Skip to main content

டி-20 போட்டி; இந்தியா - பாகிஸ்தான் போட்டிக்குப் பயங்கரவாதிகள் மிரட்டல்!

Published on 30/05/2024 | Edited on 30/05/2024
 hreaten India-Pakistan match in t20 match

இந்தியாவில் சமீபத்தில் 2024ஆம் ஆண்டிற்கான ஐ.பி.எல் போட்டி நடைபெற்று முடிந்தது. இதில், கொல்கத்தா அணிக்கும், ஹைதராபாத் அணிக்கும் நடந்த இறுதிப் போட்டியில் கொல்கத்தா அணி வெற்றி பெற்று இந்த வருட கோப்பையை வென்றது. இதற்கிடையில், கிரிக்கெட் ரசிகர்களை இன்னும் மகிழ்விக்கும் வகையில், ஜூன் மாதத்தில் நடைபெறும் டி-20 உலகக்கோப்பைத் தொடரில் பங்கேற்கும் கிரிக்கெட் வீரர்களை ஒவ்வொரு அணியும் அறிவித்து வந்தனர்

உலக கோப்பை டி20 கிரிக்கெட் தொடர் அமெரிக்கா மற்றும் மேற்கு இந்திய தீவுகள் நாடுகளில் வருகின்ற ஜுன் 2ஆம் தேதி முதல் ஜுன் 29ஆம் தேதி வரை டி-20 உலகக்கோப்பை தொடர் நடைபெற இருக்கிறது. இதில், குரூப் ஏ, குரூப் பி, குரூப் சி, குரூப் டி என்று நான்கு பிரிவுகளாக பிரிக்கப்பட்டு, ஒவ்வொரு பிரிவிலும் ஐந்து அணிகள் இடம் பெற்று விளையாடவுள்ளன. 

டி-20 உலகக்கோப்பைத் தொடரில் பங்கேற்கும் இந்திய அணி கிரிக்கெட் வீரர்களை கடந்த ஏப்ரல் மாதம் பிசிசிஐ அறிவித்தது. அதில், ரோஹித் சர்மா தலைமையிலான இந்திய அணியில் ஜெய்ஸ்வால், கோலி, சூர்யகுமார், பண்ட் (வி.கீ), சஞ்சு சாம்சன் (வி.கீ), ஹர்திக் பாண்ட்யா (துணை கேப்டன்), துபே, ஜடேஜா, அக்ஸர் படேல், குல்தீப் யாதவ், சாஹல், அர்ஷ்தீப் சிங், பும்ரா, சிராஜ், கில், ரிங்கு சிங், கலீல் அஹ்மத், ஆவேஷ் கான் ஆகியோர் இடம்பெற்றிருந்தனர்.

20 அணிகள் கலந்துகொள்ளும் டி-20 உலககோப்பை கிரிக்கெட் தொடரில் இந்திய அணி, ‘ஏ’ பிரிவில் அயர்லாந்து, பாகிஸ்தான், கனடா, அமெரிக்கா ஆகிய அணிகளுடன் இடம்பெற்றுள்ளது. இதில் இந்திய அணி தனது தொடக்க ஆட்டத்தில் ஜூன் 5ஆம் தேதி அயர்லாந்து அணியுடன் மோதவிருக்கிறது. இதனையடுத்து, இந்தியா தனது இரண்டாவது ஆட்டத்தில் பாகிஸ்தான் அணியுடன் ஜூன் 9ஆம் தேதி நியூயார்க் நகரில் மோதவிருக்கிறது.

இந்த நிலையில், இந்தியா - பாகிஸ்தான் மோதும் போட்டிக்கு ஐ.எஸ் பயங்கரவாத அமைப்பு மிரட்டல் விடுத்துள்ளதாகத் தகவல் வெளியாகியுள்ளது. மேலும், மைதானத்தின் புகைப்படத்தைப் பகிர்ந்து ஐஎஸ் ஆதரவு அமைப்பு மிரட்டல் விடுத்துள்ளதாக தகவல் வெளியாகியுள்ளது. இதனால், போட்டி நடைபெறும் மைதானத்தை சுற்றி வழக்கத்தை விட கூடுதல் பாதுகாப்பு அதிகரிக்கப்பட்டுள்ளது. 

 

Next Story

டி-20 உலக்கோப்பை; இந்திய அணியில் இடம்பெற்ற அதிரடி வீரர்கள்!

Published on 30/04/2024 | Edited on 30/04/2024
Action players in the Indian team at T-20 World Cup

இந்தியாவில் தற்போது 2024ஆம் ஆண்டிற்கான ஐ.பி.எல் போட்டி நடைபெற்று கொண்டிருக்கிறது. இதில், ராஜஸ்தான் ராயல்ஸ் அணி, கொல்கத்தா நைட் ரைடர்ஸ் மற்றும் சென்னை சூப்பர் கிங்ஸ் அணி முன்னிலை வகித்து வருகின்றன. ஒவ்வொரு மாநிலத்திலும் நடைபெறும் இந்த ஐ.பி.எல் தொடர்களைக் கிரிக்கெட் ரசிகர்கள் ஆர்வமாக கண்டு வருகின்றனர். இந்த நிலையில், கிரிக்கெட் ரசிகர்களை இன்னும் மகிழ்விக்கும் வகையில், ஜூன் மாதத்தில் நடைபெறும் டி-20 உலகக்கோப்பைத் தொடரில் பங்கேற்கும் கிரிக்கெட் வீரர்களை ஒவ்வொரு அணியும் அறிவித்து வருகின்றன.

