Skip to main content

சொரியாசிஸ் பிரச்சனைக்கு தீர்வு என்ன? - ஹோமியோபதி மருத்துவர் ஆர்த்தி விளக்கம்

Published on 28/06/2023 | Edited on 28/06/2023

 

Psoriasis - Skin Problem 

 

சொரியாசிஸ் பிரச்சனை குறித்து ஹோமியோபதி மருத்துவர் ஆர்த்தி விவரிக்கிறார்.

 

சொரியாசிஸ் நோய் என்பது பரம்பரையாக வரலாம், நம்முடைய சுற்றுப்புற காரணங்களால் ஏற்படலாம் என்று சொல்லப்படுகிறது. இந்த நோயால் நமக்கு உடலில் மிகுந்த அரிப்பு ஏற்படும். நம்முடைய தோல் மீன் செதில் போல் மாறிவிடும். அல்லது தலையில் ஏற்படும் பொடுகு போன்ற தோற்றத்தை அளிக்கும். இதில் பெரும்பாலும் ரத்தக்கசிவு என்பது இருக்காது. மிக அதிகமாக சொறியும்போது ரத்தக்கசிவு ஏற்பட வாய்ப்பு இருக்கிறது. இந்த நோயால் பாதிக்கப்பட்டவர்களிடம் பிரத்தியேகமான வாடை எதுவும் இருக்காது. 

 

தலை, நகம், நாக்கு, முட்டி, உள்ளங்கை என்று பல இடங்களில் சொரியாசிஸ் ஏற்பட வாய்ப்புள்ளது. ஒவ்வொருவருடைய தோல் நிறத்தையும் பொறுத்து புண் நிறமும் மாறும். இந்த நோய் சில மாதங்களுக்கு நீடித்து அதன் பிறகு மறைந்துவிடும். சில காலம் கழித்து மீண்டும் வரும். வெடிப்பு ஏற்பட்டு அதனால் அரிப்பு ஏற்படும். ரணம் போன்ற வலி ஏற்படும். குழந்தைகளுக்கும் இந்த நோய் ஏற்படும். அவர்களுக்கு ஏற்படும் புண் சிவப்பு நிறத்தில் இருக்கும். இந்த நோயால் உடல் உணர்ச்சிகளில் எந்த பாதிப்பும் ஏற்படாது.

 

குளிர்ச்சியான வானிலை, தொண்டை மற்றும் தோலில் ஏற்படும் தொற்று, சிகரெட் மற்றும் மது பயன்படுத்துதல், சில மருந்துகளை எடுத்துக்கொள்ளுதல் ஆகியவற்றின் காரணமாக சொரியாசிஸ் அதிகமாகும் வாய்ப்பு இருக்கிறது. ஹோமியோபதியில் சொரியாசிஸ் எதனால் ஏற்பட்டுள்ளது என்பதை முதலில் ஆராய்வோம். அவர்களுடைய மனநிலை, வாழ்க்கை முறை என்று அனைத்தையும் அறிந்துகொள்வோம். இவற்றின் அடிப்படையில் சரியான மருந்துகளை நாம் வழங்கும்போது சொரியாசிஸ் நோயை எளிதாக குணப்படுத்தலாம். 

 

ஹோமியோபதியில் குணமாவது சற்று தாமதமானாலும் அதற்கான பலன்கள் நீண்ட காலம் இருக்கும். சொரியாசிஸ் என்பது குணப்படுத்தக்கூடிய ஒரு நோய் தான். இதனால் சர்க்கரை நோய், இதய நோய், உடல் பருமன், ரத்தக் கொதிப்பு என்று பல்வேறு பிரச்சனைகள் ஏற்படலாம். எனவே மக்கள் ஆரம்பத்திலேயே இந்த நோய்க்கு சிகிச்சை எடுத்துக்கொள்ள வேண்டும். சொரியாசிஸ் என்பது பரவக்கூடிய நோய் அல்ல. சொரியாசிஸ் நோயால் பாதிக்கப்பட்டவர்கள் பால் மற்றும் பால் பொருட்கள், கோதுமை, மைதா, தக்காளி, கத்தரிக்காய், மது ஆகியவற்றைத் தவிர்க்க வேண்டும். காய்கறிகள், பழங்கள், நட்ஸ், ஒமேகா 3 சத்து நிறைந்த மீன்கள் ஆகியவற்றை எடுத்துக்கொள்ளலாம். சொரியாசிஸ் நோயால் பாதிக்கப்பட்டவர்களை நாம் வித்தியாசமாக நடத்தாமல் சமமாக மதிக்க வேண்டும்.

