நண்பர்கள் மூவர் இணைந்து கொள்ளை அடித்து மாட்டிக்கொண்ட சம்பவம் குறித்து இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் விவரிக்கிறார் 

வாழை இலை விற்பவர், ஆட்டோ ஓட்டிக்கொண்டிருந்தவர், வேலையில்லா பட்டதாரி நண்பர்கள் மூவர் ஒரு டீக்கடையில் டீ குடித்துக் கொண்டிருந்த போது என்ன வாழ்க்கையில இப்படியே இருக்கோமே, இப்படியே இருந்தால் எப்பத்தான் செட்டில் ஆவது என்று யோசித்திருக்கிறார்கள். அதில் ஒருவன் சொல்லி இருக்கிறான் “பேங்க்கை கொள்ளை அடித்தால் தான் செட்டில் ஆக முடியும்” என்று. இது ஏதோ ஒரு சாதாரணமாக நண்பர்களுக்குள் கிண்டலாக பேசிக் கொள்வதாகத்தானே அனைவரும் நினைப்போம். ஆனால் இந்த நண்பர்கள் மூவரும் இதை சீரியசாகவே செயல்படுத்த முனைந்திருக்கிறார்கள்.

சென்னை அரும்பாக்கத்தில் உள்ள நகைகளை அடகு பிடித்து பணம் கொடுக்கும் ஒரு தனியார் நிறுவனத்தில் இந்த மூன்று நண்பர்களில் ஒருவனான முருகன் என்பவன் கடைநிலை ஊழியராக சேர்கிறான். நீண்ட நாட்கள் திட்டப்படி ஒரு நாள் அங்கிருக்கும் ஊழியர்களுக்கு ஜுஸில் மயக்கமருந்து கொடுத்து விட்டு, மற்றொரு பெண் ஊழியரை கத்தியைக் காட்டி மிரட்டி தனி அறையில் அடைத்து விட்டு அங்கிருந்த 15 கோடி மதிப்பில் உள்ள நகைகளை திருடிக்கொண்டு சென்று விடுகிறார்கள்.

மூவரும் சென்னையில் பல்லாவரத்தில் ஒரு லாட்ஜ் புக் பண்ணி, அங்கேயே தங்கி நகைகளை உருக்க முயற்சித்திருக்கிறார்கள். ஒரு அளவிற்கு மேலே முடியவில்லை. அதனால் மூவரும் தனித்தனியாக பிரிந்து சென்றுவிடலாம் என்று முடிவெடுத்து ஒருவன் மேல்மருவத்தூர் அருகே உள்ள ஒரு ஊரில் உறவினர் வீட்டில் தங்கி இருந்துவிட்டு அந்த குடும்பத்தில் உள்ளவர்களுக்கு கொஞ்சம் பணம் கொடுத்து விட்டு சென்றிருக்கிறான். மற்றொருவன் விழுப்புரம் அருகே உள்ள மனைவி ஊரில் மண்ணைத் தோண்டி புதைத்து வைத்திருந்திருக்கிறான்.

காவல்துறையின் தீவிர வேட்டையில் மூன்றே நாளில் மூவரும் பிடிபட்டார்கள். அவர்களிடம் திருடப்பட்ட நகையும் மீட்கப்பட்டது. இதை திறம்பட செய்தவர் மறைந்த காவல்துறை அதிகாரி விஜயகுமார் என்பது குறிப்பிடத்தக்கது. காவல்துறையினரே கண்டுபிடிக்க முடியாவிட்டால், அதற்கான இன்சூரன்சிற்கு நிறுவனங்கள் ஒதுக்கீடு செய்யும். இந்த நகைகள் பிடிபட்டதால் இன்சூரன்ஸ் தொகை எதுவும் வழங்கவில்லை.

கணவனைக் கொன்ற மனைவியைப் பற்றியும், அந்த கொலை நடத்தப்பட்ட விதம் பற்றியும் இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் விவரிக்கிறார் 

ஒரு அப்பாவிக் கணவன் தன்னுடைய உயிரை இழந்த கதை இது. சென்னையில் இண்டீரியர் டெகரேசன்  செய்யும் பணியில் அவர் ஈடுபட்டிருந்தார். மனைவி, குழந்தை என்று மகிழ்ச்சியாகவே வாழ்ந்து வந்தார். அவருடைய மனைவி அழகுக் கலை பயின்றவர். அவர் வேலை செய்து வந்த ஆபீசுக்கு அருகில் இருந்த ஒருவரோடு அந்தப் பெண்ணுக்கு திருமணத்தை மீறிய உறவு ஏற்பட்டது. அந்த நபர் குடும்ப நண்பராகவே பழகி வந்தாலும் ஒருகட்டத்தில் மனைவியின் தொடர்பு குறித்து கணவர் கண்டுபிடித்தார். மனைவியை எச்சரித்தார். அதன் பிறகும் அந்த நபரோடு மனைவி ரகசியமாகப் பழகி வந்தார். 

கணவருக்கு உண்மை தெரிந்துவிட்டதால், அந்த நபரோடு சேர்ந்து கணவரைக் கொல்ல மனைவி முடிவு செய்தார். ரகசியமாக ஒரு செல்போன் வாங்கினார். தன்னுடைய ஊருக்கு அவர் கிளம்பிச் சென்றார். அந்த நேரத்தில் கூலிப்படையை வைத்து கணவரைக் கொலை செய்யுமாறு காதலனுக்கு அறிவுறுத்தினார். காதலனிடம் அவளுடைய வீட்டின் போலி சாவி ஒன்று இருந்தது. கத்தியை எடுத்துக்கொண்டு போய் அவளுடைய கணவனை அவன் கொன்றான். அதன் பின்னர் அவளே காவல் நிலையத்துக்கு போன் செய்து தன்னுடைய கணவர் போனை எடுக்கவில்லை என்று கூறினாள். போலீசார் சென்று பார்த்தபோது கணவர் இறந்து கிடந்தார். 

இந்தப் பெண்ணின் நடவடிக்கைகளை காவல்துறையினர் கண்காணிக்க ஆரம்பித்தனர். அவள் மீது அவர்களுக்கு சந்தேகம் ஏற்பட்டது. அவள் பேசிய போன் கால்களை செக் செய்தனர். அவளையும் அவளுடைய காதலனையும் கைது செய்தனர். கணவன் வேண்டாம் என்று நினைத்திருந்தால் அந்தப் பெண் விவாகரத்து பெற்றிருக்கலாம். ஆனால் சொத்துக்காக அந்த அப்பாவி மனிதர் கொலை செய்யப்பட்டார். கடைசியில் அந்தப் பெண் நினைத்த எதுவும் நடக்கவில்லை. முதலில் பிசினஸ் சம்பந்தப்பட்ட யாரோ தான் கொலை செய்தார்கள் என்று காவல்துறையினர் நினைத்தனர். பிறகு தான் மனைவியே கொலை செய்திருக்கிறார் என்பதை கண்டறிந்தனர்.