Skip to main content

பாஜகவை சமாளிக்க இவர்தான் சரி? - முதல்வரைத் தெரியுமா? #11 

Published on 23/12/2018 | Edited on 06/01/2019

ஜோத்பூர் அருகிலுள்ள மகாமண்டீர் என்கிற இடத்தில் 1951 மே 3ஆம் தேதி   பிறந்தார்   அசோக். அப்பா, பாபு லஷ்மண் சிங் கெலாட். ஜோத்பூரில் பிரபலமான குடும்பம். மாலி கெலாட் என்கிற சமூகத்தைச் சேர்ந்தவர்கள். அசோக் சட்டம் பயின்றவர் எம்.ஏ பொருளாதாரம் படித்துள்ளார். படிக்கும்போதே காங்கிரஸ் கட்சியில் தன்னை இணைத்துக்கொண்டார். அசோக்கின் மனைவி சுனிதா. இவர்களுக்கு வைபவ் என்கிற மகனும், சோனியா என்கிற மகளும் உள்ளனர்.

 

ashok gehlot with his wife

அசோக் - சுனிதா



1971ல் கிழக்கு பாகிஸ்தானியர்கள் இந்தியாவுக்கு அகதியாக வந்தபோது, அவர்களுக்குக் காங்கிரஸ் கட்சியின் சார்பிலான உதவிகள் அனைத்தையும் பெற்றுத் தந்தவர் அசோக் கெலாட். இதனால் ராஜஸ்தான் மாணவர் காங்கிரஸ் பிரிவின் தலைவராக்கப்பட்டார். 1985 முதல் 1999 வரை மாநிலத் தலைவராக இருந்தார் அசோக். 1980ல் இருந்து 1999 வரை எம்.பியாக, மத்திய இணையமைச்சர், மத்திய அமைச்சர் என பதவியில் அடுத்தடுத்து இருந்து வந்தார். மாநில காங்கிரஸ் கட்சித் தலைவராக இருந்தாலும், எம்.எல்.ஏ தேர்தலில்   அவர் என்றும் நின்றதில்லை.

1998 சட்டமன்றத் தேர்தலில் ராஜஸ்தானில் பெருவாரியான இடங்களில் வெற்றிபெற்று பாஜகவை தோற்கடித்திருந்தது காங்கிரஸ். யாரை முதல்வராக்கலாம் என்கிற உள்கட்சி மோதல் டெல்லியில் நடைபெற்றது. அப்போது சோனியாகாந்தி குடும்பத்துக்கு நெருக்கமாகயிருந்த, மத்திய அமைச்சர் அசோக் கெலாட் முதல்வர் பதவியை ஏற்கும்படி ஆனது. எம்.எல்.ஏவாகத் தேர்வாவதற்கு முன்பே ராஜஸ்தான் சட்டசபையில் தனக்கான   உயர்ந்த நாற்காலியை பெற்றுக்கொண்டார். முதல்வர் பதவியில் இருப்பவர் 6 மாதத்துக்குள் எம்.எல்.ஏவாக வேண்டும் என்பதற்காக ஒரு தொகுதி எம்.எல்.ஏவை ராஜினாமா செய்யவைத்து அந்தத் தொகுதிக்கான இடைத்தேர்தலில் நின்று வெற்றி பெற்று முதல்வராகத் தொடர்ந்தார். 2003 வரை பதவியில் இருந்தார். 2003ல் நடைபெற்ற சட்டமன்றத் தேர்தலில் பாஜக பெரும் வெற்றிபெற்றது. பழைய ராணியான வசுந்தரா ராஜே சிந்தியா முதல்வராகப் பொறுப்பு ஏற்றார். 2008 வரை எதிர்கட்சித் தலைவராக இருந்தார் அசோக்கெலாவட்.

