Skip to main content

தாராவி தமிழன்னாலே அசிங்கமானவனா? ஆறாவயல் பெரியய்யா கூறும் தாராவி கதைகள் #1

Published on 22/05/2021 | Edited on 22/05/2021

 

aaravayal periyaiya

 

எழுத்தாளரும் மூத்த பத்திரிகையாளருமான ஆறாவயல் பெரியய்யா, தாராவியில் தான் வசித்த நாட்களின் நினைவுகள் குறித்தும், தாராவி தமிழர்களின் வாழ்க்கைமுறை குறித்தும் தாராவி கதைகள் என்ற தொடர் வாயிலாக நம்மோடு பகிர்ந்துவருகிறார். தாராவி மக்களின் வாழ்க்கைமுறை குறித்து அவர் பகிர்ந்துகொண்ட முதல் பகுதி...

 

நான் நக்கீரனின் செய்திப்பிரிவில் கால் நூற்றாண்டு பணியாற்றிய முன்னாள் ஊழியன். அதற்கு முன்பாக பன்னிரண்டு ஆண்டுகள் மும்பை தாராவியில் வசித்தேன். வேறு இடங்களில் வசிப்பதற்கான வாய்ப்புகள் இருந்தும்கூட அங்குதான் வாழவேண்டும் என்று முடிவெடுத்து அங்கு வசித்தேன். தாராவி தமிழன் என்றாலே அவன் குற்றவாளி; நாற்றம் பிடித்தவன் என்பது மாதிரியான எண்ணம் எங்கும் பரவியிருந்தது. அங்கு வசித்த மக்களின் வாழ்வியலைக் கதையில் சொல்லவேண்டும்... கவிதையில் சொல்லவேண்டும்... கருத்துரைகளில் சொல்லவேண்டும் என்பதற்காக அந்த வாழ்வியலை ஆழ்ந்து கவனித்தேன். அதனால் தாராவி வாழ்க்கைப் பற்றி என்னால் விரிவாகப் பேசமுடியும். 

 

