்டும்.

ஒன்றிய அரசு மூன்று புதிய வேளாண் சட்டங்களை அறிமுகப்படுத்தியபோது, அதற்குக் கடுமையான எதிர்ப்பு தெரிவித்து விவசாயிகள் கடுமையான வெய்யிலிலும், மழையிலும், பட்டினியிலும் போராட்டம் நடத்தினார்கள். இருப்பினும் அவர்களின் குரல்கள் ஒடுக்கப்பட்டன. விவசாயிகள் தாக்கப்பட்டனர். அவர்கள்மீது கண்ணீர்ப்புகைக் குண்டுகள் வீசப்பட்டன. விவசாய விளைபொருட்களுக்கு லாபகரமான விலையை பெற்றுத்தரவும், விவசாயிகளுக்கு நிலையான சூழலை உருவாக்கவும் ஒன்றிய அரசு தவறிவிட்டது. அவர்களின் போராட்டங்களை ஒன்றிய அரசு புரிந்துகொள்ளவில்லை. ஆகவே, விவசாயிகளுக்கு நம்பிக்கையையும், சிறந்த எதிர்காலத்தையும் உருவாக்க வேண்டும் என ஒன்றிய அரசை வலியுறுத்துகிறேன்.

தேசிய தேர்வு முகமையால் நடத்தப்படும் நீட் மற்றும் இதர தேர்வுகளில் நடைபெற்றுள்ள முறைகேடுகள் மற்றும் குளறுபடிகளை நீக்குவதற்கு உண்டான வழிமுறைகள் எதுவும் குடியரசு தலைவர் உரையில் இடம்பெறாததற்கு வருந்துகிறேன். தமிழ்நாடு முதலமைச்சர் மாண்புமிகு மு.க.ஸ்டாலின் அவர்களால் தமிழக சட்டமன்றத்தில் ஒருமனதாக நிறைவேற்றப்பட்ட நீட் விலக்கு மசோதா 2022 -க்கு குடியரசு தலைவர் ஒப்புதல் அளிக்க வேண்டும் என வலியுறுத்துகிறேன்.நீட் தேர்வின் பாதிப்புகளைக் குறிப்பிட்டு, ஏழை எளிய அடித்தட்டு மாணவர்களின் நலன் கருதி நீட் தேர்வை முழுமையாக தடை செய்ய வேண்டும் என வலியுறுத்துகிறேன்.

நான் மதிமுக சார்பிலோ, இந்தியா கூட்டணி சார்பிலோ, எந்த ஒரு சித்தாந்தத்தின் சார்பிலோ பேசவில்லை. ஆனால் நான், சாமானியர்களின் சார்பாகவும், விவசாயிகளின் சார்பாகவும், மாணவர்கள், தொழிலாளர்கள், ஒடுக்கப்பட்டவர்களின் சார்பாகவும் பேசுகிறேன். அரசியல் எல்லைகள், சித்தாந்தங்களைத் தாண்டி சாதாரண மக்களுக்குச் சேவை செய்வோம். அவர்களை அரவணைப்போம் என இந்த அவையின் முன்பு பணிவுடன் கேட்டுக் கொள்கிறேன்.

வாழ்க சமூக நீதி, வாழ்க சமத்துவம், வாழ்க மதச்சார்பின்மை, வாழ்க சகோதரத்துவம், வாழ்க உலகளாவிய சகோதரத்துவம். உரையாற்றுவதற்கு ஐந்து நிமிடங்கள் வாய்ப்பு தரப்படும் எனத் தெரிவித்து இருந்த நிலையில், இரண்டு நிமிடங்கள் மட்டுமே வழங்கப்பட்டன. நான் உரையாற்றும்போது, தரவுகளைத் தவிர்த்து கையில் எந்த குறிப்பும் வைத்துக் கொள்ளாமல் உரையாற்ற வேண்டும் என நினைத்து இருந்தேன். ஆனால், இரண்டு நிமிடங்கள் மட்டுமே தரப்பட்டதால் தயாரித்து வைத்திருந்த உரையின் பல பகுதிகளை விட வேண்டியதாயிற்று. முழுமையாகப் பேச முடியவில்லை. உரையை நிறைவு செய்வதற்கு உள்ளாகவே பேச்சை நிறுத்தும்படி ஆயிற்று என்றார்.