2008 டிசம்பர் மாதம் நடைபெற்ற சட்டமன்ற பொதுத்தேர்தலில் சர்தார்புரா தொகுதியில் இருந்து எம்.எல்.ஏ வாக தேர்வான அசோக் கெலாட் இரண்டாவது முறை முதல்வராகத் தேர்வு செய்யப்பட்டார். 2013 டிசம்பர் 13 வரை அந்தப் பதவியில் இருந்தார். இரண்டாவது முறையாக முதல்வர் பதவியில் இருந்த காலத்தில் சம்பாதித்ததை கறுப்புப் பணமாகப் பதுக்கி வைத்துள்ளார் என்கிற குற்றச்சாட்டு எழுந்தது. சுவிஸ் வங்கிகளில் கறுப்புப் பணம் வைத்திருப்பவர்கள் பட்டியல் பனாமா பேப்பர்ஸ் என்கிற பெயரில் வெளிவந்தபோது, அதில் காங்கிரஸ் முதல்வராக இருந்த அசோக் கெலாட் பெயரும் இருந்ததாக சர்ச்சை எழுந்தது. கட்சியில் ஓரம் கட்டப்பட்டார் அசோக் கெலாட்.


 

sachin pilot with rahul gandhi



2014 ஜனவரி 13ஆம் தேதி ஓரம்கட்டப்பட்ட முன்னாள் முதல்வர் அசோக்கெலாட்க்கு பதில்   ராஜஸ்தான் மாநில காங்கிரஸ் கட்சித் தலைவர் பதவியில் அமர்த்தப்பட்டார் சச்சின் பைலட்.

சச்சின்... இவரது குடும்பமே விமானி குடும்பம். அவரது தந்தை ராஜேஷ் காங்கிரஸ் கட்சியில் முன்னாள் பிரதமர் ராஜிவ் காந்திக்கு நெருக்கமாக இருந்தவர். ராஜேஷ் இறந்ததைத் தொடர்ந்து அவரது மகன் சச்சினை காங்கிரஸ் கட்சிக்குள் இழுத்துப்போட்டார் ராகுல். ராகுலின் நண்பரான சச்சின், 2009ல் நாடாளுமன்ற தேர்தலில் வெற்றி பெற்று எம்.பியாகி இணையமைச்சராக பதவி வகித்தார். 2014ல் நாடாளுமன்ற பொதுத்தேர்தலில் பாஜக வேட்பாளார் சன்வார்லால் என்பவரிடம் தோல்வியை சந்தித்தார் சச்சின். அதன்பின் மாநில அரசியலில் தீவிரமாக கவனம் செலுத்தினார். சச்சின் பைலட், பைலட் உரிமம் வைத்திருப்பவர், சிறந்த விளையாட்டு வீரர், புகழ்பெற்ற கல்வி நிறுவனங்களில் கற்றவர்.

 

rajesh pilot

ராஜேஷ் பைலட்



2018 ராஜஸ்தான் மாநில சட்டமன்ற தேர்தலில் பாஜகவை எதிர்க்கும் தலைவராக காங்கிரஸால் அடையாளம் காட்டப்பட்டவர் சச்சின் பைலட். காங்கிரஸ் வென்றால் அவர்தான் முதல்வர் எனச்சொல்லப்பட்டது. கடுமையான தேர்தல் பிரச்சாரம் செய்தார். ஆளும் கட்சியாக இருந்த பாஜகவுக்கும், ராணியாகவே வாழ்ந்த முதல்வர் வசுந்தராவின்   பேச்சுக்கும் தேர்தல் களத்தில் பதிலடி தந்துவந்தார் சச்சின் பைலட். 

