Skip to main content

குடிக்கும் மனைவி; பாடாய்ப்படுத்தப்பட்ட கணவன் - வழக்கறிஞர் சாந்தகுமாரியின் வழக்கு எண்: 36

Published on 04/10/2023 | Edited on 04/10/2023

 

advocate-santhakumaris-valakku-en-36

 

பலரது இல்லற வாழ்வு என்பது குடிப்பழக்கத்தால் எவ்வளவு சிதைந்திருக்கிறது என்பதை கேள்விப்பட்டிருப்போம். இங்கே குடிக்கும் மனைவியால் பாடாய்ப்படுத்தப்பட்ட கணவனின் கதை குறித்து குடும்ப நல வழக்கறிஞர் சாந்தகுமாரி விவரிக்கிறார். 

 

சுனில் என்பவருடைய கதை இது. மிகப் பெரிய குடும்பத்தைச் சேர்ந்தவர் அவர். காதலித்த பெண்ணையே திருமணம் செய்து கொண்டார். சில காலம் இருவரும் மகிழ்ச்சியாகவே வாழ்ந்தனர். விழாக்களுக்குச் செல்லும்போது அந்தப் பெண்ணுக்கு குடிப்பழக்கம் ஏற்பட்டது. ஒருகட்டத்தில் அவளால் குடியை நிறுத்த முடியவில்லை. குடியை நிறுத்தச் சொல்லி கணவன் சொன்னாலும் அவள் கேட்கவில்லை. இருவருக்குமிடையே பிரச்சனை அதிகரித்துக்கொண்டே சென்றது. அவளை மருத்துவரிடம் அவர் அழைத்துச் சென்றார். 

 

மருத்துவர் ஆலோசனைகள் மற்றும் மருந்துகளை வழங்கினாலும் அதன் பிறகும் அவளுடைய பழக்கம் குறையவில்லை. குடிப்பதற்காக அடிக்கடி பணம் கேட்க ஆரம்பித்தாள். இதனால் வீட்டுக்கு தேவையான பணத்தை அவளிடம் கொடுப்பதை அவர் நிறுத்தினார். அவர்களுடைய வீட்டில் அவரின் சகோதரர் குடும்பமும் வாழ்ந்து வந்தது. அவர் பணம் கொடுப்பதை நிறுத்தியதால், அவருக்கும் அவருடைய சகோதரரின் மனைவிக்கும் தொடர்பிருக்கிறது என்று இவள் பொய்யாகக் கிளப்பிவிட்டாள். குடும்பத்தில் நிறைய குழப்பங்கள் ஏற்பட்டன. இதுபற்றி அவள் தன்னுடைய சமூகவலைத்தளங்களிலும் எழுதினாள். 

 

தனிக்குடித்தனம் செல்ல அவருக்கு விருப்பமில்லை. ஆனாலும் அவளை அங்கு விட்டுவிட்டு இவர் அடிக்கடி தன்னுடைய குடும்பத்தினர் இருக்கும் வீட்டுக்கு வந்தார். அனைத்து விதங்களிலும் அவருக்கு சிக்கல்கள் ஏற்பட்டன. அவளுக்கு பணம் கொடுப்பதை அவர் முழுமையாக நிறுத்தினார். அவருடைய கம்பெனிக்கு சென்ற அவள், அங்கு அட்டகாசம் செய்தாள். அவர் போலீசில் புகார் கொடுத்தார். கொஞ்ச நாளைக்கு அவள் திருந்த வாய்ப்பு கொடுக்குமாறு போலீசார் கூறினர். அவரும் அதை ஏற்றுக்கொண்டார். அதன் பிறகு அவளும் அவர் மீது போலீசில் புகார் கொடுத்தாள். ஒருநாள் வீட்டு அலமாரியில் வைக்கப்பட்டிருந்த 7 லட்ச ரூபாயைக் காணவில்லை. அதுபற்றி தனக்கு எதுவும் தெரியாது என்று அவள் கூறினாள். அடுத்த நாள் ஒரு நகைக்கடையில் இருந்து அவருக்கு அழைப்பு வந்தது. அவருடைய மனைவி ஏழரை லட்சம் ரூபாய்க்கு நகை எடுத்ததாக அவர்கள் தெரிவித்தனர். அதன் பிறகு போலீசாரிடமிருந்து அவருக்கு வரதட்சணை கொடுமை செய்ததாக நோட்டீஸ் வந்தது. அதற்கு மேல் என்ன செய்வது என்று தெரியாத அவர் என்னிடம் வந்தார். நீதிமன்றத்தில் அவள் தனக்கு 10 கோடி ரூபாய் வேண்டும் என்று கேட்டாள். தனக்கு சாதகமாக சில உத்தரவுகளையும் நீதிமன்றத்தில் அவள் வாங்கினாள். 

