Skip to main content

பெண்கள் பூப்படையும்போது கவனிக்க வேண்டியவை... - வழியெல்லாம் வாழ்வோம் #17

Published on 27/06/2018 | Edited on 27/06/2018

பூப்படைதல், சடங்கு என்று பல பெயர்களில் குறிப்பிடப்படும் பெண்குழந்தைகளின் பருவமாற்றம், பெண்களின் வாழ்வின் அதிமுக்கியமான காலம். அந்த காலகட்டத்தை பிள்ளைகள் சரியாக அணுக இந்த சமூகமும் குடும்பங்களும் உதவுகின்றனவா என்பது கேள்விக்குறியே.

 

vazhiyellam vaazhvom


 

தாய்மாமன் சீர், தங்க வெள்ளிப்பாத்திரப் பகட்டுகள், ஊர் அதிரும் மேள தாளங்கள் என்று அத்தனை வகையிலும் தங்கள் குடும்ப கௌரவத்தை உலகுக்கு தண்டோரா போடுவதற்கு செலவிடும் நேரத்தையும், கவனத்தையும் வயதுக்கு வந்த குழந்தையின் மனோநிலையை தெளிவாக்குவதற்கு பெரும்பாலான குடும்பங்கள் காட்டுவதில்லை. அதன் விளைவுதான் பெண் குழந்தைகள் அந்த வயதிலிருந்தே மனஉளைச்சலுக்கு உள்ளாக காரணமாகிறது. இந்தக்கட்டுரை, பூப்படைதலின் அடிப்படை உடற்கூறியல், உடலியல் மாற்றங்களை விளக்குகிறது.


பூப்படைதலின் போது ஏற்படும் உடல் மாற்றங்கள் மற்றும் ஹார்மோன்களின் மாற்றங்கள்:

ஹார்மோன்களின் தலைவன் பிட்யூட்டரி  என்ற  சுரப்பி.  இதை  மூளையில்  உள்ள  தலாமஸ் என்ற  பகுதி கட்டுப்படுத்துகிறது.  இது  நேரடியாகவும், மற்ற சுரப்பிகளை ஊக்குவித்தும் உடலை இயங்கச் செய்கிறது. பெண் பூப்படையும் காலத்தில் ஹார்மோன்கள் துரிதமாக செயல்பட ஆரம்பிக்கும். அந்த காலகட்டத்தில், கருவகங்கள் ஈஸ்ட்ரோஜன் மற்றும் புரோஜஸ்டிரான் ஆகிய இரு வகையான ஸ்டிராய்டு ஹார்மோன்களை சுரக்கின்றன. இனப்பெருக்க உறுப்புகளின் வளர்ச்சிக்கும் செயல்பாட்டுக்கும் ஈஸ்ட்ரோஜன் முக்கிய காரணியாகயாகும்.  மார்பகங்களின் வளர்ச்சிக்கும் முறையான மாதவிலக்கு ஏற்படுவதிலும் ஈஸ்ட்ரோஜன் இன்றியமையாதது. புரொஜெஸ்டிரோன் கருப்பை வளர்ச்சிக்கும், கருப்பையை குழந்தை வளர்ச்சிக்கு ஏற்றதாக மாற்றுவதற்கும் உதவுகிறது. எனவே சரியான ஹார்மோன் விகிதல் இருந்தால், பூப்படைந்த பெண்ணின் மாதசுழற்சி சரியானதாய் அமையும். இந்த ஹார்மோன்களின் சுரப்பும், அதனால் ஏற்படும் முகப்பரு, உடல்வலி சார்ந்த பிரச்சனைகளும் சாதாரணம்தான். ஆனால் வயதுக்கு வந்த பெண் குழந்தையால் இந்த திடீர் மாற்றங்களை உடனடியாக ஏற்றுக்கொள்ள இயலாது. மாதவிடாய்க்காலங்களின்போது ஏற்படும் வலிகளுக்கும் அந்தக் குழந்தை மனதளவில் தயாராகியிருக்காது. அதன் விளைவாகவே, எரிச்சலைடைதல், கோபப்படுதல் போன்றவை. 