தாராவி என்பது மும்பையில் பெரிய சேரி. அங்கு 5 லட்சம் மக்கள்வரை வசிக்கிறார்கள். அது தனித்தொகுதியாகிவிடக்கூடாது என்பதற்காக அருகில் உள்ள சில தொகுதிகளோடு அந்த மக்களைப் பகுதிபகுதியாகப் பிரித்து இணைத்தார்கள். தாராவி தனித்தொகுதியானால் தமிழர்கள் பெரும்பான்மைபெற்றுவிடுவார்கள் என்ற காரணத்தினால் அதற்கான வாய்ப்புகள் இருந்தும் அதைச் செய்யமால்விட்டார்கள். தாராவி மும்பையில் மட்டும் பெரிய சேரியல்ல; ஆசியாவிலேயே அதுதான் பெரிய சேரி. அந்தக் காலகட்டத்தில் லண்டனில் பெரிய சேரி இருந்தது. அதற்கடுத்து உலகிலேயே இரண்டாவது பெரிய சேரி என்றால் அது தாராவிதான். மும்பையின் நடுவில் அழுக்கான ஒரு சேரி இருப்பதை அங்கிருந்த தொழிலதிபர்கள், அரசியல்வாதிகள் உள்ளிட்ட பலரால் சகித்துக்கொள்ள முடியவில்லை. அங்கு தமிழர்கள் குடியேறியது 18ஆம் நூற்றாண்டின் தொடக்கத்தில்தான். அப்போது வெள்ளையர்கள் அங்கு தோல் தொழிற்சாலை நடத்திக்கொண்டிருந்தனர். அதில் வேலை செய்வதற்காக நெல்லை மற்றும் சேலம் பகுதிகளில் இருந்து அழைத்துச் செல்லப்பட்டவர்கள்தான் அங்கு ஆரம்பத்தில் குடியேறியவர்கள். தேயிலை தோட்டங்களில் வேலை பார்ப்பதற்காக இலங்கைக்கு எப்படித் தமிழர்களை அழைத்துச்சென்று குறைவான கூலி கொடுத்து வறுமைக்குள்ளாக்கினார்களோ அதே போன்றுதான் இங்கும் செய்தார்கள். 150க்கும் மேலான தோல் தொழிற்சாலைகள் அங்கு இருந்தன. அங்கிருந்து வரும் துர்நாற்றம் 100 மீட்டர் தொலைவிற்காவது வரும். அங்கு இருப்பவர்களுக்கு இது பழகிவிடும். ஆனால், புதிதாக அங்கு ஒருவர் செல்கிறார் என்றால் மிகவும் சிரமமாக இருக்கும். ஒரு கட்டிடத்தில் 10 பொதுக்கழிப்பறைகள் இருக்கும். அதில் சிலவற்றில் கதவும் இருக்காது. கதவு இல்லாத கழிப்பறையில் ஆபாசமாகத் தெரியக்கூடாது என்பதற்காக தண்ணீர் எடுத்துக்கொண்ட சென்ற வாளியை முன்னே வைத்துவிட்டு மலம் கழிப்பார்கள். தாராவி பற்றி நான் எழுதிய ஒரு கவிதையில், 'இடுப்பில் அரிப்பு இல்லாதவன் இங்கு உயர்சாதிக்காரன்' என்று எழுதியிருந்தேன். அத்தனை பேரும் இடுப்பில் சொறிந்துக்கொண்டுதான் இருப்பார்கள். இது அங்கிருந்த அரசு தவறு மட்டுமல்ல; நம்மளுடைய தவறும்தான். அங்கு மின்சாரப் பிரச்சனை, தண்ணீர் பிரச்சனை என்பதெல்லாம் இருக்காது. அந்த அளவிற்கு சிறந்த வசதியை மாநகராட்சி ஏற்படுத்திக்கொடுத்திருக்கும். இருப்பினும், அந்த இடத்தை சுத்தமாக வைத்துக்கொள்ள வேண்டும் என்றெல்லாம் நம் ஆட்கள் நினைக்கமாட்டர்கள். கழிவறைக்கு அரசாங்கம் கதவு போட்டுக்கொடுத்தால் அதைக் கழட்டி எடுத்துச் செல்லும் செயலைச் செய்வதும் நம் ஆட்கள்தான். 

 

dharavi

 

திருமணமாகி முதல்முதலாக தாராவியில் நான் வசித்த வீடு 7க்கு 6 அளவுள்ள 42 சதுரஅடி கொண்ட சிறிய குடிசைதான். குடிசைகளும் நெருக்கநெருக்கமாக இருக்கும். நானும் என் மனைவியும் இரவில் ஏதாவது பேசிக்கொண்டு இருந்தால் மறுநாள் காலை பக்கத்து வீட்டுகார அக்கா என் மனைவியிடம் அதுபற்றி கேட்கும். என் மனைவி கிராமத்தில் வளர்ந்தவர் என்பதால் அவரால் அங்கு இருக்கவே முடியவில்லை. ஆறு மாதங்களிலேயே நான் ஊருக்குப் போகிறேன் எனக் கிளம்பிவிட்டார். ஏன் உனக்கு தாராவி பிடிக்கவில்லை என்று மனைவியிடம் கேட்டதற்கு அவர் சில காரணங்களைச் சொன்னார். அதைப் பின்னாட்களில், 'கோலமிட வாசலற்ற, பாடை கொண்டு செல்ல பாதையற்ற, விருந்தழைக்கச் சூழலற்ற, கூடி முயங்கி எழச் சூழலற்ற, வேய்ந்திருக்கும் நாட்களில் ஓய்ந்திருக்க கோடியற்ற தாராவி, நவநகரின் நடுவிருக்கும் வியர்வைப் பெருஞ்சேரி' என ஒரு கவிதையாக எழுதினேன். நான் மேற்சொன்ன அத்தனை பிரச்சனைகளும் அங்கு நிறைந்திருந்தன . யாரவது ஒருவர் இறந்துவிட்டால் அவர் வீட்டில் பிணத்தை வைக்கமுடியாது. கொஞ்சம் தள்ளி ஒரு மைதானம் போல அமைத்திருப்போம். அங்குக் கொண்டுபோய்தான் வைக்கவேண்டிய நிலை இருக்கும். அங்கிருந்து நேரடியாக சுடுகாட்டிற்கு எடுத்துக்கொண்டு சென்றுவிட முடியாது. தெருக்களும் குறுகலானதாக இருப்பதால் அந்த இடத்திலிருந்து தோளில்தான் பிணத்தை எடுத்துக்கொண்டு செல்லவேண்டும். பிரதான சாலைக்கு வந்தபிறகுதான் ஒரு பாடையில் வைத்து சுடுகாட்டிற்கு எடுத்துச் செல்லமுடியும். கணவன் மனைவிக்கு இடையேயான தாம்பத்யம் என்பது தெய்வீகமானதும் ரகசியமானதுமாகும். அதையே அந்த நான்கு தகரத்தினுள் தயங்கித்தயங்கித்தான் செய்யவேண்டும். பக்கத்து வீட்டில் மலம் கழித்திருந்தார்கள் என்றால் அந்த நரகல் சாக்கடையில் வரும். நம் வீட்டிற்கு முன்வந்து நின்றது என்றால் நாம்தான் தண்ணீர் ஊற்றி தள்ளிவிடவேண்டும். அந்த அளவிற்கு ஆரோக்கியக் கேடான விஷயங்கள் அங்கு நிறைந்திருந்தன.         