 

அந்த உத்தரவுகளுக்கு தடை வாங்கப்பட்டது. அத்தனை வலிகளையும் மனதில் சுமந்துகொண்டு அவர் அந்த வழக்கை நடத்தினார். வீட்டில் பாதிப் பங்கை அவளுக்கு கொடுத்துவிட்டு, குழந்தைகளுக்கான அனைத்து செலவுகளையும் தான் ஏற்றுக்கொள்வதாக அவர் தெரிவித்தார். அவருடைய குழந்தைகளை வெளிநாட்டுக்கு அனுப்பி படிக்க வைத்தார். இன்று அவருடைய குழந்தைகள் பட்டங்கள் பெற்று நல்ல நிலையில் இருக்கின்றனர். அதன் பிறகு திருமணம் செய்துகொள்ளாமல் அவர் தனியாக வாழ்ந்து வருகிறார். அவருக்குத் தேவையான அமைதி அவருக்குக் கிடைத்தது.

 

 

Next Story

அப்பாவி கணவனை தெருவில் அலைய வைத்த மனைவி - வழக்கறிஞர் சாந்தகுமாரியின் வழக்கு எண்: 47

Published on 27/02/2024 | Edited on 27/02/2024
advocate-santhakumaris-valakku-en-47

தான் சந்தித்த பல்வேறு வழக்குகள் குறித்தும் அதை நடத்திய விதம் குறித்தும் நம்மோடு பிரபல வழக்கறிஞர் சாந்தகுமாரி பகிர்ந்து கொள்கிறார்.

ரமேஷ்பாபு  என்பவரின் வழக்கு இது. அப்பா இல்லாமல் அம்மா வளர்ப்பில் ஏழ்மை நிலையிலிருந்து வளர்ந்து வேலை தேடி கஷ்டப்பட்டு வயது சற்றே அதிகம் ஆன பின்பு தான் திருமணம் செய்து கொள்கிறார். இவருக்கு குழந்தையும் பிறக்க, நான்கு வருடம் கழித்து திடீரென்று சற்றும் எதிர்பாராமல் மனைவியிடம் இருந்து விவாகரத்து நோட்டீஸ் வர, பதட்டமாக வந்து என்னை சந்திக்கிறார். அந்த இரண்டு நோட்டீசில் ஒன்று விவாகரத்து கேட்டும் இன்னொன்று குழந்தைக்கு பராமரிப்பு பணம் கேட்டும் இருந்தது. என்னதான் பிரச்சனை என்று ரமேஷ்பாபுவிடம் கேட்ட பின்னே மெல்ல சொல்கிறார். 