 


குழந்தைகளின் அறியாமை:

பருவமடையும் ஒரு சிறுமியின் மனதை இனம்புரியாத உணர்ச்சிகள் ஆக்கிரமிக்கின்றன. குழப்பமும், பயமும், கவலையும் அவளை வாட்டுகின்றன. அதற்கு காரணம் :   மாதவிடாய் பற்றி எதுவுமே தெரியாதிருப்பது அல்லது தவறாகத் தெரிந்து வைத்திருப்பது. மாதவிடாய் பற்றி நன்கு தெரிந்து வைத்திருக்கும் சிறுமிகள் அது ஆரம்பமாகிற சமயத்தில் தைரியமாக இருக்கிறார்கள். ஆனால் நிறைய சிறுமிகளுக்கு அதைப் பற்றி ஒன்றுமே தெரிந்திருப்பதில்லை என ஆய்வுகள் காட்டுகின்றன. 23 நாடுகளைச் சேர்ந்த பெண்களிடம் பேட்டி காணப்பட்டபோது, கிட்டத்தட்ட மூன்றில் ஒரு பங்கினர் மாதவிடாய் பற்றி ஒன்றுமே தெரியாதிருந்ததாகச் சொன்னார்கள். திடீரென ஒருநாள் வயதுக்கு வந்தபோது என்ன செய்வதென்றே தெரியாமல் தவித்ததாகவும் சொன்னார்கள்.

எனவே இந்த உடல் மற்றும் மனவலிகளையும், குழப்பங்களையும் போக்கும் விதமான உணவுகளை குழந்தைகளுக்கு கொடுத்தல் அவசியம். உடல்வலிகளின் வீர்யம் குறைந்தாலே, மன உளைச்சலிலிருந்து குழந்தைகளை மீட்டுவிடலாம். அத்தைகய பாரம்பர்ய உணவு முறைகள் பற்றி காண்போம்.

 

 


உடல்வலிகளை குறைக்கும் உணவு முறைகள்: 

உதிரப்போக்கு இருப்பதால், பெண் பிள்ளைகள் சரிவிகித, கலப்பு உணவுகளை சரியான அளவில் உட்கொள்ளாவிட்டால் அவர்களுக்கு முதலில் தோன்றுவது ரத்த சோகை எனப்படும் அனீமியா குறைபாடு. இந்த ஹீமோகுளோபின் எனப்படும் சிவப்பணு குறைப்பாட்டால், குழந்தைகள் எப்போதும் சோர்வாகக் காணப்படுவர். அதேபோல் கால்சியம் சத்துக் குறைபாட்டால் கால் உளைச்சல், இடுப்பு வலி போன்றவற்றால் பாதிக்கப்படுகின்றனர்.


 

சரிவிகித உணவு (Balanced Food):

சரிவிகித, கலப்பு உணவென்பது நம் பாரம்பர்ய உணவு முறையில் நம் முன்னோர்களால் நடைமுறையில் இருந்ததே. எல்லா வகையான சத்துக்களும் உடலுக்கு கிடைப்பதுபோல் சமைத்து வழங்கப்படும் உணவு சரிவிகித உணவு எனப்படும். பொதுவாக உடலுக்குத் தேவையான சத்துக்களை, விட்டமின்கள், கார்போஹைட்ரேட்டுகள், புரோட்டீன்கள், மினரல்கள், நார்ச்சத்துக்கள் என்று வகைப்படுத்தலாம். இவை அனைத்தும் ஒவ்வொரு வேலையும் நம் உணவில் இருக்குமாறு கவனித்து உணவுகளைத் தயாரித்து உண்ணும் முறை, சரிவிகித உணவுமுறை எனப்படும். இந்த சத்துக்கள் கிடைக்குமாறு கலந்து உணவுகளை உண்பதால் இது கலப்பு உணவு (Mixed Food) எனப்படுகிறது.