 

தொடரும்...

 

 

Next Story

"தமிழர்கள் கடைசிவரை கூலித்தொழிலாளியாக இருந்ததற்கு இதுதான் காரணம்..." ஆறாவயல் பெரியய்யா கூறும் தாராவி கதைகள்! #8

Published on 23/06/2021 | Edited on 23/06/2021

 

aaravayal periyaiya

 

எழுத்தாளரும் மூத்த பத்திரிகையாளருமான ஆறாவயல் பெரியய்யா, தாராவியில் தான் வசித்த நாட்களின் நினைவுகள் குறித்தும், தாராவி தமிழர்களின் வாழ்க்கைமுறை குறித்தும் 'தாராவி கதைகள்' என்ற தொடர் வாயிலாக நம்மோடு பகிர்ந்துவருகிறார். அந்த வகையில், தாராவி தமிழர்கள் பெரிய தொழிலதிபர்களாக உருவாக முடியாமல் போனதற்கான காரணம் குறித்து அவர் பகிர்ந்துகொண்டவை பின்வருமாறு... 

 

தாராவிக்கு மனிதநேயமிக்க முகம் ஒன்று உள்ளது. அங்கு வீடுகள் நெருக்கமாக இருப்பதால் யார்யார் வீட்டில் சமையல் நடக்கிறது; அடுப்பு எரிகிறது என்பதெல்லாம் தெரிந்துவிடும். தொடர்ந்து இரு நாட்கள் ஒரு வீட்டில் அடுப்பு எரியவில்லை என்றால் பக்கத்து வீட்டுக்காரர்கள் வந்து காரணம் கேட்பார்கள். கையில் பணமில்லை என்பதற்காக ஒருவர் சமைக்காமல் பட்டினியாகக் கிடக்கிறார் என்றால் மற்றவர்கள் கோபப்படுவார்கள். 'இதை முதலிலேயே சொல்லவேண்டியதுதானே.. வா இருக்கிறதை பகிர்ந்து சாப்பிடலாம்' என்று கூறி அவர்கள் வீட்டிற்கு அழைத்துச் சென்றுவிடுவார்கள். இந்தப் பழக்கம் அங்கு வசித்த எல்லா மொழி பேசும் மக்களிடமும் இருந்தது. தாராவி என்ற பெயர் எதற்காக வந்தது என்று எனக்குத் தெரியவில்லை. இது குறித்து நிறையத் தேடிப்பார்த்தோம். எந்த இடத்திலும் அதற்கான சரியான பதில் இல்லை. மும்பை என்ற பெயர் வந்ததற்குக் காரணம் அங்கு மும்பாதேவி கோவில் என்று ஒரு கோவில் இருந்தது. அது மீனவ மக்களுக்கான கோவில். மும்பா என்பது ஆங்கிலேயர்களால் பம்பா என உச்சரிக்கப்பட்டு பின்பு பம்பாய் என்றானதாகக் கூறுவார்கள். பின்பு, அது மும்பை எனப் பெயர் மாற்றம் செய்யப்பட்டது.