இந்தத் தேர்தலில் முன்னாள் முதல்வரான அசோக் கெலாட், சர்தார்புரா தொகுதியில் நின்றார். இவரை எதிர்த்து பாஜக சார்பில் சாம்பு சிங் என்பவர் நிறுத்தப்பட்டார். சுமார் 45 ஆயிரம் வாக்கு வித்தியாசத்தில் சாம்புவை அசோக் தோற்கடித்தார். இந்த தேர்தலில் பாஜகவை சேர்ந்த அமைச்சர்களே   தோற்றிருக்கின்றனர். காங்கிரஸ் கட்சி பெருவெற்றி பெற்றுள்ளது. ராஜஸ்தானின் அடுத்த முதல்வர் சச்சின் பைலட் என அனைவரும் நினைத்திருக்க, ஓரம் கட்டி வைக்கப்பட்ட அசோக் கெலாட்டை மீண்டும் முதல்வராக்கியுள்ளார் காங்கிரஸ் தலைவர் ராகுல்காந்தி. துணை முதல்வராக சச்சின் பைலட்டை தேர்வு செய்துள்ளனர். 2019 எம்.பி தேர்தலில் சீனியர் ஒருவர் முதல்வர் பதவியில் இருந்தால்தான் பாஜகவின் தகிடுதத்தங்களை தவிர்க்க முடியும் என்பதால் ஓரம் கட்டிவைக்கப்பட்ட அசோக் கெலாட் மீண்டும் முதல்வர் பதவியில் அமர்த்தப்பட்டுள்ளார் என்கிறார்கள் அரசியல் நோக்கர்கள். தேர்தலுக்குப் பின் முதல்வர் மாற்றம் நிச்சயம் உண்டு என்கிறார்கள்.

பழைய மொந்தையில் புதிய கள் என்பார்கள் கிராமத்தில். ராஜஸ்தானில் மொந்தையும் பழையது, கள்ளும் பழையது. பெரும் சவால்கள் முதல்வர் முன் உள்ளன. 

அடுத்த பகுதி:

இந்தியாவின் இதயத்தில் அரசியல், மூச்சுத்திணறி மறைந்த உயிர்கள்... - முதல்வரைத் தெரியுமா? #12 

முந்தைய பகுதி:

எம்.எல்.ஏ ஆவதற்கு முன்பே முதல்வரானவர் கதை!  - முதல்வரைத் தெரியுமா? #10 

 

 

 

 

 

 

 

Next Story

“ஸ்மிருதி இராணியை இழிவுபடுத்த வேண்டாம்” - ராகுல் காந்தி வேண்டுகோள்

Published on 12/07/2024 | Edited on 12/07/2024
Rahul Gandhi said that Don't insult Smriti Irani

கடந்த 2019 நாடாளுமன்றத்  தேர்தலில் காங்கிரஸ் தலைவர் ராகுல் காந்தியை அவரது குடும்பத் தொகுதியான அமேதியில் பாஜக வேட்பாளர் ஸ்மிருதி இராணி தோற்கடித்தார். அதேபோன்று இந்த முறையும் ராகுல் காந்தியை அமேதி தொகுதியில் தோற்கடிப்பேன் என்று ஸ்மிருதி இராணி சவால் விடுத்தார். ஆனால் கடைசி நேரத்தில் ராகுல் காந்தி அமேதி தொகுதியில் போட்டியிடாமல், காந்தி குடும்பத்தின் பாரம்பரிய தொகுதியான ரேபரேலி தொகுதியில் போட்டியிட்டு வெற்றியும் பெற்றார். 

அதே சமயம் அமேதியில் ஸ்மிருதி இராணியை எதிர்த்து ராகுல் காந்தி குடும்பத்தின் நம்பிக்கைக்குரிய நபரான கிஷோரி லால் சர்மாவைக் காங்கிரஸ் நிறுத்தியது. பின்னர் 2 லட்சம் வாக்குகள் வித்தியாசத்தில் ஸ்மிருதி இராணியைத் தோற்கடித்து கிஷோரி லால் சர்மா அமோக வெற்றிபெற்றார். இதனைத் தொடர்ந்து தோல்வியை ஒப்புக்கொண்ட ஸ்மிருதி இராணி, தொடர்ந்து அமேதி தொகுதி மக்களுக்காக பணியாற்றுவேன் என்று தெரிவித்தார். இதனைத் தொடர்ந்து, காங்கிரஸ் கட்சியினர் ஸ்மிருதி இராணிக்கு எதிராக சமூக வலைத்தளங்களில் கருத்து தெரிவித்து கடுமையான விமர்சனங்களை முன்வைத்து வருகின்றனர். 