எடுத்துக்காட்டாக சாதம், பருப்பு, ரசம், காய்கறிகளின் கூட்டு, ஆகியவற்றை சொல்லலாம். இதில் சாதத்தில் கார்போஹைட்ரேட்டும், பருப்பில் புரோட்டீனும், காய்கறிகளில் வைட்டமின், மினரல், பைபர் உள்ளிட்ட சத்துகளும் அடங்கியிருந்தாலேயே இது சரிவிகித உணவு என கூறப்பட்டது. இந்த சரிவிகித உணவு முறையுடனான தமிழனின் உறவு தற்போது முறியும் தருவாயில் இருக்கிறது. முன்னதாக ராகி, கம்பு, சோள வகை உணவுகளுடனான தமிழனின் உறவு முறிந்து பல வருடங்கள் கடந்து விட்டன. இப்போது அதீதமாய் நாம் பயன்படுத்தும் துரித உணவுகளான பிட்சா, பர்கர், பாஸ்தா போன்றவற்றில் சரிவிகித சத்துக்கள் கிடைப்பதில்லை.

 


பூப்படைந்த குழந்தைகளுக்கு வழங்கப்பட வேண்டிய சிறப்பு  உணவுகள்:

தமிழர்களின் வாழ்வியலில், பூப்படைந்த பிள்ளைகளுக்கு கொடுக்கப்பட வேண்டிய ஒரு மாத கால கவனிப்பை பல நூல்கள் எடுத்துக்கூறுகின்றன. அத்தகைய காலங்களில் குழந்தைகளுக்கு முழு நேர ஓய்வு கொடுப்பதும், சரியான உணவுகளை வழங்கி அவர்களின் உடலை வலுவாக்குவதும் வழக்கமாய் இருந்தது. ஆனால் இப்போது பள்ளிகளில் அவ்வளவு விடுமுறை கொடுப்பதில்லை. அதனால் குறைந்தபட்சம், சரியான உணவுகளையாவது குழந்தைகளுக்கு வழங்க வேண்டும்.

 

குழந்தை வயதுக்கு வந்த நாள் முதல், காலையில் எழுந்தவுடன் உளுந்தங்களி அல்லது புட்டு போன்ற பச்சரிசிப் உணவுகளைக் கொடுக்க வேண்டும். அவை குழந்தைகளின் எலும்புகள் (குறிப்பாக இடுப்பெலும்புகள்)  பலம் பெற உதவும். அதோடு கருப்பட்டி கலந்து கொடுப்பதால் கால்சியம் சத்தும் அதிகரிக்கிறது. உளுந்து வடை, நல்லெண்ணெய் போன்றவற்றையும் கொடுப்பதால் குழந்தைகளின் இடுப்பு எலும்பு வலுவாகவும், அதே நேரத்தில் நெகிழும் தன்மையுடையதாகவும் மாறுகிறது. இந்தத்தன்மை பின்னாளில், அந்தப்பெண் தாய்மையடைந்து பேறுகாலம் ஆகும்போது, இயற்கை வழியில் குழந்தை பெற உதவும்.

 

 

 

சில வீடுகளில், பூப்படைந்த குழந்தைக்கு முதல் முப்பது நாட்கள் பச்சை நாட்டுக்கோழி முட்டையை உடைத்து கொடுக்கும் வழக்கமும் உள்ளது. (பச்சை கோழிமுட்டை சாப்பிடுவது குறித்த பல மாறுபட்ட கருத்துக்கள் உள்ளன). அதே அளவு நல்லெண்ணெயும் உடனடியாக குழந்தைகளுக்கு வழங்கப்பட்டன. இப்படியான உணவு முறைகளால், குழந்தையின் கருப்பை பலமடையும். ஹார்மோன்கள் சுரக்கும் விகிதங்கள் சரியாகும் என்று இயற்கை உணவு ஆய்வாளர்கள் நிரூபிக்கின்றனர்.

 

பருவமடைந்த ஒரு மாதம் மட்டுமல்ல; உளுந்தங்களி, புட்டு ஆகியவற்றை ஒவ்வொரு மாதமும் மாதசுழற்சி நாட்களில் தொடர்ந்து குழந்தைகளுக்கு வழங்கினால் அவர்களின் உடல் நலம் சரியாய் பேணப்படும்.


பூப்படையும் வயது:

முன்பெல்லாம் சராசரியாக பன்னிரண்டு வயதுக்கு மேல்தான் குழந்தைகளின் பூப்படையும் காலம் நிர்ணயிக்கப்பட்டிருந்தது. ஆனால் இப்போது எட்டு/ஒன்பது வயதுகளிலேயே குழந்தைகள் பூப்படைவது சாதாரண விடயமாகிவிட்டது. சில குழந்தைகள் பதினைந்து வயதைத் தாண்டியும் பருவமடைந்து இருக்கின்றனர். இதன் காரணிகள் மற்றும் இவற்றை சரி செய்யும் இயற்கை வழிமுறைகள் பற்றி அடுத்த வாரம் காண்போம்.