 

விஜயகாந்த், கமல், ரஜினி என தமிழ்நாட்டில் மிகப்பெரிய நட்சத்திரங்களாக இருந்த அனைவருக்கும் தாராவியில் ரசிகர்மன்றம் இருந்தது. நடிகர் ரஜினிகாந்தின் ரசிகர் மன்றம் மிகப்பெரிய அளவில் இருக்கும். பல ரசிகர் மன்றங்கள் இருந்தாலும் இந்த நடிகர் படத்தை மட்டும்தான் பார்க்க வேண்டும் என்ற போட்டி மனப்பான்மை அங்கு இல்லை. அனைவருமே ஒற்றுமையாகத்தான் இருந்தார்கள். சாதி, மதம் கடந்து அனைவரும் தமிழர்களாக ஒற்றுமையாக இருந்ததற்கு முக்கிய காரணம் பிற இனத்தவர்கள் நம்மை இந்த இடத்திலிருந்து விரட்டிவிடுவார்களோ என்ற எண்ணம்தான். மும்பையில் ஆளுநராகத் தமிழர் ஒருவர் இருந்தபோது தாராவியில் தமிழர்களுக்கு நேர்ந்த பிரச்சனை குறித்து அவரிடம் முறையிட்டதற்கு, 'பிழைக்க வந்த இடத்தில் வாலைச் சுருட்டிக்கொண்டு இருக்கவேண்டியதுதானே' என்றார். இது மாதிரியான விஷயங்கள் எல்லாம்தான் தமிழர்கள் நாம் ஒற்றுமையாக இருக்கவேண்டும் என்ற உந்துதலை ஏற்படுத்தியது. 

 

மராட்டியப் பெண்களும் தமிழ்ப்பெண்கள் போலவேதான் இருப்பார்கள். அவர்கள் நம் பெண்களைவிட எந்த விதத்திலும் குறைந்தவர்கள் அல்ல. மராட்டியக் கிராமப்புறங்களுக்குள் சென்றால் நம்முடைய அம்மா, அத்தையைப் பார்ப்பதுபோல இருக்கும். அவர்களுடைய விருந்தோம்பல் பண்பும் சிறப்பாக இருக்கும். ஆரம்பக்கட்டத்தில், தாராவி மக்கள் என்றால் தவறானவர்கள் என்ற எண்ணம் அங்கிருந்தவர்கள் மத்தியில் இருந்தது. நான் அங்கிருந்த காலகட்டத்திலேயே அந்த எண்ணத்தை உடைக்க இலக்கியவாதிகள், இளைஞர்கள் எனப் பலர் வேலை செய்தனர். உண்மையில் தாராவிக்காரர்கள் தவறானவர்கள் அல்ல; கொஞ்சம் கோபக்காரர்கள். ஒருமுறை ஓனர் திட்டினார் என்பதற்காக நடு ரோட்டிலேயே வண்டியை நிறுத்திவிட்டு, நீங்களே ஒட்டிட்டுப்போங்கடா என நம்முடைய ஆட்கள் எட்டு பேர் வேலையை விட்டுவிட்டு வந்தார்கள். தாராவி தமிழர்களை வேலைக்கு வைத்தால் இந்த மாதிரியான முரட்டுத்தனமான செயல்களைச் செய்வார்கள் என்ற பயம் அங்கிருந்த முதலாளிகளுக்கு இருந்தாலும் இதுவரை எந்த முதலாளியும் தாராவி தமிழர்களை நன்றி கெட்டவர்கள் என்று கூறியதில்லை. 