ஒண்ணுமே இல்லாத நிலையிலிருந்து வீடு வசதி இல்லாமல் சிரமத்துடன் வளர்ந்ததால், தன் அம்மாவிற்காக சொந்த வீடு கட்டி முடிக்கையில் வயதும் அதிகம் ஆகிவிட்டது. இதை சொல்லித்தான் திருமணமும் நடந்தது. நாங்கள் சந்தோஷமாகத்தான் இருந்தோம். ஒரு குழந்தை கூட பிறந்திருக்கிறது என்றார். பின் எதற்காக உங்கள் மனைவி விவாகரத்து நோட்டீஸில், நீங்கள் இரவு மிகவும் லேட்டாக வருவதாகவும், கெட்ட வார்த்தை பேசுவதாகவும் குறிப்பிட்டிருக்கிறார் என்று கேட்டேன். ரமேஷ்பாபுவுக்கு தான் வேலை பார்க்கும் அலுவலகத்தில் மாதத்தின் முதல் வாரம் மட்டும் கொஞ்சம் நிறைய வேலைகள் இருக்கும் என்பதால், அந்த வாரம் மட்டுமே வீடு திரும்ப நள்ளிரவு ஆகிவிடும் என்றும், தான் சத்தியமாக ஒரு கெட்ட வார்த்தை கூட பேசியது இல்லை. வேண்டுமென்றால் என் மனைவியிடமே ரெக்கார்டு எதுவும் இருந்தால் கேட்டுப் பாருங்கள் என்றார். என் மனதிற்கு இவர் பேசுவது உண்மை என்றுதான் பட்டது. அவர் மனைவி நோட்டீசுடன் குழந்தைக்கு பராமரிப்பு பணம் கேட்டிருப்பதால் அவர் வருமான விவரம் கேட்டோம். 

ஓரளவு லட்சத்தில் சம்பாதிக்கும் ரமேஷ்பாபு அதை வைத்து தன் தாய்க்காக கட்டியிருக்கும் வீட்டின் கடனை மாதாமாதம் அடைப்பதாகவும், மேலும் தன் மனைவிக்கும் சர்ப்ரைஸாக ஊரப்பாக்கத்தில் ஒரு வீடும் கட்டிக்கொண்டிருக்கிறார். அதற்கான ஆதாரத்தையும் சமர்ப்பிக்கிறார். நான் செய்யாமல் இருந்தால் தானே நான் மெயின்டனன்ஸ் பணம் கொடுக்க வேண்டும்.  நான் தான் ஏற்கனவே என் குழந்தைக்கு ஸ்கூல்ல பீஸ் முதல் அவர்கள் குடியிருக்கும் வீடு வாடகை முதல் கட்டிக்கொண்டுதானே இருக்கிறேன் என்றார். 

மேலும் அந்தப் பெண் இவரை வீட்டை விட்டுத் துரத்திவிட்டார் என்பதும் தெரிய வருகிறது. என்னவென்று கேட்டபோது தான் தெரியவந்தது, இவருக்கும் மனைவிக்கும் எந்த ஒரு பிரச்சனையும் இல்லை என்றும், அந்தப் பெண்ணின் அம்மாவினால் தான் இந்த நிலைமை என்றும் மேலே சொல்கிறார். செங்கல்பட்டிலிருந்து வந்திருக்கும் அவர் மனைவி கர்ப்பமான பின், சென்னையிலேயே பிரசவம் பார்த்து கொள்ளலாம் என்று ரமேஷ்பாபு கூறி இருக்கிறார். ஆனால் அந்த பெண்ணின் அம்மா செங்கல்பட்டிலேயே பிரசவம் பார்க்க வைக்க, அதில் சில சிக்கல்கள் வந்து யாராவது ஒரு உயிரை மட்டுமே காப்பாற்ற முடியும் என்று ஆகியிருக்கிறது. ரமேஷ்பாபுவும் அதிக விலை கொடுத்து தனியார் மருத்துவமனையில் கொண்டு போய் சிசிச்சை பார்க்க வைத்து காப்பாற்றி இருக்கிறார். குழந்தை பிறந்தபோது சிக்கல் வந்ததால், அந்த பெண்ணின் தாயாரும் இவர்கள் வீட்டில் கூடவே தங்கி இருக்கிறார். 

