Skip to main content

திருமணத்தை மீறிய உறவு; நண்பனைக் கொன்று புதைத்த இளைஞர்

Published on 06/12/2023 | Edited on 06/12/2023

 

youth incident his friend in Tirupattur

 

திருப்பத்தூர் மாவட்டம், நாட்றம்பள்ளி அடுத்த மல்லகுண்டா அருகே உள்ளது பலக்ல்பாவி. இங்குள்ள முருகன் கோவில் பகுதியில் உள்ள மலை அடிவாரத்தில் கடந்த மாதம் 21 ஆம் தேதி அன்று ஆடு மேய்க்கச் சென்றவர்கள், குழி ஒன்றில் அரைகுறையாக மூடப்பட்டுள்ள பள்ளத்திலிருந்து துர்நாற்றம் வீசி ஈக்கள் மொய்ப்பதைக் கண்டு அருகில் உள்ளவர்களுக்கு தகவல் கொடுத்தனர். அருகில் இருந்தவர்கள் அங்கு வந்து பார்த்து யாரோ புதைக்கப்பட்டுள்ளதாகவும் கூறியுள்ளனர். அதனை பெரியவர் ஒருவர் குச்சியால் தோண்டியுள்ளார். அப்போது மனித கால்கள் மட்டும் தெரிந்த நிலையில் பிணம் இருப்பதைக் கண்டு அதிர்ச்சி அடைந்துள்ளனர்.

 

உடனடியாக திம்மாம்பேட்டை போலீசாருக்கு தகவல் அளித்துள்ளனர். போலீசார் மற்றும் நாட்றம்பள்ளி வட்டாட்சியர் வந்தனர். வருவாய்த்துறையினர் முன்னிலையில் அந்த இடத்தைத் தோண்டி பார்த்தபோது, சில நாட்களுக்கு முன்பு கொலை செய்து புதைக்கப்பட்ட சுமார் 30 வயது மதிக்கத்தக்க ஆண் பிணம் ஒன்று உடலில் துணி எதுவும் இல்லாமல் இருப்பதைப் பார்த்தனர். அதனைத் தொடர்ந்து உடலைக் கைப்பற்றிய காவல்துறையினர் உடற்கூறு ஆய்வுக்காக வேலூர் அரசு மருத்துவக் கல்லூரிக்கு அனுப்பி வைத்தனர். மோப்பநாய் மற்றும் கைரேகை நிபுணர்கள் வரவழைத்து தடயங்களைச் சேகரித்தனர். இந்த கொலை தொடர்பாக மாவட்ட காவல் கண்காணிப்பாளர் ஆல்பர்ட் ஜான், வாணியம்பாடி டிஎஸ்பி விஜயகுமார் தலைமையில் தனிப்படை அமைத்தார். உடல் தோண்டியெடுக்கப்பட்டு 10 நாட்கள் கடந்தும் கொல்லப்பட்டவரை அடையாளம் காண முடியாத நிலையில், அவரது உடலைப் பிரேதப் பரிசோதனை செய்து அடக்கம் செய்துள்ளனர்.            

 

இந்நிலையில் கடந்த 1 ஆம் தேதி வெள்ளிக்கிழமை அன்று மல்லகுண்டா அடுத்த சுண்ணாம்பு காரகொள்ளை பகுதியைச் சேர்ந்த ராஜா என்பவர் திம்மாம்பேட்டை காவல் நிலையத்தில் புகார் ஒன்றை அளித்தார். அதில் தனது மகன் விஜயகுமார் கடந்த 20 நாட்களுக்கு மேலாக காணவில்லை என்றும் அவரைக் கண்டுபிடித்துக் கொடுங்கள் எனப் புகார்  கொடுத்தார். புகாரில் கடந்த மாதம் 15 ஆம் தேதி மேஸ்திரி வேலைக்கு செல்வதாகக் கூறிவிட்டுச் சென்றவர் மீண்டும் வீட்டுக்கு வரவில்லை. விஜயகுமார் மலேசியா சென்று வேலை பார்த்து வந்தவர், அது செட்டாகாமல் ஐந்து மாதத்துக்கு முன்பு ஊர் திரும்பியதாகவும் இரண்டு மாதங்களாகச் சொந்த ஊரில் இருந்து வேலை செய்து வந்ததாகவும் தெரியவந்தது.          