 

அங்கிருந்த சாதாரண மக்களுக்கு மராட்டிய அரசோ காவல்துறையோ ஒருபோதும் இடைஞ்சல் கொடுத்ததில்லை. ஏதாவது குற்றச்செயல்களில் ஈடுபட்ட ஒருவர் தாராவிக்குள் ஒளிந்திருக்கிறார் என்றால் போலீஸ் வருவார்கள். மற்றபடி வேறெந்த காரணத்திற்காகவும் போலீஸ் உள்ளே வரமாட்டார்கள். இன்றைக்கு வட இந்தியர்களைப் பார்த்து நாம் கூறுகிறோமே அதுபோல இந்த தமிழனுங்க வந்துதான் நமக்கெல்லாம் வேலை கிடைக்காம போயிருச்சு என்று சில மராட்டியர்கள் பேசுவார்கள். இது மாதிரியான பேச்சு சாதாரண மக்கள் மத்தியில் இருந்தாலும் அரசியல்வாதிகளிடமோ அதிகாரிகளிடமோ இருக்காது. கம்யூனிஸ்ட் போராட்டங்களில் கலந்துகொள்வார்கள் என்று நினைத்து முன்னரே கைது செய்து போலீஸ் நிலையத்தில் எங்களை இருக்க வைப்பார்கள். மறுநாள் வெளியே விட்டுவிடுவார்கள். எந்தவொரு போலீஸ் அதிகாரியும் நீங்கள் எதுக்கு போராட்டம் செய்றீங்க என்றெல்லாம் எங்களைப் பார்த்துக் கேட்டதில்லை. சட்டப்படி என்ன செய்யவேண்டுமோ அதை மட்டுமே அவர்கள் செய்வார்கள். 

 

குஜராத்தில் இருந்து ஒரு தொழிலதிபர் வருகிறான் என்றால் அவன் நண்பர்கள் அனைவரும் நகைக்கடை வைப்பார்கள். இங்கு தமிழ்நாட்டில் இருந்து நாடார் ஒருவர் போகிறார் என்றால் அங்கு சென்று மளிகைக்கடைதான் வைப்பார். தாராவி தமிழர்களோ மாடுங்கா தமிழர்களோ தொழில்ரீதியாக அங்கு செல்லவில்லை. மாதச்சம்பளத்தை நோக்கித்தான் ஆரம்பத்திலிருந்தே சென்றுகொண்டிருந்தார். குஜராத்தியர்கள், பார்சியினரெல்லாம் தொழில் செய்யவேண்டும் என்ற முடிவோடுதான் அங்கு வந்தார்கள். ஆனால், பெரும்பாலான தமிழர்களிடம் கூலிக்கு வேலைக்குச் செல்லவேண்டும் என்ற எண்ணம் மட்டும்தான் இருந்தது. தாராவிக்கு சென்ற தமிழர்களின் அதிகபட்ச ஆசை டாக்சி, ஆட்டோ வாங்கவேண்டும் என்பதாகவே இருந்தது. இதுதான் தமிழர்கள் அங்கு பெரிய தொழிலதிபர்களாக உருவாக முடியாமல் போனதற்கு முக்கிய காரணமாக இருந்தது.

 

 

Next Story

"தாராவி பற்றி தமிழ் சினிமா கூறுவது உண்மையல்ல..." ஆறாவயல் பெரியய்யா கூறும் தாராவி கதைகள்! தாராவி கதைகள் #7

Published on 10/06/2021 | Edited on 10/06/2021

 

aaravayal periyaiya

 

எழுத்தாளரும் மூத்தப் பத்திரிகையாளருமான ஆறாவயல் பெரியய்யா, தாராவியில் தான் வசித்த நாட்களின் நினைவுகள் குறித்தும், தாராவி தமிழர்களின் வாழ்க்கைமுறை குறித்தும் 'தாராவி கதைகள்' என்ற தொடர் வாயிலாக நம்மோடு பகிர்ந்துவருகிறார். அந்த வகையில், தாராவியின் தற்போதைய நிலை குறித்து அவர் பகிர்ந்துகொண்டவை பின்வருமாறு...