இது இயல்புதானே என்று ரமேஷ்பாபுவும் விட, ஆனால் வந்த தாயார் திரும்பி செல்லவே இல்லை. மேலும் இந்த அம்மா, கணவன் மனைவிக்குள் நிறைய பிரச்சனைகளை ஏற்படுத்தி விடுகிறார். லேட்டாக வந்தால் கதவை திறக்காதே என்றும், தன் மகளின் அதிர்ஷ்டமே இப்படி மேலே வந்ததற்கு காரணம் என்றும், அவரை உருவ கேலி வரை செய்கிறார். அந்த பெண்ணின் தம்பியும் மாதக் கணக்கில் இவர்கள் கூடவே தங்கி விடுகிறார். ரமேஷ்பாபுவுக்கு டிப்ரெஷன் அதிகமாகி புகைப் பழக்கமும் அதிகம் ஆகிறது. மனைவியும் விலகிப் போக, தன் மாமியாரிடமும் பேசிப் பார்க்கிறார். ஆனால் அதுவும் தவறாக போகிறது. மேலும் மனைவியின் தம்பியும் இவரை அடித்து வெளியே துரத்தி விடுகிறார். இந்த நிலையில் தான் அவருக்கு நோட்டீஸ் வருகிறது.

இதையெல்லாம் நாங்கள் கோர்ட்டில் நீதிபதியிடம் சொல்ல, ரமேஷ்பாபுவையும் அந்த பெண்ணையும் மீடியேஷனுக்கு அனுப்பினார்கள். குழந்தையைப் பார்க்க ரமேஷ்பாபுவை அனுமதிக்க வேண்டும் என்று கேட்டு பெட்டிஷன் போட்டு அதன்படி பார்க்க போனாலும், குழந்தையை வாசலிலேயே காண்பித்து அவரை மரியாதை குறைவாக நடத்தி அனுப்பி விடுகின்றனர். 

பின்னர் விசிட்டிங் ரயிட்ஸ் வாங்கியும், அந்த பெண்ணும் குழந்தையும் வீட்டை விட்டே சென்றதாக தகவல் வர, ஊரப்பாக்கத்தில் இருப்பதாக அறிந்து கொள்கிறார். கடைசியாக கோர்ட்டில் அந்த பெண் எதற்கும் ஒத்து வரவில்லை. ஏதாவது செட்டில் பண்ணுமாறு கூற, அந்த பெண்ணும் குழந்தையை பார்க்க அனுமதிக்க வேண்டும் என்றால் ஊரப்பாக்கத்தில் ஒரு பிராப்பர்ட்டியை தனது பெயரில் எழுதித் தருமாறு கேட்கிறாள். ஆனால் அவளுக்குத் தெரியவில்லை அது அவளுக்காகத் தான் ரமேஷ்பாபு வங்கியிருக்கார் என்று. இறுதியில் அவரும் இதற்கு ஒத்துக்கொண்டு சொத்தையும் அவள் பெயரில் ரிஜிஸ்டர் செய்த பின், மியூச்சுவல் கன்சென்ட்டில் டைவோர்ஸ் வாங்கியும், அந்த பெண்  குழந்தையை காட்டவே இல்லை. அதற்கு பெட்டிஷன் போட்டு, நோட்டீஸை அந்த பெண்ணுக்கு அனுப்பினாலும், சரியான ரெஸ்பான்ஸ் இருக்காது. அந்த குழந்தை பள்ளிக்கு போய் வரும்போது மட்டும் பார்த்து வருகிறார் ரமேஷ்பாபு. இப்போது அவர் தன் அம்மா இருக்கும் பாண்டிச்சேரிக்கே சென்றுவிட்டார்.

கணவனை என்றுமே வெறும் பணம் காய்க்கும் மரமாக மட்டுமே பார்க்காமல், அன்போடும் அரவணைப்போடும் பார்த்துக் கொள்ளும் பெண்கள் இருக்கும் குடும்பம் முன்னேற்றம் அடையும். அப்படியில்லாத குடும்பம் முன்னேற்றம் அடையாது.