இந்த நிலையில் ஸ்மிருதி இராணியை இழிவுபடுத்த வேண்டாம் என நாடாளுமன்ற எதிர்க்கட்சி தலைவர் காங்கிரஸ் எம்.பி ராகுல் காந்தி கேட்டுக்கொண்டுள்ளார். இது தொடர்பாக அவர் வெளியிட்டுள்ள சமூக வலைத்தள பக்கத்தில், “வாழ்க்கையில் வெற்றியும் தோல்வியும் சகஜம். அதனால் அந்த விஷயத்தில் ஸ்மிருதி இராணி அல்லது வேறு எந்தத் தலைவர்களையும், இழிவான வார்த்தைகளைப் பயன்படுத்துவதையும், கேவலமாக நடந்து கொள்வதையும் தவிர்க்குமாறு அனைவரையும் கேட்டுக்கொள்கிறேன். மக்களை அவமானப்படுத்துவதும் அவமதிப்பதும் பலவீனத்தின் அடையாளம், வலிமை அல்ல” எனக் குறிப்பிட்டுள்ளார். 

Next Story

“மணிப்பூர் இரண்டாகப் பிளவுபட்டுள்ளது” - ராகுல் காந்தி எம்.பி. உருக்கம்!

Published on 08/07/2024 | Edited on 08/07/2024
Manipur is divided into two Rahul Gandhi MP

கடந்த ஆண்டு மணிப்பூரில் மெய்தி - குக்கி சமூகங்களுக்கு இடையே ஏற்பட்ட மோதல், ஆளும் பாஜக அரசின் அலட்சியத்தால் கலவரமாக மாறியது. மெய்தி மக்களை, பழங்குடிப் பட்டியலில் சேர்க்கும் பரிந்துரையை மத்திய அரசுக்கு அனுப்ப ஆளும் பாஜக அரசுக்கு மணிப்பூர் உயர் நீதிமன்றம் உத்தரவிட்டது. ஆனால், அதனை எதிர்த்து குக்கி பழங்குடியின மக்கள் நடத்திய அமைதிப் பேரணியில் வன்முறை வெடிக்க, மாநிலமே கலவர பூமியாக மாறியது. வன்முறைக்கு இடையில் குக்கி பழங்குடியினத்தைச் சேர்ந்த இரண்டு பெண்கள் நிர்வாணமாக இழுத்துச் செல்லப்பட்ட வீடியோ வெளியாகி, இந்திய நாட்டையே உலுக்கியது. இந்தச் சம்பவம் நடைபெற்று ஒரு ஆண்டுக்கு மேல் ஆகியும், இன்றுவரை மணிப்பூரில் கலவரம் ஓய்ந்தபாடில்லை.

இந்நிலையில் மக்களவை எதிர்க்கட்சித் தலைவரும், காங்கிரஸ் கட்சியின் மூத்த தலைவருமான ராகுல் காந்தி எம்பி மணிப்பூர் ஆளுநர் அனுசுயா உய்கேயை இம்பாலில் உள்ள ராஜ்பவனில் இன்று (08.07.2024) சந்தித்துப் பேசினார். இதனையடுத்து மணிப்பூரில் உள்ள நிவாரண முகாம்களுக்கு ராகுல் காந்தி சென்று பாதிக்கப்பட்டவர்களிடம் தங்கள் பிரச்சனைகளைக் கேட்டறிந்தார். இது தொடர்பாக ராகுல் காந்தி செய்தியாளர்களைச் சந்தித்துப் பேசுகையில், “மணிப்பூருக்கு என்னால் முடிந்ததைச் செய்ய நான் தயாராக இருக்கிறேன். இங்கு அமைதி திரும்பக் காங்கிரஸ் கட்சி என்ன செய்ய முடியுமோ அதைச் செய்யத் தயாராக உள்ளது. நாங்கள் ஆளுநரைச் சந்தித்துப் பேசினோம். எங்களால் இயன்ற உதவிகளைச் செய்ய விரும்புகிறோம் என்று ஆளுநரிடம் நாங்கள் தெரிவித்தோம். ஆளுநரிடம் நாங்கள் எங்களின் அதிருப்தியை வெளிப்படுத்தினோம். 