 

ஒரு காலத்தில் 45 பள்ளிகளாக இருந்த தமிழ்வழிப் பள்ளிகள் தற்போது 20 பள்ளிகளாக குறைந்துவிட்டன. தாராவியில் இருந்த 2 பள்ளிகள் இழுத்து மூடப்பட்டுவிட்டன. பம்பாயில் வசிக்கும் நம் குழந்தைகள் எதற்குத் தமிழ் படிக்க வேண்டுமென்று நம் ஆட்கள் நினைக்க ஆரம்பித்ததன் விளைவுதான் பள்ளிக்கூடங்களின் எண்ணிக்கை குறையத் தொடங்கியதற்கு காரணம். தாராவி என்பது தமிழர்களின் கோட்டை, தாராவி என்பது இன்னொரு தமிழ்நாடு என்ற பிம்பம் ஏறக்குறைய 90 விழுக்காடு நொறுங்கிவிட்டது. 

 

80களில் ஒலிம்பிக் நேரத்தில் கலர் டிவியை இலவசமாக இறக்குமதி செய்ய அனுமதி இருந்தது. அதற்கு முன்பு தாராவி பகுதியில் கலர் டிவி கிடையாது. சில குடிசைகளில் 60 எம்.எம் வெள்ளைத் திரையில் சினிமா ஓட்டுவார்கள். அதற்கு 2 ரூபாய், 3 ரூபாய் எனக் கட்டணம் வசூலித்துக்கொள்வார்கள். சினிமா பார்க்க வேண்டுமென்றால் அங்குதான் பார்க்க வேண்டும். 10க்கும் மேற்பட்ட குடிசைகளில் இதற்கான வசதி இருந்தது. இதை நடத்துபவர்கள் பெரும்பாலும் ஏதாவது ரௌடியாகத்தான் இருப்பார்கள். 3 மணிக்கு ஒரு சினிமா, 6 மணிக்கு ஒரு சினிமா, இரவு 9 மணிக்கு ஒரு சினிமா போடுவார்கள். இதில், 9 மணி சினிமா என்பது ப்ளூ ஃபிலிம்மாக இருக்கும். இதில், பெண்களுக்கு அனுமதி கிடையாது. இது மாதிரியான கலாச்சார சீர்கேடு நிகழ்வுகள் நடப்பது வெளிப்படையாகத் தெரிந்தாலும் போலீசார் கண்டுகொள்ளமாட்டார்கள். இதில் கிடைக்கும் வருமானத்தில் போலீசாருக்கும் ஒரு பங்கு செல்லும். சில நேரங்களில் மேலதிகாரி அழுத்தம் காரணமாக ரெய்டு நடத்த வேண்டிய கட்டாயம் போலீசாருக்கு ஏற்படும். அந்த நேரங்களில் ரெய்டு வரும் விஷயத்தை முன்கூட்டியே இவர்களிடம் தெரிவித்துவிடுவார்கள். 

 

50 பேர் கூடி ப்ளூ ஃபிலிம் பார்த்துவிட்டு வெளியே வரும்போது, அவர்கள் மனநிலை எப்படி இருக்கும் என்று யோசித்துப் பாருங்கள். இதனால் தாராவி பகுதிக்குள் நிறைய வன்முறைகள் நடந்தன. ஒருகட்டத்தில் இதை இழுத்து மூட வேண்டுமென பெண்களே போராட ஆரம்பித்துவிட்டனர். அதுபோக தாராவி தமிழர்களுக்குப் பெரிய சிக்கல், தமிழ்நாட்டுத் தமிழர்களாலும் இருந்தது. தமிழ்நாட்டில் ஏதாவது கொலை செய்துவிட்டு தாராவி பகுதிக்குள் வந்து பதுங்கிக்கொள்வார்கள். அப்படி வருபவர்களுக்கு அடைக்கலம் கொடுப்பதற்கென்றே அங்கு ஒரு கூட்டம் இருந்தது. இதனால், அடிக்கடி தாராவி பகுதிக்குள் போலீசார் வந்துசென்றனர். படம் பார்ப்பது, ரம்மி விளையாடுவது மாதிரியான பொழுதுபோக்குகள் மட்டுமே அங்கிருந்த மக்களுக்கு இருந்தன.