குழந்தைகளுக்கு பசும்பால் கொடுக்கக்கூடாது!!! ஏன்... வழியெல்லாம் வாழ்வோம் #16
 

 

 

 

Next Story

குறிவைக்கப்படும் வி.ஐ.பிக்களின் மனைவிகள்; வைரலாகும் க்யூ ஆர் கோடு!

Published on 08/07/2024 | Edited on 08/07/2024
gang cheat VIP wife for money in Coimbatore

தமிழகத்தின் முக்கிய நகரமாக விளங்கும் கோவை மாநகரில், ஏராளமான தொழில் நிறுவனங்கள் ஐ.டி நிறுவனங்கள் உள்ளிட்டவை செயல்பட்டு வருகின்றன. இந்நிலையில், கோவை மாநகரில் வசதி படைத்த பெண்கள், கணவனை பிரிந்து தனிமையில் இருக்கும் பெண்கள், தனியாக தங்கி பணியாற்றிவரும் பெண்கள் உள்ளிட்டோரை குறிவைத்து சில கும்பல்கள் மோசடியில் ஈடுபட்டு வருகிறது. 

ஆரம்பத்தில் இந்த கும்பல் சமூக வலைத்தளம் அல்லது வேறு தளங்கள் வழியாக சம்பந்தப்பட்ட பெண்ணுடன் நட்பை வளர்த்துக் கொள்கின்றனர். பின்னர், சில காலம் சென்றதும் அந்த பெண்ணை மிரட்டி பணம் பறிப்பது, பொருட்களை வாங்குவது போன்ற சமூக விரோத செயல்களில் ஈடுபட்டு வருகின்றனர். இதில் பாதிக்கப்படும் ஒரு சில பெண்கள் மட்டுமே, தைரியமாக இதனை எதிர்கொண்டு காவல் நிலையம் சென்று புகார் அளிக்கின்றனர். பல பெண்கள் புகார் அளிக்க தயக்கம் காட்டி வருகின்றனர். 

இந்நிலையில் இந்தக் கும்பல் குறித்து அதன் செயல்பாடுகள் குறித்தும் கோவை மாநகர காவல் துறை எச்சரிக்கை விடுத்துள்ளனர். இது குறித்து அவர்கள் வெளியிட்டுள்ள செய்தி குறிப்பில், சமீப காலமாக நல்ல வசதி படைத்த தனிமையில் இருக்கும் பெண்களுடன் நட்பு வளர்த்துக் கொண்டு பின்னர் அந்தப் பெண்களை மிரட்டி பணம் பறிக்கும் செயல்களில் சிலர் ஈடுபடுவதாக தெரிய வருகிறது. எனவே தனிமையில் இருக்கும் பெண்கள் அறிமுகம் இல்லாத அல்லது முன்பின் தெரியாத நபர்களுடன் பேசி பழக்கம் வைத்துக் கொள்வதில், கவனமாக செயல்பட வேண்டும். அவ்வாறு பழகினால் தங்களைப் பற்றி தனிப்பட்ட தகவல்களை எந்தக் காரணத்தை முன்னிட்டும், அவர்களிடம் பகிராமல் இருப்பது நல்லது. இதுபோன்ற நபர்களால் பிரச்சனைகளை சந்தித்தால், மாநகர காவல்துறையில் புகார் அளிக்கலாம்.  

இது போன்ற புகார்களில் பெண்களின் பெயர்களை ரகசியமாக வைக்கப்படும். மேலும் மாநகர காவல் துறை சார்பில் பெண்கள் புகார் அளிக்க வசதியாக, பிரத்யேக க்யூ ஆர் கோடு அடங்கிய விழிப்புணர்வு பிரசுரங்கள் கல்லூரி, பொது இடங்களில் பெண்களுக்கு வழங்கப்பட்டுள்ளது. மேலும் மாநகர காவல்துறை பக்கத்திலும் வெளியிடப்பட்டு உள்ளது. இந்த கியூ ஆர் கோடு பயன்படுத்தி தங்களது புகார்களை பெண்கள் பதிவு செய்யலாம் என்றும் அதில் கூறப்பட்டுள்ளது.

