Skip to main content

டெங்கு காய்ச்சல் ஏழுநாள் தான் இருக்கும்; ஆனால் இப்படி ஆகிடும் - டாக்டர் ராஜேந்திரன் விளக்கம்

Published on 26/09/2023 | Edited on 26/09/2023

 

 DrRajendran | Dengue fever |

 

டெங்கு காய்ச்சல் பற்றி ஓய்வு பெற்ற அரசு மருத்துவர் ராஜேந்திரன் விரிவாக விளக்குகிறார்

 

டெங்கு காய்ச்சலுக்கு காரணமானவை கொசு மற்றும் வைரஸ். இதில் பாதிக்கப்பட்டவருக்கு முதலில் காய்ச்சல் ஏற்படும். முதல் இரண்டு நாட்கள் காய்ச்சல் அதிகமாக இருக்கும். அதன் பிறகு காய்ச்சல் குறைய ஆரம்பிக்கும். ரத்தம் இறுகிப் போவதால், ரத்த அழுத்தம் குறையும், பல்ஸ் ரேட் அதிகமாகும். இதனால் மற்ற உறுப்புகள் கொஞ்சம் கொஞ்சமாக செயலிழக்க ஆரம்பிக்கும். இதனால் ரத்தக் கசிவு நிச்சயம் இருக்கும். நோயாளியை கவனமாக நாம் கவனித்துக்கொண்டால் விரைவாக குணமாக வாய்ப்பு இருக்கிறது. 

 

இந்த நோயை விரைவில் கண்டறிவது மிகவும் முக்கியமானது. சாதாரண காய்ச்சலாக இருந்தாலும், பரிசோதனை செய்துகொள்வது முக்கியம். டெங்கு காய்ச்சலுக்கான அறிகுறி இருந்தால், உடனடியாக சந்தேகப்பட்டு பரிசோதனை செய்துகொள்ள வேண்டும். ரத்தம் மற்றும் சிறுநீர் பரிசோதனை மூலம் நோயாளிக்கு வேறு ஏதேனும் தொற்று ஏற்பட்டிருக்கிறதா என்பதையும் நாங்கள் கண்டறிவோம். இதன் மூலம் மற்ற நோய்கள் இருந்தால் அவையும் கண்டறியப்பட்டு சிகிச்சை வழங்கப்படும். இதனால் மற்ற நோய்களும் களையப்படும். 

 

அதிகமான பாராசிட்டமால் மாத்திரைகளை எடுத்துக்கொள்வதை தவிர்க்க வேண்டும். அதுவே சிறுநீரகத்தில் பாதிப்பை ஏற்படுத்தும். உடலின் உறுப்புகள் பாதிக்கப்படுவதை முடிந்தவரை நாம் தடுக்க வேண்டும். பாதிக்கப்பட்ட நபர் ஏழு நாட்கள் வரை நன்றாக பாதுகாக்கப்பட்டால், அதன் பிறகு அவருக்கான பிரச்சனை என்பது குறைவாகவே இருக்கும். டெங்கு நோயை ஏழு நாள் காய்ச்சல் என்று கூட சொல்வார்கள். பெண்களுக்கு மாதவிடாய் காலத்தில் டெங்கு நோய் ஏற்பட்டால் அதிகமான உதிரப்போக்கு ஏற்படும். இதை நாம் கவனமாக அணுக வேண்டும். 

 

சொத்தைப் பற்களில் இருந்தும் ரத்தக்கசிவு ஏற்பட வாய்ப்பு இருக்கிறது. சரியான பரிசோதனை மேற்கொண்டு, நன்றாக தண்ணீர் அருந்தி, சரியான மருந்துகளை நாம் எடுத்து வந்தால் நிச்சயம் டெங்கு நோயை நம்மால் குணப்படுத்த முடியும். சரியான சிகிச்சையின் மூலம், பாதிப்புக்கு உள்ளான நோயாளி மீண்டும் ஆரோக்கியமான வாழ்க்கையை வாழ்வார் என்பதில் எவ்வித சந்தேகமும் இல்லை.

 


 

 

Next Story

அதிகரிக்கும் டெங்கு; 8 மாவட்டங்களுக்கு அலர்ட்

Published on 15/05/2024 | Edited on 15/05/2024
 Increasing dengue; Alert for 8 districts

தமிழகத்தில் பல மாவட்டங்களில் டெங்கு காய்ச்சல் அதிகரித்துள்ளதால் வழிகாட்டு நெறிமுறைகளை பின்பற்ற அரசு அறிவுறுத்தியுள்ளது.