உலக கோப்பை டி20 கிரிக்கெட் தொடர் மேற்கிந்திய தீவுகள் மற்றும் அமெரிக்காவில் வருகிற ஜூன் மாதம் தொடங்கவுள்ளது. அமெரிக்கா மற்றும் மேற்கு இந்திய தீவுகள் நாடுகளில் வருகின்ற ஜுன் 1ஆம் தேதி முதல் ஜுன் 29ஆம் தேதி வரை டி-20 உலகக்கோப்பை தொடர் நடைபெற இருக்கிறது. இதில், குரூப் ஏ, குரூப் பி, குரூப் சி, குரூப் டி என்று நான்கு பிரிவுகளாக பிரிக்கப்பட்டு, ஒவ்வொரு பிரிவிலும் ஐந்து அணிகள் இடம் பெற்று விளையாடவுள்ளன. 

அதற்கான 15 பேர் கொண்ட பட்டியலை ஒவ்வொரு அணியும் இறுதி செய்யும் தருவாயில் உள்ளன. அதன் ஒரு பகுதியாக நேற்று (29-04-24) நியூசிலாந்து கிரிக்கெட் அணி வில்லியம்சன் தலைமையிலான 15 பேர் கொண்ட அணியை அறிவித்துள்ளது. அதில் ஐபிஎல்- இல் கலக்கி வரும் போல்ட், மிட்செல், ரச்சின் ரவீந்திரா ஆகியோரும் இடம் பெற்றுள்ளனர். இதனையடுத்து, டி20 உலக கோப்பைத் தொடருக்காக எய்டன் மார்க்ரம் தலைமையில் 15 பேர் கொண்ட அணியை தென்னாப்பிரிக்கா அறிவித்தது. அதில், குவிண்டின் டிகாக், மார்கோ யான்சன், ஹென்றிக் கிளாசன், டேவிட் மில்லர், ரபாடா, ட்ரிஸ்டன் ஸ்டப்ஸ் உள்ளிட்டோர் அணியில் இடம்பெற்றுள்ளனர்.

இந்த நிலையில், டி-20 உலகக்கோப்பைத் தொடரில் பங்கேற்கும் இந்திய அணி கிரிக்கெட் வீரர்களை பிசிசிஐ அறிவித்துள்ளது. அதில், ரோஹித் சர்மா தலைமையிலான இந்திய அணியில் ஜெய்ஸ்வால், கோலி, சூர்யகுமார், பண்ட் (வி.கீ), சஞ்சு சாம்சன் (வி.கீ), ஹர்திக் பாண்ட்யா (துணை கேப்டன்), துபே, ஜடேஜா, அக்ஸர் படேல், குல்தீப் யாதவ், சாஹல், அர்ஷ்தீப் சிங், பும்ரா, சிராஜ், கில், ரிங்கு சிங், கலீல் அஹ்மத், ஆவேஷ் கான் ஆகியோர் இடம்பெற்றுள்ளனர். 

நடப்பு ஐபிஎல்-ல் சென்னை சூப்பர் கிங்ஸ் அணிக்காக மிடில் ஆர்டரில் அதிரடியாக ஆடிவரும் ஷிவம் துபே டி20 உலக கோப்பைக்கான இந்திய அணியில் இடம் பெற்றுள்ளார். நடப்பு ஐ.பி.எல்-லில் துபே 9 ஆட்டங்களில் ஆடி 350 ரன்களை எடுத்துள்ளார் என்பது குறிப்பிடத்தக்கது. அதே வேளையில், நடப்பு ஐ.பி.எல் தொடரில் கோலிக்கு பிறகு அதிக ரன்கள் குவித்தவரும், சென்னை அணியின் கேப்டனுமான ருதுராஜ் கெய்க்வாட் டி20 உலக கோப்பைக்கான இந்திய அணியில் இடம்பெறவில்லை. அதே போல், மிகப்பெரிய விபத்துக்கு பிறகு ஐ.பி.எல் தொடரில் தற்போது சிறப்பாக விளையாடி வரும் ரிஷப் பண்ட் 1.5 ஆண்டுகளுக்கு பிறகு இந்திய அணிக்கு திரும்பியுள்ளார். மேலும், தமிழக கிரிக்கெட் வீரரான நடராஜன், டி-20 உலக்கோப்பைக்கான இந்திய அணியில் இடம்பெறவில்லை. இந்த தொடரில், தேர்ந்தெடுக்கப்பட்ட வீரர்களில் ஒருவர் தமிழக வீரர் இல்லாததால் ரசிகர்கள் கடும் விமர்சனம் செய்து வருகின்றனர். நடராஜன் தற்போது நடைபெற்று கொண்டிருக்கும் ஐ.பி.எல் தொடரில் ஹைதராபாத் அணிக்காக விளையாடிக் கொண்டிருக்கிறார் என்பது குறிப்பிடத்தக்கது. 