Manipur is divided into two Rahul Gandhi MP

இங்கு வன்முறைக்குப் பிறகு இங்கு ஏற்பட்டுள்ள முன்னேற்றம் குறித்து நாங்கள் மகிழ்ச்சியடையவில்லை என்றும், மேலும் இந்த விவகாரத்தை அரசியலாக்குவதற்கு நான் விரும்பவில்லை என்று அது எனது நோக்கமல்ல எனத் தெரிவித்தேன். முழு மணிப்பூரும் வேதனையில் உள்ளது. துன்பத்தில் உள்ளது. இந்த துன்பத்திலிருந்து விரைவில் மீள வேண்டும் என்பதை இந்த பயணத்தின் மூலம் நான் புரிந்துகொள்கிறேன். அனைவரும் அமைதி மற்றும் சகோதரத்துவம் பற்றிச் சிந்திக்க வேண்டும். மாறாக வன்முறை மற்றும் வெறுப்பால் எந்த ஒரு தீர்வும் கிடைக்கப் போவதில்லை. எனவே நாம் அமைதியைப் பற்றிச் சிந்திக்க ஆரம்பித்தால் பாசத்தைப் பற்றிச் சிந்திக்கத் தொடங்கினால் நான் மகிழ்ச்சி அடைகிறேன். நீங்கள் சொல்வதைக் கேட்டு எதிர்க்கட்சித் தலைவராக உங்களுக்கு உதவ முயற்சிப்பதில் மகிழ்ச்சி அடைகிறேன். இந்திய அரசும், தேசபக்தர்களாகக் கருதும் ஒவ்வொருவரும் மணிப்பூர் மக்களை அணுகி அரவணைக்க வேண்டும். மணிப்பூருக்கு அமைதியைக் கொண்டு வாருங்கள்.

மணிப்பூரில் பிரச்சனை தொடங்கியதில் இருந்து நான் மூன்றாவது முறையாக இங்கு வந்துள்ளேன். இங்கு மிகப்பெரிய சோகத்தை ஏற்படுத்தியுள்ளது. இந்த சூழ்நிலையில் முன்னேற்றம் ஏற்படும் என எதிர்பார்த்தேன், ஆனால் ஏமாற்றம் அடைந்தேன். நிலைமை இன்னும் எங்கும் சரியாகவில்லை என்பதைப் பார்க்க முடிகிறது. நான் நிவாரண முகாம்களுக்குச் சென்று அங்குள்ள மக்களைக் கேட்டறிந்தேன். அவர்களின் வலியைக் கேட்டேன். அவர்கள் மீது நம்பிக்கையை வளர்க்க இங்கு வந்தேன். மாநிலம் இரண்டாகப் பிளவுபட்டுள்ளது. 

Manipur is divided into two Rahul Gandhi MP

நான் உங்கள் சகோதரனாக இங்கு வருகிறேன். மணிப்பூரில் அமைதியை மீட்டெடுக்க உங்களுடன் இணைந்து பணியாற்ற விரும்புகிறேன் அதற்கு உதவுங்கள். பிரதமர் இங்கு வருவதும், மணிப்பூர் மக்கள் சொல்வதைக் கேட்பதும், மணிப்பூரில் என்ன நடக்கிறது என்பதைப் புரிந்துகொள்வதும் முக்கியம் என்று நான் உணர்கிறேன். எல்லாவற்றிற்கும் மேலாக மணிப்பூர் இந்திய ஒன்றியத்தின் பெருமைக்குரிய மாநிலம். இந்த மாபெரும் சோகத்தில் பிரதமர் மணிப்பூருக்கு வந்திருக்க வேண்டும். மணிப்பூர் மக்களுக்கு இது ஆறுதல் அளிக்கும்” எனப் பேசினார்.