தமிழகத்தில் குறிப்பிட்ட 8 மாவட்டங்களில் டெங்கு காய்ச்சல் அதிகரித்துள்ளதாக பொது சுகாதாரத்துறை இயக்குநர் செல்வ விநாயகம் அறிவித்துள்ளார். திருப்பூர், கோவை, மதுரை, தேனி, நாமக்கல், அரியலூர், திருவண்ணாமலை, திண்டுக்கல் ஆகிய எட்டு மாவட்டங்களில் டெங்கு பாதிப்பு கடந்த சில நாட்களாக அதிகரித்து வருகிறது. எனவே பொது சுகாதாரத் துறையின் அறிவுறுத்தல்களை பின்பற்ற வேண்டும். டெங்கு காய்ச்சல் அறிகுறிகள் தென்பட்டால் உடனடியாக அரசு மருத்துவமனையை அணுக வேண்டும். கிருஷ்ணகிரி, தஞ்சாவூர் மாவட்டங்களில் நோய் தடுப்பு நடவடிக்கைகளை துரிதப்படுத்த வேண்டியது அவசியம். டெங்கு காய்ச்சல் அதிகரித்துள்ளதால் அதைத் தடுப்பதற்கான வழிகாட்டு நெறிமுறைகளை முறையாகப் பின்பற்ற வேண்டும் என அரசு பொது மருத்துவமனைகளுக்கு அறிவுறுத்தல் கொடுக்கப்பட்டுள்ளது.

Next Story

பன்றிக் காய்ச்சல் நுரையீரலை பாதிக்குமா? - டாக்டர் ராஜேந்திரன் விளக்கம்

Published on 26/12/2023 | Edited on 26/12/2023
 Dr Rajendran | Swine flu 

மழைக் காலங்களில் பரவக்கூடிய பல்வேறு வகையான காய்ச்சலைப் பற்றி நமக்கு ஓய்வு பெற்ற அரசு மருத்துவமனை டாக்டர் ராஜேந்திரன் விளக்குகிறார்.

இன்றைய காலத்தில் வைரஸ் காய்ச்சல், டெங்கு தவிர மற்றுமொரு கவனிக்கப்பட வேண்டிய காய்ச்சல் பன்றிக் காய்ச்சல் ஆகும். ஸ்வைன் ப்ளூ ஹெச்1 என் 1 இன்புளுயன்சா வைரஸ், இது ஒருவரிடமிருந்து மற்றவர்களுக்கு பரவக் கூடியது. டெங்கு நோயால் பாதிக்கப்பட்டவரை கடித்த கொசு மற்றவரை கடிக்கும்போது அதனால் பரவக்கூடியது டெங்கு காய்ச்சல். 

ஆனால் பன்றிக் காய்ச்சல் என்பது பாதிக்கப்பட்ட நபரிடமிருந்து வருகிற மூச்சுக்காற்று, இருமல், சளி ஆகியவற்றாலும், கை, கால் ஆகியவற்றைக் கொண்டு எங்கெல்லாம் தொடுகிறோமோ அதன் மூலம் பரவக்கூடிய தன்மையைக் கொண்டது. 

பன்றிக் காய்ச்சல் தொற்று ஒருவருக்கு ஏற்பட்டுவிட்டால் தீவிரமான உடல் சூட்டோடு காய்ச்சல், உடல் வலி, வரட்டு இருமல், கடுமையான தலைவலி, தொண்டை வலி ஏற்படும். மருத்துவர்கள் தொண்டை வலி என்றதும் தொண்டையை பரிசோதித்துப் பார்ப்பார்கள். ஆனால் அங்கே வலியால் வீங்கியோ அல்லது சிவந்து போயோ இருக்காது இப்படியாக எந்த அறிகுறிகளுமே இல்லாமல் கடுமையான தொண்டை வலி ஏற்பட்டால் அது பன்றிக் காய்ச்சல் என்பதை உறுதி செய்து கொள்ளலாம். 

நோயின் தீவிரத்தன்மையை அறியாமல் சாதாரண காய்ச்சல்தான் என்று வலி நிவாரண மாத்திரைகளை வாங்கி போட்டுக் கொண்டு சாதாரணமாக இருந்து விடக்கூடாது. தீவிர சிகிச்சை எடுத்துக் கொள்ளாமல் விட்டால் சுவாசப் பாதையிலிருந்து நுரையீரலை நோக்கி காய்ச்சல் நகரக்கூடும் இதனால் மூச்சுத் திணறல் ஏற்படும்.  

பன்றிக் காய்ச்சல் என்றதும் நாங்கள் பன்றிக்கறி எதுவும் சாப்பிடவில்லையே, பன்றியிடம் அருகில் எதுவும் போகவில்லையே என்று நினைப்பார்கள். அது காய்ச்சலை வேறுபடுத்த வைக்கப்பட்ட பெயராகும். காய்ச்சலின் அறிகுறிகளைத் தெரிந்து கொள்ள பரிசோதனை செய்து உறுதிசெய்து கொண்டு அருகில் உள்ள மருத்துவமனையையோ, மருத்துவரையோ அணுகி முறையான சிகிச்சை எடுத்துக்கொள்ள வேண்டும்.