 

விஜயகுமார் அவரது மனைவி வினிதா(25) என்பவரிடம் அடிக்கடி சண்டையிட்டு வந்துள்ளார். இவர்களுக்கு 11 மாத கைக்குழந்தை உள்ளது. கடந்த தீபாவளி அன்று கணவனுடன் சண்டையிட்டு அவரது தாய் வீடான ஆந்திர மாநிலம் குப்பம் பகுதிக்குச் சென்றுவிட்டது தெரியவந்தது. புகாரை பெற்றுக்கொண்ட காவல்துறையினர் விசாரணை நடத்தியதில், கடந்த 21 ஆம் தேதி கொன்று புதைக்கப்பட்ட நபர் ராஜாவின் மகன் விஜயகுமார்(29) என்பதும் அவர் காட்டிய அடையாளங்களைக் கொண்டு கண்டுபிடிக்கப்பட்டது. இறந்து போன விஜயகுமாரின் செல்போன் நம்பர்களை கண்காணித்து விசாரணையைத் தீவிரப்படுத்தியபோது அந்த நம்பர் அவருடைய நண்பரான திருப்பத்தூர் அடுத்த புதுக்கோட்டை பகுதியைச் சேர்ந்த ராகவேந்திரன்(24) என்பவரிடம் இருப்பது தெரியவந்தது.

 

இறந்து போன விஜயகுமாரின் மனைவி வினிதாவிடம் காவல்துறையினர் நடத்திய விசாரணையில், விஜயகுமாரின் நண்பர் ராகவேந்திரனிடம் திருமணத்தை மீறிய உறவில் இருந்தேன். கடந்த நவம்பர் 15 ஆம் தேதி ராகவேந்திரனும் நானும் ஜோலார்பேட்டையில் உள்ள ஒரு லாட்ஜில் ரூம் எடுத்து தங்கி தனிமையில் இருந்தோம். அப்போது என் கணவர் அடிக்கடி சந்தேகப்பட்டு என்னை டார்ச்சர் செய்து வருவதாக அவரிடம் கூறினேன். நான் பார்த்துக்கறன்னு ராகவேந்திரன் சொன்னார். கடந்த 19 ஆம் தேதி ராகவேந்திரன் விஜயகுமாருக்கு போன் செய்து தனியாக வரவழைத்து அவருக்கு மது பாட்டில்களை வாங்கி கொடுத்து கொலை செய்து மண்ணில் புதைத்து விட்டு தலைமறைவாக ஆனது பின்னர்தான் எனக்கு தெரியவந்தது எனக் கூறியதாக தெரிகிறது.            

 

அதனைத் தொடர்ந்து ராகவேந்திரனை பிடித்த காவல்துறையினர், கொலை எவ்வாறு நடந்தது, கொலைக்கு பயன்படுத்திய கத்தி மற்றும் அவர் அணிந்திருந்த துணி ஆகியவற்றை கைப்பற்றி அவருக்கு உதவிய ஜோலார்பேட்டை பகுதியைச் சேர்ந்த சங்கர் என்பவரையும் கைது செய்தனர்.

 

 

சார்ந்த செய்திகள்

Next Story

தி.மு.க. பிரமுகர் மீது கொடூரத் தாக்குதல்!

Published on 29/02/2024 | Edited on 29/02/2024
Chengalpattu Katangulathur dmk executive incident

செங்கல்பட்டு மாவட்டம் காட்டாங்குளத்தூர் வடக்கு ஒன்றிய தி.மு.க. செயலாளராக இருந்து வருபவர் ஆராவமுதன். இவர் மீது அடையாளம் தெரியாத மர்ம கும்பல் ஒன்று நாட்டு வெடிகுண்டு வீசி அரிவாளால் வெட்டியுள்ளனர். இந்தத் தாக்குதல் சம்பவத்தில் ஆராவமுதனின் கை மற்றும் தலைப்பகுதியில் காயம் ஏற்பட்டுள்ளது. இதனையடுத்து மர்ம கும்பல் அங்கிருந்து தப்பிச் சென்றுள்ளனர். அதே சமயம் படுகாயம் அடைந்த ஆராவமுதன் சிகிச்சைக்காக சென்னையில் உள்ள மருத்துவமனைக்கு அனுப்பி வைக்கப்பட்டுள்ளார்.

இந்தத் தாக்குதல் சம்பவத்தில் ஈடுபட்டவர்கள் மீது ஓட்டேரி போலீசார் வழக்குப்பதிவு செய்து தீவிரமாகத் தேடி வருகின்றனர். நாட்டு வெடிகுண்டு வீசி தி.மு.க நிர்வாகி அரிவாளால் வெட்டப்பட்ட சம்பவம் மக்கள் மத்தியில் அதிர்ச்சியையும் பரபரப்பையும் ஏற்படுத்தியுள்ளது. 

Next Story

‘துரித நடவடிக்கை’- முதல்வருக்கு தருமபுரம் ஆதீனம் நன்றி!