Next Story

எனக்கு விருப்பமில்லை; ஹனிமூனில் தடை போட்ட மணப்பெண்- வழக்கறிஞர் சாந்தகுமாரியின் வழக்கு எண்: 46

Published on 24/02/2024 | Edited on 24/02/2024
advocate-santhakumaris-valakku-en-46

தான் சந்தித்த பல்வேறு வகையான வழக்குகள் குறித்தும், அதை நடத்திய விதம் குறித்தும் நம்மோடு பிரபல வழக்கறிஞர் சாந்தகுமாரி பகிர்ந்து கொள்கிறார்.

சுந்தரமூர்த்தி என்பவருடைய வழக்கு இது. ஒரு நல்ல குணம் உள்ள, நல்ல வேலையில், குடும்பத்தில், இருக்கும் அந்த வாலிபனுக்கு திருமணம் செய்து வைக்க பெண் பார்க்கப்படுகிறது. கோவிலில் நடக்கும் முதல் சந்திப்பில் இருவரும் மனம் விட்டு பேசிக் கொள்கிறார்கள். எல்லாம் சரியாய் நடக்கிறது. அடுத்ததாக பெண் பார்க்கும் சம்பிரதாயத்திலும் இருவீட்டாரும் கலந்து பேசி சரியாக நடந்து, நிச்சயமும் உறுதி ஆகிறது. திருமணத்திற்கு முன்பும் சுந்தரமூர்த்தியும் அந்த பெண்ணும் நன்கு பழகுகிறார்கள். அனைவரும் இது காதல் திருமணமா என்று ஆச்சரியப்படுமாறு சந்தோஷமாக இருக்கிறார்கள். திருமண வேலைகள் நடக்கும்போது பெண் வீட்டில் பணத்தட்டுப்பாடு ஏற்படும்போது கூட சுந்தரமூர்த்தி பெண்ணின் தாய் மாமாவிடம் இரண்டரை  லட்சம் பணம் கொடுத்து உதவுகிறார்.

தேனிலவுக்காக மாலத்தீவுக்கு வீட்டில் ஏற்பாடு செய்து அனுப்பி வைக்கிறார்கள். மிகவும் சந்தோஷமாக எல்லாம் போய்க்கொண்டு இருப்பதாக சுந்தரமூர்த்தி நினைக்கிறார். அந்த பெண்ணும் அவருடன் மாலத்தீவில் வெளியில் சுற்றுவது, பிடித்த உணவை சாப்பிட்டு சிரித்து பேசுகிறாள். இரவு ரூமுக்கு திரும்பும்போது, அசதியாக இருப்பதாகக் கூறி, இப்போது வேண்டாமே என்று மறுக்கிறாள். சுந்தரமூர்த்தியும் இது இயல்புதானே, எல்லாமே அடுத்தடுத்து சடங்குகள் என்று அசதியாக இருக்கும் என்று சாதாரணமாக எடுத்துக் கொள்கிறார். ஆனால் இதுவே அடுத்த நாளும் தொடர சுந்தரமூர்த்தி. தன் அக்காவிடம் போன் செய்து நடந்ததை கூற, அக்காவும் இருக்கட்டும் பொறுமையாக பார்த்துக்கொள்ளலாம் என்று கூறிவிட்டு, அந்த பெண்ணிற்கு தொடர்பு கொண்டு பேசி இருக்கிறார். 