கோவை மாநகரில் இரவு பணி முடிந்து தனியாக செல்லும் பெண்கள் பாதுகாப்பை மேம்படுத்த பொது மக்களிடம் மாநகர காவல் துறை சார்பில் கருத்து கேட்கப்பட்டு வருகிறது. இதற்காக பிரத்தியேக க்யூ ஆர் கோடு வெளியிடப்பட்டு உள்ளது இந்த  க்யூ ஆர் கோடினைப் பயன்படுத்தி பொதுமக்கள் தங்களது கருத்துக்களைப் பதிவு செய்யலாம். இதில் பல்வேறு கேள்விகள் கேட்கப்பட்டு உள்ளன குறிப்பாக இரவு பணி முடிந்து செல்லும் பெண்கள் போக்குவரத்தில் செல்லும் போது பாதுகாப்பாக உணர்கிறீர்களா? இரவில் தனியாக செல்லும் போது நீங்கள் எப்பொழுதாவது துன்புறுத்தலை அனுபவிக்கிறீர்களா? அல்லது சங்கடமாக உணர்ந்துள்ளீர்களா? இரவு நேர பயணத்திற்கு பாதுகாப்பற்ற பகுதிகள் அல்லது தெருக்கள் என எதைக் கருதுகிறீர்கள்? நீங்கள் பணிபுரியும் இடத்தில் இரவு நேரத்தில் பாதுகாப்பாக செல்ல உங்களுக்கு தற்காப்பு பயிற்சிகள் உதவி குறிப்புகள் வழங்கப்படுகிறதா? எனப் பல்வேறு கேள்விகள் கேட்கப்பட்டு உள்ளது. இதனைப் பொதுமக்கள் அல்லது பெண்கள் பயன்படுத்திக் கொண்டு பூர்த்தி செய்யலாம் எனச் சொல்லப்பட்டுள்ளது.

Next Story

பெண்களுக்குக் கட்டாய மாதவிடாய் கால விடுப்பு; உச்சநீதிமன்றம் கொடுத்த அறிவுரை 

Published on 08/07/2024 | Edited on 08/07/2024
Supreme Court advises on compulsory menstrual leave for women

நிறுவனங்கள், தொழிற்சாலைகள் எனப் பல இடங்களில் பணிபுரியும் பெண்களுக்கு மாதவிடாய் நாட்களில் கட்டாயம் விடுப்பு வழங்க கோரி உச்சநீதிமன்றத்தில் மனு தாக்கல் செய்யப்பட்டது. இந்த நிலையில் இந்த மனு உச்சநீதிமன்ற தலைமையில் நீதிபதி சந்திரசூட் தலைமையிலான அமர்வு முன்பு விசாரணைக்கு வந்தது. 

அப்போது, “மாதவிடாய் காலங்களில் பெண்களுக்கு விடுப்பு வழங்குவதை கட்டாயமாக்கினால், அது அவர்களை நிறுவனங்களில் இருந்து ஒதுக்கி வைக்க வழி வகுக்கும். தனியார் நிறுவனங்கள் இதனைக் காரணம் காட்டி பெண்களை வேலைக்கு எடுப்பதில் தயக்கம் காட்டலாம். பெண்களை பாதுகாக்க எடுக்கும் முயற்சிகள் அவர்களுக்கு பாதகமாக கூட அமைய வாய்ப்பிருக்கிறது” என்று கருத்து தெரிவித்த நீதிபதிகள், இது அரசின் கொள்கை சார்ந்த விஷயம்; இதில் நீதிமன்றம் கவனம் செலுத்த விரும்பவில்லை என்றனர்.

மேலும், “மனுதாரர், அரசை அனுகலாம். அதேசமயம் மத்திய அரசு இது தொடர்பாக மாநில அரசுகள் மற்றும் நிறுவனக்களுடன் கலந்து ஆலோசித்து வழிக்காட்டு நெறிமுறைகளை கொண்டுவரலாம். மாநில அரசுக்கு இந்த விஷயத்தில் முடிவு எடுக்க உரிமை உண்டு” என்றும் தெரிவித்தனர்.