Published on 29/02/2024 | Edited on 29/02/2024
Urgent Action Thanks to the CM Darumapuram Atheenam
கோப்புப்படம்

மயிலாடுதுறை மாவட்டத்தில் உள்ள தருமபுரத்தில் ஆதீன சைவ மடம் ஒன்று அமைந்துள்ளது. இந்த ஆதீனத்தின் 27வது தலைமை மடாதிபதியாக ஸ்ரீலஸ்ரீ மாசிலாமணி தேசிய ஞானசம்பந்த பரமாச்சாரியார் சுவாமிகள் பட்டம் வகித்து வருகிறார். இந்த சூழலில் தருமபுரம் ஆதீன மடாதிபதியின் சகோதரர் விருத்தகிரி மயிலாடுதுறை காவல்துறையினரிடம் புகார் ஒன்றை அளித்திருந்தார்.

அந்த புகாரில் தெரிவித்திருப்பதாவது, ‘தஞ்சாவூர் மாவட்டம் ஆடுதுறை சார்ந்த வினோத் என்பவரும், மடாதிபதியின் உதவியாளர் செந்தில் என்பவரும் தன்னை நேரில் சந்தித்து ஆதீன மடாதிபதியின் ஆபாச வீடியோ தங்களிடம் இருப்பதாக மிரட்டினர். மேலும், அவர்கள் அந்த வீடியோவை சமூக வலைத்தளங்கள் மற்றும் தொலைக்காட்சியில் வெளியிடாமல் இருக்க வேண்டுமென்றால் பணம் தர வேண்டும் என்று கூறி என்னைக் கழுத்தை நெரித்துக் கொலை செய்ய முயற்சி செய்தனர். இந்த சம்பவத்தில் செம்பனார்கோவிலைச் சேர்ந்த பிரபல கல்வி நிறுவனங்களின் தாளாளர் குடியரசு, பா.ஜ.க. கட்சியின் மயிலாடுதுறை மாவட்டத் தலைவர் அகோரம், வழக்கறிஞர் செய்யூர் ஜெயச்சந்திரன் ஆகியோர் தூண்டுதலாக இருந்துள்ளனர். எனவே அவர்கள் மீது நடவடிக்கை எடுக்க வேண்டும்’ என்று தெரிவிக்கப்பட்டிருந்தது.

இந்த புகாரின் பேரில் போலீசார் வழக்குப்பதிவு செய்து விசாரணை நடத்தி வந்த நிலையில், மயிலாடுதுறை பா.ஜ.க மாவட்டத் தலைவர் அகோரம், மடாதிபதியின் உதவியாளர் செந்தில், வினோத் உள்ளிட்டோர் மீது வழக்குப்பதிவு செய்து போலீசார் அதிரடியாக நேற்று கைது செய்து நீதிமன்றத்தில் ஆஜர்படுத்தினர். இந்நிலையில் போலி ஆபாச வீடியோ விவகாரத்தில் பாஜக நிர்வாகிகள் மீது மிகத் துரிதமாக செயல்பட்டு நடவடிக்கை எடுத்த முதலமைச்சர் மு.க. ஸ்டாலினுக்கும், காவல்துறைக்கும் தருமபுரம் ஆதீனம் சார்பில் நன்றி தெரிவித்துள்ளனர்.

இது குறித்து தருமபுரம் ஆதீனம் சார்பில் வெளியிட்டுள்ள அறிக்கையில், “கடந்த சில நாட்களாக தருமபுர மடத்தில் சில அடையாளம் தெரியாத நபர்கள் மற்றும் சில ரவுடிகள் சேர்ந்து மடத்தின் சம்பந்தமான போலியான ஆடியோ மற்றும் வீடியோ டேப்களை தயாரித்து மடத்தில் வேலை செய்பவர்களையும், மடத்தின் விசுவாசிகளையும் அணுகி மன உளைச்சலுக்கு ஆளாக்கி வந்தனர். இதை சட்ட ரீதியாக எதிர்கொள்ள வேண்டும் என நாங்கள் காவல்துறையை நாடினோம். காவல்துறை தமிழக முதல்வரின் ஆணைப்படி இதில் சம்பந்தப்பட்டவர்கள் மீது மிகத் துரிதமாக சட்டப்படியான நடவடிக்கை எடுத்துள்ளது. எனவே, மிகத் துரிதமாக நடவடிக்கை எடுத்து எங்களையும் எங்கள் மடத்தின் பெருமையையும் காத்த காவல்துறைக்கு எங்கள் மனமார்ந்த நன்றியைத் தெரிவித்துக் கொள்கின்றோம். தருமபுர மடத்தையும் எங்களையும் ரவுடிகளிடமிருந்து மீட்டெடுத்த தமிழ்நாடு முதல்வர் மு.க. ஸ்டாலினுக்கும் எம் நெஞ்சார்ந்த நன்றியைத் தெரிவித்துக் கொள்கிறோம்” எனத் தெரிவிக்கப்பட்டுள்ளது.