 

 

 

Next Story

மூல நோய்க்கு என்னதான் தீர்வு? - ஹோமியோபதி மருத்துவர் ஆர்த்தி  விளக்கம்

Published on 18/10/2023 | Edited on 18/10/2023

 

homeopathy Doctor Arthi health tips

 

பைல்ஸ் பிரச்சனை குறித்தும் அதற்கான சிகிச்சை வழிமுறைகளைப் பற்றியும் ஹோமியோபதி மருத்துவர் ஆர்த்தி விளக்குகிறார்.

 

ஆசனவாயில் உள்ள நரம்பு வீக்கத்தினால் ஏற்படுவது தான் பைல்ஸ் என்கிற மூல நோய். உள்ளுக்குள் இருக்கும் பைல்ஸ் நோயில் நமக்கு எந்த அறிகுறியும் தெரியாது. வெளியேற்றத்தின் போது ரத்தம் வெளிவரும். வெளியே ஏற்படும் பைல்ஸ் நோயில் அதிகமான எரிச்சல் இருக்கும், உட்காரும்போது வலி ஏற்படும். வெளியேற்றத்தின் போது கொஞ்சமாகவோ அதிகமாகவோ ரத்தம் வெளிவரும். பலருக்கு ஏற்படும் பைல்ஸ் என்பது வெளியே ஏற்படுவது தான். 

 

பல வருடங்களாக மலச்சிக்கல் பிரச்சனை இருப்பவர்களுக்கு பைல்ஸ் பிரச்சனை ஏற்படும். அதிகமான பளுவைத் தூக்குபவர்களுக்கும் இந்தப் பிரச்சனை ஏற்படும். கர்ப்ப காலத்தில் இருப்பவர்கள், வயதானவர்கள், குறைவான அளவில் தண்ணீர் குடிப்பவர்கள் ஆகியோருக்கு பைல்ஸ் பிரச்சனை ஏற்படும். சில நேரங்களில் மருந்துகளின் விளைவுகளினால் கூட இது ஏற்படும். குழந்தைகளைப் பொறுத்தவரை மலச்சிக்கல் மட்டுமே இதற்கான அறிகுறியாக இருக்கும். 

 

30 வயதுக்குப் பிறகு பலருக்கு பைல்ஸ் பிரச்சனை ஏற்படும். ஹோமியோபதியில் இதற்கான நல்ல மருந்துகள் இருக்கின்றன. ஆரம்ப கட்டத்திலேயே நம்மிடம் வரும்போது இதை முழுமையாக குணப்படுத்த முடியும். பைல்ஸ் பரிசோதனைக்காக மருத்துவரை அணுகுவதற்கு நாம் கூச்சப்படக்கூடாது. காலம் தாழ்த்தி மருத்துவரிடம் சென்றால் நோயை குணப்படுத்துவது கடினமாகிவிடும். ஹோமியோபதி சிகிச்சை எடுத்துக்கொண்டால் மீண்டும் பைல்ஸ் நோய் வராது. 

 

ஹோமியோபதியில் உடனடியாக நோய் குணமாக வேண்டும் என்கிற எண்ணத்தில் பலர் நம்மிடம் வருகின்றனர். ஆனால் முழுமையாக குணமடைய நிச்சயம் காலம் எடுக்கும். இனிப்பு உணவுகள், மைதா, கோதுமை, கேக் போன்றவற்றை நிச்சயம் தவிர்க்க வேண்டும். கீரை, காய்கறிகள், பழங்களை நிறைய எடுத்துக்கொள்ள வேண்டும். நிறைய தண்ணீர் குடிக்க வேண்டும். குறைந்தது 3 லிட்டர் தண்ணீர் அருந்த வேண்டும். பாத்ரூமில் நீண்ட நேரம் செலவழிக்கக் கூடாது. உணவு உண்ணுவதற்கு சற்று இடைவெளி விட வேண்டும்.