இதனால் கோபமடைந்த அந்த பெண், சுந்தரமூர்த்தியிடம் இப்படி நமக்குள் நடக்கும் அந்தரங்க பேச்சை எப்படி நீங்கள் அக்காவிடம் சொல்லலாம் என்று கோபிக்கிறாள். இப்படியே பகலில் நன்றாக மனம் விட்டு சந்தோஷமாக பேசுவது என்று இருந்துவிட்டு இரவு ஆனால் அந்த பெண் நெருங்க மறுக்கிறாள். நான்கு நாட்கள் முடிந்து ஊருக்கு கிளம்பும் நாளன்று அந்த பெண் கடைசியாக சொல்கிறாள். தனக்கு ஏற்கனவே வேலை பார்க்கும் இடத்தில் காதல் இருந்தது என்றும், பெற்றோர்கள் வற்புறுத்தியதாலும், தன் தங்கை வாழ்க்கைக்காகவும் தான் சுந்தரமூர்த்தியை திருமணம் செய்ததாகக் கூறுகிறாள். இதை ஏற்கெனவே முதல் சந்திப்பில் தன் காதலனை விட்டு விட்டுதாகவும் அது முடிந்த கதை என்று உறுதி அளித்து தான் சுந்தரமூர்த்திக்கு சரி சொல்லி இருக்கிறாள். அப்படி இருக்க அவருக்கு ஒரே குழப்பம், முடிந்த கதைதானே பின் என்ன இப்போது என்று கேட்டதற்கு, இல்லை என்னால் உங்களுடன் தாம்பத்யம் வைத்துக் கொண்டு சந்தோஷமாக வாழ முடியாது என்று உறுதியாகக் கூற, உடைந்து போகிறார் சுந்தரமூர்த்தி.  

மேலும் அந்தப் பெண், தான் இங்கே இருந்து பெங்களூருக்குச் செல்ல வேண்டும், முக்கியமான புராஜெக்ட் வேலை இருக்கிறது என்று கூற, சுந்தமூர்த்தி மறுத்து அவளுக்குத் தெரியாமல், அந்த பெண்ணின் தாய்மாமா, மற்றும் இரு குடும்பத்திடமும் நடந்ததைக் கூறிவிடுகிறார். அந்த பெண்ணிடமும், தன்னுடன் வீடு வரைக்கும் வந்துவிட்டு அதன் பின் நீ எங்கு வேண்டுமானாலும் போய்க் கொள் என்று கூறி அழைத்து வருகிறார். ஆனால் ஏர்போர்ட் வந்தவுடன் மொத்த குடும்பமும் அந்த பெண்ணை சூழ்ந்து கொள்கிறது. அந்த பெண்ணை  அவளது பெற்றோர் அழைத்துச் செல்கின்றனர். பின்னர் சுந்தரமூர்த்தி தன் அம்மா, அப்பாவைக் கூட்டிகொண்டு அழைக்கச் சென்றபோது, அவரோடு வாழமாட்டேன் என்று மறுக்கிறாள். சுந்தரமூர்த்தியும் தன் மனதில் எந்த ஒரு கோவமும் இல்லை, நாங்கள் இன்னும் வாழ்க்கையையும் தொடங்கவில்லை, எனவே எல்லாம் விட்டுவிட்டு தன்னுடன் முழுமனதுடன் வாழ்வதாக இருந்தால் ஏற்றுக் கொள்வதாக கூறி பெற்றோருடன் திரும்ப வந்து விடுகிறார். 

ஆனால் அந்த பெண்ணும் என்ன ஆயினும் சுந்தரமூர்த்தியுடன் செல்ல பிடிவாதமாக மறுக்கிறாள். இதன்பிறகு தான் அவர் என்னை சந்திக்கிறார். தாம்பத்தியம் நடக்காதபோது அந்த திருமணம் செல்லுபடி ஆகாது என்பதால், நீதிமன்றத்தில் வழக்கு போட்டோம். அந்த பெண்ணிற்கு நோட்டீஸ் அனுப்பியும் வரவில்லை. திருமண செலவுக்கு பையன் வீட்டில் 17 லட்சம் ரூபாய் கொடுத்த ஆதாரங்களை வைத்து அந்த பணத்தை திருப்பி கேட்டு மனு கொடுத்தோம். அந்த பெண்ணின் தாய் மாமா தான் அந்த பணத்தை கேட்டு வாங்கித் தருகிறேன் என்று கூற,  கடைசியாக பரஸ்பரமாக இரு குடும்பங்களும் பேசி இருவரும் ஒத்துப்போய் விவாகரத்து வாங்கி வழக்கை முடித்தோம்.