 

அதைத் தவிர்த்து, இலக்கியக் கூட்ட விழா நடந்தாலும் பெரும்பாலான மக்கள் அதில் பங்கெடுத்துக்கொள்வதில்லை. புத்தகங்கள், பத்திரிகைகள் படிக்கக் கூடிய ஆட்கள் பத்தாயிரம் பேருக்கு மேல் இருந்தாலும் வெறும் 20, 30 ஆட்கள் மட்டுமே இலக்கியக் கூட்டங்களில் வந்து நேரடியாகக் கலந்துகொள்வார்கள். அதுபோக அரசியல் ரீதியான பட்டிமன்றங்கள் நடைபெறும். திமுகவினர் வந்தால் ஜெயலலிதா அதிக அயோக்கியத்தனம் செய்தது ஆளும் கட்சியாக இருந்தபோதா, எதிர்க்கட்சியாக இருந்தபோதா என தலைப்பு வைத்து நடத்துவார்கள். அதுவே அதிமுகவினர் வந்தால் கருணாநிதி அதிக அயோக்கியத்தனம் செய்தது ஆளும் கட்சியாக இருந்தபோதா, எதிர்க்கட்சியாக இருந்தபோதா எனத் தலைப்பு வைத்து நடத்துவார்கள். எங்களுக்கு இது சரியாகப்படவில்லை. ஒருமுறை இதுமாதிரியான பட்டிமன்ற நிகழ்வுக்கு வந்தவர்களிடம் அரசியல் பேச வேண்டாம்; அதற்குப் பதிலாக திருக்குறள் கூட்டத்தில் கலந்துகொண்டு பேசுங்கள் எனக் கூறினோம். முதலில் அவர்கள் தயங்கினாலும் பிறகு சம்மதித்துவிட்டனர்.

 

அப்படி ஏற்பாடு செய்யப்பட்ட திருக்குறள் கூட்டத்தில் கலந்துகொண்டு பேசும்போது, 'உண்மையோ பொய்யோ இதுவரை ஒரு தலைவனை தூற்றியோ புகழ்ந்தோதான் பேசியிருக்கிறோம். முதல்முறையாக திருக்குறள் பற்றி பேசுகிறோம் என விழாவிற்கு வந்த மூவருமே கண்கலங்கிவிட்டனர். அரசியல் பட்டிமன்றங்கள்தான் இப்படி ஆபாசமாக நடக்குமேயொழிய, இலக்கிய பட்டிமன்றங்கள் மிகக் கண்ணியமான முறையில் நடக்கும். சிலப்பதிகாரம் பற்றி பேசுகிறார்கள் என்றால் கண்ணகிக்கும் மாதவிக்கும் புகழ் பரப்பக்கூடிய அளவிலேயே விவாதங்கள் நடைபெறும். அந்த மாதிரியான தலைப்புகள்தான் தேர்ந்தெடுக்கப்படும். தற்போது இலக்கியக் கூட்டங்கள் எதுவும் அங்கு நடப்பதில்லை. 

 

அன்று பெரிய தலைவர்களாக இருந்த ஆட்களின் பெயர்களைக்கூட இன்றைய ஆட்கள் மறந்துவிட்டனர். தாராவி பற்றி தமிழ் சினிமாவில் கூறியதில் எதுவும் உண்மையில்லை. 'நாயகன்', 'காலா' படங்களில் காட்டியதுபோல எந்தச் சம்பவங்களும் அங்கு நடைபெறவில்லை. தற்போது வசிக்கும் இடத்தை விற்றுவிட்டு 30 லட்சம், 40 லட்சம் பணம் பெற்றுக்கொண்டு புறநகர் பகுதியில் சென்று வசதியாக வாழலாம் என்று நினைத்துதான் தாராவியில் இருந்து தமிழர்கள் வெளியேறத்தொடங்கினார்கள். மராட்டிய அரசோ, மாநகராட்சியோ நம் மக்களைத் துரத்தவில்லை. சினிமாவிற்காகத் தமிழர்கள் அவர்களுக்கு கீழே அடிமையாக இருந்ததுபோல காட்டிக்கொண்டிருக்கிறார்கள்.

 

தமிழர்கள் என்றாலே வன்முறையாளர்கள் என்றானது இந்த சம்பவத்திற்குப் பிறகுதான்! தாராவி கதைகள் #6