Next Story

‘அடுத்தடுத்து குண்டு வெடிக்கும்’ - மின்னஞ்சல் மிரட்டலால் பரபரப்பு

Published on 05/03/2024 | Edited on 05/03/2024
e-mail threat to karnataka cheif miniter and causing panic

கர்நாடக மாநிலம் பெங்களூரில் உள்ள ஒயிட்ஃபீல்ட் 80 அடி சாலை என்ற இடத்தில் ராமேஸ்வரம் கபே என்ற பிரபல உணவகத்தில் கடந்த 1ஆம் தேதி பிற்பகல் 01.05 மணியளவில் திடீரென யாரும் எதிர்பாராத வேளையில் மர்மப் பொருள் ஒன்று வெடித்தது பரபரப்பை ஏற்படுத்தியது. இதனால் உணவகத்தில் தீ மளமளவெனப் பரவி பலர் படுகாயம் அடைந்தனர். இது குறித்து தகவலறிந்து சம்பவ இடத்திற்கு வந்த தீயணைப்புப் படையினர் சிக்கியவர்களை மீட்டனர். இந்த வெடி விபத்தில் மொத்தம் 10 பேர் படுகாயமடைந்தனர்.

முதற்கட்ட விசாரணையில், இது சிலிண்டர் வெடிப்பு இல்லை என்பதும் உறுதி செய்யப்பட்டது. அதே சமயம் வெடி விபத்து நிகழ்ந்த இடத்தில், தடயவியல் நிபுணர்கள் குழு தடயங்களைச் சேகரித்து ஆய்வு நடத்தினர். பின்னர் அது திட்டமிடப்பட்ட குண்டு வெடிப்பு என்பது உறுதி செய்யப்பட்டது.

இந்த சம்பவத்தை தொடர்ந்து சுமார் 3 கிலோமீட்டர் தூரத்திற்கு உள்ள சிசிடிவி கேமரா பதிவுகளை போலீசார் கைப்பற்றி தீவிர விசாரணை மேற்கொண்டு வருகின்றனர். இந்த குண்டுவெடிப்பு சம்பவத்திற்கு இதுவரை எந்த அமைப்பும் பொறுப்பேற்காத நிலையில், இந்த சம்பவத்தின் பின்னணியில் இருக்கும் நபர்கள் யார் என்பது குறித்து தேசியப் புலனாய்வு முகமை தீவிர விசாரணையை முன்னெடுத்துள்ளது.

இந்தச் சம்பவம் பெங்களூர் நகரத்தையே பரபரப்பில் ஆழ்த்தி இருக்கும் நிலையில், ராமேஸ்வரம் கஃபே சுற்று வட்டாரப் பகுதிகளில் பல முக்கிய இடங்களிலும் பாதுகாப்பு ஏற்பாடுகள் தீவிரப்படுத்தப்பட்டுள்ளது. சம்பந்தப்பட்ட ராமேஸ்வரம் கஃபே ஹோட்டலுக்கு மர்ம நபர் ஒருவர் வருவதும், பையை வைத்துவிட்டு வெளியே செல்வது தொடர்பான சிசிடிவி காட்சி வெளியாகியுள்ளது. அந்த காட்சிகள் அடிப்படையில் ஒருவரை சந்தேகத்தின் அடிப்படையில் கைது செய்து தீவிர விசாரணை மேற்கொள்ளப்பட்டு வருகிறது. அந்த நபர் எந்தெந்த பகுதிக்கு சென்றாரோ அந்தந்த பகுதியில் உள்ள இடங்களில் வெடிகுண்டு நிபுணர்கள் தீவிர சோதனை மேற்கொண்டு வருகின்றனர். சந்தேகப்படும் நபரின் புகைப்படம் மற்றும் சிசிடிவி காட்சிகள் ஆகியவையும் வெளியிடப்பட்டது. இது குறித்து, போலீசார் தொடர்ந்து விசாரணை நடத்தி வருகின்றனர். 

இந்த நிலையில், கர்நாடகாவில் பேருந்துகள், வழிபாட்டு தலங்களில் வெடிகுண்டு வெடிக்கும் என மின்னஞ்சலில் மிரட்டல் விடுக்கப்பட்டுள்ளது. கர்நாடகா முதல்வர் சித்தராமையா, உள்துறை அமைச்சர் மற்றும் காவல்துறை தலைவருக்கு மின்னஞ்சலில் வெடிகுண்டு மிரட்டல் விடுக்கப்பட்டுள்ளது. அண்மையில் பெங்களூரு உணவகத்தில் குண்டு வெடித்த நிலையில், மீண்டும் மிரட்டல் விடுக்கப்பட்டது பெரும் பரபரப்பை ஏற்படுத்தியுள்ளது. இந்த மிரட்டல் குறித்து போலீசார் தீவிர விசாரணை நடத்தி வருகின்றனர்.