 

நன்றாக உடற்பயிற்சி செய்ய வேண்டும். உடல் எடையைக் குறைக்க வேண்டும். வயிற்றுக்கு அழுத்தம் கொடுப்பதுபோல் உடை அணியக்கூடாது. தண்ணீரால் ஆசனவாயை சுத்தப்படுத்தினால் நன்றாக இருக்கும் என்று தோன்றினால் நிச்சயமாக சுத்தப்படுத்தலாம். மருந்துகளோடு சேர்த்து நாம் சுத்தமாக இருப்பதும் முக்கியம்.

 

 

Next Story

செரிமான கோளாறுக்கும் கேன்சருக்கும் என்ன சம்பந்தம்? - ஹோமியோபதி மருத்துவர் ஆர்த்தி விளக்கம்

Published on 17/10/2023 | Edited on 17/10/2023

 

 Dr.Arthi |Homeopathy| Digestive disorder

 

செரிமான கோளாறுக்கான காரணங்கள் குறித்து ஹோமியோபதி மருத்துவர் ஆர்த்தி விளக்குகிறார்

 

நெஞ்சு எரிச்சல் என்பது பலருக்கும் நிகழக்கூடிய ஒன்று. நேரம் தவறி சாப்பிடுவது இதற்கான முக்கியமான காரணம். நேரத்திற்கு சாப்பிடாமல் இருப்பது, அதிகமான அளவில் உண்ணுவது, இரவு நேரங்களில் மிகத் தாமதமாக சாப்பிடுவது, சாப்பிட்ட உடனேயே படுப்பது, ஆல்கஹால் எடுத்துக்கொள்வது போன்ற பல்வேறு காரணங்களால் இது ஏற்படும். முன்பு வயதானவர்களுக்கு மட்டுமே வந்த இந்தப் பிரச்சனை, இப்போது இளைஞர்களுக்கும் வருகிறது. இதற்கான காரணம் நம்முடைய உணவு முறைதான்.

 

ஆரோக்கியமான உணவு முறை என்பதையே நாம் மறந்துவிட்டோம். எண்ணெய் நிறைந்த உணவுகள், காரமான உணவுகள், துரித உணவுகள் என்று இவற்றைத் தான் நாம் அதிகமாக உண்ணுகிறோம். இரவில் நீண்ட நேரம் விழித்திருப்பதும் தவறு. உணவில் எதையுமே அதிகமாக எடுத்துக்கொண்டால் பிரச்சனை தான். உடலுக்கென்று ஒரு கடிகாரம் இருக்கிறது. அதை நாம் மாற்றாமல், செய்ய வேண்டியதை, செய்ய வேண்டிய நேரத்தில் செய்ய வேண்டும். 

 

நடைமுறையை நாம் மாற்றும்போது, உணவு வயிற்றுக்குள் செல்லாமல் மேலே வரும். இதனால் ஏப்பம் உள்ளிட்டவை ஏற்படும். இதனால் இதயத்துக்கு நேரடியான பாதிப்புகள் ஏற்படாது. ஆனால் அதிகமான எண்ணெய் உணவுகளை நாம் பயன்படுத்தினால், இதய பாதிப்புகள் ஏற்பட வாய்ப்பிருக்கிறது. உணவுக்குழாய் தான் முதலில் பாதிக்கப்படும். இது கேன்சர் வரை கூட கொண்டுபோய் விடுவதற்கான வாய்ப்பு இருக்கிறது. நாமாக மாத்திரைகள் எடுத்துக்கொள்வது தவறு.

 

மருத்துவரின் ஆலோசனை நிச்சயம் தேவை. நிறைய தண்ணீர் குடிக்க வேண்டும். உடற்பயிற்சி செய்ய வேண்டும். குப்பை போல் வயிற்றுக்குள் அனைத்தையும் நாம் அடைக்கக் கூடாது. ஆரோக்கியமாக நம்முடைய வாழ்க்கை முறையை நாம் மாற்றிக்கொள்ள வேண்டும். செரிமான கோளாறு பிரச்சனைக்கு ஹோமியோபதி சிகிச்சை முறையில் நிறைய மருந்துகள் இருக்கின்றன. அறிகுறிகளை வைத்து சரியான சிகிச்சை வழங்கப்படும். இதில் முழுமையான தீர்வு கிடைக்கும்.